LIJIGANYO 15
Ana Yesu ali Ŵani?
Yesu ali jwakumanyika mnope mu mbili josope ja ŵandu Atamose kuti ŵandu ŵajinji akusamanyilila lina lyakwe, nambope jemanjaji ŵangamanyililaga yejinji ya jwalakwe. Nambosoni ŵane akwete nganisyo syakulekanganalekanga syakwamba Yesu. Nambo ana Baibulo jikusati uli pakwamba ya jwalakwe?
1. Ana Yesu ali ŵani?
Yesu akusatama kwinani soni ali lilayika lyamachili. Jwalakwe jwaliji jwandanda kupanganyidwa, Yehofa Mlungu mkanapanganye chilichose. Ni ligongo lyakwe jwalakwe akusamanyika kuti “jwandanda kupagwa jwa yakupanganyikwa yosope.” (Akolose 1:15, NWT) Baibulo jikusasalasoni kuti Yesu ali “mwanache jumopejo” juŵapanganyidwe mwakulekangana ni yakupanganyidwa yine. (Yohane 3:16) Yesu ŵakamwile masengo gakupanganya yindu pampepe ni Atati ŵakwe, ŵali Yehofa. (Aŵalanje Misyungu 8:30.) Jwalakwe ali paunasi wambone mnope ni Yehofa, mwamti akusakamulaga masengo gakumŵechetela Mlungu mwakulupichika. Yesu akusakolanjidwasoni kuti “Liloŵe.” Yeleyi yili myoyo ligongo lyakuti jwalakwe akusapeleka mawutenga soni malamusi kwa ŵandu.—Yohane 1:14.
2. Ana ligongo chichi Yesu jwayiche pachilambo chapasi?
Chiŵandika yaka 2,000 yipiteyo, Yehofa jwatesile chakusimonjesya. Jwalakwe jwakamulichisye masengo msimu wakwe weswela, pakuwusamisya umi wa Yesu kutyoka kwinani ni kuwuŵika mwamwali jwine, lina lyakwe Maliya. Kaneko, jwalakwe jwapagwile pachilambopa mpela mundu. (Aŵalanje Luka 1:34, 35.) Yehofa ŵamtumisye Yesu kuti chaŵe Mesiya kapena kuti Klistu, ni chakulinga chakuti ŵakulupusye ŵandu.a Chilichose chajasasile Baibulo mkanipaŵe chakwamba Mesiya chatendekwe kupitila mwa Yesu. Yeleyi yakamuchisye ŵandu kumanyilila kuti Yesu ali “Mwanache jwa Mlungu jwachijumi.”—Mateyu 16:16.
3. Ana apano Yesu ali kwapi?
Yesu ali awile, Mlungu ŵamjimwisye jwalakwe mpela lilayika soni jwawujile kwinani. Kwinaniko, “Mlungu ŵampele Klistu ulamusi pa yindu yosope ni ŵamŵisile kuŵa jwamkulungwa jwa mpingo.” (Aefeso 1:22) Patukuŵecheta pano, Yesu akwete ulamusi wa machili. Atamose yili myoyo Yehofa ni jwali jwakulamulila jwamkulungwa mnope kupunda Yesu.
KULIJIGANYA YEJINJI
Alijiganye yejinji yakwamba Yesu. Amanyililesoni ligongo lyakwe kulijiganya ya jwalakwe kuli kwakusosekwa mnope.
4. Yesu ngaŵa kuti ali Mlungu
Baibulo jikusajiganya kuti atamose kuti Yesu ali lilayika lyamachili mnope lyakwinani, nambope jwalakwe akusampikanila Yehofa ŵali Atati ŵakwe. Ligongo chichi tukuŵecheta myoyo? Alolele FIDIYO kuti amanyilile yajikusajiganya Baibulo yakwamba kulekangana kwakupali pasikati pa Yesu ni Mlungu.
Malemba gakuyichisyaga chigatukamuchisye kumanyilila ya unasi wawupali pasikati pa Yehofa ni Yesu. Aŵalanje malemba gakuyichisyaga kaneko akambilane yiwusyo ayi.
Aŵalanje Luka 1:30-32.
Ana yalyasasile lilayika yikulosya chamtuli kuti Yesu ni Yehofa Mlungu jwali ‘Jwakwinani Mnope’ ali ŵandu ŵaŵili ŵalekangane?
Aŵalanje Mateyu 3:16, 17.
Ana pa ubatiso wa Yesu papikaniche maloŵe gamtuli gakutyochela kwinani?
Ana akuganisya kuti maloŵega galiji ga ŵani?
Aŵalanje Yohane 14:28.
Pasikati pa Atati ni mwanache, ana ŵani ŵali ŵakulungwa soni ŵani ŵakwete ulamusi wekulungwa?
Ana yaŵaŵechete Yesu yakuti Yehofa ali Atati ŵakwe, yikutujiganya chichi?
Aŵalanje Yohane 12:49.
Ana Yesu akusaganisyaga kuti jwalakwe ali jwakulandana ni Atati ŵakwe? Ana wawojo akuganisya uli?
5. Umboni wakulosya kuti Yesu ali Mesiya
M’Baibulo mwana yakulochesya yejinji yayakamuchisye ŵandu kummanyilila Mesiya, jwele jwasagulidwe ni Mlungu kuti ŵakulupusye ŵandu. Alolele FIDIYO kuti alijiganye yakwamba yakulochesya yine yaŵakwanilisye Yesu ali pachilambo chapasi.
Aŵalanje yakulochesya ya m’Baibulo yayili pasiyi, kaneko akambilane yiwusyo yakuyichisyayi:
Aŵalanje Mika 5:2 kuti amanyilile kuŵapagwile Mesiya.b
Ana kupagwa kwa Yesu kwakwanilisye chamtuli chakulochesyachi?—Mateyu 2:1.
Aŵalanje Salimo 34:20 soni Sakaliya 12:10 kuti amanyilile yejinji yajasasile Baibulo pakwamba ya chiwa cha Mesiya.
Ana yakulochesya yeleyi yakwanilichikwe?—Yohane 19:33-37.
Ligongo chichi yaliji yangakomboleka kuti Yesu atendekasye yakulochesyayi kwanilichikwa?
Ana yeleyi yikutusalila chichi yakwamba Yesu?
6. Kulijiganya yakwamba Yesu kukusatukamuchisya
Baibulo jikusasala kusosekwa kwa kulijiganya yakwamba Yesu soni udindo wakwete. Aŵalanje Yohane 14:6 soni 17:3, kaneko akambilane chiwusyo achi:
Ana ligongo chichi kulijiganya yakwamba Yesu kuli kwakusosekwa?
Yesu jwawugwile litala kuti tuwe paunasi wambone ni Mlungu. Jwalakwe jwajiganyisye usyesyene wakwamba Yehofa. Soni kupitila mwa jwalakwe tuchipata umi wangamala.
YAKUSAŴECHETA ŴANDU ŴANE: “Ŵa Mboni sya Yehofa akusakulupilila kuti Yesu ali Mwanache jwa Mlungu. Yili yangakomboleka kuti Mlungu akole mwanache.”
Ana mpaka ajanje uli?
YALIJIGANYISYE
Yesu ali lilayika lyamachili. Jwalakwe ali Mwanache jwa Mlungu soni ali Mesiya.
Yiwusyo Yakuwilisya
Ligongo chichi Yesu akusakolanjidwa kuti “jwandanda kupagwa jwa yakupanganyikwa yosope”?
Ana Yesu jwatendaga chichi mkanayiche pachilambo chapasi?
Ana tukusamanyilila chamtuli kuti Yesu ali Mesiya?
YAKULINGA YINESONI
Alijiganye yejinji yakwamba udindo wa Yesu mpela Mesiya.
“Ana Yakulochesya Yakwamba Mesiya Yikusalosya Chamtuli Kuti Yesu Ali Mesiya?” (Ngani ja pa intaneti)
Alole naga Baibulo jikusasala kuti Mlungu jwaŵeleche Yesu mpela mwayikusaŵelega ni ŵandu.
“Ligongo Chichi Yesu Akusakolanjidwa Kuti Mwanache jwa Mlungu?” (Ngani ja pa intaneti)
Alijiganye ligongo lyakwe Baibulo jangajiganya kuti mwa Mlungu jumo mwana milungu jitatu.
Aŵalanje yajwatite pakuchenga jwamkongwe jwine ali aŵalasile ngani jakwamba Yesu kutyochela m’Baibulo?
a Mu Lijiganyo 26 ni 27 tuchikambilana ligongo lyakwe ŵandu akusosekwa kukulupuka soni yakusatenda Yesu pakutukulupusya.
b Alole Maloŵe Gakumbesi 2 kuti amanyilile yakulochesya yayasasile ndaŵi jisyesyene jele Yesu jwawonechele pachilambo chapasi.