Ana Mpaka Tuŵambale Chamtuli Kwinjilila ya m’Chilambo?

Yesu ŵasasile kuti ŵakumkuya ŵakwe ngakusosekwa kuŵa “mbali ja chilambo.” (Yohane 15:19, NWT) Yeleyi yikugopolela kuŵambala kwinjilila nawo mu yakutendekwa ya m’chilambo, yayili kutenda nawo yandale soni kujigala nawo mbali pa ngondo. Kusala yisyene yili yakusawusya kuŵambala kwinjilila nawo ya m’chilambo. Yeleyi yili myoyo ligongo lyakuti ŵandu mpaka atunyosyeje naga ngatukwinjilila nawo mu yakutendekwayi. Nambo ana mpaka tutende yamtuli kuti tukajinjililaga nawo ya m’chilambo nikupitilisya kuŵa ŵakulupichika kwa Mlungu?

1. Ana Aklistu ŵasyesyene akusiŵawona mwamtuli ŵakulamulila chilambo?

Aklistu akusiŵachimbichisya ŵakulamulila chilambo. Tukusakuya yiŵasasile Yesu yakuti, “pelekani kwa Mwenye yayili yakwe ya Mwenye.” Tukusatendaga yeleyi mwakupikanila malamusi ga m’chilambo chetu. Mwachisyasyo, tukusakomaga misongo. (Maliko 12:17) Baibulo jikusalosya kuti maulamusi ga ŵandu gapali ligongo lyakuti Yehofa akundile kuti gapagwe. (Aloma 13:1) Myoyo tukusamanyilila kuti ulamusi wa Mlungu ni wawuli wamachili mnope kupunda maulamusi ga ŵandu. Tukusakulupilila kuti Mlungu chachikamulichisya masengo Uchimwene wakwe wakwinani pakumasya yakusawusya ya ŵandu.

2. Ana mpaka tulosye chamtuli kuti ngatukwinjilila nawo ya m’chilambo?

Mwakulandana ni Yesu, nombe m’weji ngatukusatendaga nawo yandale. Ndaŵi jine Yesu ali atesile chakusimonjesya chine, ŵandu ŵasakaga kuti aŵe mwenye jwawo. Nambo jwalakwe jwakanile. (Yohane 6:15) Ana ligongo chichi jwakanile? Ligongo lyakuti pali papitile ndaŵi jwalakwe jwasasile kuti, “uchimwene wangu nganiwuŵa kose wa pa chilambo chapasi pano.” (Yohane 18:36) Pakuŵa m’weji tuli ŵakumkuya ŵa Yesu, tukusalosya kuti ngatukusajinjililaga mu yakutendekwa ya m’chilambo m’matala gakulekanganalekangana. Mwachisyasyo, ngatukusaputaga nawo ngondo. (Aŵalanje Mika 4:3.) Tukusachimbichisyaga yimanyilo yakwimila chilambo nambo ngatukusayitindiŵalilaga. Yine mwayeleyi yili mbendela. (1 Yohane 5:21) Konjesya pelepa ngatukusajinjilaga mu chipani, kulimbana ni chipani chilichose cha ndale, kuŵa kumbali ja achimlongola ŵa yipani kapena kusisyana nawo. Patukutenda yeleyi soni yindu yine tukusalosyaga kuti tuli ŵakulupichika mnope ku Uchimwene wa Mlungu.

KULIJIGANYA YEJINJI

3. Aklistu ŵasyesyene ŵangajinjililaga ya m’chilambo

Yesu ni ŵakumkuya ŵakwe ŵatupele chisyasyo panganiji. Aŵalanje Aloma 13:1, 5-7 soni 1 Petulo 2:13, 14. Kaneko alolele FIDIYO, ni akambilane yiwusyo yakuyichisyayi.

FIDIYO: Aklistu Ŵasyesyene Ŵangajinjilila Nawo ya M’chilambo—Mbali 1 (4:28)

• Ana ligongo chichi tukusosekwa kwachimbichisya achakulungwakulungwa ŵa boma?

• Ana mpaka tulosye chamtuli kuti tukusiŵapikanilaga jemanjaji?

Ndaŵi sine, pajiwuliche ngondo, yilambo yine yikusasala kuti ngayikujigala nawo mbali pa ukanganiwo. Nambo yilamboyi yikusaŵa yili mkukamuchisya mbali syasikuputanasyo. Ana ungajinjilila ya m’chilambo ukusagopolela chichi kusyesyene? Aŵalanje Yohane 17:16. Kaneko, alolele FIDIYO ni akambilane chiwusyo achi.

FIDIYO: Aklistu Ŵasyesyene Ŵangajinjilila Nawo ya M’chilambo—Mbali 2 (3:11)

• Ana ungajinjilila ya m’chilambo ukusagopolela chichi?

Uli naga achakulungwakulungwa ŵa boma akusaka kuti tutende yindu yayikutindana ni lilamusi lya Mlungu? Aŵalanje Masengo 5:28, 29. Kaneko, alolele FIDIYO ni akambilane yiwusyo ayi.

FIDIYO: Aklistu Ŵasyesyene Ŵangajinjilila Nawo ya M’chilambo—Mbali 3 (1:18)

• Naga malamusi ga ŵandu gatindene ni lilamusi lya Mlungu, ana mpaka apikanile lilamusi lya ŵani?

• Ana mpaka aganisye yakutendekwa yele Mklistu nganaŵa ŵapikanile achakulungwakulungwa ŵa boma?

4. Yakusaganisya soni kutenda yilosyeje kuti ngakwinjilila ya m’chilambo

Aŵalanje 1 Yohane 5:21. Kaneko, alolele FIDIYO ni akambilane yiwusyo ayi.

FIDIYO: Ligongo Lyakwe Aklistu Ŵasyesyene Akusosekwa Kuŵa Ŵakulimba Mtima—Kuti Akajinjililaga Nawo ya M’cilambo (2:49)

• Mu fidiyoji, ana ligongo chichi Ayenge nganaŵa mu chipani soni kujitindiŵalila mbendela?

• Ana akuganisya kuti ŵasagwile mwalunda?

Ana ni yakutendekwa yine yapi yampaka yitendekasye kuti yiŵe yakusawusya kuŵambala kwinjilila nawo ya m’chilambo? Alolele FIDIYIO, kaneko akambilane yiwusyo ayi.

FIDIYO: Yatukulijiganya mu Sanja ja Mlonda—Akajinjililaga ya m’Chilambo (5:16)

• Ana mpaka tutende yamtuli kuti tukajinjililaga ya m’chilambo pangani sya maseŵela ga pachilambo chosope?

• Ana mpaka tutende yamtuli kuti tukajinjililaga ya m’chilambo naga ŵandale atesile yindu yakutuwulasya kapena kutukamuchisya?

• Ana ŵakuwandisya ngani soni ŵatukusakunguluka nawo mpaka atendekasye mwamtuli kuti yitusawusyeje kuŵambala kwinjilila ya m’chilambo?

YALIJIGANYISYE

Aklistu akusatenda yakuti akajinjililaga ya m’chilambo muyakutenda, mukaganisye soni mukaŵechete.

Yiwusyo Yakuwilisya

• Ana tukusosekwa kutendaga yamtuli kwa achakulungwakulungwa ŵa boma?

• Ana ligongo chichi ngatukusatenda nawo ya ndale?

• Ana ni yakutendekwa yine yapi yampaka yitendekasye kuti yiŵe yakusawusya kuŵambala kwinjila nawo ya m’chilambo?

YAKULINGA YINESONI

Ana mpaka tusosekwe kulijima yindu yapi ni chakulinga chakuti tukajinjililaga ya m’chilambo?

Yehofa Nganatuleka (3:14)

Ana maŵasa mpaka gatende yamtuli pakosechela yindu yampaka yitendekasye kuŵa yakusawusya kuŵambala kwinjilila ya m’chilambo?

Akajinjililaga ya M’chilambo mu Yakutendekwa ya Pagulu (4:25)

Ana ligongo chichi kuchichenjela chilambo chakwe nganikuŵa kumtendekasye mundu kuŵa jwakuchimbichikwa mnope?

“Ni Mlungu Yindu Yosope Yili Yakomboleka” (5:19)

Alole yampaka atende kuti akaŵa mbali ja chilambo pakusagula yakutenda yakwayana ni masengo.

‘Jwalijose Akusosekwa Kutwichila Katundu Jwakwe’ (Sanja ja Mlonda, Malichi 15, 2006)

Chinga pachangakaŵapa kapena kusogolo, Aklistu wosope chachisimana ni ŵakusisya soni ŵakulagasya. Nambo ana yeleyi yitutendekasyeje woga?

1. Ana ligongo chichi tukusajembecheya ŵane kutulagasya?

Baibulo jikusasala mwakupikanika kuti: “Wosope ŵakusaka kuŵa ni umi wakumlumba Mlungu mwa Klistu Yesu tachisimana ni yisawusyo.” (2 Timoteo 3:12) Ligongo lyakuti Yesu nganaŵa mbali ja chilambo cha Satana, ŵandu ŵamlagasisye. Pakuŵa m’wejisoni nganituŵa mbali ja chilambochi, ngatukusasimonga naga ŵaboma soni ŵadini akutulagasya.—Yohane 15:18, 19.

2. Ana mpaka tukosechele chamtuli kulagasidwa?

Apano tukusosekwa kumkulupililaga mnope Yehofa. Myoyo, lisiku lililyose apateje ndaŵi jakupopela soni kuŵalanga Maloŵe gakwe. Asimanikweje pamisongano jampingo mwakutamilichika. Yeleyi yichakamuchisya kuti aŵe ŵakulimba, atamose achalongo achimjawo kapena ŵane ali mkwalagasya wawojo. Ndumetume Paulo jwele ndaŵi ni katema ŵandu ŵamlagasyaga, jwatite, “Ambuje ni ŵakungamuchisya ŵangu ngasindenda woga.”—Ahebeli 13:6.

Naga akusalalichilaga mwakutamilichika, yichakamuchisyasoni kuŵa ŵakulimba mtima. Masengo gakulalichila gakusatukamuchisya kuti tumkulupilileje Yehofa soni kuti tukajogopaga ŵandu. (Misyungu 29:25) Naga apano akusalimba mtima kulalichila, nikuti chachiŵa ŵakoseka kupitilisya kulalichila atamose ŵaboma ali alekasisye masengo getu.—1 Atesalonika 2:2.

3. Ana tukusapata umbone wamtuli patukuŵa ŵakulupichika kwa Yehofa ŵane pakutulagasya?

Kusala yisyene, ngatukusasangalaga ŵane pakutulagasya. Nambo patukombwele kupilila, chikulupi chetu chikusalimbaga. Soni tukusaŵa paunasi ŵambone ni Yehofa patumanyilile kuti jwalakwe atukamuchisye pandaŵi jatuyiweni kuti nganituŵasoni tupilile. (Aŵalanje Yakobo 1:2-4.) Ngaŵa kuti Yehofa akusasangalalaga pakutuwona tuli mkulaga. Nambo jwalakwe akusasangalalaga patukupilila. Ni ligongo lyakwe Baibulo jikusati: “Naga mkupilila mu yipwetesi timchitenda chenene, pelepo nikuti mtesile chakwitichisidwa pameso pa Mlungu.” (1 Petulo 2:20) Naga tukuŵa ŵakulupichika kwa Yehofa, jwalakwe chachitupa umi wangamala mchilambo chasambano. Wosope ŵachachitamaga m’chilambochi, chachimtumichilaga jwalakwe pali pangali jwakwalagasya.—Mateyu 24:13.

KULIJIGANYA YEJINJI

4. Mpaka apilile ŵamwiŵasa mwawo pakwasisya

Yesu ŵamanyililaga chenene kuti ŵane mwiŵasa mwetu nganaŵa asachile kuti tumtumichileje Yehofa. Aŵalanje Mateyu 10:34-36, kaneko akambilane chiwusyo achi:

• Ana ni chichi champaka chitendekwe naga jwine mwiŵasa asagwile kumtumichila Yehofa?

FIDIYO: Yehofa Ŵatujigele (5:13)

• Ana mpaka atende yamtuli naga jwamwiŵasa mwawo kapena mjawo akwalekasya kumtumichila Yehofa?

Aŵalanje Salimo 27:10 soni Maliko 10:29, 30. Pachaŵalanje lilemba lililyosye, akambilane chiwusyo achi:

• Ana yindu yayisasile palilembali mpaka yakamuchisye chamtuli naga ŵamwiŵasa mwawo kapena achimjawo akwasisya?

5. Apitilisyeje kumlambila Yehofa atamose pakwalagasya

FIDIYO: Mpaka Tuŵe Ŵakulimba Mtima Pakutulagasya (6:27)

• Ana yisyasyo ya mu fidiyoji yalimbikasisye mwamtuli?

Aŵalanje Masengo 5:27-29 soni Ahebeli 10:24, 25. Pachaŵalanje lilemba lililyose ajanje chiwusyo achi:

• Ligongo chichi yili yakusosekwa mnope kupitilisya kumlambila Yehofa atamose ŵaboma ali alekasisye masengo gakulalichila kapena kusongana?

6. Yehofa chachakamuchisya kupilila

FIDIYO: Yehofa Mlungu Chachilimbikasya (3:40)

• Mwakamulana ni fidiyoji, ana ni chichi chachakamuchisye ŵa Mboniŵa kupilila?

Aŵalanje Aloma 8:35, 37-39 soni 2 Akolinto 4:7. Pachaŵalanje lilemba lililyose, akambilane chiwusyo achi:

• Ana lilembali likwasimichisya chamtuli kuti mpaka akombole kupilila chakusawusya chilichose?

Aŵalanje Mateyu 5:10-12, kaneko akambilane chiwusyo achi:

• Ana ligongo chichi akusosekwa kuŵa ŵakusangalala atamose pakwalagasya?

YALIJIGANYISYE

Yehofa akusayamichila mnope patukutenda yakomboleka kumtumichila jwalakwe atamose ŵane pakutulagasya. Ni chikamuchisyo chakwe mpaka tukombole kupilila.

Yiwusyo Yakuwilisya

• Ana ligongo chichi Aklistu akusajembecheya kulagasidwa?

• Ana apano akusosekwa kutenda chichi pakosechela kulagasidwa kusogolo?

• Ana ni chichi champaka chakamuchisye kuŵa ŵakusimichisya kumtumichila Yehofa atamose ali achingangene ni chakusawusya chilichose?

YAKULINGA YINESONI

Alole yaŵaŵechete m’bale jwine payaŵatesile Yehofa kumkamuchisya kupilila ali amŵisile mu ukayidi ligongo lyakana kwinjilila ya m’chilambo.

Apilileje Atamose Pakwalagasya (2:34)

Alole chachakamuchisye liŵasa line kuti limtumichile Yehofa kwa yaka yejinji atamose kuti papali ŵakusisya.

Kutumichila Yehofa Pandaŵi Jele Yindu Yachenjile (7:11)

Alijiganye yampaka atende kuti aŵe ŵakulimba mtima ŵandu pakwalagasya.

“Ajino Jili Ndaŵi Jambone Jakosecela Kulagasidwa” (Sanja ja Mlonda, Julayi 2019)

Ana tukoleje nganisyo syamtuli naga ŵamwiŵasa mwetu akutulagasya? Soni mpaka tutende yamtuli kuti tupitilisye kuŵa ŵakulupichika kwa Yehofa?

“Usyesyene Wangayikasya Mtendele, Nambo Upanga’” (Sanja ja Mlonda, Okotoba 2017)