Amtumicileje Yehofa, Mlungu jwa Ufulu

1, 2. (a) Ligongo cici ngani ja ukapolo soni ufulu jaliji palipose mundaŵi ja ndumetume Paulo? (b) Ana ndumetume Paulo ŵasalile ŵandu kuti ufulu usyesyene mpaka awupate kwapi?

AKLISTU ŵandanda ŵaliji pasi pa ulamusi wa Loma. Ulamusiwu walilapililaga kuti wakwete malamusi gacilungamo, soni ufulu. Nambope, kuti yindu yijendeje cenene, ulamusiwu ŵajegamilaga acikapolo. Pa ndaŵi jine, mu ulamusi wa Loma, mundu jumo pa ŵandu ŵatatu, ŵaliji kapolo. Mwangakayicila, ngani ja ukapolo soni ufulu nganijiŵa jacilendo kwa Aklistu ligongo jaliji palipose.

² M’yikalata ya ndumetume Paulo, mwasimanikwaga ngani syakwamba ufulu. Nambo cakulinga cakwe nganiciŵa cakusaka kumasya yakusawusya, mpela muŵasacilaga ŵandu ŵane. M’malo mwakwe, Paulo ni Aklistu acimjakwe ŵalimbicilaga kwajiganya ŵandu ngani syambone syakwamba Ucimwene wa Mlungu, soni ŵakamucisyaga ŵanduwo kupikanicisya mbopesi ja ciwombolo ca Klistu Yesu. Paulo ŵasalile ŵakulupilila acimjakwe kwampaka apate ufulu usyesyene. Mwambone, m’cikalata cakwe caŵili caŵalembele Aklistu ŵa ku Kolinto, ŵatite, “Yehofa ali Msimu, m’yoyo pawuli msimu wa Yehofa, pakusaŵasoni ufulu.”—2 Akoli. 3:17.

3, 4. (a) Ana Paulo ŵasasile ya cici mkanalembe yayili pa 2 Akolinto 3:17? (b) Ana tukusosekwa kutenda cici kuti tusangalaleje ni ufulu wakutyocela kwa Yehofa?

³ Mu cikalata cakwe caŵili cakwawula kwa Akolinto, Paulo ŵasasile yayamtendecele Mose paŵaliji pa Litumbi lya Sinayi pambesi pakuŵecetana ni lilayika lya Yehofa. Ŵandu paŵagambile kum’wona Mose, wakamwile woga, kaneko jwalakwe jwaliwunicile ngope jakwe. (Eks. 34:29, 30, 33; 2 Akoli. 3:7, 13) Ndumetume Paulo ŵasasile kuti, “Naga mundu agalawucile kwa Yehofa, cakuliwunicilaco cikusatyoka.” (2 Akoli. 3:16) Ana yaŵaŵecete Pauloyi yikugopolela cici?

⁴ Mpela mutwalijiganyicisye mungani jipite jila, Yehofa, jwali Mkupanganya jwa yindu yosope, jwalakwe jikape ni jwakwete ufulu wangali malile. Pelepatu yili yakupikanika kuti “pawuli msimu wa Yehofa,” pakusaŵa ufulu. M’yoyo, kuti tusangalaleje ni ufuluwu, tukusosekwa ‘kugalawucila kwa Yehofa,’ gopolela kuti tuŵe paunasi wakulimba ni jwalakwe. Ayisalayeli paŵaliji m’cipululu, nganayiwonaga mwausimu yindu yaŵatendelaga Yehofa. Mitima ni nganisyo syawo yaliji mpela yewunicile. Jemanjaji ŵasakaga kamulicisya masengo ufulu wawo pakwanilisya yakumbila yawo.—Ahe. 3:8-10.

 5. (a) Ana msimu wa Yehofa ukusatukamucisya kuti tukole ufulu wapi? (b) Ana tukumanyilila camtuli kuti mundu mpaka aŵe pa ukapolo kapena ku ukayidi nambo ni kuŵagape pa ufulu wakutyocela kwa Yehofa? (c) Ana tukusosekwa kuliwusya yiwusyo yapi?

⁵ Ufulu watukusapata ligongo lyacikamucisyo ca msimu wa Yehofa, uli wakulekangana mnope ni ufulu wagopoka ku ukapolo. Msimu wa Mlunguwu ukusayikasya ufulu wakulekangana ni wampaka ayikasye ŵandu. Soni ukusatugopola ku ulemwa ni ciwa nambosoni ku ukapolo wakulambila kwa unami ni yitendo yakwe yakusakala. (Alo. 6:23; 8:2) Welewutu wuli ufulu wambone mnope! Mundu mpaka asangalaleje ni ufuluwu, atamose ali mu ukayidi kapena ku ukapolo. (Gen. 39:20-23) Yeleyi ni yayatendekwe ni M’bale Harold King soni M’bale Horst Henschel, juŵapilile kwa yaka yejinji paŵaliji mu ukayidi ligongo lya cikulupi cakwe. Mpaka alolele fidiyo jakusala ya cikulupi ca m’baleju pa JW Library. (Ajawule palembile kuti MEDIA > INTERVIEWS AND EXPERIENCES > ENDURING TRIALS.) Nambope, tukusosekwa kuliwusya kuti, ana mpaka tulosye camtuli kuti ufulu wetu uli wakusosekwa mnope? Ana mpaka tutende cici kuti tukamulicisyeje masengo mwalunda ufulu watukwete?

 6. Ana Ayisalayeli ŵalosisye mwamtuli ungayamicila ufulu waŵapele Yehofa?

⁶ Mundu patupele cindu cakudula, tukusam’yamicila. Nambo Ayisalayeli nganalosya kuyamicila ufulu waŵapele Yehofa pakwakoposya m’cilambo ca ukapolo ca Iguputo. Pali papitile miyesi jamnono ali ŵakopwesye m’cilamboci, jemanjaji ŵatandite kumbucila yakulya ya ku Iguputo mpaka ŵaliŵalile yaŵatendele Yehofa, mwamti ŵasakaga kuwujila ku Iguputo. Jemanjaji ŵaganicisyaga mnope ya ‘somba, masakaka, matikiti soni anyesi jwamitundumitundu’ kupunda ufulu waŵapele Mlungu wakumlambila jwalakwe. Ni ligongo lyakwe nganiyiŵa yakusimonjesya kuti Yehofa ŵatumbile mnope ni yaŵatesile ŵanduŵa. (Num. 11:5, 6, 10; 14:3, 4) Pelepatu pana lijiganyo lyekulungwa kwa m’weji!

 7. Ana Paulo jwatesile yamtuli mwakamulana ni maloŵe gakwe ga pa 2 Akolinto 6:1, soni ana m’weji mpaka tutende wuli kuti tugakuyeje?

⁷ Ndumetume Paulo ŵalimbikasisye Aklistu wosope kuti akawujigalaga mwacisyoŵe ufulu waŵatupele Yehofa kupitila mwa Mwanagwe, Yesu Klistu. (Aŵalanje 2 Akolinto 6:1.) Paulo ŵaliji jwangali umlama, mwamti jwaliji kapolo jwa ulemwa ni ciwa. Yeleyi yamtendekasyaga kulagasika nganisyo. Nambope jwayamicile kuti, ‘Mlungu tacingulupusya kupitila mwa Yesu Klistu Ambuje ŵetu.’ Ligongo cici jwayamicile? Paulo jwalondecesye Aklistu acimjakwe kuti, “Pakuti lilamusi lya msimu lyalikusapeleka umi kupitila mwa Klistu Yesu lyagopwele jemanja ku lilamusi lya ulemwa ni ciwa.” (Alo. 7:24, 25; 8:2) Mpela muŵatendele Paulo, m’wejisoni ngatukusosekwa kuliŵalila kuti Yehofa ni juŵatugopwele ku ulemwa ni ciwa. Kupitila mu ciwombolo, tukusakombola kumtumicila Mlungu tuli ni cikumbumtima ceswela soni kuŵa ŵakusangalala yisyesyene.—Sal. 40:8

8, 9. (a) Ana ndumetume Petulo ŵatukalamwisye wuli pa ngani jakuwukamulicisya masengo ufulu wetu? (b) Ana mundu mpaka akamulicisye wuli masengo ufulu wakwe mwakulemweceka?

⁸ Nambope, konjecesya pa kuyamicila kwetu, tukumbucilejesoni kuti ngatukusosekwa kuwukamulicisya masengo ufulu wetu wakusagula yakutenda mwakulemweceka. Ndumetume Petulo jwatukalamwisye kuti tukakamulicisyaga masengo ufuluwu pakusaka kulikululucila ni kutendaga yakusakala. (Aŵalanje 1 Petulo 2:16.) Maloŵe gakutukalamusyaga gakutukumbusya yayatendecele Ayisalayeli mu cipululu. M’wejisoni tukusosekwa kuŵa ŵakusamala mnope. Cilambo ca Satanaci cikwatendekasya ŵandu kuti ajigaliceje ni kawale, kulisalalisya, kulya ni kumwa, yakusangalasya nambosoni yindu yine yejinji. Mwakalamuka, ŵamalonda akusajambula ŵandu ŵakusalala pa yindu yawo pakusaka kuti ŵandu ŵajinji ayiwutucileje. Mpaka yiŵe yangasawusya kujigalika ni yindu yacikusakoposya cilamboci ni kutanda kuwukamulicisya masengo ufulu wetu mwakulemweceka.

⁹ Yaŵasasile Petuloyi, mpaka yitukamucisyesoni pa yindu yakusosekwa mnope pa umi wetu mpela majiganyo soni masengo. Mwambone, ŵacinyamata ŵajinji akusiŵalimbikasya kuti alimbicileje mnope sukulu ni cakulinga cakuti capate majiganyo gapenani. Akusiŵalimbikasya kuti pacacimalisya majiganyo gawo cacipata masengo ga mbiya syejinji soni kuti caŵe ŵakumanyika mnope. Maumboni gakulosya kuti ŵandu ŵatesile majiganyo gapenani akusawoneka kuti yindu yikwajendela cenene kulekangana ni ŵanganatenda majiganyoga. Ligongo lya yeleyi, ŵacinyamata pakusagula yindu yakusosekwa paumi wawo mpaka ayiwoneje kuti kutenda majiganyo gapenani kuli kwambone mnope. Nambo ana jemanjaji soni acinangolo akusosekwa akumbucileje cici?

10. Ana tukusosekwa kumbucilaga cici pakukamulicisya masengo ufulu wetu wakusagula yakutenda?

¹⁰ Ŵandu ŵane akusaganisyaga kuti pakuŵa yakusagula mpela yeleyi mundu akusalisagulila msyene, nikuti mpaka asagule cilicose bola cikumbumtima cakwe cikumkunda. Mwine mpaka asaleje kuti, ‘Ngangusaka kuti cikumbumtima ca mundu jwine cilamulileje ufulu wangu.’ Atamose kuti mundu jwalijose akwete ufulu wakusagula jika yakwamba majiganyo soni masengo, nambope, tukusosekwa tukumbucileje kuti ufulu wetu wakusagula yakutenda yiliyose ukwete ni yakuyicisya yakwe. Pa ligongo lyeleli, Paulo jwatite, “Yindu yosope yili yakundidwa, nambo ngaŵa kuti yosope yili yakamucisya. Yindu yosope yili yakundidwa, nambo ngaŵa kuti yosope yili yakulimbikasya.” (1 Akoli. 10:23) Lilembali likutukamucisya kumanyilila songa syakusosekwa mnope, m’malo mwakwamba kamulicisya masengo ufulu wetu pakusagula yatukuyiwona kuti yili yambone paumi wetu.

11. Ana Mlungu ŵatugopwele ni cakulinga camtuli?

¹¹ Petulo pajwatukalamwisye ya kuwukamulicisya masengo ufulu mwakulemweceka, jwasasilesoni cakulinga ca ufuluwo. Jwatulimbikasisye kuti tuwukamulicisyeje masengo ufulu wetu “mpela acikapolo ŵa Mlungu.” M’yoyo, cakulinga ca Yehofa pakutugopola ku lilamusi lya ulemwa soni ciwa kupitila mwa Yesu, caliji cakuti tulipeleceje ni umi wetu wosope kwa Mlungu ‘mpela acikapolo ŵakwe.’

12. Ana Nowa ni liŵasa lyakwe ŵatupele cisyasyo camtuli?

¹² Kuyinonyelaga mnope yindu yausimu lili litala lyambone lyampaka litukamucisye kuŵambala kuwukamulicisya masengo ufulu wetu mwakulemweceka, soni kuŵa acikapolo ŵa yakumbila ya m’cilamboci. (Aga. 5:16) Kwende tulole cisyasyo ca Nowa ni liŵasa lyakwe. Mu ndaŵi ja Nowa, ŵandu ŵajinji ŵatendaga yaciwawa soni yakusakala. Nambo Nowa ni liŵasa lyakwe nganajigalika ni yakusakala yaŵatendaga ŵanduwo. Ana ŵakombwele wuli kuyiŵambala? Ndaŵi syejinji ŵakamulaga masengo gaŵapele Yehofa gakutaŵa combo, kusunga yakulya yawo soni ya yinyama nambosoni kwakalamusya ŵandu. ‘Nowa jwatesile mwakamulana ni yosope yaŵamlamwile Mlungu.’ (Gen. 6:22) Ana yakuyicisya yakwe yaliji yamtuli? Nowa pampepe ni liŵasa lyakwe ŵakulupwice Mlungu paŵajonangaga ŵakusakala.—Ahe. 11:7.

13. Ana Yehofa ŵatulamwile kuti tutendeje cici?

¹³ Ana Yehofa ŵatulamwile kuti tutendeje cici masiku agano? Tukumanyilila kuti Mlungu ŵamlamwile Yesu kutenda masengo gakulalicila nambosoni kuti Yesu ŵalamwile ŵakumkuya ŵakwe kuti atendeje yeleyi. (Aŵalanje Luka 4:18, 19.) Masiku agano, Satana ŵatendekasisye ŵandu ŵajinji kuti akamanyililaga kuti ali acikapolo mu dini jaunami nambosoni ayinonyeleje mnope yindu yakucilu ni yindu ya m’cilambo. (2 Akoli. 4:4) Uli upile wetu kuya cisyasyo ca Yesu mwakwakamucisya ŵandu kuti ammanyilile Yehofa, Mlungu jwa ufulu soni kuti amlambileje. (Mat. 28:19, 20) Gelegatu gali masengo gamakulungwa, soni gakwete yakusawusya yejinji. M’yilambo yine, ŵandu ŵangasaka kupikanila utenga wetu. Paligongo lyeleli, jwalijose akusosekwa kuliwusya kuti, ‘Ana mpaka nawukamulicisye masengo ufulu wangu pakukamucisya masengo ga Ucimwene?’

14, 15. Ana ŵakutumicila ŵa Yehofa asagwile kutenda cici? (Alole ciwulili cacili kundanda kwa nganiji.)

¹⁴ Yili yakulimbikasya mnope kuyiwona kuti ŵakutumicila ŵa Yehofa akumanyilila kuti mbesi jiŵandicile mnope mwamti ŵajinji akutenda upayiniya. (1 Akoli. 9:19, 23) Ŵandu ŵane akutumicila mu mkuli mwawo pemo, soni ŵane akutumicila ku mkuli kwakukusosecela ŵakulalicila ŵajinji. Mu yaka msano yayipiteyi, ŵandu ŵakupunda 250,000 atandite upayiniya, mwamti apano pacilambo cosope pana apayiniya ŵakutamilicika ŵakupunda 1,100,000. Yili yakusangalasyatu kwawona ŵanduŵa ali mkuwukamulicisya masengo ufulu wawo pakumtumicila Yehofa.—Sal. 110:3.

¹⁵ Ana cici cacakamucisye abale ni alongoŵa kuti awukamulicisyeje masengo ufulu wawo mwalunda? Kwende tulole yaŵatesile John ni Judith, ŵatumicile kwa yaka 30 m’yilambo yakulekanganalekangana. Jemanjaji ŵasasile kuti Sukulu ja Undumetume wa Upayiniya jajatandite mu 1977, jagombelecesyaga umbone wakwawula kukutumicila ku mkuli kwakusosecela ŵakulalicila ŵajinji. Kuti akwanilisye cakulinga cawo, John ŵasasile kuti ŵaŵele ali mkucenga masengo gaŵakamulaga pakusaka kuti atameje umi wangasaka yejinji. Kaneko paŵayice m’cilambo cine, ŵayiweni kuti kupopela kwa Yehofa soni kumjegamila kwakamucisye kuti amalane ni yakusawusya mpela kulijiganya ciŵeceto casambano, kusyoŵelela ndamo jasambano, soni kupilila nyengo jasambano. Ana jemanjaji akupikana wuli mumtima ni undumetume watesile m’yaka yosopeyi? John jwatite, “Nguyiwona kuti nakamulaga masengo gambone mnope kupunda galigose.” Jwasasilesoni kuti, “Natandite kum’wona Yehofa mpela Mtati jwacinonyelo. Sambano napikanicisye lilemba lya Yakobo 4:8 lyalikusati, ‘Amŵandicile Mlungu, soni jwalakwe tacaŵandicila.’ Ngumanyilila kuti napatile yanayisosaga, yayili yakulinga yambone pa umi wangu.”

16. Ana ŵandu ŵajinji awukamulicisye masengo camtuli ufulu wawo mwalunda?

¹⁶ Mwakulekangana ni John soni Judith, ŵandu ŵane akusasagula kutenda undumetume wa ndaŵi syosope kwa ndaŵi jamnono, mwakamulana ni mwayiŵelele yindu pa umi wawo. Ŵajinji akusakamucisya pamasengo ga yakutaŵataŵa gagakutendekwa pa cilambo cosope. Mwambone, palyataŵidwaga likulu lya ku Warwick, New York, ŵane mwa abale ni alongo ŵakwana 27,000 ŵalesile kaje masengo gawo ni kulipeleka kuja kamula nawo masengoga kwa yijuma yiŵili, ŵane kupunda pelepa, soni ŵane mpaka kupunda caka. Celeci cili cisyasyo cambone mnope cakuwukamulicisya masengo ufulu wetu pakumlumba soni kumcimbicisya Yehofa, Mlungu jwa ufulu.

17. Naga tukuwukamulicisya masengo mwalunda ufulu waŵatupele Mlungu, ana tucipata majali gapi?

¹⁷ Tukuyamicila mnope ligongo lyakummanyilila Yehofa soni kusangalala ni ufulu usyesyene patukumlambila. M’yoyo mu yakusagula yetu, kwende tulosyeje kuti ufulu wetu uli wakusosekwa mnope. M’malo mwakuwukamulicisya masengo ufuluwu mwakulemweceka, kwende tuwukamulicisyeje masengo pakumtumicila Yehofa. Naga tukutenda yeleyi, tucisangalala ni majali gaŵatulagucisye Yehofa pagacikwanilicikwa maloŵe gakuti, “Yakupanganyikwa yicigopoka ku ukapolo wakuwola ni kola ufulu waucimbicimbi wa ŵanace ŵa Mlungu.”—Alo. 8:21.