1. Ana ndumetume Paulo jwalembile maloŵe gamtuli pakwakalamusya Aklistu ŵasagulwe?

NDUMETUME PAULO jwatukalamwisye kuti, “Mkasimkuyaga ndamo syakusakala sya ŵandu ŵa cilambo capasi pano.” (Alo. 12:2) Paulo jwalembele maloŵega Aklistu ŵa m’yaka 100 yandanda. Ligongo cici Paulo jwaŵecete yeleyi kwa acalume soni acakongwe ŵaŵaliji ali alipelece kala kwa Mlungu soni ŵaŵaliji ŵasagulwe ni msimu weswela?—Alo. 1:7.

2-3. Ana Satana akusasokonasya unasi wetu ni Yehofa camtuli, soni mpaka tutyosye camtuli yindu yakusakala “yayitamilicice” munganisyo mwetu?

² Paulo jwakwayidwaga mnope ligongo lyakuti Aklistu ŵane ŵakolaga nganisyo soni kwendela lunda lwa ŵandu ŵa m’cilambo cakulongoleledwa ni Satanaci. (Aef. 4:17-19) Yeleyi mpaka yitutendecelesoni m’weji. Satana ali jwakulamulila jwa cilambo capasici soni jwalakwe mpaka atende yiliyose pakusaka kutusokonasya. Mwacisyasyo, naga tuli mkusaka kuŵa ŵakumanyika kapena kuŵa ŵakusosekwa mnope, Satana akusakamulicisya masengo mpata welewu ni kututendekasya konanga unasi wetu ni Yehofa. Satana akusakamulicisyasoni masengo yindu yatwalijiganyisye ku sukulu, ndamo jetu kapena acimjetu ŵatusyungulile pakusaka kuti tuganisyeje mpela mwakusaganicisya jwalakwejo.

 4. Ana ni kucenga kwapi kwatwasosekwe kutenda pandaŵi jitwagambile kulijiganya usyesyene?

⁴ Aganicisye yindu yaŵasosekwaga kucenga pandanda ali agambile kulijiganya kwene usyesyene wa m’Maloŵe ga Mlungu ni kusagula kumtumicila Yehofa. Ŵane mwa m’weji kuti tuyice pakumtumicila Yehofa twasosekwe kuleka yindu yakusakala yatwatendaga. (1 Akoli. 6:9-11) Kusala yisyene, tukusayamicila ligongo lyakuti Yehofa ŵatukamucisye kuti tukombole kusileka ndamo syakusakalasi.

 5. Mwakamulana ni lilemba lya Aloma 12:2, ana ni yindu yiŵili yapi yakutusalila kuti tutendeje?

⁵ Ngatukusosekwa kulipikana kuti basi ngatukusosekwa kucenga panyuma pakulijiganya usyesyene. Atamose kuti twalesile kutenda maulemwa gekulungwa gatwatendaga mkanituŵe kubatiswa, tukusosekwa kuŵambala kutenda yindu yampaka yitutendekasye kuwujilasoni ku yitendo yakalayo. Ana mpaka tutende wuli yeleyi? Paulo jwasasile kuti, “Akajigalilaga lunda lwa ndaŵi ajino, nambo agalawuce mwakucenga nganisyo syawo.” (Alo. 12:2, NW.) Kuti yeleyi yikombolece, tukusosekwa kutenda yindu yiŵili ayi. Candanda, tukusosekwa kuŵambala “kujigalila lunda” lwa kucilamboku. Cindu caŵili, tukusosekwa “kugalawuka” mwakucenga nganisyo syetu.

 6. Ana tukulijiganya cici pa maloŵe ga Yesu gagakusimanikwa pa Mateyu 12:43-45?

⁶ Kucenga kwaŵasalaga Paulo ngaŵa kwakusape. Kucengaku kukusakwaya umi wetu wosope. (Alole libokosi lyakuti “Ana Twacenjile Yisyesyene Kapena Twagambile Kuŵa Mpela Tucenjile?”) Tukusosekwa kucenga yisyesyene kaganisye ketu, ndamo syetu sisyesyene, mwatukusapikanila mumtima nambosoni yindu yatukusakumbilaga. Jwalijose akusosekwa kuliwusya kuti, ‘Ana kucenga kwangutenda pakusaka kumsyasya Mklistuku, kuli kwakwamba kulilosya, kapena ngutenda yeleyi kutyocela pasi pamtima soni mu nganisyo mwangu?’ Kupata kwanga kwa ciwusyoci kuli kwakusosekwa mnope. Mwakamulana ni maloŵe gagali pa Mateyu 12:43-45, Yesu jwalosisye cindu catukusosekwa kutenda. (Aŵalanje.) Maloŵega gakutujiganya cindu cine cakusosekwa mnope, cakuti nganikuŵa kwakwanila gamba kutyosya nganisyo syakusakala, nambo patutyosisye tukusosekwa kuŵika nganisyo syakusasiwona Mlungu kuti sili syakuŵajilwa.