M’Baibulo, ngani jakusosekwa mnope jili jakwamba Uchimwene wa Mlungu. Yehofa chachikamulichisya masengo Uchimwenewu pakwanilisya chakulinga chakwe chapandanda chakwamba chilambo chapasi. Nambo ana Uchimwenewu uli chichi? Soni mpaka tumanyilile chamtuli kuti Uchimwenewu ukulamulila apano? Ana ni yindu yapi yawukombwele kutenda? Ana kusogoloku chiwutende yamtuli? Mu lijiganyoli soni gaŵili gakuyichisya chitupate kwanga kwa yiwusyoyi.

1. Ana Uchimwene wa Mlungu uli chichi, soni ana Mwenye jwakwe ali ŵani?

Uchimwenewu jili boma jatamilikasisye Yehofa Mlungu. Mwenye jwakwe ali Yesu Klistu jwakusalamulila ali kwinani. (Mateyu 4:17; Yohane 18:36) Pakwamba ya Yesu Baibulo jikusati: “Tachiŵa Mwenye . . . . mpaka kalakala.” (Luka 1:32, 33) Yesu jwali Mwenye jwa Uchimwene wa Mlungu chachilamulilaga chilambo chosope chapasi.

2. Ana Yesu chachilamulilaga yalumo ni ŵani?

Yesu ngasalamulila jika. Ŵandu ŵa “ngosyo syosope, chiŵecheto chilichose, ni mtundu uliwose. . .tachilamulila pachilambo chapasi.” (Chiwunukuko 5:9, 10) Nambo ana ni ŵandu ŵalingwa ŵachalilamulilaga yalumo ni Yesu? Kutyochela pandaŵi jiŵayiche Yesu pachilambo chapasi, ŵandu ŵajinji aŵele ŵakumkuya ŵakwe. Mwa ŵeleŵa, ŵandupe 144,000 ni ŵakwawula kwinani kukulamulila ni Yesu. (Aŵalanje Chiwunukuko 14:1-4.) Ŵandu ŵane wosope chachiŵa pachilambo chapasi ni kulamulidwaga ni Uchimwenewu.—Salimo 37:29.

3. Ana ligongo chichi Uchimwene wa Mlungu uli wambone mnope kupunda ma boma ga ŵandu?

Atamose ŵakulamulila ŵa chilambochi ali alinjile kutenda yambone, nambo ŵangakola machili gakutenda yiliyose yakusaka. Mkupita kwandaŵi ŵakulamulilaŵa akusatyokaga m’maulamusi gawo. Kaneko akusayikagasoni ŵane ŵele chakulinga chawo ngaŵa kwakamuchisya ŵandu nambo kusaka kulipatila. Mwakulekangana ni jemanjaji, Mwenye jwa Uchimwene wa Mlungu jwali Yesu, ngasajinjilidwa mmalo ni jwine jwalijose. Baibulo jikusati, Mlungu “tachitamilisya uchimwene wele ngisiwujonasika.” (Daniele 2:44) Yesu chachilamulilaga chilambo chosope chapasi, soni ulamusi wakwe uchiŵa wangali lusagu. Yili myoyo ligongo jwalakwe ali jwachinonyelo, jwachanasa soni jwachilungamo. Mwamti chachajiganya ŵandu kuti akole ndamo syelesi.—Aŵalanje Yesaya 11:9.

4. Boma jamachili jichilamulilaga pachilambo chosope

Yesu Klistu akwete machili ga ulamusi kupunda ŵakulamulila wosope ŵatemi pachilambopa. Aŵalanje Mateyu 28:18, kaneko akambilane chiwusyo achi:

• Ana ulamusi wa Yesu ukulekangana chamtuli ni ulamusi wa ŵandu?

Maulamusi ga ŵandu gakusachenga ndaŵi ni katema soni jwakulamulila akusagambaga kulamulila kambali kamnono ka chilambochi. Nambi uli pakwamba ya Uchimwene wa Mlungu? Aŵalanje Daniele 7:14, kaneko akambilane yiwusyo ayi:

• Ana ligongo chichi yili yambone kumanyilila kuti Uchimwenewu “ngasiwujonasika”?

• Ana ligongo chichi yili yakusangalasya kumanyilila kuti Uchimwenewu uchilamulila pachilambo chosope?

5. Maulamusi ga ŵandu gakusosekwa kwinjilidwa mmalo

Ana ligongo chichi Uchimwene wa Mlungu ukusosekwa kwinjila mmalo mwa maulamusi ga ŵandu? Alolele FIDIYO, kaneko akambilane chiwusyo achi.

FIDIYO: Ana Ucimwene wa Mlungu Uli Cici—Kambali ka Fidiyo (1:41)

• Ana ulamusi wa ŵandu uyikasisye yindu yamtuli?

Aŵalanje Jwakulalichila 8:9, kaneko akambilane yiwusyo ayi:

• Ana akuganisya kuti Uchimwene wa Mlungu ukusosekwa kwinjila mmalo mwa maboma ga ŵandu? Ligongo chichi akuganisya myoyo?

6. Ŵakulamulila ŵa mu Uchimwene wa Mlungu Akusatupikanichisya

Pakuŵa Mwenye jwetu Yesu, pakwete payiche pachilambopa ni kuŵa mundu, jwalakwe ‘akusatutendela chanasa ligongo lya kulepetala kwetu’ kapena kuti yakulepela yetu. (Ahebeli 4:15) Achalume ni achakongwe ŵa 144,000 ali ŵakulupichika ŵachachilamulila yimpepe ni Yesu. Soni Yehofa ŵasagwile jemanjaji kutyochela mwa ŵandu “ŵa ngosyo syosope, ŵa chiŵecheto chilichose ni mtundu uliwose.”—Chiwunukuko 5:9.

• Ana ngakusangalala kumanyilila kuti Yesu soni achimjakweŵa akusamanyilila mwawukusaŵelaga umi wa ŵanduwe? Ligongo chichi?

7. Uchimwene wa Mlungu ukwete malamusi gambone mnope

Ma boma ga ŵandu gakusakolaga malamusi gele chakulinga chakwe chili kwakamuchisya soni kwachenjela ŵandu. Nombe nawo Uchimwene wa Mlungu ukwete malamusi gele ŵandu ŵakwe akusosekwa kugakuya. Aŵalanje 1 Akolinto 6:9-11, kaneko akambilane yiwusyo ayi:

• Ana akuganisya kuti jwalijose pachachikuyaga malamusi ga Mlungu, yindu yichiŵa uli pachilambopa?a

• Ana akuganisya kuti Yehofa akusaka kuti ŵandu ŵa mu Uchimwene wakwe apikanileje malamusi ga palilembali? Ligongo chichi?

• Ana ni chichi chachikulosya kuti yili yakomboleka ŵandu ŵangapikanila malamusi kutanda kugapikanila?—Alole vesi 11.

YALIJIGANYISYE

Uchimwene wa Mlungu jili boma jisyesyene jajili kwinani jele jichilamulilaga pachilambo chosope chapasi.

Yiwusyo Yakuwilisya

• Ana ŵani ŵachachilamulilaga mu Uchimwene wa Mlungu?

• Ana ligongo chichi Uchimwene wa Mlungu uli wambone mnope kupunda maboma ga ŵandu?

• Ana ni yindu yapi yakusajembecheya Yehofa kuti ŵandu ŵa mu Uchimwene wakwe ayitendeje?

YAKULINGA YINESONI

Alole yaŵajiganyisye Yesu yakwamba kwawuchiŵa Uchimwene wa Mlungu.

“Ana Uchimwene wa Mlungu Uli mu Mtima Mwawo?” (Ngani ja pa intaneti)

Ana ligongo chichi ŵa Mboni sya Yehofa akusaŵa ŵakulupichika mnope ku Uchimwene wa Mlungu kulekangana ni ku maulamusi ga ŵandu?

Kuŵa Ŵakulupichika ku Uchimwene wa Mlungu (1:43)

Awungunye kuti amanyilile yajikusalondesya Baibulo pakwamba ya ŵa 144,000 ŵachachilamulilaga ni Yesu.

“Ana Ŵani Ŵakusajawula Kwinani?” (Ngani ja pa intaneti)

Ana jwamkongwe juŵaliji mu ukayidi jwasimichisye uli kuti Mlungupe, ni jwampaka ayikasye chilungamo pachilambopa?

“Yayangamuchisye Kumanyilila Juchachimasya Ungali Chilungamo” (Ajimuche!, Nofemba 2011)

Yesu ŵasasile kuti ŵakumkuya ŵakwe ngakusosekwa kuŵa “mbali ja chilambo.” (Yohane 15:19, NWT) Yeleyi yikugopolela kuŵambala kwinjilila nawo mu yakutendekwa ya m’chilambo, yayili kutenda nawo yandale soni kujigala nawo mbali pa ngondo. Kusala yisyene yili yakusawusya kuŵambala kwinjilila nawo ya m’chilambo. Yeleyi yili myoyo ligongo lyakuti ŵandu mpaka atunyosyeje naga ngatukwinjilila nawo mu yakutendekwayi. Nambo ana mpaka tutende yamtuli kuti tukajinjililaga nawo ya m’chilambo nikupitilisya kuŵa ŵakulupichika kwa Mlungu?

1. Ana Aklistu ŵasyesyene akusiŵawona mwamtuli ŵakulamulila chilambo?

Aklistu akusiŵachimbichisya ŵakulamulila chilambo. Tukusakuya yiŵasasile Yesu yakuti, “pelekani kwa Mwenye yayili yakwe ya Mwenye.” Tukusatendaga yeleyi mwakupikanila malamusi ga m’chilambo chetu. Mwachisyasyo, tukusakomaga misongo. (Maliko 12:17) Baibulo jikusalosya kuti maulamusi ga ŵandu gapali ligongo lyakuti Yehofa akundile kuti gapagwe. (Aloma 13:1) Myoyo tukusamanyilila kuti ulamusi wa Mlungu ni wawuli wamachili mnope kupunda maulamusi ga ŵandu. Tukusakulupilila kuti Mlungu chachikamulichisya masengo Uchimwene wakwe wakwinani pakumasya yakusawusya ya ŵandu.

2. Ana mpaka tulosye chamtuli kuti ngatukwinjilila nawo ya m’chilambo?

Mwakulandana ni Yesu, nombe m’weji ngatukusatendaga nawo yandale. Ndaŵi jine Yesu ali atesile chakusimonjesya chine, ŵandu ŵasakaga kuti aŵe mwenye jwawo. Nambo jwalakwe jwakanile. (Yohane 6:15) Ana ligongo chichi jwakanile? Ligongo lyakuti pali papitile ndaŵi jwalakwe jwasasile kuti, “uchimwene wangu nganiwuŵa kose wa pa chilambo chapasi pano.” (Yohane 18:36) Pakuŵa m’weji tuli ŵakumkuya ŵa Yesu, tukusalosya kuti ngatukusajinjililaga mu yakutendekwa ya m’chilambo m’matala gakulekanganalekangana. Mwachisyasyo, ngatukusaputaga nawo ngondo. (Aŵalanje Mika 4:3.) Tukusachimbichisyaga yimanyilo yakwimila chilambo nambo ngatukusayitindiŵalilaga. Yine mwayeleyi yili mbendela. (1 Yohane 5:21) Konjesya pelepa ngatukusajinjilaga mu chipani, kulimbana ni chipani chilichose cha ndale, kuŵa kumbali ja achimlongola ŵa yipani kapena kusisyana nawo. Patukutenda yeleyi soni yindu yine tukusalosyaga kuti tuli ŵakulupichika mnope ku Uchimwene wa Mlungu.

KULIJIGANYA YEJINJI

3. Aklistu ŵasyesyene ŵangajinjililaga ya m’chilambo

Yesu ni ŵakumkuya ŵakwe ŵatupele chisyasyo panganiji. Aŵalanje Aloma 13:1, 5-7 soni 1 Petulo 2:13, 14. Kaneko alolele FIDIYO, ni akambilane yiwusyo yakuyichisyayi.

FIDIYO: Aklistu Ŵasyesyene Ŵangajinjilila Nawo ya M’chilambo—Mbali 1 (4:28)

• Ana ligongo chichi tukusosekwa kwachimbichisya achakulungwakulungwa ŵa boma?

• Ana mpaka tulosye chamtuli kuti tukusiŵapikanilaga jemanjaji?

Ndaŵi sine, pajiwuliche ngondo, yilambo yine yikusasala kuti ngayikujigala nawo mbali pa ukanganiwo. Nambo yilamboyi yikusaŵa yili mkukamuchisya mbali syasikuputanasyo. Ana ungajinjilila ya m’chilambo ukusagopolela chichi kusyesyene? Aŵalanje Yohane 17:16. Kaneko, alolele FIDIYO ni akambilane chiwusyo achi.

FIDIYO: Aklistu Ŵasyesyene Ŵangajinjilila Nawo ya M’chilambo—Mbali 2 (3:11)

• Ana ungajinjilila ya m’chilambo ukusagopolela chichi?

Uli naga achakulungwakulungwa ŵa boma akusaka kuti tutende yindu yayikutindana ni lilamusi lya Mlungu? Aŵalanje Masengo 5:28, 29. Kaneko, alolele FIDIYO ni akambilane yiwusyo ayi.

FIDIYO: Aklistu Ŵasyesyene Ŵangajinjilila Nawo ya M’chilambo—Mbali 3 (1:18)

• Naga malamusi ga ŵandu gatindene ni lilamusi lya Mlungu, ana mpaka apikanile lilamusi lya ŵani?

• Ana mpaka aganisye yakutendekwa yele Mklistu nganaŵa ŵapikanile achakulungwakulungwa ŵa boma?

4. Yakusaganisya soni kutenda yilosyeje kuti ngakwinjilila ya m’chilambo

Aŵalanje 1 Yohane 5:21. Kaneko, alolele FIDIYO ni akambilane yiwusyo ayi.

FIDIYO: Ligongo Lyakwe Aklistu Ŵasyesyene Akusosekwa Kuŵa Ŵakulimba Mtima—Kuti Akajinjililaga Nawo ya M’cilambo (2:49)

• Mu fidiyoji, ana ligongo chichi Ayenge nganaŵa mu chipani soni kujitindiŵalila mbendela?

• Ana akuganisya kuti ŵasagwile mwalunda?

Ana ni yakutendekwa yine yapi yampaka yitendekasye kuti yiŵe yakusawusya kuŵambala kwinjilila nawo ya m’chilambo? Alolele FIDIYIO, kaneko akambilane yiwusyo ayi.

FIDIYO: Yatukulijiganya mu Sanja ja Mlonda—Akajinjililaga ya m’Chilambo (5:16)

• Ana mpaka tutende yamtuli kuti tukajinjililaga ya m’chilambo pangani sya maseŵela ga pachilambo chosope?

• Ana mpaka tutende yamtuli kuti tukajinjililaga ya m’chilambo naga ŵandale atesile yindu yakutuwulasya kapena kutukamuchisya?

• Ana ŵakuwandisya ngani soni ŵatukusakunguluka nawo mpaka atendekasye mwamtuli kuti yitusawusyeje kuŵambala kwinjilila ya m’chilambo?

YALIJIGANYISYE

Aklistu akusatenda yakuti akajinjililaga ya m’chilambo muyakutenda, mukaganisye soni mukaŵechete.

Yiwusyo Yakuwilisya

• Ana tukusosekwa kutendaga yamtuli kwa achakulungwakulungwa ŵa boma?

• Ana ligongo chichi ngatukusatenda nawo ya ndale?

• Ana ni yakutendekwa yine yapi yampaka yitendekasye kuti yiŵe yakusawusya kuŵambala kwinjila nawo ya m’chilambo?

YAKULINGA YINESONI

Ana mpaka tusosekwe kulijima yindu yapi ni chakulinga chakuti tukajinjililaga ya m’chilambo?

Yehofa Nganatuleka (3:14)

Ana maŵasa mpaka gatende yamtuli pakosechela yindu yampaka yitendekasye kuŵa yakusawusya kuŵambala kwinjilila ya m’chilambo?

Akajinjililaga ya M’chilambo mu Yakutendekwa ya Pagulu (4:25)

Ana ligongo chichi kuchichenjela chilambo chakwe nganikuŵa kumtendekasye mundu kuŵa jwakuchimbichikwa mnope?

“Ni Mlungu Yindu Yosope Yili Yakomboleka” (5:19)

Alole yampaka atende kuti akaŵa mbali ja chilambo pakusagula yakutenda yakwayana ni masengo.

‘Jwalijose Akusosekwa Kutwichila Katundu Jwakwe’ (Sanja ja Mlonda, Malichi 15, 2006)