Ciwombolo Cili ‘Mtuka Wamlama’ Wakutyocela kwa Atati

 1. Ana ciwombolo cikusatupa upile watuli?

MBOPESI ja ciwombolo ja Yesu Klistu jikusakombolekasya kuti tupocele majali gamajinji. Yaŵatesile Mlungu pakulinganya ya ciwombolo, yawugwile mlango wakuti ŵanace wosope ŵa Adamu ŵakusanonyela cilungamo pambesi pakwe caŵe m’liŵasa lya Mlungu. Ciwombolo cikusatupasoni upile wakuti citutame mwakusangalala kwangamala. Nambope, ciwombolo ca Klistu cikusakombolekasya yejinji kupunda pakwamba kuyikasya majali gamsogolo kwa ŵandu ŵakupikanila. Kusacilila kwa Yesu kuwa ali jwakulupicika kwa Yehofa kukusakamulana ni ngani syakusosekwa mnope syasikusamkwaya jwalijose kwinani ni pacilambo capasi.—Ahe. 1:8, 9.

 2. (a) Ana ngani syapi syakusosekwa mnope syasikusimanikwa m’lipopelo lya Yesu syasikumkwaya jwalijose kwinani soni pacilambo capasi? (Alole ciwulili cacili penanipa.) (b) Ana citutagulilane cici munganiji?

² Kuli kusigele yaka yiŵili kuti Yesu awulajidwe, ŵajiganyisye ŵakulijiganya ŵakwe kupopela kuti, “Atati ŵetu ŵakwinani, lina lyawo liswejesyedwe. Ucimwene wawo uyice. Lisosa lyawo litendekwe pacilambo capasi, mpela kwinani.” (Mat. 6:9, 10) Kwende tutagulilane mwele ciwombolo cikamucisya kuswejesya lina lya Mlungu, kuyikasya majali pasi pa Ucimwene wa Mlungu, soni kwanilisya lisosa lya Mlungu.

 3. Ana lina lya Yehofa likusalosya cici, soni ana Satana ŵalisakesye catuli?

³ Mu lipopelo lyakwe lyacisyasyo, Yesu ŵatandite ni kuŵenda kuti lina lya Mlungu liswejesyedwe. Lina lya Yehofa likusalosya mwaŵelele msyenejo kuti ali jwapenani mnope, jwamacili mnope soni jwamswela. Mu lipopelo line, Yesu ŵamkolasile Yehofa kuti, “Atati Ŵaswela.” (Yoh. 17:11) Pakuŵa Yehofa ali jwamswela, malamusi gakutulongola gakusapeleka soni yosope yakusatenda yili yeswela. Nambo mumgunda wa Edeni, Satana mwakalamuka ŵasisisye kuti Mlungu ngakuŵajilwa kwapa ŵandu malamusi. Ligongo lyakuti ŵalambwisye yakwamba Yehofa, Satana ŵasakesye lina lyeswela lya Mlungu.—Gen. 3:1-5.

 4. Ana Yesu ŵakamucisye catuli kuswejesya lina lya Mlungu?

⁴ Nambo mwakulekangana ni Satana, Yesu ŵalinonyelaga mnope lina lya Yehofa. (Yoh. 17:25, 26) Jwalakwe ŵakamucisye kuswejesya lina lya Mlungu. (Aŵalanje Salimo 40:8-10.) Paŵaliji pacilambo capasi, Yesu ŵatendaga yindu yakuŵajilwa, yayalosisye kuti yili yakupikanika soni yakuŵajilwa kuti Yehofa ŵaŵicileje ŵandu malamusi. Atamose pandaŵi jele Satana ŵatendekasisye kuti Yesu awe ciwa cakupweteka mnope, jwalakwe ŵaŵelepe jwakulupicika kwa Atati ŵakwe. Yaŵatesile Yesu pakwendelecela kuŵa jwakulupicika yalosisye kuti mundu jwamlama mpaka ajendelecele kupikanila malamusi gakulungama ga Mlungu.

 5. Ana mpaka tulosye catuli kuti tukusalinonyela lina lya Mlungu?

⁵ Ana mpaka tulosye catuli kuti tukusalinonyela lina lya Mlungu? Mpaka tulosye yeleyi kupitila m’yitendo yetu. Yehofa akusasaka kuti tuŵeje ŵaswela. (Aŵalanje 1 Petulo 1:15, 16.) Yeleyi yikugopolela kuti tukusosekwa kumlambila Yehofa jika soni kumpikanila ni mtima wetu wosope. Atamose patukulagasidwa, tukusosekwa kulingalinga kutenda yindu mwakamulana ni malamusi gakulungama ga Yehofa. Patukutenda yindu yakuŵajilwa, tukusalosya lilanguka lyetu soni yeleyi yikusayikasya ucimbicimbi ku lina lya Yehofa. (Mat. 5:14-16) Mwatukusatendela yindu paumi wetu, tukusalosya kuti malamusi ga Mlungu gali gambone soni kuti yaŵasasile Satana yili yaunami. Patutesile yakulemwa, tukusapitikuka mtima ni kuleka yitendo yangamcimbicisya Yehofa.—Sal. 79:9.

 6. Ligongo cici Yehofa akusatuwona kuŵa ŵakulungama atamose kuti tuli ŵangali umlama?

⁶ Pakamulicisya masengo mbopesi ja Yesu, Yehofa akusiŵakululucila ŵandu ŵakusalosya cikulupi. Yehofa akusiŵakunda ŵandu ŵalipelece kwa jwalakwe kuŵa ŵakulambila ŵakwe. Yehofa akusiŵawona Aklistu ŵasagulwe kuŵa ŵanace ŵakwe ŵakulungama soni ‘ŵangondolo sine’ kuŵa acimjakwe ŵakulungama. (Yoh. 10:16; Alo. 5:1, 2; Yak. 2:21-25) M’yoyo atamose apanopano, ciwombolo cikukombolekasya kuti tuŵe ŵakulungama pameso pa Atati ŵetu soni kuti tukamucisyeje pakuswejesya lina lya Yehofa.

 7. Ana ciwombolo cicikombolekasya majali gatuli pasi pa ulamusi wa Ucimwene?

⁷ Mu lipopelo lyacisyasyo lila, Yesu ŵam’ŵendilesoni Mlungu kuti, “Ucimwene wawo uyice.” Ana ciwombolo cikusakamulana catuli ni Ucimwene wa Mlungu? Ciwombolo cikombolekasisye kuti papagwe ŵandu ŵakwana 144,000 ŵakuti akaŵe mayimwene soni ŵambopesi pampepe ni Klistu kwinani. (Ciu. 5:9, 10; 14:1) Yesu pampepe ni ŵandu ŵeleŵa, cacakamucisya ŵandu ŵakupikanila kuti casangalale ni majali gakwika ligongo lya ciwombolo mkati mwa yaka 1,000 ya ulamusi wa Ucimwene. Pandaŵijo, cilambo capasi cicicenga ni kuŵa paladaiso, soni ŵandu ŵakulupicika wosope caciŵa ŵamlama. Pambesi pakwe ŵakutumicila ŵa Mlungu kwinani ni pacilambo capasi caciŵa liŵasa limo lyakamulana yisyesyene. (Ciu. 5:13; 20:6) Yesu cacikasa mtwe wa lijoka soni kumasya yakusawusya yosope yakwika ligongo lya kwimucila kwa Satana.—Gen. 3:15.

 8. (a) Ana Yesu ŵakamucisye catuli ŵakulijiganya ŵakwe kuti awuwoneje Ucimwene wa Mlungu kuŵa wakusosekwa? (b) Ana tukusalosya catuli kuti tuli ku mbali ja Ucimwene?

⁸ Yesu paŵaliji pacilambo capasi, ŵakamucisye ŵakulijiganya ŵakwe kuti awuwoneje Ucimwene wa Mlungu kuŵa wakusosekwa mnope. Paŵagambile kubatiswa, jwalakwe ŵatandite kulalicila “ngani syambone syakwamba ya Ucimwene wa Mlungu” m’mikuli jakulekanganalekangana. (Luk. 4:43) Yesu mkanajawule kwinani, ŵasalile ŵakulijiganya ŵakwe kuti aŵe mboni syakwe mpaka “kumbesi kwa cilambo capasi.” (Mase. 1:6-8) Kupitila m’masengo gakulalicila ya Ucimwene, ŵandu ŵajinji pacilambo cosope akwete upile wakulijiganya yakwamba ciwombolo ni kusagula kuŵa ku mbali ja Ucimwene wa Mlungu. Masiku agano, tukusalosya kuti tuli ku mbali ja Ucimwene mwakujigala nawo mbali pa masengo gakulalicila ngani syambone syakwamba ya Ucimwenewo, gagakutendekwa pacilambo cosope.—Mat. 24:14; 25:40.

 9. Ligongo cici mpaka tusimicisye kuti Yehofa cacikwanilisya lisosa lyakwe kwa ŵandu?

⁹ Ana Yesu ŵagopolelaga cici paŵasasilesoni kuti, “Lisosa lyawo litendekwe”? Yehofa ali Mkupanganya jwa yindu yosope. Naga jwalakwe asasile kuti cinecakwe citendekwe, nganiciŵa cilepelece. (Yes. 55:11) Yehofa nganaŵa akundile kuti kwimucila kwa Satana kulepelekasye lisosa lyakwe kwa ŵandu. Kutandila pandanda, Yehofa ŵasakaga kuti cilambo capasi cigumbale ni ŵanace ŵamlama ŵa Adamu ni Hawa. (Gen. 1:28) Yikaŵe kuti Adamu ni Hawa ŵawile ali mkanaŵelece ŵanace, nikuti lisosa lya Mlungu lyakuti cilambo capasi cigumbale ni ŵanace ŵawo likalepelece. Ni ligongo lyakwe Adamu ni Hawa paŵalemwisye, Yehofa ŵakundilepe jemanjaji kuti aŵelece ŵanace. Kupitila mu ciwombolo, Mlungu akupeleka upile kwa wosope ŵakusalosya cikulupi kuti caŵe ŵamlama soni catame ni umi kwangamala. Yehofa akusiŵanonyela ŵandu, soni akusasaka kuti ŵandu ŵakupikanila atameje ni umi wambone.

10. Ana ciwombolo cicikombolekasya yatuli kwa ŵandu ŵaŵawile?

¹⁰ Nambi wuli pakwamba ya ŵandu ŵajinji ŵaŵawile ali mkanakole upile wakulijiganya ya Yehofa soni kumtumicila? Ciwombolo cicikombolekasya kuti jemanjaji cajimuce ku ŵawe. Atati ŵetu ŵacinonyelo cacajimusya jemanjaji ni kwapa upile wakuti alijiganye yakwamba lisosa lyakwe ni kupata umi wangamala. (Mase. 24:15) Yehofa jwangasaka kuti ŵandu aweje, nambo kuti aŵeje cijumi. Pakuŵa jwalakwe ali Cisima ca umi, caciŵa Mtati kwa wosope ŵakwimuka ku ŵawe. (Sal. 36:9) Ni ligongo lyakwetu Yesu ŵatujiganyisye kuti tupopeleje kuti “Atati ŵetu ŵakwinani.” (Mat. 6:9) Yehofa ampele Yesu masengo gakusosekwa mnope gakwimusya ŵandu ŵawe. (Yoh. 6:40, 44) Mu Paladaiso, Yesu cacikwanilisya ukumu wakwe mpela muŵasalile kuti, “Une ndili kwimuka soni umi.”—Yoh. 11:25.

11. Ana lisosa lya Mlungu kwa “likuga lyekulungwa lya ŵandu” lili lyatuli?

¹¹ Yehofa akuŵilanga jwalijose kuti aŵe m’liŵasa lyakwe. Yesu ŵasasile kuti, “Jwalijose jwakusatenda lisosa lya Mlungu, jwelejo ni mlongo mjangu, mlumbwangu soni mama ŵangu.” (Maliko 3:35) Mlungu akusasaka kuti “likuga lyekulungwa lya ŵandu” ŵakutyocela mu mtundu uliwose, lukosyo lulilose, soni ciŵeceto cilicose kuti aŵe ŵakulambila ŵakwe. Wosope ŵakusakulupilila ciwombolo ca Klistu soni kutenda lisosa lya Mlungu cacigumila kuti, ‘Cikulupusyo cikusatyocela kwa Mlungu jwetu jwatemi pacitengu ca Ucimwene, soni kwa Mwanace jwa Ngondolo.’—Ciu. 7:9, 10.

12. Ana lipopelo lyacisyasyo lya Yesu likusalosya catuli lisosa lya Yehofa kwa ŵandu ŵakupikanila?

¹² Yaŵaŵendile Yesu m’lipopelo lyakwe lyacisyasyo yitukamucisye kumanyilila lisosa lya Yehofa kwa ŵandu ŵakupikanila. Mwakamulana ni lipopeloli, tukusosekwa kutenda yiliyose yakomboleka kuti tuswejesye lina lya Yehofa. (Yes. 8:13) Lina lyakuti Yesu likusagopolela kuti “Yehofa Ali Cikulupusyo.” Nambosoni cikulupusyo catukupata ligongo lya ciwombolo ca Yesu cikusayikasya ucimbicimbi ku lina lya Yehofa. Ucimwene wa Mlungu uciyikasya majali ga ciwombolo kwa ŵandu ŵakupikanila. Kusala yisyene, lipopelo lyacisyasyo lya Yesu likutusimicisya kuti pangali cilicose campaka cilepelekasye lisosa lya Mlungu.—Sal. 135:6; Yes. 46:9, 10.

13. Ana kubatiswa kukusapeleka umboni watuli?

¹³ Litala limo lyampaka tulocesye kuti tukusayamicila ciwombolo lili kulipeleka kwa Yehofa soni kubatiswa pakulosya kuti tukukulupilila ciwombolo. Kubatiswa kukusapeleka umboni wakuti “tuli ŵa Yehofa.” (Alo. 14:8) Patukubatiswa tukusaŵa kuti tukum’ŵenda Mlungu kuti atupe cikumbumtima cambone. (1 Pet. 3:21) Yehofa akusatujanga mwakutuswejesya ni miyasi ja mbopesi ja Klistu. Tuli ŵakusimicisya kuti jwalakwe cacitupa yosope yaŵatulagwisye.—Alo. 8:32.

14. Ligongo cici tukusosekwa kwanonyela acimjetu?

¹⁴ Ana litala line lyampaka tulocesye kuyamicila ciwombolo lili lyapi? Pakuŵa Yehofa akusatenda yindu yosope mwakamulana ni ndamo jakwe ja cinonyelo, jwalakwe akusasakasoni kuti ŵakulambila ŵakwe wosope alosyeje ndamo japenaniji. (1 Yoh. 4:8-11) Tukusalosya kuti tukusasacilila kuŵa “ŵanace ŵa Atati [ŵetu] ŵakwinani” mwakwanonyela acimjetu. (Mat. 5:43-48) Lilamusi lyakuti twanonyeleje acimjetu lili lyaŵili ku lilamusi lyekulungwa lyakuti tumnonyeleje Yehofa. (Mat. 22:37-40) Litala limo lyakulocesya cinonyelo kwa acimjetu lili kupikanila lilamusi lyakuti tulalicileje ngani syambone syakwamba ya Ucimwene wa Mlungu. Patukupikanila lilamusi lyakuti twanonyeleje ŵane, mnopemnope abale ŵetu, cinonyelo cetu kwa Mlungu cikusakula.—1 Yoh. 4:12, 20.

15. (a) Ana Yehofa akutupa majali gatuli apanopano? (b) Ana kusogoloku tukwembeceya majali gatuli?

¹⁵ Patukukulupilila ciwombolo, Yehofa akusatukululucila yakulemwa yetu. Maloŵe gakwe gakusatusimicisya kuti jwalakwe mpaka asimasye yakulemwa yetu yosope. (Aŵalanje Masengo 3:19-21.) Mpela mwatulijiganyicisye, Yehofa akusiŵajigala Aklistu ŵasagulwe kuti aŵe ŵanace ŵakwe kupitila mu ciwombolo. (Alo. 8:15-17) Nambo kwa m’weji ŵatuli ‘ŵangondolo sine’ yili mpela kuti Yehofa agambile kutuŵilanga kuti tuŵe mbali japacilambo capasi ja liŵasa lyakwe. Naga tukwendelecela kuŵa ŵakulupicika mpaka patuciŵa ŵamlama ni kupunda yakulingwa yakumalisya, Yehofa cacitujigalasoni kuti tuŵe ŵanace ŵakwe ŵapacilambo capasi. (Alo. 8:20, 21; Ciu. 20:7-9) Yehofa cacijendelecela kwanonyela ŵanace ŵakwe mpaka kalakala. Nambosoni jemanjaji cacisangalalaga ni majali ga ciwombolo kwangamala. (Ahe. 9:12) Mtuka welewu uli wapenani mnope soni pangali cakupanganyikwa cilicose campaka citusumule.

16. Ana ciwombolo cikusatukamucisya catuli kuŵa ŵagopoka yisyesyene?

¹⁶ Satana nganaŵa ŵalepelekasisye ŵandu ŵapitikwice mtima yisyesyene kuti kumbesi kwakwe caŵe mbali ja liŵasa lya Yehofa. Yesu ŵayice pacilambo capasi ni kuwa “kamope basi.” Yeleyi yikulosya kuti ciwombolo cana macili kundaŵi syosope. (Ahe. 9:24-26) Cikusasiŵa ulemwa wosope watwajigalile kwa Adamu. Tukusayamicila mnope mbopesi ja Klistu ligongo jatugopwele ku ukapolo wa cilambo ca Satanaci mwati ngatukusajogopasoni ciwa.—Ahe. 2:14, 15.

17. Ana cinonyelo ca Mlungu cikusakwaya mwatuli wawojo?

¹⁷ Yaŵalagucisye Mlungu nganiyiŵa yilepelece. Mpela mwele malamusi gaŵaŵisile Mlungu m’cipago gakusaŵa gangacenga, Yehofasoni nganaŵa acenjile. (Mal. 3:6) Yehofa akusatupa yindu yejinji ngaŵaga mtuka wa umipe. Jwalakwe akusatupasoni cinonyelo. “Tukusamanyilila soni kulupilila ya cinonyelo cakwete Mlungu petuwe. Mlungu ali cinonyelo.” (1 Yoh. 4:16) Cilambo cosope capasi ciciŵa paladaiso jwakusalala mnope, soni jwalijose pacilambo cacilosyaga cinonyelo ca Mlungu. Kaneko ŵakutumicila ŵa Mlungu kwinani soni pacilambo capasi caciŵeceta maloŵe gakuti, ‘Lumbili, lunda, kuyamicila, ucimbicimbi, soni macili yiŵe kwa Mlungu jwetu mpaka kalakala. Ami.’—Ciu. 7:12.