Tulijiganyeje Yakwamba Yehofa Kutyochela ku Yachilengedwe

 1. Ana chichi chachamkamuchisye Yobu kummanyilila chenene Yehofa?

YOBU jwaŵechetanaga ni ŵandu ŵakulekanganalekangana paumi wakwe. Nambo kuŵechetana kwakwe ni Yehofa pandaŵi jinejakwe kwaliji kwakusosekwa mnope. Yehofa pakusaka kumkamuchisya Yobu kumanyilila kuti jwalakwe akusiŵakamuchisyaga ŵakutumichila ŵakwe soni kuti ali jwalunda mnope jwakamulichisye masengo yindu yiŵapanganyisye. Mwachisyasyo, Yobu jwamanyilile kuti Mlungu akusayisamalilaga yinyama. Yeleyi yamkamuchisye kumanyilila kuti jwalakwesoni mpaka amkamuchisye. (Yob. 38:39-41; 39:1, 5, 13-16) Kuganichisya yindu yakusimonjesya yiŵapanganyisye Mlungu kwamkamuchisye Yobu kumanyilila ndamo syakusosekwa mnope syakwete Mlungu.

 2. Ligongo chichi mpaka yiŵe yakusawusya kuganichisya yindu yaŵapanganyisye Yehofa?

² M’wejisoni mpaka tulijiganye yindu yejinji yakwamba Yehofa patukuganichisya yindu yiŵapanganyisye. Nambope ndaŵi sine kutenda yeleyi mpaka kuŵe kwakusawusya. Mwachisyasyo, naga tukusatama mtawuni mpaka kuŵe kwakusawusya kuti tuyiwoneje yindu yejinji yiŵapanganyisye Mlungu. Nambosoni kwa ŵandu ŵakusatama chiŵandika yindu yachilengedwe mpaka alepeleje kupata ndaŵi jakwanila jakuyilolechesya yindu yeleyi. Myoyo chitukambilane ligongo lyakwe yili yakamuchisya mnope kupataga ndaŵi jakuyilolechesya yindu yiŵapanganyisye Mlungu. Chitukambilanesoni yaŵatesile Yehofa ni Yesu pakamulichisya masengo yindu yachilengedwe pakwajiganya ŵandu. Nambosoni yampaka tulijiganye m’weji patukuyilolechesya yindu yeleyi.

 3. Ana chichi chachikulosya kuti Yehofa ŵasakaga kuti Adamu asangalaleje ni yindu yachilengedwe?

³ Yehofa jwasakaga kuti mundu jwandanda kumpanganya asangalaleje ni yindu yachilengedwe. Jwalakwe paŵampanganyisye Adamu ŵampele paladaiso gagaliji malo gakusalala mnope, mwamti ŵamsalile kuti agasamalileje soni kugakusya. (Gen. 2:8, 9, 15) Agambe ganisya muŵasangalalilaga Adamu paŵasiwonaga mbeju sili mkumela nambosoni kukoposya maluŵa. Kusala yisyene Adamu jwakwete upile wekulungwa mnope wakusamalila mgunda wa Edeni. Yehofa ŵamsalilesoni Adamu kuti ayipe mena yinyama yosope. (Gen. 2:19, 20) Yikakomboleche Yehofa kukamula jika masengo gelega. Nambo jwalakwe nganatenda myoyo mwamti ŵapeleche masengoga kwa Adamu. Ngatukukayichila kuti Adamu mkanaŵe kupeleka lina ku chinyama chilichose ŵatandaga kuchilolechesya mwachikuwonechela soni mwachikutendela yindu kaneko nikuchipa lina. Masengo gelega gamtendekasisye Adamu kuŵa jwakusangalala mnope. Mwamti yili yangakayikasya kuti masengoga gampele upile wakumyamichila Yehofa soni kuyamichila kusalala kwa yindu yiŵayipanganyisye.

 4. (a) Ana ni ligongo limo lyapi lyalikusatutendekasya kuganichisya yindu yachilengedwe? (b) Ana ni yindu yapi ya m’chilengedwe yakusasangalala nayo mnope?

⁴ Ligongo limo lyalikusatutendekasya kuganichisya yindu yachilengedwe lili lyakuti Yehofa akusasaka kuti tutendeje yeleyo. Mwachisyasyo Jwalakwe akusatusalila kuti ‘Mlole kwiwunde, ana ŵani ŵaŵapanganyisye ndondwa simkusiwona?’ Kwanga kwa chiwusyochi kuli kwangasawusya. (Yes. 40:26) Yehofa nganagamba kupanganya yindu yakusimonjesya kwinanipe, nambo jwapanganyisyesoni yindu yine yakusimonjesya pachilambopa soni yine ya mmesi yampaka yitujiganye yejinji patukuyiganichisya. (Sal. 104:24, 25) Aganichisye yiŵatite Mlungu pakutupanganya m’weji. Jwalakwe jwatupanganyisye m’litala lyakuti tuyamichileje kusalala kwa yindu yachilengedwe. Jwatupanganyisyesoni m’litala lyakuti tukomboleje kusangalala ni yindu yachilengedwe pakamulichisya masengo yindu mpela kulola, kupikana, kukamula, kupasya soni kunusya.

 5. Mwakamulana ni lilemba lya Aloma 1:20, ana tukusapindula chamtuli patukukamulichisya masengo yindu yiŵapanganyisye Yehofa?

⁵ Baibulo jikusatusalila ligongo line lyakusosekwa mnope lyalikusatutendekasya kuganichisya yindu yachilengedwe. Yindu yeleyi yikusatukamuchisya kulijiganya yakwamba ndamo syakwete Yehofa. (Aŵalanje Aloma 1:20.) Mwachisyasyo, aganichisye yindu yachilengedwe yatukusayiwona pachilambopa. Yindu yeleyi yikusalosya kuti Yehofa ali Mlungu jwalunda mnope. Aganichisyesoni yamitundu ja yakulya yatukusasangalala nayo? Yakulya yeleyi yikusapeleka umboni wamachili mnope wakuti Mlungu akusiŵanonyela ŵandu. Patukumanyilila ndamo syambone syakwete Yehofa kutyochela ku yindu yiŵayipanganyisye, ni patukusammanyilila chenene jwalakwe soni kuŵa najo paunasi wambone. Sambano kwende tulole matala gane gaŵakamulichisye masengo Yehofa pakusaka kwajiganya ŵandu yindu yakusosekwa mnope pakamulichisya masengo yindu yachilengedwe.

 6. Ana yijuni yayikusasama dela jine kwawula kudela jine yikusatujiganya chichi?

⁶ Yehofa akwete ndandanda jakutendela yindu. Chaka chilichose kumapeto kwa mwesi wa Febuluwale soni chamkatikati mwa mwesi wa Meyi, Ayisalayeli ŵayiwonaga yijuni ya msinji yili mkuguluka kwawula chakumpoto kwa chilambocho. Yehofa ŵasalile Ayisalayeli kuti yijuni ya ‘msinji yikusamanyilila ndaŵi jakuwujila.’ (Yel. 8:7) Mpela muŵatendele Yehofa pakuyipa ndaŵi jakutendela yindu yijuniyi, jwalakwesoni akwete ndaŵi jachachimachisya yakusakala pachilambopa. Masiku aganosoni patukuyiwona yijuni yili mkutyoka dela jine kwawula dela jine yikusatukamuchisya kulupilila kuti Yehofa “akwete ndaŵi jakwe” jachachimachisya yakusakala pachilambopa.—Hab. 2:3.

 7. Ana mwachikusatendela chijuni pakuguluka yikusatusimichisya ya chichi? (Yesaya 40:31)

⁷ Yehofa akusiŵapa machili ŵakutumichila ŵakwe. Kupitila mwa jwakulochesya Yesaya, Yehofa jwasasile kuti chachapa machili ŵakutumichila ŵakwe “gakuguluka mwinani mpela chijuni chakolanjidwa ngwasi” pandaŵi jachachiŵa kuti machili gamalile. (Aŵalanje Yesaya 40:31.) Ayisalayeli ŵayiwonaga yijuni yakolanjidwa kuti ngwasi yili mkuguluka ni kwawulaga mwinani mnope mwangalajilila kukupisya mapapiko mwamachili mnope. Yeleyi yikutusimichisya kuti Yehofa mpaka atupesoni m’weji machili mpela mwakusatendela pakuyipa machili yijuniyi. Myoyo pakuchiwona chijuni chili mkuguluka kwawula mwinani mnope yakamuchisyeje wawojo kumanyilila kuti Yehofa mpaka ŵapesoni machili gakwakamuchisya kumalana ni yakusawusya yawo.

 8. Ana Yobu jwalijiganyisye chichi pajwaganichisyaga yindu yaŵapanganyisye Mlungu? Ana m’weji mpaka tulijiganye chichi patukuganichisya yindu yapanganyisye Mlungu?

⁸ Yehofa akusasaka kuti tumdalileje mnope. Yehofa ŵamkamuchisye Yobu kuti amdalileje mnope jwalakwe. (Yob. 32:2; 40:6-8) Pakuŵechetana ni Yobu, Mlungu ŵakamulichisye masengo yindu yakulekanganalekangana kupwatikapo ndondwa, mawunde nambosoni kumesya kwa njasi. Yehofa jwasasilesoni ya yinyama mpela njati nambosoni bulu. (Yob. 38:32-35; 39:9, 19, 20) Yindu yosopeyi ngaŵa kuti yikwamba kulosya kuti jwalakwe ali jwamachilipe, nambo yikulosyasoni kuti ali jwamachili mnope. Mwamti kukambilanaku kwamkamuchisye Yobu kuti amdalileje mnope Yehofa kupundana ni kalakose. (Yob. 42:1-6) Mwakulandana ni yeleyi, kuganichisya yindu yachilengedwe kukusatukamuchisya kumanyilila kuti Yehofa ali jwalunda soni jwamachili mnope kutupunda m’weji. Jwalakwe chachimasyasoni yakusawusya yetu yosope yene. Mfundo jeleji mpaka jitukamuchisye kuti tumdalileje mnope jwalakwe.

9-10. Ana wula ni lyuŵa yikusatujiganya yamtuli yakwamba Yehofa?

⁹ Yesu jwayimanyililaga chenene yindu yachilengedwe. Mpela “mmisili,” jwalakwe jwakwete upile wakupanganya nawo chilambochi yalumo ni Atati ŵakwe. (Mis. 8:30) Kaneko pajwaliji pachilambopa, Yesu jwakamulichisye masengo yachilengedwe pakwajiganya ŵakulijiganya ŵakwe yakwamba Atati ŵakwe. Kwende tulole yindu yine yamnono yiŵajiganyisye Yesu pakamulichisya masengo yindu yachilengedwe.

¹⁰ Yehofa akusiŵanonyela ŵandu wosope. Pakulalichila kwa petumbi, Yesu ŵasalile ŵakumkuya ŵakwe yakwamba wula soni lyuŵa yindu yele ŵandu ŵajinji ŵangayiganichisyaga kuti yili yakusosekwa mnope. Nambotu yindu yeleyi yili yakusosekwa mnope paumi wetu. Yikakomboleche kuti Yehofa akapaga wula soni lyuŵa ŵandu ŵangakusamtumichilaga. Mmalomwakwe, mwachinonyelo jwalakwe akusapeleka wula soni lyuŵa kwa ŵandu wosope. (Mat. 5:43-45) Yesu jwakamulichisye masengo mfundo jeleji pakwajiganya ŵakumkuya ŵakwe kuti Yehofa akusasaka kuti m’wejisoni twalosyeje chinonyelo ŵandu wosope. Patukusangalala ni kusalala kwa lyuŵa palikukapila nambosoni kusangalasya kwa wula pajikugwa yitukamuchisyeje kumanyilila kuti Yehofa ali jwangali lusagu. Chisyasyo chakwechi mpaka chitukamuchisye kuŵambala lusagu patukulalichila.

11. Ana kuganichisya mwayikusapatila yakulya yijuni mpaka kutulimbikasye chamtuli?

¹¹ Yehofa akusatupa yindu yakusosechela paumi wetu. Pakulalichila kwa petumbi, Yesu jwasasilesoni kuti, “Mlolechesyeje yijuni yamwinani, yangapanda mbeju kapena kugowola kapena kututila mu ngokwe, nambo Atati ŵenu ŵakwinani akusayilisya.” Komboleka kuti ŵandu ŵaŵampikanilaga Yesu ŵayiwonaga yijuni yili mkuguluka mwinani, jwalakwe paŵawusisye kuti, “Ana jemanja ngaŵa ŵakusosekwa mnope kuyipunda yijuniyi?” (Mat. 6:26) Yeleyitu yikutusimichisya kuti Yehofa ali jwakusachilila kutupa yakusosechela yetu yapaumi. (Mat. 6:31, 32) Yaŵatesile Yesu pakwiganya pakamulichisya masengo yindu yachilengedwe yikusiyalimbikasya ŵakutumichila ŵa Mlungu ŵakulupichika. Mlongo jwine jwachisikana jwakutenda upayiniya ku Spain jwatengwiche ligongo lyakuti nganapataga malo gambone gakutama. Nambo jwalakwe paŵayiweni yijuni yili mkulokota yakulya yamlimbikasisye mwamti jwasasile kuti, “Yijuniyi yangumbwisye kuti Yehofa akusayisamalilaga, mwamti yeleyi ni yachachindendelasoni uneji.” Mkanipapite ndaŵi mlongoju jwapatile malo gambone gakutama.

12. Mwakamulana ni Mateyu 10:29-31, ana yiwunga yikusatujiganya yamtuli yakwamba Yehofa?

¹² Yehofa akusamwona jwalijose jwetuwe kuŵa jwakusosekwa mnope. Mkanaŵe kwatumisya ŵandumetume ŵakwe kukulalichila, Yesu ŵakamuchisye jemanjajo kuti akaja kutendaga woga ŵandu pakwasisya. (Aŵalanje Mateyu 10:29-31.) Jwatesile yeleyi mwakwasalila jemanjajo ya yiwunga yayaliji yijuni yakumanyika mnope ku Isalayeli. Yijuni yeleyi ŵandu nganayiŵalanjilaga mnope mu ndaŵi ja Yesu. Nambo jwalakwe jwasalile ŵakumkuya ŵakwe kuti, “Pangali atamose kamo kampaka kagwile pasi Atati ŵenu ni ngamanyilila.” Kaneko jwasalilesoni kuti, ‘Jemanja mli ŵakusosekwa mnope kupunda tuwunga twejinji.’ Pelepa Yesu ŵakamuchisye ŵakumkuya ŵakwe kumanyilila kuti Yehofa akusamwona jwalijose jwa jemanjajo kuŵa jwakusosekwa mnope. Yeleyi yakamuchisye kuti jemanjajo akatenda woga. Myoyo jemanjaji paŵalalichilaga mtawuni soni mmisi ni kuyiwona yiwunga, ŵakumbuchilaga maloŵe ga Yesu gala. Mwamti wawojosoni pakaweni kajuni kamwana yakumbusyeje kuti Yehofa akusiŵawona kuti “ali ŵakusosekwa mnope kuyipunda yiwunga.” Mwamti ngakusosekwa kutenda woga ŵandu pakwasisya.—Sal. 118:6.

13. Ana chichi champaka chitukamuchisye kuti tulijiganyeje kutyochela mu yindu yachilengedwe?

¹³ Mpaka tulijiganye yindu yejinji yakwamba Yehofa kutyochela mu yindu yiŵapanganyisye. Ana mpaka tutende chamtuli yeleyi? Chandanda tukusosekwa kupataga ndaŵi jakulola yindu yachilengedwe. Kaneko tukusosekwa kuganichisya yatukulijiganya kutyochela ku yinduyi pakwamba ya Yehofa. Nambo ndaŵi sine kutenda yeleyi mpaka kuŵe kwakusawusya. Mwachisyasyo, mlongo jwine jwa ku Cameroon jwasasile kuti, “Nakulile mtawuni, myoyo nayikopochele kuti nasosekwaga kulimbichila kuti mbateje ndaŵi jakulola yindu yachilengedwe.” Jwamkulungwa jwa mumpingo jwine lina lyakwe Alfonso jwatite, “Namanyilile kuti nasosekwaga kola ndandanda jakutama pajika ni kulolaga yindu yaŵapanganyisye Yehofa, soni ganichisya yayikunjiganya yinduyi pakwamba ya jwalakwe.”

14. Ana Daudi jwalijiganyisye chichi pajwaganichisyaga yindu yaŵapanganyisye Mlungu?

¹⁴ Daudi jwaganichisyaga mnope yindu yaŵapanganyisye Mlungu. Jwalakwe jwamsalile Yehofa kuti, “Pingukuwona kwinani masengo ga magasa gawo, mwesi ni ndondwa siŵasiŵisile kweleko, ngusaliwusya kuti, ‘Ana mundu ali nduni kuti ŵalakwe akumkumbuchila?’” (Sal. 8:3, 4) Daudi pajwalolaga kwinani nganagambaga kusangalala ni mwasyawonechelaga ndondwa. Nambo jwalakwe jwaganichisyagasoni yasikumjiganya ndondwasyo pakwamba ya ukulu wa Mlungu. Pandaŵi jine, Daudi jwaganichisyesoni yaŵatite pakupanganyidwa jwalakwe pajwaliji mchitumbo cha mamagwe. Kuganichisya yindu yakusimonjesyayi kwamtendekasisye kuti aganichisyeje mnope lunda lwakwete Yehofa.—Sal. 139:14-17.

15. Asale yisyasyo ya yindu yachilengedwe yiyajiganyisye wawojo ndamo syakwete Yehofa. (Salimo 148:7-10)

¹⁵ Mpaka yiŵe yangasawusya kupata yindu yachilengedwe yampaka tuyiganichisyeje mpela muyaŵelele ni Daudi. Pakulola yindu yayasyungulile mpaka alijiganye ndamo syejinji syakwete Yehofa. Mwachisyasyo, mpaka amanyilile machili gakwete Yehofa pakupikana machili ga mtukuta wa lyuŵa pawuyiche pa chilu chawo. (Yel. 31:35) Mpaka amanyililesoni lunda lwakwete Yehofa pachiweni chijuni chili mkutaŵa chisusi chakwe. Nambosoni mpaka amanyilile kuti Yehofa akusasaka kuti tusangalaleje pakaweni kapwa kali mkutenganya mchila. Amyamichilejesoni Yehofa ligongo lya chinonyelo chakwe paŵaweni mama ali mkukunguluka ni kamwanache kawo. Kusala yisyene, tukwete yindu yejinji yakutukamuchisya kulijiganya yakwamba Yehofa kupitila mu yindu yosope yajwapanganyisye. Mwamti chinga yinduyi yili yekulungwa, yamwana, yayituŵandichile kapena yayili kutali, yosopeyi mpaka yitukamuchisye ligongo yikusamchimbichisya jwalakwe.—Aŵalanje Salimo 148:7-10.

16. Ana tuli wakusimichisya kutenda chichi?

¹⁶ Mlungu jwetu ali jwalunda, jwachinonyelo soni jwamachili mnope. Mwamti chilichose chajwapanganyisye jwalakwe chili chambone mnope. Mpaka tulijiganye ya ndamo syelesi soni ndamo sine patukulola yindu yachilengedwe yayitusyungulile. Myoyo, kwende ndaŵi syosope tulinjelinjeje kupata ndaŵi jakusangalala ni yindu yachilengedwe soni kuganichisya yayikutujiganya pakwamba ya Yehofa. Kutenda yeleyi kuchitukamuchisya kuti tumŵandichile Mlungu jwetu juŵapanganyisye yindu yeleyi. (Yak. 4:8) Mungani jakuyichisya, tuchilola yampaka atende achinangolo pakamulichisya masengo yindu yachilengedwe pakwakamuchisya ŵanache ŵawo kuti aŵe paunasi wambone ni Yehofa.