Lunda Lusyesyene Lukugumila

 1. Ana ŵandu ŵajinji akusatenda chichi papikene lunda lwakutyochela m’Baibulo? (Misyungu 1:20, 21)

MU YILAMBO yejinji, abale ni alongo akusajima mmisewu ni kwalalichilaga ŵandu ŵakupita. Jemanjaji akusaŵa ŵakusangalala kwagaŵila ŵandu mabuku kuti akaŵalanje. Ana pakwete patesile nawo ulaliki welewu? Naga pakwete patesile, ngatukukayichila kuti ŵatesile yeleyo ligongo lyakuganichisya maloŵe gagakusasimanikwa m’buku ja Misyungu, gagakusasala kuti lunda lukugumila palipose kuti ŵandu apikane. (Aŵalanje Misyungu 1:20, 21.) M’Baibulo soni mabuku gakulondesya Baibulo gakwete “lunda” lusyesyene lwakutyochela kwa Yehofa. Lunda lwelelu ni lwampaka lwakamuchisye ŵandu kuti akapate umi wangamala. Tukusaŵa ŵakusangalala mnope ŵane papochele gane mwa mabuku getu. Nambo ngaŵa wosope ŵakusapochela. Ŵane akusasagula kuti akapikanila yajikusasala Baibulo, pele ŵane akusatusekaga. Jemanjaji akusaganisya kuti Baibulo jili jangakamuchisya. Nambosoni ŵane ŵangakamulana ni yajikusasala Baibulo pangani ja ndamo syambone. Jemanjaji akusaganisya kuti ŵandu ŵakusajikuya Baibulo ali ŵangali chanasa nambosoni ŵakalalisya. Nambope, Yehofa akupitilisya kupeleka lunda lusyesyene kwa ŵandu wosope. Ana jwalakwe akutenda chamtuli yeleyi?

 2. Ana masiku agano mpaka tupate kwapi lunda lusyesyene? Ana ŵane akusasagula kutenda chichi?

² Litala limo lyakusakamulichisya masengo Yehofa pakupeleka lunda lusyesyene lili kupitila m’Maloŵe gakwe, Baibulo. Mundu jwalijose mpaka akole buku jeleji. Nambi uli pakwamba ya mabuku getu gakulondesya Baibulo? Tukusamyamichila mnope Yehofa ligongo lyakuti mabukuga gakusasimanikwa m’yiŵecheto yakupunda 1,000. Ŵandu ŵakusaŵalanga soni kamulichisya masengo yalijiganyisye, yindu yikusajendela chenene. Nambope, ŵandu ŵajinji akusasagula kuti akapikanila maloŵe galunda lusyesyene. Jemanjaji pakusagula yakutenda paumi wawo, akusadalila lunda lwawo kapena yakusasala achimjawo. Mwamti ndaŵi sine akusatuwona m’weji kuti tuli ŵandu ŵakusigalila ligongo lyakusagula kukuya yajikusasala Baibulo. Munganiji chitulijiganye ligongo lyakwe jemanjaji akusaganisya myiyi. Nambo chandanda, kwende tulole yampaka tutende kuti tupate lunda lwakutyochela kwa Yehofa.

 3. Ana tukusosekwa kutenda chichi kuti tukole lunda lusyesyene?

³ Lunda mpaka lugopolele kukamulichisya masengo yindu yatukusamanyilila patukusagula yakutenda. Nambope, lunda lusyesyene lukusasaka yejinji. Baibulo jikusati, “Ndandililo ja lunda ni kwajogopa AMBUJE, soni naga ukummanyilila Jwamswela jula nikuti ukwete umanyilisi.” (Mis. 9:10) Myoyo naga tukusaka kusagula yindu yakusosekwa mnope paumi wetu, tukusasoseka kumanyilila nganisyo sya Yehofa payindu yatukusagulayo. Mpaka tutende yeleyi mwakulijiganya Baibulo nambosoni mabuku gakulondesya ya Baibulo. Patukutenda yeleyi, tuchilosya kuti tukwete lunda lusyesyene.—Mis. 2:5-7.

 4. Ligongo chichi Yehofape ni jwampaka atupe lunda lusyesyene?

⁴ Yehofape ni jwampaka atupe lunda lusyesyene. (Alo. 16:27) Ligongo chichi tukuŵecheta yeleyi? Chandanda, mpela juŵapanganyisye chilichose, jwalakwe akusayimanyilila chenene yindu yaŵayipanganyisye. (Sal. 104:24) Chaŵili, yindu yosope yakusatenda Yehofa yikusalosya kuti jwalakwe ali jwalunda. (Alo. 11:33) Chatatu, malangiso gakutyochela kwa Yehofa gakusigakamuchisya ŵandu ŵakusagakuya. (Mis. 2:10-12) Naga tukusaka kukola lunda lusyesyene, tukusasosekwa kunda kuti lunda lwakutyochela m’Baibulo lutulongoleleje patukusagula yakutenda.

 5. Ana pakusapagwa yakuyichisya yamtuli naga ŵandu akukana kwitichisya kuti lunda lusyesyene lukusatyochela kwa Yehofa?

⁵ Ŵandu ŵajinji ŵatukusasimana nawo patukulalichila akusajitichisya kuti yindu yakupanganyikwa yili yakusangalasya mnope. Nambope, jemanjaji akusakana yakuti kwana Mlungu juŵapanganyisye yindu yeleyi, mwamti akusakulupilila kuti yindu yaumi yagambile kuchenga kutyochela ku yindu yine. Ŵandu ŵane akusasala kuti akusakulupilila Mlungu, nambo akusayiwona kuti yajikusasala Baibulo yili yachikala, soni akusasagula kukuya nganisyo syawo. Ana yakuyichisya yakwe yikusaŵa yamtuli? Ana yakusatenda ŵandu pakudalila nganisyo syawo mmalo mwakumdalila Mlungu yikamuchisye kuti chilambochi chiŵe chambone? Ana yikusiyakamuchisya kuŵa ŵakusangalala yisyene kapena kola chembecheyo chambone cha msogolo? Yatukusayiwona pachilambopa yikusatutendekasya kulupilila maloŵe gakuti, “Pangali lunda, pangali kupikanichisya yindu chenene, pangali soni atamose msyungu, yampaka yikombole kwapunda AMBUJE.” (Mis. 21:30) Yeleyi yikusatutendekasya kupitilisya kumŵenda Yehofa kuti atupe lunda lusyesyene. Nambo chakutesya chanasa chili chakuti ŵajinji ŵangasaka kuŵenda lunda. Ligongo chichi jemanjaji akusatenda yeleyi?

 6. Mwakamulana ni Misyungu 1:22-25, ana ŵani ŵakusawugala mawiwi kuti akapikana lunda lusyesyene?

⁶ Lunda lusyesyene ‘palukugumila m’misewu’ ŵandu ŵajinji akusawugala mawiwi gawo kuti akapikana. Mwakamulana ni yajikusasala Baibulo, pana magulu gatatu ga ŵandu ŵakusakana lunda. Maguluga gali ŵandu “ŵangamanyilila yindu,” “ŵakunyosya,” soni “ŵakuloŵela.” (Aŵalanje Misyungu 1:22-25.b) Kwende tulole yayikusatendekasya ŵandu ŵeleŵa kukana lunda lwakutyochela kwa Mlungu soni yampaka tutende kuti tukaŵa mpela jemanjaji.

 7. Ligongo chichi ŵane akusasagula kuŵa “ŵangamanyilila yindu”?

⁷ Ŵandu “ŵangamanyilila yindu” ali gulu jandanda. Jemanjaji ali ŵandu ŵakusagamba kukulupilila yiliyose yapikene kapena ŵakusagamba kulambusidwa. (Mis. 14:15.) Ŵandu ŵeleŵa tukusasimana nawo patukulalichila. Mwachisyasyo, aganichisye ya ŵandu ŵajinji ŵasokonasidwe ni achimlongola ŵa dini soni ŵandale. Ŵandu ŵane payikopochele kuti achimlongola ŵeleŵa ŵalambusyaga akusadandawula mnope. Nambo ŵandu ŵakwasala pa Misyungu 1:22 akusasagula kuŵa ŵangamanyilila yindu ligongo lyakuti ŵasagwile kuti aŵe myoyo. (Yel. 5:31) Jemanjaji akusagamba kutenda yakusaka, nambosoni ŵangasaka kulijiganya yajikusasala Baibulo kapena kupikanila malamusi gakwe. Ŵandu ŵajinji akusaganisyaga mpela muŵaganichisyaga jwamkongwe jwine jwa ku Quebec, m’chilambo cha Canada, juŵanonyelaga ya dini. Jwamkongweju jwasalile ŵa Mboni sya Yehofa kuti, “Naga ŵamsembe ŵetu akusatulambusya, jelejo jili futo jawo ngaŵaga ja m’weji.” Kusala yisyene, ngatukusosekwa kwasyasya ŵandu mpela ŵeleŵa ŵakusasagula mwamele kuti akamanyilila yindu.—Mis. 1:32; 27:12.

 8. Ana chichi champaka chitukamuchisye kuti tuŵe ŵakumanyilila yindu?

⁸ Pamagongo gambone, Baibulo jikusatulimbikasya kuti tukaŵaga mpela ŵandu ŵangamanyilila yejinji, mmalomwakwe jikusatulimbikasya kuti tuŵeje “ŵachikulile pa kupikanichisya yindu.” (1 Akoli. 14:20) Tukusaŵa ŵandu ŵakumanyilila yindu mwakamulichisya masengo mfundo sya m’Baibulo paumi wetu. Patukutenda yeleyi, tuchiyiwona yampaka sijile mfundo sya m’Baibulo pakutukamuchisya kuŵambala yakusawusya soni kuti tusaguleje yindu mwakuŵajilwa. Mpaka yiŵe yakamuchisya kuganichisya chenene yindu yatusagwile. Naga tuŵele tuli mkulijiganya Baibulo soni kusimanikwa pa misongano ja mpingo kwandaŵi jelewu, mpaka tuliwungunye kuti tupate chachikutulepelekasya kulipeleka kwa Yehofa ni kubatisidwa. Naga twabatisidwe, ana tukwawula pasogolo pangani jakuŵa jwakulalichila soni jwakwiganya jwambone? Ana yindu yatukusasagula kutenda yikusalosya kuti mfundo sya m’Baibulo sikusatulongolelaga? Patukutenda yindu ni ŵane, ana tukusalinga kutenda yindu mpela mwakatendele Yesu? Naga tuyiweni kuti tukusosekwa kongolela panepakwe, tukusosekwa kukamulichisya masengo yakusatusalila Yehofa, yayikusiyapa ‘ŵandu wambape lunda.’—Sal. 19:7.

 9. Ana ŵandu “ŵakunyosya” akusalosya chamtuli kuti akusakana lunda?

⁹ Ŵandu “ŵakunyosya” ali gulu jaŵili ja ŵandu ŵakusakana kupikanila lunda lwa Mlungu. Ndaŵi sine patukulalichila tukusaŵechetana ni ŵandu mpela ŵeleŵa. Jemanjaji akusasangalala pakwanyosya ŵane. (Sal. 123:4) Baibulo jatukalamwisye kuti mmasiku gakumalisya kuchiŵa ŵandu ŵajinji ŵakunyosya. (2 Pet. 3:3, 4) Mpela muyaŵelele ni achakwegwegwe Loti, ŵandu ŵane masiku agano ŵangapikanila Mlungu pakwakalamusya. (Gen. 19:14) Mwamti ŵandu ŵajinji akusiŵaseka ŵandu ŵakusakuya mfundo sya m’Baibulo. Ŵandu ŵakunyosyaŵa akusagamba kutenda “yakumbila yawo yangachimbichisya Mlungu.” (Yud. 7, 17, 18) Kusala yisyene, yajikusati Baibulo pakwalondesya ŵandu ŵakunyosyaŵa yikusakamulana mnope ni yakusatenda ŵampatuko soni ŵandu ŵane ŵakusamkana Yehofa.

10. Mwakamulana ni Salimo 1:1, ana mpaka tuŵambale chamtuli kuŵa mundu jwakunyosya?

¹⁰ Ana chichi champaka chitukamuchisye kuti m’wejisoni tukaŵa mpela ŵandu ŵakunyosyaŵa? Litala limo lili kwaŵambalaga ŵandu ŵakusanonyela kusisya pa yiliyose. (Aŵalanje Salimo 1:1.) Yeleyi yikugopolela kuti ngatukusosekwa kupikanila kapena kuŵalanga yiliyose yakusawandisya ŵampatuko. Naga ngasamala, mpaka yisimanikwe kuti tutandite mtima wakusisya yiliyose ni kutanda kumkayichila Yehofa soni malangiso gatukusapochela kutyochela mu gulu jakwe. Kuti tuŵambale kutenda yeleyi tukusosekwa kuliwusya yiwusyo yakuyichisyayi. ‘Ana pambochele malangiso gasambano yikusasawusya kuti ngamulane nayo? Ana ngusatamila kwapatila magongo ŵandu ŵakulongolela?’ Patukutenda yakomboleka kuti tuleche mwachitema ndamo syelesi tukusamsangalasya Yehofa.—Mis. 3:34, 35.

11. Ana ŵandu “ŵakuloŵela” akusagawona chamtuli malamusi ga Yehofa ga ndamo syambone?

¹¹ Ŵandu “ŵakuloŵela” ali gulu jatatu ja ŵandu ŵakusakana lunda. Jemanjaji ali ŵakuloŵela ligongo lyakuti akusakana kukuya paumi wawo malamusi ga Mlungu ga ndamo syambone. Jemanjaji akusasagula jika kutenda yindu yakuganisya mumtwe mwawo kuti yili yambone. (Mis. 12:15) Jemanjaji akusamkana Yehofa jwali msyene lunda. (Sal. 53:1) Naga tusimene ni ŵandu ŵeleŵa patukulalichila, akusatuŵechetela yachipongwe ligongo lyakuti tukusachimbichisya yajikusasala Baibulo. Soni pangali chalunda chilichose champaka atusalile jemanjaji. Baibulo jikusati, “Lunda luli lwakutalichila cha mnope kwa chisilu, mu nganya ja magambo, ngakusawunukula kose pakamwa kuŵecheta chilichose.” (Mis. 24:7) Mundu jwakuloŵela pangali chalunda champaka aŵechete pakamwa pakwe. Lyeleli ni ligongo lyakwe Yehofa akusatukalamusya kuti, “mtalikangane nacho chisilu.”—Mis. 14:7.

12. Ana chichi champaka chitukamuchisye kuti tukatendaga yindu mpela ŵandu ŵakuloŵela?

¹² M’wejo nganituŵa mpela ŵandu ŵakusaŵengana ni malangiso ga Mlungu. Nambo mmalomwakwe tukusanonyela mnope kutenda yindu mpela mwakusatendela Mlungu. Soni chinonyelochi mpaka tuchilimbisye mwakuganichisya yakuyichisya yayikusapagwa pasikati pa ŵandu ŵakupikanila ni ŵangapikanila. Aganichisye ya yakusawusya yayikusapagwa ligongo lyakuti ŵandu asagwile kuti akapikanila malangiso galunda ga Yehofa. Kanekosoni aganichisye ya maumbone gapatile ligongo lyakumpikanila Mlungu.—Sal. 32:8, 10.

13. Ana Yehofa akusatukanganichisya kuti tupikanileje malangiso gakwe galunda?

¹³ Yehofa akusapeleka lunda lwakwe kwa ŵandu wosope, nambo jwalakwe jwangamkanganichisyaga mundu kuti apochele lundalu. Jwalakwe akusatusalila yampaka yitendekwe naga ŵandu asagwile kuti akapikanila lunda lwakwe. (Mis. 1:29-32) Ŵandu ŵasagwile kuti akampikanilaga Yehofa ‘tachilya yisogosi ya masengo gawo.’ Soni pambesi pakwe Yehofa chachajonanga. Nambo ŵandu ŵakusapikanila malangiso galunda ga Yehofa ni kugakuyaga, Baibulo jikwasalila kuti, “Jwele jwakusambikanila une, tachiŵa pambone, tachitama mwa mtendele, ngajogopa chakusakala chilichose.”—Mis. 1:33.

14-15. Ana tukulijiganya chichi pa lilemba lya Misyungu 4:23?

¹⁴ Ndaŵi syosope tukusapindula patukukamulichisya masengo lunda lwakutyochela kwa Mlungu. Mpela mwatuyiwonele kala, Yehofa atesile yakuti tupateje malangiso mwangasawusya. Mwachisyasyo, m’buku ja Misyungu Yehofa atupele malangiso gakamuchisya mnope paumi ŵetu naga tukugakuya. Kwende tukambilane yisyasyo mchechepe ya malangiso galundaga.

¹⁵ Kuchenjela mtima wakuwanichisya. Baibulo jikusati, “Mwujangate chenene mtima wenuwo mwakupundanganya pa yosope yamkuyisunga, pakuŵa uliŵa wa umi ukutyochela mwelemo.” (Mis. 4:23) Ana tukusosekwa kutenda chichi kuti tuchenjele mtima wetu usyesyene? Tukusasosekwa kulya yakulya yambone, kutenda maseŵela gakulimbisya chilu soni kuŵambala ndamo syakusakala. Yeleyi yikulandana ni yatukusasosekwa kutenda kuti tuchenjele mtima wetu wakuwanichisya. Lisiku lililyose tukusawulisya mtima wetu wakuwanichisya Maloŵe ga Mlungu. Tukusakosechela soni kwanga pamisongano. Tukusatenda yejinji patukulipeleka pakamula masengo gakulalichila. Nambosoni tukusaŵambala ndamo syakusakala mwakulolechesya kuti ngatukutenda chilichose champaka chisokonasye kaganisye ketu. Mwachisyasyo yakusangalasya yakusakala kapena kunguluka ni ŵandu ŵakwete ndamo syakusakala.

16. Ligongo chichi lilemba lya Misyungu 23:4, 5 lili lyakamuchisya masiku agano?

¹⁶ Kwikutila ni yindu yatukwete. Baibulo jikusatupa malangiso aga, “Mkasimlipesya mwasyene kusosasosa chipanje. . . . Pakwamba kupisya panandipe, basi tiwusimane kuti chipanje chipite, pakuŵa chikusatenda mpela chigambile kumela mapapiko mwakusisimuchisya, ni kutanda kuguluka ulendo wakwinani mpela nyanga.” (Mis. 23:4, 5) Ŵandu mpaka aluse mwangasawusya chipanje chawo. Nambope ŵandu ŵajinji masiku agano chinga ŵakulaga kapena ŵakusichila akusaganichisya mnope yampaka atende kuti akole chipanje. Yeleyi yikusatendekasyaga ndaŵi syejinji kutenda yindu yayikusajonanga mbili jawo, unasi wawo ni ŵane atamosesoni chilu chawo. (Mis. 28:20; 1 Tim. 6:9, 10) Mwakulekangana ni yeleyi, lunda lukusatukamuchisya kuti tusiwoneje mbiya mwakuŵajilwa. Yeleyi yikusatukamuchisya kuti tukaŵa ŵakutunduka nambo tuŵeje ŵakusangalala ligongo lya kwikutila ni yindu yatukwete.—Jwak. 7:12.

17. Ana “maloŵe ga mundu jwalunda” gakugasala pa Misyungu 12:18 gali gakusosekwa chamtuli?

¹⁷ Kutanda kuganisya mkanituŵechete. Naga tukusaŵecheta mwangasamala maloŵe getu mpaka gayikasye yakusawusya. Baibulo jikusati, “Mundu jwakusaŵecheta mwangasamalila, maloŵe gakwe gakusasoma mpela upanga, nambo maloŵe ga mundu jwalunda gakusaposya mitima ja ŵandu ŵane.” (Mis. 12:18) Tukusakamuchisya kuti paŵe mtendele patukuŵambala kuŵecheta miseche pa yakulepela ya ŵane. (Mis. 20:19) Kuti yatukusaŵecheta yiposyeje mitima ja ŵandu ŵane mmalo mwakwasoma, ndaŵi syosope tukusasosekwa kuwulisyaga mtima wetu Maloŵe ga Mlungu. (Luk. 6:45) Kuganichisya yajikusasala Baibulo patukuŵecheta, maloŵe getu mpaka gaŵe mpela “uliŵa wa lunda” lwampaka lwalimbikasye ŵane.—Mis. 18:4.

18. Ana kukamulichisya masengo yakusala pa Misyungu 24:6 mpaka kutukamuchisye chamtuli mu utumiki?

¹⁸ Kukuya malangiso. Baibulo jikusapeleka malangiso gakamuchisya mnope. Jikusati, “Pakuti kupitila mwa msyungu wa lunda lwambone, mpaka mpakombole kuputa ngondo, naga atupile apungu, kupunda kukusaŵa papopo.” (Mis. 24:6) Aganichisye mwampaka malangisoga gatukamuchisye kuŵa jwakulalichila soni jwakwiganya jwambone. Mmalo mwakamulichisya masengo litala lyatukulimanyilila patukulalichila, tukusalingalinga kukuya malangiso gatupochele. Tukusapochela malangiso gakamuchisya ku misongano ŵandu ŵane pakuŵecheta ngani syawo pakamulichisya masengo Baibulo. Konjechesya pelepa gulu ja Yehofa jipeleche yindu yakamuchisya mnope. Yindu yakwe yili mabuku soni mafidiyo yampaka yakamuchisye ŵandu kujipikanichisya Baibulo. Ana akulijiganya kukamulichisya masengo yindu yakusosekwa mnopeyi?

19. Ana wawojo akusapikana uli pakuganichisya ya lunda lwakusatupa Yehofa? (Misyungu 3:13-18)

¹⁹ Aŵalanje Misyungu 3:13-18. Kusala yisyene tukusayamichila mnope ligongo lya malangiso gakamuchisya gagakusasimanikwa m’Maloŵe ga Mlungu, Baibulo. Ana m’weji tukaliji ŵani yikaŵe kuti kwangali Baibulo? Munganiji, tukambilene yisyasyo yine ya malangiso gakamuchisya gagakusasimanikwa m’Buku ja Misyungu. Sonitu Baibulo josope jigumbele ni lunda lwakamuchisya lwakutyochela kwa Yehofa. Myoyo, kwende ndaŵi syosope tukamulichisyeje masengo lundalu paumi wetu. Atamose kuti ŵandu ŵajinji kuchilamboku ŵangaluwona lunda lwa Mlungu kuŵa lwakamuchisya, m’weji ngatukusayiwona myoyo. Mmalomwakwe tukusakulupilila mnope maloŵe gakuti “ŵana upile ŵele ŵakusalukamulisya masengo mnope lundalo.”