Tulichimbichisyeje Lina lya Yehofa

1-2. Ana ni chichi champaka chitukamuchisye kupikanichisya mwaŵapikanile Yehofa ali amsakachisye mbili jakwe?

TUWANICHISYE kuti mundu jwakusamnonyela wawojo akuŵecheta ngani jaunami jakwamba wawojo. Wawojo akumanyilila kuti nganijo jili jaunami, nambope ŵandu ŵane akujikulupilila. Nambotu chakusakala mnope chili chakuti ŵandu ŵane akutanda kuwandisya nganijo mwamti ŵandu ŵajinji akutanda kulupilila. Ana wawojo mpaka apikane uli? Naga akusasamala ya ŵandu nambosoni yakwamba mbili jawo jambone, yatesile mundujo mpaka yakuŵasye mnope.—Mis. 22:1.

² Ngani jeleji mpaka jitukamuchisye kupikanichisya muŵapikanile Yehofa ali amsakachisye mbili jakwe. Lilayika limo lyamsalile Hawa yindu yaunami yakwamba Yehofa. Mwamti Hawa jwakulupilile yeleyo. Yindu yaunami yalyaŵechete lilayikalyo yatendekasisye achinangolo ŵetu ŵandanda kumjimuchila Yehofa. Yakuyichisya yakwe ŵandu wosope ŵaŵele ŵakulemwa soni ŵatandite kuwa. (Gen. 3:​1-6; Alo. 5:12) Yindu yakusakala yosope yatukuyiwona pachilambopa mpela chiwa, ngondo soni yindu yangali chilungamo yatandite kuwanda ligongo lya unami waŵawutandikasisye Satana mu mgunda wa Edeni. Ana Yehofa ŵapikene uli ni yindu yayatendekweyi? Mwangakayichila yampweteche mnope. Nambotu Yehofa nganatumbila kapena kupya mtima. Mmalomwakwe jwalakwe jwapitilisye kuŵa “Mlungu jwakusangalala.”—1 Tim. 1:11.

 3. Ana tukwete upile wamtuli?

³ Wosopewe tukwete upile wakuliswejesya lina lya Yehofa mwakupitilisya kupikanila lilamusi lyakwe lyakuti, “Mlilumbe lina” lya Yehofa. (Sal. 113:1) Mpaka tutende yeleyi mwakwasalila ŵane ngani syambone syakwamba Yehofajo. Ana wawojo akusalichimbichisya lina lya Yehofa? Kwende tukambilane yindu yitatu yampaka yitukamuchisye kuti tulichimbichisyeje lina lya Mlungu ni mtima wetu wosope.

YEHOFA AKUSASANGALALA PATUKULICHIMBICHISYA LINA LYAKWE

 4. Ligongo chichi Yehofa akusasangalala patukumlapilila? Apeleche chisyasyo. (Alole chiwulili.)

⁴ Atati ŵetu ŵakwinani akusasangalala mnope patukulichimbichisya lina lyawo. (Sal. 119:108) Ana yeleyi yikugopolela kuti Mlungu ali mpela m’weji ŵandu ŵangali umlama ŵatukusasaka kuti ŵandu atuchimbichisyeje pakusaka kutulimbikasya soni kutusimichisya kuti tuli ŵakusosekwa? Iyayi. Agambe ganichisya ya kamwanache kakakwawutuchila babagwe ni kwakumbatila mwachinonyelo ni kwasalila kuti, “Wawojo ali nangolo jwambone mnope pachilambopa.” Maloŵega gakumtendekasya mtatijo kuŵa jwakusangalala. Nambo ana mpaka tusale kuti mtatiju akusalikayichila kuti nganaŵa mundu jwambone mwamti akudalila mwanache jwakwejo kuti amsimichisye yeleyi? Iyayi. Mmalomwakwe tuli ŵakusimichisya kuti jwalakwe ali jwamlume jwamachili jwakusangalala pakumwona mwanache jwakwe ali mkulosya chinonyelo soni kumyamichila. Jwalakwe akumanyilila kuti ndamo syakwesi mpaka simkamuchisye mwanachejo kuŵa jwakusangalala pakukula. Mwakulandana ni yeleyi, Yehofa jwali Mtati jwamkulungwa akusasangalala pakutuwona tuli mkumlapilila.

 5. Ana patukulichimbichisya lina lya Mlungu tukusasisya unami wapi?

⁵ Patukwachimbichisya Atati ŵetu ŵakwinani yikusatukamuchisya kukana unami wine wakusaŵecheta Satana. Jwalakwe akusasala kuti pangali mundu jwampaka aŵe jwakulupichika pakulichenjela lina lya Mlungu. Satana akusasala kuti ŵandu wosope nganaŵa aŵele ŵakulupichika pakusimana ni yakulingwa. Jwalakwe akusasala kuti wosopewe mpaka tumjimuchile Mlungu naga kutenda yeleyo mpaka kutukamuchisye kupata yindu yineyakwe yambone. (Yob. 1:​9-11; 2:4) Pambali jeleji, mundu jwakulupichika Yobu jwalosisye kuti Satana ali jwaunami. Nambi uli pakwamba ya wawojo? Jwalijose jwetuwe akwete ufulu wakusagula kuŵa kumbali ja Mlungu soni kumsangalasya jwalakwe mwakumtumichila mwakulupichika. (Mis. 27:11) Yeleyi ni yatukusosekwa kutendaga.

 6. Ana mpaka tumsyasye chamtuli Mwenye Daudi soni Alefi? (Nehemiya 9:5)

⁶ Kumnonyela Mlungu kukusikwatendekasya ŵandu ŵakulupichika kuti alichimbichisyeje mnope lina lyakwe. Mwenye Daudi jwalembile kuti, “Mtima ŵangu, wachimbichisye AMBUJE, umi ŵangu wosope uchimbichisye lina lyawo lyaliswela.” (Sal. 103:1) Daudi jwamanyilile kuti kulichimbichisya lina lya Yehofa kuli kumchimbichisya Yehofa msyenejo. Lina lya Yehofa likupwatikapo mbili jakwe, mwamti patupikene linali tukusaganichisya ya ndamo syakwe syambone soni masengo gakwe gakusimonjesya. Daudi ŵaliwonaga lina lya Atati ŵakwe ŵakwinani kuti lili lyeswela soni ŵasakaga kulichimbichisya. Jwalakwe jwasakaga kutenda yeleyi “ni umi wakwe wosope.” Mwakulandanamo, nombenawo Alefi ŵalongolelaga pakulichimbichisya lina lya Yehofa. Mwakulinandiya, jemanjaji ŵajitichisyaga kuti nganaŵa akombwele kulichimbichisya mwakwanila lina lyeswela lya Yehofa ni maloŵe gawo. (Aŵalanje Nehemiya 9:5.) Kumchimbichisya Yehofa mwakulinandiyaku kwatendekasisye mtima wa Yehofa kuŵa wakusangalala.

 7. Ana mpaka tumchimbichisye chamtuli Yehofa patukulalichila soni patukutenda yindu yine lisiku lililyose?

⁷ Masiku aganosoni mpaka tumsangalasye Yehofa mwakuŵecheta ya jwalakwe mwakusangalala, soni mwakulosya kuti tukusamnonyela mnope. Patukulalichila tukumbuchileje kuti chakulinga chetu chekulungwa chili kwakamuchisya ŵandu kumŵandichila Yehofa soni kuti amwoneje jwalakwe mpela mwatukusamwonela m’weji. (Yak. 4:8) Tukusaŵa ŵakusangalala kwalosya ŵandu yajikusati Baibulo pakumlondesya Yehofa kuti ali jwachinonyelo, jwachilungamo, jwalunda, jwamachili nambosoni kuti akwete ndamo sine syambone syejinji. Tukusamchimbichisya soni kumsangalasya Yehofa mwakulingalinga kumsyasya jwalakwe. (Aef. 5:1) Patukutenda yeleyi ŵane akusayiwona kuti tuli ŵakulekangana mnope ni ŵandu ŵane m’chilambo chakusakalachi. (Mat. 5:​14-16) Patukukunguluka ni jemanjaji mpaka twasalileje ligongo lyakwe tuli ŵakulekangana nawo. Patukutenda yeleyi ŵandu ŵamtima wambone akusatanda kumtumichila Mlungu. Patukumchimbichisya Yehofa m’matala gelega tukusasangalasya mtima wakwe.—1 Tim. 2:​3, 4.

TUKUSAMSANGALASYA YESU PATUKULICHIMBICHISYA LINA LYA YEHOFA

 8. Ligongo chichi Yesu ali chisyasyo chambone mnope pakulichimbichisya lina lya Yehofa?

⁸ Pa yindu yosope yalunda yaŵapanganyisye Mlungu Yesupe ni jwakusammanyilila chenene Mlungu. (Mat. 11:27) Yesu jwanonyelaga mnope Atati ŵakwe mwamti jwalakwe jwalongolele pakulichimbichisya lina lya Yehofa. (Yoh. 14:31) Mu lipopelo lyaŵapopesile kwa Atati ŵakwe chilo chakuti malaŵi gakwe chawulajidwe, jwasasile mwakata ya utumiki ŵajwatesile pa chilambo chapasichi. Jwalakwe jwatite, “Une namanyisye jemanjaji lina lyawo.” (Yoh. 17:26) Ana pelepa jwagopolelaga chichi?

 9. Ana Yesu jwakamulichisye masengo chamtuli ngani ja mwanache jwamsokonechele pakusaka kutukamuchisya kuti tummanyilile chenene Yehofa?

⁹ Yesu jwatesile yindu yejinji kupunda kwamba kwasalila ŵandu yakuti lina lya Mlungu lili Yehofa. Ayuda ŵaŵajiganyaga Yesu ŵamanyililaga kuti Mlungu akwete lina. Nambo Yesu jwaŵele mundu ‘juŵasasile chenene ya Jwalakwejo.’ (Yoh. 1:​17, 18) Mwamti Malemba ga Chihebeli gakusasala kuti Yehofa ali jwachanasa soni jwachinonyelo. (Eks. 34:​5-7) Yesu jwalosisye chenene yeleyi pakamulichisya masengo ngani jakusala ya mtati ni mwanache jwakwe jwamsokonechele. Munganiji tukusaŵalanga kuti mtatiju ali am’weni mwanache jwakweju “ali chapakutalichila” ŵamwutuchile ni kumkumbatila mwamti ŵamkululuchile ni mtima wosope. Ŵatesile yeleyitu ligongo lyakuti mwanachejo ŵapitikwiche mtima. Nganiji jikusatukamuchisya kumanyilila kuti Yehofa ali jwachanasa soni jwachinonyelo. (Luk. 15:​11-32) Pelepatu Yesu jwakamuchisye ŵandu ŵajinji kupikanichisya mwaŵelele Atati ŵakwe.

10. (a) Ana tukusamanyilila chamtuli kuti Yesu jwakamulichisyaga masengo lina lya Atati ŵakwe soni kuti akusasaka tutendeje yakulandanayo? (Maliko 5:19) (Alole chiwulili.) (b) Ana Yesu akusasaka kuti tutendeje chichi masiku agano?

¹⁰ Ana Yesu jwasakaga kuti ŵandu akamulichisyejesoni masengo lina lya Atati ŵakwe? Elo. Achimlongola ŵane ŵadini pandaŵijo ŵasalaga kuti lina lya Mlungu lili lyakuchimbichikwa mnope mwamti ngakusosekwa kulikolangaga. Nambo Yesu nganakunda kuti misyungu ja ŵandu jakutindana ni Malembaji jimlepelekasye kulichimbichisya lina lya Atati ŵakwe. Aganichisye yayatendekwe pandaŵi jele Yesu ŵamposisye mundu jwine juŵakwete yiŵanda juŵatamaga mu dela ja Agelasa. Ŵandu ŵa m’delaji wakamwile woga mwamti ŵamŵendile Yesu kuti atyoche. (Maliko 5:​16, 17) Nambotu Yesu jwasakaga kuti ŵandu ŵa m’delajo alimanyilile lina lya Yehofa. Myoyo jwamlamwile mundu juŵamposisyejo kuti jwasalileje ŵandu kuti Yehofa ni jwamposisye ngaŵaga Yesu. (Aŵalanje Maliko 5:19.)a Jwalakwe akusasakasoni kuti masiku agano twasalileje ŵane lina lya Atati ŵakweli pachilambo chosope. (Mat. 24:14; 28:​19, 20) Patukutenda yeleyi tukusamsangalasya Mwenye jwetu Yesu.

11. Ana Yesu jwajiganyisye ŵakulijiganya ŵakwe kuti atendeje chichi pakupopela soni ligongo chichi yili yakusosekwa mnope? (Esekiele 36:23)

¹¹ Yesu jwamanyililaga kuti chakulinga cha Yehofa chili kuliswejesya lina lyakwe ku yindu yosope yaunami yakusaŵecheta ŵandu yakwamba linali. Alitu ni ligongo lyakwe Ambuje ŵetu ŵajiganyisye ŵakulijiganya ŵawo kuti apopeleje kuti, “Atati ŵetu ŵakwinani, lina lyawo liŵe lyeswela.” (Mat. 6:​9, Maloŵe gamwiŵanda.) Yesu jwamanyililaga kuti jeleji jili ngani jekulungwa ku yakupanganyikwa yosope. (Aŵalanje Esekiele 36:23.) Pangali chakupanganyikwa chalunda pachilambopa chachikombwele kuliswejesya lina lya Yehofa kupunda muŵatendele Yesu. Ana Yesu ali ataŵidwe achimmagongo ŵakwe ŵamjimbaga magambo gamtuli? Ŵamjimbaga magambo gakuti ali jwakunyosya Mlungu. Nambo Yesu jwamanyililaga kuti kukamulichisya masengo mwakulemwechekwa soni kuŵecheta yakusakala yakwamba Atati ŵakwe uli ulemwa wekulungwa mnope. Mwamti jwalakwe yampweteche mnope paŵamanyilile kuti akumjimba magambo gakunyosya lina lya Mlungu. Lyeleli ni ligongo lyekulungwa lyalyamtendekasisye Yesu ‘kulagasika mnope mu mtima’ pandaŵi jaŵamjimbaga magambo kuti amtaŵe.—Luk. 22:​41-44.

12. Ana Yesu jwaswejesye chamtuli lina lya Atati ŵakwe pandaŵi jakusawusya mnope?

¹² Kuti akombole kuswejesya lina lya Atati ŵakwe, Yesu jwasosekwaga kupilila yindu yaunami yiŵamlambuchisyaga soni yakusawusya yaŵasimanaga nayo. Jwalakwe jwamanyilile kuti jwapikanile Atati ŵakwe mu yindu yosope mwamti pangali chindu chakatesile nacho sooni. (Aheb. 12:2) Yesu jwamanyililagasoni kuti Satana ni jwakulimbana najo mundaŵi jakusawusyajo. (Luk. 22:​2-4; 23:​33, 34) Kusala yisyene, Satana jwasakaga kuti Yesu akaŵa jwakulupichika kwa Mlungu. nambotu jwalakwe jwalepele mwakutesya chanasa. Mwamti Yesu jwalosisye kuti Satana ali jwaunami nambosoni kuti Yehofa akwete ŵakutumichila ŵakwe ŵakulupichika. Jemanjaji akusaŵaga ŵakulupichika atamose pasimene ni yakuligwa yekulungwa mnope.

13. Ana mpaka amsangalasye chamtuli Mwenye jwetu Yesu?

¹³ Ana ali ŵakusachilila kumsangalasya Mwenye jwetu Yesu Klistu? Apitilisye kulichimbichisya lina lya Yehofa mwakwakamuchisya ŵane kumanyilila ndamo syambone syakwete Mlungu. Pakutenda yeleyi chachiŵa kuti akumsyasya Yesu. (1 Pet. 2:21) Mpela muyaŵelele ni Yesu nikuti akumtendekasya Yehofa kuŵa jwakusangalala soni kulosya kuti Satana ali jwaunami.

TUKUSAKULUPUSYA UMI WA ŴANDU PATUKULICHIMBICHISYA LINA LYA YEHOFA

14-15. Ana pakusaŵa yakusangalasya yapi patukwajiganya ŵandu yakwamba Yehofa?

¹⁴ Patukulichimbichisya lina lya Yehofa tukusakamuchisya pakukulupusya umi wa ŵandu. Yili myoyo ligongo lyakuti Satana ‘asiŵile nganisyo sya ŵandu ŵangakulupilila.’ (2 Akoli. 4:4) Yakuyichisya yakwe ŵandu ŵeleŵa akusatanda kukulupilila mabosa ga Satana. Mabosa gakwe gali gakuti, kwangali Mlungu, Mlungu ali kwakutalichila, Mlungu jwangasamala ya ŵandu, Mlungu ali jwangasa nambosoni Mlungu akusiŵalagasya kwangamala ŵandu ŵakutenda yakusakala. Chakulinga cha mabosaga chili kusakasya lina lya Yehofa soni mbili jakwe. Mwamti yeleyi yikusatendekasya kuti ŵandu akakola mtima wakusachilila kumtumichila Mlungu. Nambo masengo getu gakulalichila gakusatendekasya kuti chakulinga cha Satanachi chikakomboleka. Tukusitwajiganya ŵandu yisyesyene yakwamba Atati ŵetu soni tukusalichimbichisya lina lyeswela lya Mlungu. Ana yeleyi yikusakola yakuyichisya yamtuli?

¹⁵ Maloŵe ga Mlungu gana machili gakusimonjesya mnope. Patukwajiganya ŵandu yakwamba Yehofa soni mwaŵelele jwalakwe yikusatukamuchisya kuyiwona yakuyichisya yambone mnope. Mabosa ga Satanaga gakusatanda kutyoka mwapanandipanandi mwa ŵanduŵa mwamti akusatanda kumwona Yehofa mpela mwatukusamwonela m’weji. Mwamti akusamanyilila kuti Mlungu akwete machili gekulungwa mnope. (Yes. 40:26) Jemanjaji akusaŵa ŵakusimichisya kuti Mlungu ali jwachilungamo. (Det. 32:4) Akusasimongasoni ni lunda lwangali malile lwakwete jwalakwe. (Yes. 55:9; Alo. 11:33) Yikusiyalimbikasyasoni pakumanyilila kuti Yehofa akusiŵanonyela jemanjaji pajikapajika. (1 Yoh. 4:8) Pakumŵandichila mnope Yehofa, chembecheyo chawo chakutama ni umi wangamala chikusaŵa chisyesyene. Kusala yisyene uli upile wetu wekulungwa kwakamuchisya ŵandu kuti ŵaŵandichile Atati ŵetu. Patukutenda yeleyi Yehofa chachituwona kuŵa ‘ŵamasengo achimjakwe.’—1 Akoli. 3:​5, 9.

16. Ana ŵandu ŵane yikusiyakwaya chamtuli pamanyilile lina lya Mlungu? Apeleche chisyasyo.

¹⁶ Pandanda mpaka twajiganyeje ŵandu kuti lina lya Mlungu lili Yehofa. Yeleyi mpaka yakamuchisye ŵandu ŵakwete mtima wambone kwa umi wawo wosope. Mwachisyasyo msikana jwine lina lyakwe Aliyab jwakulile muliŵasa lyanganiliŵa lya Chiklistu. Mwamti jwalakwe nganayikosyaga mnope ya dini soni yakuti kwana Mlungu. Nambope nganisyo syelesi syachenjile pajwatandite kulijiganya ni ŵa Mboni sya Yehofa. Jwalakwe jwatandite kuyiwona kuti Mlungu ali mjakwe jusyesyene. Mwamti jwasimonjile mnope paŵalijiganyisye kuti lina lya Mlungu ŵalityosisye m’ma Baibulo gane nikuŵika mena ga udindo mpela Ambuje. Kumanyilila kuti lina lya Mlungu lili Yehofa kwamkamuchisye jwalakwe paumi wakwe. Jwalakwe jwatite, “Mjangu jusyesyene akwete lina.” Ana yakuyichisya yakwe yaliji yamtuli? Msikanaju jwatite, “Sambano ngwete mtendele wa mumtima soni mbatile yindu yambone.” Aganichisyesoni ya jwamlume jwine lina lyakwe Steve juŵaliji jwakwimba nyimbo. Jwalakwe jwatyochelaga ku liŵasa lya Chiyuda soni nganakundaga kuchenga yaŵakulupililaga. Jwamlumeju nganasakaga kuŵa mu dini jilijose ligongo lya yindu yachinyengo yaŵayiwonaga. Nambope panyuma pakuti mamagwe awile jwajitichisye kulijiganya Baibulo ni jwa Mboni sya Yehofa. Jwalakwe yamkwayiye mnope paŵalijiganyisye kuti Mlungu akwete lina. Jwalakwe jwatite, “Nalijiganyisye yakuti Mlungu akwete lina. Mwamti kwandaŵi jandanda napikanichisye kuti Mlungu ali jusyesyene. Nayiweni kuti jwalakwe ali jusyesyene, soni nayimanyi kuti mbatile mjangu jwambone mnope.”

17. Ana ligongo chichi tukusosekwa kupitilisya kulichimbichisya lina lya Yehofa? (Alole chiwulili.)

¹⁷ Pakukamula masengo gakulalichila soni kwiganya, ana akusiŵakamuchisya ŵandu kumanyilila lina lya Mlungu lyakuti Yehofa? Ana akusiŵakamuchisya jemanjajo kumanyilila kuti Mlungu ali jusyesyene? Naga akusatenda yeleyi nikuti akusachimbichisya lina lya Mlungu. Apitilisye kulichimbichisya lina lyeswela lya Yehofa mwakwakamuchisya ŵandu kummanyilila chenene jwalakwe. Pakutenda yeleyi nikuti chachikulupusya umi wa ŵandu soni kumsyasya Mwenye jwetu Klistu Yesu. Kupunda yosopeyi chachiŵa ali mkwasangalasya Atati ŵetu ŵachinonyelo Yehofa. Kwende tupitilisye kuŵecheta maloŵe gaŵaŵechete jwamasalimo kuti “tinalichimbichisye lina lyawo kwa yaka yosope.”—Sal. 145:2.