Ana Baibulo Jikusasala Yamtuli Yakwamba Kusoŵa kwa Wula?

• Nyusipepala jine (The Guardian) ja pa Sepitemba 7, 2022 jasasile kuti “Chaka achino ku China kutesile mnope chitukuta, mwamti chawu cha chakachi chili chatatu payawu yosope yachitukuta mnope yayitendekwe ku China.

• Nyusipepala ja bungwe ja United Nations ja Ogasiti 26, 2022 jasasile kuti, “Yilambo yine yakungopoko lyuŵa chakumpoto kwa Africa yiŵele yili mkulaga mnope ni kusoŵa kwa wula kwa yaka 5 soni yeleyi chiyipitilisye kutendekwa.”

• Lipoti lya BBC lya pa Ogasiti 23, 2022 lyasasile kuti “Yilambo yejinji ku Europe chiyilaje mnope ni kusoŵa kwa wula yanganiyichitendekwejepo mu yaka 500 yipiteyi.”

Ŵamlijiganye ŵajinji akusala kuti wulaji jipitilisye kusoŵa soni yindu chiyiyikane pakusawusya mnope. Ana pelepa nikuti pana chembecheyo chakuti yindu yichiŵa chenene msogolo? Ana Baibulo jikusasala yamtuli?

Baibulo jasasile kala kuti masiku agano:

• “Kuchiŵa sala . . . mmalo gakulekanganalekangana.”—Luka 21:11.

Ndaŵi syejinji kusoŵa kwa wula kukusatendekasya kuti kuŵeje sala. Mwamti salaji jikusatendekasya kuti ŵandu alajeje soni kuwa. Yeleyitu yigamba kwanilisya yakulochesya ya m’Baibulo.—Chiwunukuko 6:6, 8.

Baibulo jikusasala mfundo jakupikanika jakwamba ligongo lyakwe wula jikupitilisya kusoŵa. Jikusati:

• “mundu ngaŵa mkomboleka kulilongolela jikape.”—Yelemiya 10:23.

Yeleyi yikugopolela kuti ŵandu nganaŵa akombwele “kulilongolela” kapena kulilamulila achimsyene. Ligongo lya yeleyi yitendo ya ŵandu yikonanga chilengedwe yayikutendekasya kuti wula soni mesi yisoŵeje.

• Ŵasayansi ŵajinji akwitichisya kuti yitendo ya ŵandu yikutendekasya kuti pachilambopa paŵeje mtukuta mnope. Mwamti yeleyi yikutendekasya kuti wula jipitilisye kusoŵa pachilambo chosope.

• Kulinonyela soni kupanganya malamusi mwangaganichisya yakusogolo yitendekasisye kuti ŵandu agambeje kata yitela mwachisawawa, konanga mpweya, mesi soni chajila. Konjechesya pelepa kamulichisya masengo yindu yachilengedwe mwakulemwecheka kutendekasisye kuti nombe nago mesi gasoŵeje.

Atamose yili myiyi, Baibulo jikusatusalila kuti tukwete sogolo jambone.

Baibulo jikusatusalilaga kuti Mlungu chachitendekasya kuti mesi gakasoŵaga pachilambopa. Ana chachitenda yeleyi mwamtuli?

1. 1. Mlungu ‘chachajonaga ŵandu wosope ŵakuchijonanga chilambo chapasi.’ (Chiwunukuko 11:18) Mlungu chachilolechesya kuti mesi gakasoŵaga. Mwamti jwalakwe chachajonanga ŵandu ŵakulinonyela ŵele yitendo yawo yikonanga chilambochi.—2 Timoteyo 3:1, 2.

2. 2. “Chilambo chejumu tichichisyuka nduluko sya mesi.” (Yesaya 35:1, 6, 7) Mlungu chachityosya yakusawusya yayiyiche ligongo lyakusoŵa kwa wula. Nambosoni chachilinganya chilambochi kuti chiŵe chakusalala soni changasoŵa mesi.

3. 3. “Ŵalakwe akusalosya chisamalilo chawo pachilambo chapasi pakuchipa ula, akusachitendekasya kuti chiŵe chachajila.” (Salimo 65:9) Ligongo lya chikamuchisyo cha Mlungu, chilambochi chichigumbala ni yakulya soni mesi gambone kwa ŵandu wosope.