LIJIGANYO 34
Ana Mpaka Tulosye Chamtuli Kumnonyela Yehofa?
Chitandile kulijiganya Baibulo kwawo, ana apano akuliwona kuti ali paunasi wambone ni Yehofa? Ana akusaka kupitilisya kulimbisya unasi wawo ni jwalakwe? Naga yili myoyo amanyilile kuti pakumnonyela mnope Yehofa, nombe najo chachanonyela mnope soni kwasamalila. Nambo ana mpaka alosye chamtuli kuti akusamnonyela Yehofa?
1. Ana tukusalosya chamtuli kuti tukusamnonyela Yehofa?
Tukusalosyaga kuti tukusamnonyela Yehofa naga tukumpikanila. (Aŵalanje 1 Yohane 5:3.) Nambope jwalakwe jwangamkanganichisya mundu kuti ampikanileje. Mmalo mwakwe, akusasaka kuti mundu jwalijose asaguleje jika kumpikanila kapena iyayi. Ligongo chichi? Yehofa akusasaka kuti ‘tumpikanileje ni mtima wosope.’ (Aloma 6:17) Yeleyi yikugopolela kuti jwalakwe akusasaka kuti tumpikanileje ligongo lyakuti tukusamnonyela, ngaŵaga mwakulikanganichisya. Mbali 3 soni 4 m’bukuji, asilinganyisye pakusaka kwakamuchisya kuti amnonyeleje Yehofa. Mpaka alosye kuti akusamnonyela Yehofa pakutenda yindu yakumsangalasya soni kuŵambala kutenda yindu yangamsangalasya.
2. Ligongo chichi mpaka yiŵe yakusawusya kumnonyela Yehofa?
Baibulo jikusati: “Mundu jwambone akuyiwona yisawusyo yejinji.” (Salimo 34:19) Wosopewe tukusalagaga kuti tutendeje yindu yambone. Nambosoni mpaka tulajeje ligongo lyakusoŵa kwa mbiya, yindu yangali chilungamo ni yine yejinji. Patukusimana ni yisawusyo, mpaka yiŵe yakusawusya kutenda yindu yakusasaka Yehofa. Tukuŵecheta yeleyi ligongo lyakuti ŵanduwe yikusaŵa yangasawusya kukuya matala gakulemwecheka pakumasya yakusawusya yetu. Nambo naga akutenda mwakulupichika yindu yakusaka Yehofa, akusalosya kuti akusamnonyela jwalakwe kupunda chilichose. Soni akusalosya kuti ali jwakulupichika kwa jwalakwe. Yakuyichisya yakwe yichiŵa yakuti jwalakwe chachiŵa jwakulupichika kwa wawojo soni ngasiŵaleka.—Aŵalanje Salimo 4:3.
KULIJIGANYA YEJINJI
Chitulijiganye ligongo lyakwe Yehofa akusasangalalaga patukumpikanila soni yampaka atende kuti apitilisye kuŵa ŵakulupichika kwa jwalakwe.
3. Pana ngani jajikwakwaya wawojo
Mu buku ja Yobu, tukusaŵalanga kuti Satana ŵasasile kuti Yobu soni ŵandu wosope ŵakumtumichila Yehofa ali ŵakulemwa. Aŵalanje Yobu 1:1, 6–2:10, kaneko akambilane yiwusyo ayi:
Ana Satana ŵasasile kuti Yobu ŵampikanilaga Yehofa ligongo chichi?—Alole Yobu 1:9-11.
Ana Satana akusasalaga yamtuli pakwamba ya ŵandu wosope kupwatikapo wawojo?—Alole Yobu 2:4.
Aŵalanje Yobu 27:5b, kaneko akambilane chiwusyo achi:
Ana Yobu jwalosisye chamtuli kuti jwamnonyelaga Yehofa yisyesyene?
Yobu jwalosisye kuti akusamnonyela Yehofa mwakupitilisya kuŵa jwakulupichika kwa jwalakwe
Tukusalosya kuti tukusamnonyela Yehofa naga tukupitilisya kuŵa ŵakulupichika kwa jwalakwe
4. Tumsangalasyeje Yehofa
Aŵalanje Misyungu 27:11, kaneko akambilane yiwusyo ayi:
Ana Yehofa akusapikana uli mumtima patukutenda yindu mwalunda soni patukumpikanila? Ligongo chichi?
5. Mpaka aŵe ŵakulupichika kwa Yehofa
Kumnonyela Yehofa, kukusatutendekasyaga kwasalila ŵane yakwamba jwalakwe. Tukusaŵaga ŵakulupichika kwa Yehofa atamose kuti kutenda yeleyo mpaka kuŵe kwakusawusya ndaŵi sine. Alolele FIDIYO, kaneko akambilane yiwusyo ayi.
Ana pakwete payiweni kuŵa yakusawusya kwasalila ŵane yakwamba Yehofa?
Mu fidiyoji, ana ni chichi chachamkamuchisye Grayson kuti amalane ni woga?
Yikusaŵaga yangasawusya kuŵa ŵakulupichika kwa Yehofa naga tukusanonyela yindu yakusayinonyela soni kuyiŵenga yakusayiŵenga. Aŵalanje Salimo 97:10, kaneko akambilane yiwusyo ayi:
Mwakamulana ni yalijiganyisye, ana ni yindu yine yapi yakusayinonyela Yehofa? Ana ni yindu yine yapi yakusayiŵenga jwalakwe?
Ana wawojo mpaka atende yamtuli kuti anonyeleje yindu yambone soni kuyiŵenga yindu yakusakala?
6. Umbone wakumpikanila Yehofa
Kumpikanila Yehofa kukusaŵa kwakamuchisya ndaŵi syosope. Aŵalanje Yesaya 48:17, 18, kaneko akambilane yiwusyo ayi:
Ana tukulupilileje yakuti Yehofa akusamanyililaga yindu yambone yampaka yitukamuchisye? Ligongo chichi?
Ana kulijiganya Baibulo soni yakwamba Yehofa, kwakamuchisye chamtuli?
YAKUSAŴECHETA ŴANDU ŴANE: “Mlungu jwangali nayo masengo yitendo yangu.”
Ana ni lilemba lyapi lyampaka alikamulichisye masengo pakusaka kulosya kuti yitendo yetu yikusamkwayaga Yehofa?
YALIJIGANYISYE
Mpaka alosye kuti akusamnonyela Yehofa pakumpikanila soni pakupitilisya kuŵa jwakulupilichika kwa jwalakwe atamose kuti akusimana ni yakusawusya.
Yiwusyo Yakuwilisya
Ana alijiganyisye chichi kutyochela kwa Yobu?
Ana mpaka alosye chamtuli kuti akusamnonyela Yehofa?
Ana ni chichi champaka chakamuchisye kupitilisya kuŵa ŵakulupichika kwa Yehofa?
YAKULINGA YINESONI
Amanyilile yampaka atende kuti aŵe ŵakulupichika kwa Yehofa soni mu mpingo.
Alijiganye yejinji yakusaŵecheta Satana pakwasisya ŵandu.
“Yobu Akwendelecela Kuŵa Jwagoloka” (Ana M’Baibulo Mwana Utenga Watuli? mbali 6)
Alole yampaka atende ŵachinandipile pakulosya kuti akusamnonyela Yehofa.
Ana jwachinandipile mpaka alosye chamtuli kuti ali jwakulupichika kwa Mlungu atamose ŵane pakumkanganichisya kutenda yakusakala?