Pangali Champaka ‘Chitulekanganye M’we ni Chinonyelo cha Mlungu’

 1. Ana ŵandu ŵajinji kupwatikapo Aklistu ŵasyesyene, akusakola nganisyo syapi?

ANA YEHOFA Mlungu asiŵanonyela wawojo pajika? Mwakamulana ni lilemba lya Yohane 3:16, ŵandu ŵane akusajitichisya kuti Mlungu akusaŵanonyela ŵandu. Nambo jemanjaji akusati, ‘Mlungu nganaŵa anonyele une pajika.’ Atamose Aklistu ŵasyesyene ndaŵi syejinji mpaka akolesoni nganisyo syelesi. Jwamlume jwine ali atengwiche jwatite, “Yikusaŵa yakusawusya kukulupilila kuti Mlungu akusasamala ya une.” Ana wawojo ndaŵi sine akusakola nganisyosi?

2, 3. Ana ŵani ŵakusasaka kuti tuliwoneje kuŵa ŵangali mate, soni ana mpaka tumalane chamtuli ni nganisyosi?

² Satana ali jwakusachilila kututendekasya kukulupilila kuti Yehofa Mlungu jwangatunonyela kapena kutuŵalanjila. Yisyene, Satana ndaŵi syejinji akusaŵatendekasya ŵandu kuŵa ŵakulipikana soni ŵakulikwesya. (2 Akolinto 11:3) Nambosoni jwalakwe akusasangalala kwatendekasya ŵandu kuliwona kuti ali ŵakutuluka. (Yohane 7:47-49; 8:13, 44) Satana akutenda yeleyi “masiku gambesi” gano. Ŵandu ŵajinji lelojino akulile m’maŵasa mwele ŵandu ŵakwe “ŵangali chanasa.” Ŵandu ŵane akusalaga ni ŵandu ŵawukali, ŵakulinonyela soni ŵakumula mtima. (2 Timoteo 3:1-5) Ligongo lyakuti pamasile yaka yejinji ŵanduŵa ali kutendeledwa yakusakala, yitendekasisye jemanjaji kuliwona kuŵa ŵakutuluka soni ŵanganonyeledwa.

³ Naga akusimana ni yakutengusyayi akajasa mtima. Ndaŵi syejinji tukusalijimba magambo. Nambo akumbuchileje kuti chakulinga cha Maloŵe ga Mlungu chili “kongolela yangalumbana” soni ‘konanga nganisyo syaunami.’ (2 Timoteo 3:16; 2 Akolinto 10:4) Baibulo jikusati, “tuchijisimichisya mitima jetu kuti Mlungu jwangatujimba magambo, pachilichose chele mitima jetu jikusatusisya, ligongo Mlungu ali jwamkulungwa kujipunda mitima jetu soni akusamanyilila yindu yosope.” (1 Yohane 3:19, 20) Kwende tulole matala mcheche gele Malemba gakusatukamuchisya ‘kujisimichisya mitima jetu’ kuti Yehofa akusatumnonyela.

4, 5. Ana chisyasyo cha Yesu cha tujuni twa timba chikulosya wuli kuti tuli ŵakusosekwa pameso pa Yehofa?

⁴ Litala lyandanda lili lyakuti, Baibulo jikusatujiganya kuti Mlungu akusamwona jwakutumichila jwakwe jwalijose kuŵa jwakusosekwa. Mwachisyasyo, Yesu jwaŵechete kuti, “Ana ngati akusasumisya tujuni tuŵili twa timba ni kambiya kamope? Kutendaga pangali atamose kamo ka tujunito kampaka kagwile pasi akakumanyilila Atati ŵetu. Jemanjatu atamose umbo syosope sya mu mtwe wenu ŵasiŵalasile syosope. Myoyo mkajogopaga. Jemanja mli ŵamtengo mnope kupunda yijuni ya timba yejinji.” (Mateyu 10:29-31) Kwende tulole yagagopolelaga maloŵega kwa ŵakupikanila ŵa Yesu ŵa mu yaka 100 yandanda.

⁵ Mwine mpaka tuliwusye kuti, ana ligongo chichi mundu jwasumaga kajuni ka timba? Mundaŵi ja Yesu kajuni ka timba chaliji chakulya chakutuluka mtengo. Mundu jwasumaga tujuni tuŵili twa timba ni kambiya kamo. Nambo kaneko Yesu jwasasile kuti naga mundu akwete tumbiya tuŵili, ŵampaga ngaŵa yijuni mcheche nambo ŵampaga yijuni msano. Chinecho chaŵaga chalulele. Atamose kuti yijuniyi yaliji yakutuluka m’meso mwa ŵandu, nambo ana Mlungu jwayiwonaga wuli? Yesu jwatite, “Mlungu jwangayiliŵalila amta chimo chose [atamose chalulele chila].” (Luka 12:6, 7) Sambano tutandite kupikanichisya chiwundo cha Yesu. Naga Yehofa akusakawona kajuni katimba kuŵa kakusosekwa mnope, kuli wuli ŵandu? Mpela mwaŵaŵechetele Yesu, Yehofa akusamanyilila yiliyose yayikusatutendechela. Yisyene, jwalakwe akusaŵalanga atamose umbo syetu.

 6. Ligongo chichi mpaka tuŵe ŵakusimichisya kuti yajwasasile Yesu yakuti Mlungu akusasiŵalanga umbo syetu yili yisyene?

⁶ Ana mpaka yikomboleche uli umbo syetu kusiŵalanga? Ŵandu ŵane mpaka aganisyeje kuti Yesu jwaŵechetaga yindu yangokomboleka. Kwende tuganichisye ya chembecheyo chatukwete chakwamba kwimuka kwa ŵawe. Yehofa akusosekwa kutumanyilila chenene kuti chatupanganyesoni. Jwalakwe akusatuwona kuti tuli ŵakusosekwa mnope mwamti akusatumanyilila chenene. Akusamanyilila upanganye wachilu chetu, nganisyo syetu soni yindu yatukusasimana nayo.a Kuŵalanga umbo syasikusakwana chiŵandika 100,000 mu mtwe wa mundu, mpaka gaŵe masengo gangasawusya pakuwanichisya ni yatusasile kundandayi.

7, 8. (a) Ana ni ndamo syapi syasikusamsangalasya Yehofa syakusapata pakuwungunya m’mitima ja ŵandu? (b) Ana ni masengo gapi gatukusatenda gakusagawona Yehofa kuti gali gakusosekwa?

⁷ Litala lyaŵili lili lyakuti, Baibulo jikusatujiganya yakusayiwona Yehofa mwetuwe kuti yili yakusosekwa. Mwakata mpaka tujile kuti jwalakwe akusasangalala ni ndamo syetu syambone soni kulingalinga kwetu. Mwenye Daudi ŵamsalile Solomoni kuti, “Mlungu akusamanyilila nganisyo sya mundu jwalijose.” (1 Mbili 28:9) Mlungu pakuwungunya mitima ja ŵandu m’chilambo chegumbale ni chiwawa soni uŵenganichi, jwalakwe akusasangalala pawusimene mtima wakunonyela mtendele, usyesyene soni chilungamo. Ana chikusatendekwa chichi Mlungu pasimene mtima wakumnonyela jwalakwe, wakusachilila kulijiganya yajwalakwe soni wakusaka kwasalila ŵane ya jwalakwe? Yehofa akusatusalila kuti jwalakwe akusiŵawona ŵandu ŵakusiŵasalila ŵane pakwamba ya jwalakwe. Akwetesoni “buku ja chikumbukumbu” ja wosope ‘ŵakusajopaga Ambuje ni kulichimbichisya lina lyakwe.’ (Malaki 3:16) Ndamo syelesi sili syakusosekwa kwa jwalakwe.

⁸ Ana ni masengo gambone gapi gele Yehofa akusagawona kuti gali gakusosekwa? Jwalakwe mnopemnope akusasangalala ni kulingalinga kwetu pakumsyasya Mwanache jwakwe, Yesu Klistu. (1 Petulo 2:21) Masengo gakusagawona Yehofa kuti gali gakusosekwa, gali kulalichila ngani syambone sya Uchimwene wakwe. Pa Aloma 10:15 pakusati, “Sajo sya ŵandu ŵakusalalichila utenga wa yindu yambone, sili syakusalala kwabasi.” Nganituŵa tuganichisye kuti syajo syetu sili “syakusalala.” Palilembali, kusalalaku kukwimila kulingalinga kwakusatenda ŵandumetume ŵa Yehofa pakulalichila ngani syambone. Kulingalingaku kuli kwakusalala soni kwakusosekwa m’meso mwa Mlungu.—Mateyu 24:14; 28:19, 20.

9, 10. (a) Ligongo chichi mpaka tusimichisye kuti Yehofa akusayamichila kupilila kwetu patusimene ni yakusawusya yakulenganalekangana? (b) Ana Yehofa akusaŵambala kutenda chichi kwa ŵandumetume ŵakwe?

⁹ Yehofa akusayamichilasoni kupilila kwetu. (Mateyu 24:13) Tukumbuchile kuti Satana akusasaka kuti tumkane Yehofa. Lisiku lililyose lyalosisye kukulupichika kwa Yehofa akusaŵa kuti akamuchisye kuti Mlungu apate chakumjanga Satana. (Misyungu 27:11) Ndaŵi sine kupilila kukusaŵa kwakusawusya. Yakusawusya ya m’chilu, kusawusya kwa mbiya, kulagasika nganisyo soni yakusawusya yine mpaka yilinje chikulupi chetu lisiku lililyosye lisiku. Mpaka tutenguchesoni naga yindu yatujembecheyeje nganiyitendekwa. (Misyungu 13:12) Kupilila yakusawusya yeleyi kuli kwakusosekwa kwa Yehofa. Ni ligongo lyakwe Mwenye Daudi jwamŵendile Yehofa kuti akumbuchileje kupuluputa soni kudandawula kwakwe. Kaneko jwajonjechesye kuti “Ana yosopeyi nganayilemba m’buku jawo?” (Salimo 56:8) Yisyene, patukupilila yakusawusya soni patukupitilisya kuŵa ŵakulupichika kwa Yehofa, jwalakwe akusayamichila soni akusakumbuchila yeleyo. Yehofa jwanganandiya yakusawusya yetu.

¹⁰ Nambo mtima wetu wakulambusya mpaka ukane maumboni gakuti tuli ŵakusosekwa kwa Mlungu. Mpaka utusalileje mwangalechesya kuti, ‘Nambotu pana ŵandu ŵajinji ŵachisyasyo chambone kupunda une. Komboleka kuti Yehofa jwangasangalala pakulandanya une ni jemanjajo.’ Nambo Yehofa jwangatulandanya ni ŵane, soni nganaŵa jwakakamila pa chindu chimo kapena kuganisya yakwatendela ŵane yangasa. (Agalatiya 6:4) Akusalola mwakusamala mnope yayili m’mitima jetu, soni akusayamichila yambone yayiweni, chinga yamwana kapena yekulungwa.

11. Ana ngani ja Abiya mpaka jituganye chichi pakwamba ya Yehofa?

¹¹ Litala lyatatu lili lyakuti, Yehofa pakutuwungunya, akusalola mwakusamala yindu yambone mwetuwe. Mwachisyasyo, pandaŵi jele Yehofa jwalamwile kuti liŵasa lyosope lya mwenye Yelobowamu liwulajidwe, jwalakwe jwalamwile kuti mwanache jwakwe, Abiya, aŵichidwe m’malembe mwakamulana ni mwambo wakwe. Ligongo chichi? Ligongo lyakuti ‘Yehofa Mlungu jwa Isalaeli ŵapatile chindu chinechakwe chambone mwa jwalakwejo.’ (1 Ayimwene 14:1, 10-13, NWT) Yehofa ŵawungunyisye mwakusamala mumtima mwa mnyamataju soni jwapatile “chindu chine chakwe chambone.” Atamose kuti chindu chambonecho chaliji chamwana, Yehofa jwachiweni kuŵa chakusosekwa kuchilemba m’Maloŵe gakwe. Jwalakwe jwampele upile mnyamataju. Atamose kuti liŵasa lyakwe lyajimuchile Yehofa, jwalakwe jwamtendele chanasa.

12, 13. (a) Ana ngani ja Mwenye Yehosafati jikulosya chamtuli kuti Yehofa akusalola yindu yambone mwa m’weji atamose patulemwisye? (b) Pakwamba ya masengo getu gambone soni ndamo syetu syambone, ana Yehofa akusatenda wuli mpela nangolo jwachinonyelo?

¹² Panasoni chisyasyo chine chambone. Chisyasyochi chili cha Mwenye Yehosafati. Pandaŵi jele mwenyeju jwatesile yakuloŵela, jwakulochesya jwa Yehofa jwamsalile kuti, “Lutumbilo lwa Ambuje tiluŵe pa wawo.” Kusala yisyene gelega galiji maloŵe gamachili. Nambo utenga wa Yehofa nganiwumalila papapa. Jwalakwe jwapitilisye kuti, “Nambo atamose yili myoyo, pana yindu yine yambone yaŵatesile wawo.” (2 Mbili 19:1-3) Myoyo, kutumbila kwa Yehofa kwachilungamo nganikumtendekasya kuti akalola yambone mwa Yehosafati. Yeleyi yili yakulengana ni ŵandu ŵangali umlama. Achimjetu patutumbilikasisye, yikusaŵa yakusawusya kulola yindu yambone mwa jemanjaji. Soni patulemwisye, yindu mpela sooni, kutenguka soni kulijimba magambo yikusatutendekasya kuti tukayiwonaga yindu yambone yatutesile. Myoyo, tukumbuchileje kuti naga tupitikwiche mtima soni tukulingalinga kuti tukayiwilisya, Yehofa akusatukululuchila.

¹³ Yehofa pakutuwungunya akusajasa yakulemwayi, mpela mwakusatendela mundu jwakusosasosa golidi pakwasa maganga gangasosekwa. Nambi wuli pakwamba ya ndamo syetu syambone ni yitendo yetu? Yeleyi yili yindu yambone mnope yele Yehofa akusayisunga yayili mpela “golide.” Ana pakwete payiweni yakusatenda achinangolo ŵachinonyelo? Jemanjaji akusasunga kwandaŵi jelewu yakwambula kapena yindu yaŵalembaga ŵanache ŵawo kusukulu atamose ŵanacheŵa ali aliŵalile. Yehofa ali nangolo jwachinonyelo mnope. Patukupitilisya kuŵa ŵakulupichika, jwalakwe nganaŵa aliŵalile masengo getu gambone soni ndamo syetu syambone. Mmalo mwakwe, jwalakwe akusayiwona kuti nganichiŵa chilungamo kuyiliŵalila yeleyi soni nganaŵa atesile yindu yangali chilungamo. (Ahebeli 6:10) Yehofa akusatuwunganyasoni m’litala line.

14, 15. (a) Ligongo chichi ungali umlama wetu wangamtendekasya Yehofa kulepela kulola yambone mwetuwe? Apeleche chisyasyo. (b) Ana Yehofa chachitenda chichi ni yambone yakusapata mwetuwe, soni ana ŵandumetume ŵakwe ŵakulupichika akusiŵawona chamtuli?

¹⁴ Yehofa jwangatamila kulola yakulepela yetu, nambo akusalola yampaka tukombole kutenda. Mpaka tuwanichisye myi. Ŵandu ŵakusanonyela yakwambula akusatenda yakomboleka kusunga yakwambula yayajonasiche mnope. Mwachisyasyo, nyumba jakusunjilamo yindu ya yakwambula mu msinda wa London ku England, mundu jwine jwachigombele ni wuti chiwulili chambiya chiŵandika madola 30 miliyoni. Chiwulilichi chajambulidwe ni jwamlume jwine lina lwakwe Leonardo da Vinci. Nambo pangali juŵasasile kuti pakuŵa chiwulilichi chijonasiche, ni basi agambe kuchijasa. Mmalo mwakwe, masengo gakuchilinganyasoni chiwulili chakusalalachi, chachapanganyidwe yaka 500 munyuma mwakwe, gatandite. Ligongo chichi? Ligongo chiwulilichi chaliji chakusosekwa mnope kwa ŵandu ŵakunonyela kwambula. Kusala yisyene m’weji tuli ŵakusosekwa mnope kupunda chindu chakwambulidwa ni choko kapena makala. Kusala yisyene, atamose tujonanjidwe chamtuli ni ungali umlama wetu, mmeso mwa Yehofa tuli ŵakusosekwa. (Salimo 72:12-14) Yehofa Mlungu, juŵapanganyisye mundu, chachitenda yosope yakusosechela kuti awuchisye umlama mwa ŵandu ŵakusakunda chisamalilo chakwe chachinonyelo.—Masengo 3:21; Aloma 8:20-22.

¹⁵ Yehofa akusalola yambone mwetuwe yanganituŵa tuyiweni achimisyewe. Soni patukumtumichila, yindu yamboneyo chachiyikusya mpaka tuchiŵa ŵamlama. Chinga chilambo cha Satanachi chichitutendeleje yamtuli, nambo Yehofa akusiŵawona ŵakutumichila ŵakwe kuŵa ŵakusosekwa mnope.—Hagai 2:7.

16. Ana ni chindu chapi chekulungwa chaŵatesile Yehofa chachikulosya kuti akusatunonyela, soni ana tukumanyilila chamtuli kuti mtukawu uli wa jwalijose jwetuwe?

¹⁶ Litala lyamcheche lili lyakuti, Yehofa akusatenda yejinji pakulosya kuti akusatunonyela. Mbopesi ja Klistu jikusalosya kuti yaŵaŵechete Satana yakuti tuli ŵangasosekwa soni kuti pangali jwampaka atunonyele uli unami wekulungwa. Tukaliŵalila kuti Yesu jwawile pa chitela chakulagachisya, chachaliji chiwa chakupweteka mnope. Nambosoni Yehofa jwalasile mnope mumtima soni jwapilile pandaŵi jaŵamwonaga Mwanache jwakwe jwakunonyelwa ali mkuwa. Yosopeyi uli umboni wakulosya kuti jemanjaji akusatunonyela. Nambo chakutesya chanasa chili chakuti, ŵandu ŵajinji akusalepela kukulupilila kuti mtuka welewu Mlungu ŵawupeleche kwa jemanjajo pajika. Jemanjaji akusaliwona kuŵa ŵangasosekwa. Tukumbuchile kuti ndumetume Paulo jwalagasyaga ŵakumkuya ŵa Klistu. Nambope jwalakwe jwalembile kuti, ‘Mwanache jwa Mlungu, jwanonyele une ni kuwupeleka umi wakwe ligongo lya une.’—Agalatiya 1:13; 2:20.

17. Ana Yehofa akusatuwutila chamtuli kwa jwalakwe soni kwa Mwanache jwakwe?

¹⁷ Yehofa akusalosyasoni kuti akusatunonyela mwakutukamuchisya jwalijose pajika kuti tupindule ni mbopesi ja Klistu. Yesu jwatite, “Pangali mundu jwampaka apakombole kwika kwa une nambo akaŵe naga Atati ŵiŵandumilewo akumlongolela kapena kuti kumwutila kwa une.” (Yohane 6:44) Yisyene, Yehofa akusamwutila jwalijose jwetuwe kwa Mwanagwe soni kuti tukole chembecheyo cha umi wangamala. Ana akusatenda yeleyi chamtuli? Kupitila m’masengo gakulachila gagakusamyichila mundu jwalijose. Nambosoni kupitila mwa msimu wakwe weswela, Yehofa akusatukamuchisya kuti tupikanichisyeje soni tukamulichisyeje masengo usyesyene wa m’Baibulo, mwangasamala kandu kuti tuli ungali umlama. Myoyo, mpela muŵasalilile Aisalaeli, Yehofa mpaka atusalile kuti, “Namnonyele mmwe ni chinonyelo changamala. Ni ligongo lyakwe namwutile mmwejo ni chanasa changu.”—Yelemiya 31:3, NWT.

18, 19. (a) Ana Yehofa akusalosya kuti akusatunonyela m’litala lyapajika lyapi, soni ana chichi chachikulosya kuti jwalakwe akusasamala ya jwalijose jwetuwe pajika? (b) Ana Maloŵe ga Mlungu gakulosya chamtuli kuti Yehofa akusatutendela chanasa?

¹⁸ Komboleka kuti tukusapikana kuti Yehofa akusatunonyela mnope patukupopela kwa jwalakwe. Baibulo jikusamsalila jwalijose jwatuwe kuti ‘tupopeleje mwangalechesya’ kwa Mlungu. (1 Atesalonika 5:17) Jwalakwe akusatupikanila. Soni akusakolanjidwa kuti “ŵakupikana lipopelo.” (Salimo 65:2) Jwalakwe nganapeleka udindowu kwa mundu jwine jwalijose, atamose kwa Mwanache jwakwe. Kwende tugambe kuganichisya. Juŵapanganyisye yakupanganyika yosopeyi akusatumbilikasya kuti tuŵechetaneje najo mwagopoka kupitila mu lipopelo. Ana jwalakwe ali jwakupikanila jwamtuli? Ana jwangasangalala, jwangaganichisya ŵane kapena jwangali chanasa? Amta panandi.

¹⁹ Yehofa akwete chanasa. Nambo ana chanasa ni chichi? Jwamlume jwine jwakulupichika nambo jwamchekulupe jwatite, “Chanasa chili kuliŵika m’weji mundamo japweteka jali mjetujo.” Ana Yehofa yisyene akusakwayidwa ni kulaga kwetu? Pakwamba ya kulaga kwa Aisalaeli, tukusaŵalanga kuti, Yehofa “ŵalasile pakuyiwona yisawusyo yawo yosope.” (Yesaya 63:9) Ngaŵa kuti Yehofa jwagambile kukuwona kulaga kwawope, nambo jwalakwe jwatendele chanasa. Kupitila m’maloŵe gaŵamsalile jwakulochesya jwakwe, Yehofa jwalosisye yamkwayiye mnope. Jwakulochesyaju jwatite, ‘Jwalijose jwakumkwaya jemanja, nikuti akukwaya m’liso lyangu.’b (Sakaliya 2:8, NWT) Yeleyi yili yakupweteka. Yisyene, Yehofa akusatutendela chanasa. Patukulaga, jwalakwesoni akusalaga.

20. Ana tukusosekwa kuŵambala nganisyo syakulemwecheka syapi pakusaka kukamulichisya masengo chiwundo chachili pa Aloma 12:3?

²⁰ Pangali Mklistu jwalijose jwaganisya chenene jwampaka alipikaneje mnope kapena kupoka, ligongo lyakuti Mlungu akusatunonyela soni akusatuwona kuti tuli ŵakusosekwa mnope. Ndumetume Paulo jwalembile kuti, “Ligongo lya umbone mtima wa Mlungu, jwalakwejo ŵasagwile une kuti mbe ndumetume, ngumsalila jemanja wosope kuti mkalitenda kuti mli ŵalunda kupunda mumŵelele. Mnopemnope mŵeje ŵakulitimalika mu kuganisya kwenu, mwakulingana ni winji wa chikulupi chapeleche Mlungu kwa jwalijose jwa jemanja.” (Aloma 12:3) Patukusangalala ni chinonyelo cha Atati ŵetu ŵakwinani kwende tuŵeje ŵaganisya chenene soni tukumbuchileje kuti Mlungu jwangatunonyela mpela kuti jili mboto ja yitendo yetu.—(Luka 17:10)

21. Ana ni unami wa Satana wapi watukusosekwa kupitilisya kuwukana, soni ana ni usyesyene wapi wa m’Baibulo watukusosekwa kujisimichisya mitima jetu?

²¹ Kwende wosope tutende yakomboleka pakukana unami wosope wa Satana, kupwatikapo wakuti tuli ŵangasosekwa soni pangali jwampaka atunonyele. Naga akusakulupilila kuti yasimene nayo paumi yikusatendekasya kuti Mlungu akanonyela, kapena kuganisya kuti yitendo yawo yambone yili yamwana mwamti Yehofa ngaŵa mkuyiwona, soni kuti yakulemwa yawo yili yekulungwa mwamti mbopesi ja Yesu nganijiŵa jityosisye, ni kuti akukulupilila yaunami. Akaneje unami welewu ni mtima wawo wosope. Kwende tujisimichisye mitima jetu ni maloŵe ga kusalilidwa ga Paulo gakuti, “Ngumanyilila mwangakayika kuti pangali chindu chakutulekanganya ni chinonyelo chakwe. Kanga chiwa kapena umi, atamose malayika kapena ŵakulamulila, kapena yindu yayipali sambano jino, kapena yitichiwoneka msogolo muno, kapena ya machili ine yiliyose; kapena ya kwinani kapena ya pasi pano, kapena soni kandu kane kalikose kakupanganyidwa, ngasikatulekanganya uwe ni chinonyelo cha Mlungu, chitukwete mwa Klistu Yesu Ambuje ŵetu.”—Aloma 8:38, 39.