Ŵacinyamata Mpaka Akombole Kulimbana ni Satana

1, 2. (a) Ligongo cici ŵacinyamata akusapunda ngondo jakulimbana ni acimmagongo ŵausimu? (Alole ciwulili cacili penanipa.) (b) Ana mungani ajino citutagulilane cici?

NDUMETUME Paulo jwasasile kuti Aklistuwe tuli mpela asilikali. Nambo ngondo jatukuputa jili jausimu, ngaŵa jakulimbana ni ŵandu. Atamose yili m’yoyo, nambo acimmagongo ŵetu ali ŵasyesyene. Satana ni yiŵanda aŵele ali mkuputa ngondo kutandila kalakala soni akusajimanyilila cenene. Ligongo lya yeleyi mpaka tuyiwoneje kuti nganituŵa tupundile. Masiku agano, mnopemnope ŵacinyamata Ŵamboni ni ŵali pa ngosi jekulungwa. Ana mpaka atende cici kuti apunde pa ngondo jakulimbana ni acimmagongo ŵamaciliŵa? Kusala yisyene, ŵacinyamata mpaka apunde soni aŵele ali mkupunda. Ligongo cici tukuŵeceta m’yoyo? Ligongo lyakuti ‘akusajendelecela kupata macili kutyocela kwa Ambuje.’ Nambo panasoni cindu cine cakusatenda. Akusakosecela cenene ngondo. Mwakulandana ni asilikali ŵalijiganyisye cenene, ŵacinyamataŵa ‘akusawala yida yosope yangondo yakutyocela kwa Mlungu.’—Aŵalanje Aefeso 6:10-12.

² Paulo paŵasalaga ya cisyasyoci komboleka kuti jwaganisyaga muŵawalilaga asilikali ŵa ku Loma. (Mase. 28:16) Mungani ajino citulijiganye kusosekwa kwa cisyasyoci. Citulolesoni yakusawusya yaŵasasile ŵacinyamata ŵane soni umbone wakuwala yida yosope ya ngondo jausimu.

3, 4. Ana usyesyene wa m’Baibulo uli wakulandana camtuli ni lamba juŵawalaga msilikali jwa ku Loma?

³ Aŵalanje Aefeso 6:14. Lamba juŵawalaga asilikali ŵa ku Loma jwakwete tusyano. Tusyanotu twacigaga upanga naga jwine akusaka kumsoma msilikalijo m’ciwunu. Lambaju jwakamucisyagasoni kuti cakuwala ca msilikali ciŵe m’malo mwakwe. Malamba gane gakolaga malo gakusweka upanga. Naga lamba amtaŵile cenene, msilikali jwaŵaga jwakoseka kuja kuputa ngondo.

⁴ Mwakulandana ni yeleyi, usyesyene watukusalijiganya kutyocela m’Maloŵe ga Mlungu ukusatukamucisya kuti tukajigalikaga ni yijiganyo ya dini syaunami. (Yoh. 8:31, 32; 1 Yoh. 4:1) Patukunonyela mnope usyesyene, yikusaŵa yangasawusya kuwala “cakulicinjilicisya pamtima,” cacili kukuya malamusi gakulungama ga Mlungu. (Sal. 111:7, 8; 1 Yoh. 5:3) Nambosoni naga tukumanyilila cenene usyesyene wakutyocela m’Maloŵe ga Mlungu, tukusakombola kuwucenjela kwa ŵandu ŵakusisya.—1 Pet. 3:15.

 5. Ligongo cici kuŵeceta yisyesyene kuli kwakusosekwa?

⁵ Naga tukuwutaŵilila usyesyene wa m’Baibulo mpela lamba, tucitendaga yindu yakamulana ni yatukusalijiganya nambosoni tuciŵecetaga yisyesyene ndaŵi syosope. Ligongo cici tukusaŵambala kuŵeceta yaunami? Ligongo unami uli cimo mwa yida yekulungwa yakusakamulicisya masengo Satana. Unami uli wakogoya kwa mundu jwakusaŵecetajo soni jwakuyikulupilila. (Yoh. 8:44) M’yoyo atamose kuti tuli ŵangali umlama tukusaŵambala kuŵeceta yaunami. (Aef. 4:25) Nambope ndaŵi sine mpaka yiŵe yakusawusya. Abigail jwa yaka 18, jwasasile kuti, “Kuŵeceta yakuwona kukusaŵa kwakusawusya mnopemnope patukumanyilila kuti pacituŵecete yaunami ngatusimana ni yakogoya.” Sano ligongo cici mlongoju akusalingalinga kuŵeceta yakuwona ndaŵi syosope? Jwalakwe jwasasilesoni kuti, “Panguŵeceta yisyesyene ngusakola cikumbumtima ceswela pameso pa Yehofa. Nambosoni acinangolo ŵangu soni acimjangu akusangulupilila.” Victoria jwa yaka 23, jwasasile kuti, “Pawukuŵeceta yisyesyene soni kutenda yawukusayikulupilila, ngawukusadandawula. Ukusapata maumbone gejinji mpela kuŵa jwakulimba mtima, kuŵa pa unasi wambone ni Yehofa, soni ŵane akusakucimbicisya.” M’yoyo, yili yakusosekwa kuti ndaŵi syosope ‘tutaŵilileje lamba jwa usyesyene m’ciwunu mwetu.’

6, 7. Ligongo cici malamusi gakulungama ga Yehofa gakulandana ni cakulicinjilicisya pamtima?

⁶ Cakulicinjilicisya pamtima caŵawalaga asilikali ŵa ku Loma cakolaga tusyano twesajikane mpela maŵamba ga somba. Tusyanotu ŵatupindaga kuti tukwanile cidali ca mundu. Kaneko ŵatulumbikanyaga ni ngonji sya lipende. M’makoyo mwakwe mwaŵaga tusyano twejinji twelumbikanye. Ndaŵi syosope msilikali jwasosekwaga kulola naga tusyanotu nganitugopoka. Upanganye ni usito wa cakuwalaci yamtendekasyaga kwenda mwakulajilila. Nambope cakamucisyaga kuti mtima wakwe soni yiŵalo yine yikasomedwa ni upanga kapena mipamba ja acimmagongo ŵakwe.

⁷ Mwelemu ni mwagakusatendela malamusi gakulungama ga Yehofa. Malamusiga gakusacenjela mtima wetu wakuwanicisya. (Miy. 4:23) Cakuwala ca msilikali cakolaga tusyano twamacili. M’yoyo msilikali nganasosekwaga kucenganya ni cakuwala ca tusyano twangali macili. Mwakulandana ni yeleyi, m’wejisoni ngatukusosekwa kuleka malamusi ga Yehofa ni kwendelaga nganisyo syetu. Nganitukola lunda lwejinji lwampaka lutukamucisye kulicenjela pa cilicose. (Miy. 3:5, 6) Ni ligongo lyakwe ndaŵi syosope tukusosekwa kulolecesya kuti “cakulicinjilicisya pamtima” caŵatupele Yehofa cikutucenjelape.

 8. Ligongo cici kukuya malamusi ga Yehofa kuli kwambone mnope?

⁸ Ana ndaŵi sine akusalipikana kuti malamusi gakulungama ga Yehofa gali gakusawusya kugakuya kapena gakwakasila ufulu? Daniel jwakwete yaka 21, jwatite, “Aticala soni acimjangu ŵa kusukulu ŵanyosyaga ligongo lyakuti ngusakuya malamusi ga m’Baibulo. Kwakandaŵi, natengwice mwamti yandendekasisye kuŵa jwangasangalala.” Ana cici cacamkamucisye m’baleju kuti aŵe jwakulimbangana? Jwalakwe jwasasilesoni kuti, “Pambesi pakwe, nawuweni umbone wakukuya malamusi ga Yehofa. Acimjangu ŵane ŵatandite kumwa mitela jakusokonasya mtwe soni ŵane ŵalesile sukulu. Yaliji yakutesya canasa kuwuwona muwacenjele umi wawo. Ngusasangalala kuti Yehofa akusatucenjela.” Mlongo jwine jwa yaka 15 lina lyakwe Madison, jwatite, “Kwa une, kukuya malamusi ga Yehofa, ngaŵaga yakuyiwona acimjangu kuti yili yakusangalasya, jili ngondo jekulungwa.” Ana mlongoju akusamalana nayo camtuli yeleyi? Jwalakwe jwatite, “Ndaŵi syosope ngusakumbucila kuti ndili Mboni ja Yehofa, m’yoyo ngumanyilila kuti yakulingwa yili litala lyakusakamulicisya masengo Satana pakulimbana ni une. Nambo pangombwele kulimbana ni cakulingwaco, ngusaŵa jwakusangalala mnope.”

9-11. (a) Ana sapato syakuwanicisya syakusawala Aklistu sili cici? (b) Ana cici campaka citukamucisye kuti tulalicileje cenene ngani syambone?

⁹ Aŵalanje Aefeso 6:15. Msilikali jwa Ciloma naga nganawala sapato nganaŵaga jwakoseka kwawula kungondo. Capasi ca sapato syakwe caŵaga cakupwatikanya mapende gatatu, mwamti caliji cakulimba mnope. Sapatosi syamkamucisyaga kuti akatelesyaga nambo ajendeje cenene.

¹⁰ Sapato sya asilikali ŵa Ciloma syakosecelesyaga kwawula kungondo. Sapato syakuwanicisya syakusawala Aklistu sikusakosecelesya kuti akalalicileje ngani syambone sya mtendele. (Yes. 52:7; Alo. 10:15) Nambope, kuti umlalicile mundu jwine pakusasosekwa kulimba mtima. M’bale jwine jwa yaka 20, jwatite, “Natendaga sooni kwalalicila acimjangu ŵa m’kalasi. Pangumbucile, ngusinaligamba kuti ligongo cici natendaga yeleyi. Nambo apano ngusangalala kuti ngukombola kwalalicila ŵandu ŵamsingu wangu.”

¹¹ Ŵacinyamata ŵajinji ayiweni kuti pakosecele cenene, akusakombola kulalicila ngani syambone. Ana mpaka atende cici kuti akoseceleje cenene? Julia, mlongo jwa yaka 16, jwatite, “Pangwawula kusukulu, ngusajigalasoni mabuku gakutagulila ya Baibulo. Pangukunguluka ni acimjangu, ngusatejela mnope mawiwi kuti mbikane yakusakulupilila acimjangu nambosoni nganisyo syawo. Kaneko ngusalinga kuganicisya yampaka yakamucisye. Pangosecele cenene, ngusakombola kwasalila mwakwayika pamtima.” Mlongo jwine jwa yaka 23 lina lyakwe Makenzie, jwasasile kuti, “Naga ukusatama cenene ni ŵandu ni kwapikanilaga pakuŵeceta, ukusamanyilila yakusawusya yejinji yakusimana nayo acimjenu. Ngusalolecesya kuti mbalasile ngani syosope sya ŵacinyamata. Pambesi pakwe ngusakombola kwasalila acimjangu yampaka yakamucisye kutyocela m’Baibulo kapena pa jw.org.” Yaŵecete ŵacinyamataŵa yikulosya kuti naga tukosecele cenene yakuti tukalalicile, nikuti nganituwula sapato kusajo kwetu.

12, 13. Asale umo mwa “mipamba jakolela moto” jakusakamulicisya masengo Satana.

¹² Aŵalanje Aefeso 6:16. “Cakulicinjilicisya” kapena cakucijila caŵajigalaga msilikali jwa ku Loma caŵaga cekulungwa mwamti catandilaga m’makoyo mpaka m’malungo. Cinduci camkamucisyaga msilikali kuti akasomedwa ni upanga soni mipamba ja moto.

¹³ Satana akusasala yaunami pakwamba ya Yehofa. Welewu wuli umo mwa “mipamba jakolela moto” jakusakamulicisya masengo. Jwalakwe akusati Mlungu jwangasamala ya m’weji soni jwangatunonyela. Mlongo jwine jwa yaka 19 lina lyakwe Ida, pandaŵi jine jwalipikanaga kuti ali jwangali mate. Jwalakwe jwatite, “Nalipikanaga kuti Yehofa nganaŵa pa unasi ni une soni jwalakwe jwangasaka kuti aŵe Mjangu.” Ana mlongoju jwatesile wuli kuti amasye nganisyo syelesi? Ida jwatite, “Misongano jalimbikasisye mnope cikulupi cangu. Pandanda najawulaga ku misonganoji nambo nganimbelekaga ndemanga pakuganisya kuti pangali jwampaka asangalale kupikanila yanguŵeceta. Nambo kaneko, natandite kukosecela cenene misongano, soni pambite nalingaga kupeleka ndemanga kaŵili kapena katatu. Yaŵaga yakusawusya, nambope napikanaga cenene mumtima pandesile yeleyi. Abale ni alongo ŵalimbikasyaga. Pakuŵeluka ngusaŵaga jwakusangalala kumanyilila kuti Yehofa akunonyela.”

14. Ana yayamtendecele Ida yikutukamucisya kumanyilila cici?

¹⁴ Yayamtendecele Ida yikutukamucisya kumanyilila cindu cakusosekwa mnope. Cakulicinjilicisya caŵakamulicisyaga masengo msilikali nganicicengaga ukulu wakwe, nambo cakulicinjilicisya cetu ca cikulupi mpaka cinandipe kapena kukula. M’weji mpaka tusagule kucikusya kapena iyayi. (Mat. 14:31; 2 Ates. 1:3) M’yoyo yili yakusosekwa mnope kuti tukusyeje cikulupi cetu.

15, 16. Ana cembeceyo cetu cikulandana camtuli ni cisoti ca msilikali?

¹⁵ Aŵalanje Aefeso 6:17. Cisoti caŵawalaga asilikali ŵakwenda pasi ŵa ku Loma, cakamucisyaga kuti akasomedwa mumtwe, palukosi, kapena kungope. Yisoti yine yakolaga mkonjo kuti msilikali akomboleje kunyakula m’miyala.

¹⁶ Cisoti ca msilikali camkamucisyaga kuti akawulala mumtwe ni konanga ututu. M’yoyosoni, ‘cembeceyo cetu ca cikulupusyo’ cikusacenjela nganisyo syetu kuti tuganisyeje cenene. (1 Ates. 5:8; Miy. 3:21) Cembeceyo cikusatukamucisya kuti tuŵiceje nganisyo syetu pa yindu yaŵatulagwisye Mlungu. Cikusatukamucisyasoni kuti tukadandawulaga mnope ni yakusawusya yatukusimana nayo. (Sal. 27:1, 14; Mase. 24:15) Nambo naga tukusaka kuti “cisoti” cetu citucenjeleje, tukusosekwa kuciwala, ngaŵaga kucinyakula m’miyala.

17, 18. (a) Ana Satana akusatenda yamtuli kuti tuwule cisoti cetu? (b) Ana mpaka tulosye camtuli kuti ngatukujigalika ni nganisyo sya Satana?

¹⁷ Ana Satana mpaka atende yamtuli kuti tuwule cisoti cetu? Kwende tulole yaŵatesile ni Yesu. Satana jwamanyililaga kuti Yesu caciŵa jwakulamulila cilambo capasi. Nambo Yesu jwasosekwaga kwembeceya ndaŵi jakuŵajilwa jaŵatamilikasisye Yehofa. Soni mkanaŵe mwenye jwasosekwaga kulaga ni kuwa. Nambo Satana ŵampele upile Yesu wakuti akwanilisye cembeceyo cakweci mwacitema. M’yoyo ŵamsalile Yesu kuti naga camlambile kampepe, ndaŵi jijojo caŵe mwenye. (Luk. 4:5-7) Mwakulandana ni yeleyi, Satana akumanyilila kuti Yehofa cacitupa yindu yejinji yakucilu m’cilambo casambano. Kuti citupocele yindu yeleyi, tukusosekwa kwembeceya, soni pandaŵi ajino citusimaneje ni yakusawusya yejinji. Nambo Satana akusatunyenjelela kuti tusangalaleje ni umiwu apano. Jwalakwe akusasaka kuti tuŵiceje nganisyo syetu pa yindu yakucilu ni cakulinga cakuti apano tupatile cile yindu yaŵatulagwisye Yehofa. Satana akusatulimbikasya kuti tuŵiceje yindu ya Ucimwene pa malo gaŵili.—Mat. 6:31-33.

¹⁸ Ŵacinyamata ŵajinji ngakusajigalika ni nganisyo sya Satanasi. Cisyasyo cimo cili ca mlongo jwine jwa yaka 20 lina lyakwe Kiana. Jwalakwe jwatite, “Ngumanyilila kuti Ucimwene wa Mlungupe ni wampaka umasye yakusawusya yosope.” Ana cembeceyo celeci cikusamkamucisya wuli? Kiana jwasasile kuti, “Cembeceyo ca Paladaiso cikusangamucisya kuti ngalimbanaga mnope ni yindu ya kucilambo. Ngangusakamulicisya masengo lunda lwangu kuti sicile. M’malo mwakwe ndaŵi syosope ngusakamulicisya masengo macili gangu pa yindu yausimu.”

19, 20. Ana mpaka tujonjecesye wuli lunda lwetu patukukamulicisya masengo Maloŵe ga Mlungu?

¹⁹ Maupanga gaŵakamulicisyaga masengo asilikali ŵa ku Loma gaŵaga gelewu masentimita 50. Asilikaliŵa ŵamanyililaga mnope kakamulicisye masengo ka maupangaga. Ŵakombolaga kutenda yeleyi ligongo lyakuti ŵalijiganyaga lisiku lililyose.

²⁰ Paulo ŵasasile kuti Maloŵe ga Mlungu gali mpela upanga watupele Yehofa. Nambo tukusosekwa kulijiganya mwampaka tugakamulicisye masengo mwalunda pakucenjela yatukusakulupilila kapena pakucenga kaganisye ketu. (2 Akoli. 10:4, 5; 2 Tim. 2:15) Ana mpaka ajonjecesye wuli lunda lwawo? M’bale jwine jwa yaka 21 lina lyakwe Sebastian, jwatite, “Panguŵalanga Baibulo, mu caputala cilicose ngusasagula ndime jimo jinajinonyele. Kaneko ngusalemba maloŵe ga mundimejo m’kabuku kangu. Yeleyi yikusangamucisya kuti ndendeje yindu mwakamulana ni nganisyo sya Yehofa.” Daniel jwatumkolasile kala jula, jwatite, “Panguŵalanga Baibulo ngusasagula malemba gangugawona kuti mpaka gakamucisye ŵandu mu undumetume. Nayiweni kuti ŵandu akusapikanila pangukamulicisya masengo Baibulo soni pangutenda yosope yampaka ngombole pakwakamucisya.”

21. Ligongo cici ngatukusosekwa kumjogopa Satana ni yiŵanda?

²¹ Mpela mwatulijiganyicisye kutyocela pa yisyasyo ya ŵacinyamata munganiji, ngatukusosekwa kumjogopa Satana ni yiŵanda. Jemanjaji akwete macili nambo ngalandana ni macili ga Yehofa. Soni ngaŵa kuti caŵe ni umi mpaka kalakala. Pacangakaŵapa, mkati mwa Ulamusi wa Yaka 1,000 wa Klistu, Satana ni yiŵanda yakwe caciŵicidwa mu ndende. Pambesi pakwe cacijonanjidwa. (Ciu. 20:1-3, 7-10) Tukummanyilila cenene mmagongo jwetu, yitendo yakwe, soni yakulinga yakwe. M’yoyo, ni cikamucisyo ca Yehofa, mpaka tupunde pa ngondo jakulimbana najo.