NGANI JAKULIJIGANYA 39
Ana Lina Lyawo Lyalembedwe mu “Buku ja Umi”?
“Buku ja chikumbukumbu jalembedwe pameso pakwe, jakusala ya ŵele ŵandu uŵajogopaga AMBUJE.”—MALA. 3:16.
NYIMBO NA. 61 Mjawule Pasogolo Mbonimwe!
YACHITULIJIGANYEa
Kutandila kalakala Yehofa aŵele ali mkonjechesya mena mu “buku ja umi” (Alole ndime 1-2)
1. Mwakamulana ni Malaki 3:16, ana Yehofa aŵele ali mkulemba buku japi? Ana m’bukuji mwana yamtuli?
KWA yaka yejinji, Yehofa aŵele ali mkulemba buku japadela. Bukuji, jikwete mena kutandila ni lina lya mboni jakulupichika jandanda, Abele.b (Luk. 11:50, 51) Kutandila pandaŵijo, Yehofa aŵele ali mkonjechesya mena gane m’bukuji, mwamti pakwika apano bukuji jikwete mena gejinji. M’Baibulo buku jeleji akusajikolanga kuti “buku ja chikumbukumbu,” “buku ja umi” soni “mpukutu wa umi.” Nambo munganiji chitukamulichisye masengo maloŵe gakuti “buku ja umi.”—Aŵalanje Malaki 3:16; Chiw. 3:5; 17:8.
2. Ana ŵani ŵalembedwe mena gawo m’buku ja umi? Ana mpaka tutende chichi kuti lina lyetu lilembedwe m’bukuji?
2 Buku japadelaji jana mena ga ŵandu wosope ŵakusamtumichila Yehofa soni kunonyela lina lyakwe. Jemanjaji akwete upile wakupochela umi wangamala. Masiku agano mpaka tukolesoni upile wakulembedwa mena getu m’bukuji naga tukuŵa paunasi wambone ni Yehofa kupitila mu mbopesi ja Mwanache jwakwe, Yesu Klistu. (Yoh. 3:16, 36) Myoyo, chinga tukwete Chembecheyo chakwawula kwinani kapena chakutama ni umi wangamala pachilambopa, wosopewe tukusasaka lina lyetu lili lilembedwe m’bukuji.
3-4. (a) Ana kulembedwa lina lyetu m’buku ja umi yikugopolela kuti tuchipata umi wangamala? Alondesye. (b) Ana mungani ajino soni jakuyichisya chitukambilane chichi?
3 Ana yeleyi yikugopolela kuti wosope ŵaŵalembedwe mena gawo m’bukuji chachipochela umi wangamala? Tukusapata kwanga kwa chiwusyochi pa maloŵe ga Yehofa gaŵamsalile Mose, gagakusasimanikwa pa Ekisodo 32:33. Pelepa Yehofa ŵatite, “Jwele jwandemwechesye une pejo, ni jutinamfute lina lyakwe m’buku jangu.” Yeleyi, yikulosya kuti mena gagakusimanikwa m’bukuji mpaka gafufutidwe. Apatu yili mpela kuti Yehofa alembile menaga ni pemsulo. (Chiw. 3:5) Tukusosekwa kulolechesya kuti lina lyetu likafufutidwa m’bukuji mpaka pandaŵi jele chachililemba ni chakulembela cha inki.
4 Yeleyi mpaka yitutendekasye kuliwusya yiwusyo mpela yakuti, ana Baibulo jikusasala yamtuli pakwamba ya ŵandu ŵalembedwe mena gawo m’buku ja umi soni ŵele mena gawo nganigalembedwa? Ana ŵandu ŵele mena gawo nganigafufutidwa m’bukuji chachipochela umi wangamala chakachi? Nambi wuli pakwamba ya ŵandu ŵaŵawile mkanaŵe kulijiganya yakwamba Yehofa, ana yili yakomboleka kwalemba mena gawo m’bukuji? Yiwusyo yeleyi chitupate kwanga kwakwe munganiji soni jakuyichisya.
ANA ŴANI ŴALEMBEDWE MENA GAWO M’BUKU JA UMI?
5-6. (a) Mwakamulana ni Afilipi 4:3, ana gulu jandanda japi jele mena gawo gelembedwe m’buku ja umi? (b) Ana ni ndaŵi japi jele mena ga jemanjaji gachilembedwa mwamti ni ngafufutidwasoni?
5 Ana ŵani ŵalembedwe mena gawo m’buku ja umi? Kuti tupate kwanga kwa chiwusyochi, chitukambilane magulu msano ga ŵandu. Mmagulu gelega ŵane alembedwe mena gawo m’buku ja umi pele ŵane nganalembedwa.
6 Gulu jandanda jili ja ŵandu ŵaŵasagulidwe kuti akalamulile yimpepe ni Yesu kwinani. Ana mena ga jemanjaji galembedwe mu buku ja umi? Elo. Mwakamulana ni maloŵe ga ndumetume Paulo gakwawula kwa “ŵakutumichila” achimjakwe ŵa ku Filipi, mena ga ŵasagulwe ŵachakalamulile ni Yesu galembedwe m’buku ja umi. (Aŵalanje Afilipi 4:3.) Nambo kuti mena ga jemanjaji gakafututidwa m’bukuji, akusasosekwa kupitilisya kuŵa ŵakulupichika. Kaneko pachachipochela chidindo chakumalisya, chinga mkanaŵe kuwa kapena yisawusyo yekulungwa mkaniyitande, pelepo mena gawo gachilembedwa mwamti ngasigafufutidwasoni mpaka kalakala.—Chiw. 7:3.
7. Ana lilemba lya Chiwunukuko 7:16, 17 likutukamuchisya chamtuli kumanyilila ndaŵi jele ŵandu ŵa m’likuga lyekulungwa lya ngondolo sine chachilembedwa mena gawo m’buku ja umi soni ngafufutidwa mpaka kalakala?
7 Gulu jaŵili jili likuga lyekulungwa lya ngondolo sine. Ana mena ga jemanjaji galembedwe m’buku ja umi? Elo. Ana mena ga jemanjaji gachiŵape m’buku ja umi panyuma pa Alamagedo? Elo. (Chiw. 7:14) Yesu jwasasile kuti ŵandu ŵeleŵa ŵali mpela ngondolo “chachitama ni umi kwa ndaŵi syosope.” (Mat. 25:46) Nambo ŵandu ŵachachikulupuka pa Alamagedo ngasayichila kupochela umi wangamala. Mena ga jemanjaji gachiŵa chiŵela m’buku ja umi nambo gelembedwe ni pemsulo. Mkati mwa Ulamusi wa Yaka 1,000, Yesu “chachasamalila jemanjaji ni kwalongolela ku nduluko sya mesi gaumi.” Ŵandu ŵachachipikanila malangiso ga Yesu chachawelusya kuti ali ŵakulupichika pameso pa Yehofa. Mwamti pambesi pakwe mena gawo gachilembedwa m’buku ja umi soni ngasigafufutidwa mpaka kalakala.—Aŵalanje Chiwunukuko 7:16, 17.
8. Ana ni mena ga ŵandu ŵapi ganganigalembedwa m’buku ja umi? Ana jemanjaji chichatendechela chichi?
8 Gulu jatatu jili ja ŵandu ŵali mpela mbusi ŵachachijonanjidwa pa Alamagedo. Mena ga jemanjaji nganigalembedwa m’buku ja umi. Yesu jwasasile kuti jemanjaji “chachiwa mwamti ngasasimanikwasoni mpaka kalakala.” (Mat. 25:46) Mwakusalilidwa, Paulo jwalembile kuti, “ŵandu ŵeleŵa chachawelusya ni kwajonanga mwamti ngasawonekasoni.” (2 Ates. 1:9; 2 Pet. 2:9) Yeleyisoni ni yayichatendechela ŵandu ŵaŵele ali mkunyosya msimu weswela. Jemanjaji chachijonanjidwa mwamti ngasasimanikwasoni mpaka kalakala soni ngasajimuka ku ŵawe. (Mat. 12:32; Maliko 3:28, 29; Aheb. 6:4-6) Sambano kwende tulole magulu gaŵili ga ŵandu ŵachachijimuka ku ŵawe pachilambopa.
ŴANDU ŴACHACHIJIMUKA KU ŴAWE
9. Mwakamulana ni Masengo 24:15, ana ni magulu gaŵili gapi gagachijimuka ku ŵawe kuti atameje pachilambopa? Ana maguluga gakulekangana uli?
9 Baibulo jikusasala ya magulu gaŵili ga ŵandu ŵachachijimuka ku ŵawe ŵakwembecheya kutama ni umi wangamala pachilambo chapasi. Magulu gelega gali ga “ŵandu ŵakulungama” ni ‘ŵangalungama.” (Aŵalanje Masengo 24:15.) “Ŵandu ŵakulungama” ali ŵandu ŵaŵamtumichile Yehofa mwakulupichika pandaŵi jiŵaliji umi. Nambo “ŵangalungama” ali ŵandu ŵele nganamtumichila Yehofa pandaŵi jiŵaliji umi. Kuŵecheta kwine mpaka tujile kuti jemanjaji ŵatendaga yindu yakusakala. Pakuŵa ŵandu wosopeŵa chachijimuka ku ŵawe, ana mpaka tujile kuti mena gawo galembedwe m’buku ja umi? Kuti tupate kwanga kwa chiwusyochi, kwende tukambilane ya gulu jilijose pajika.
10. Ligongo chichi “ŵandu ŵakulungama” chachijimuka ku ŵawe? Ana ŵane mwa jemanjaji chachisangalala ni upile wapi? (Alolesoni libokosi lyakuti “Yiwusyo Yakutyochela kwa Ŵakuŵalanga” pakwamba ya ŵandu ŵachachijimuka ku ŵawe.)
10 Gulu ja mcheche jili ja “ŵandu ŵakulungama.” Mena ga jemanjaji galembedwe m’buku ja umi mkanaŵe kuwa. Ana jemanjaji paŵawile nikuti mena gawo gafufutidwe? Iyayi, ligongo Yehofa akwakumbuchilape. Yehofa “ali Mlungu jwa ŵandu ŵaumi ngaŵaga ŵawe, pakuŵa kwa jwalakwejo wosope ali ŵaumi.” (Luk. 20:38) Yeleyi yikugopolela kuti ŵandu ŵakulungama pachachijimukaga ku ŵawe kuti atame ni umi pachilambopa, mena gawo gachisimanikwa m’buku ja umi atamose kuti pandanda ŵagalembile ni pemsulo. (Luk. 14:14) Ngatukukayichila kuti ŵane mwa ŵandu ŵachachijimuka ku ŵawe, chachikola upile wakuŵa “ayimwene pachilambo chosope chapasi.”—Sal. 45:16.
11. Ana ŵandu “ŵangalungama” chachisosekwa kulijiganya chichi kuti mena gawo galembedwe m’buku ja umi?
11 Pakumalisya kwende tulole gulu jamsano. Guluji jili ja ŵandu “ŵangalungama.” Pakuŵa ŵandu ŵeleŵa nganamanyililaga malamusi ga Yehofa pandaŵi jiŵaliji ni umi, jemanjaji nganakola upile wakumtumichila. Myoyo mena gawo nganigalembedwa m’buku ja umi. Nambo jemanjaji pachachijimuka, Mlungu tachapa upile wakuti mena gawo galembedwe m’buku ja umi. Kusala yisyene ŵandu “ŵangalungama” ŵeleŵa chachisosekwa kwakamuchisya. Ligongo ŵane mwa jemanjaji paŵaliji umi ŵatendaga yindu yakusakala mnope. Myoyo chachisosekwa kwajiganya malamusi ga Yehofa soni kuti atendeje yindu yakamulana ni malamusigo. Kuti yeleyi yikomboleche, Uchimwene wa Mlungu uchilongolela pa masengo gekulungwa gakwiganya ŵandu gele nganigatendekweje chitandilile mu mbili ja ŵandu pachilambopa.
12. (a) Ana ŵani ŵachachajiganyaga ŵandu ŵangalungamaŵa? (b) Ana ŵandu ŵachachikana kukuya yakulijiganya chichatendechela chichi?
12 Ana ŵani ŵachachajiganyaga ŵandu ŵangalungamaŵa? Ali ŵandu ŵa m’likuga lyekulungwa soni ŵandu ŵakulungama ŵachachijimuka ku ŵawe. Kuti mena ga ŵangalungamaŵa chigalembedwe m’buku ja umi, jemanjaji chachisosekwa kuŵa paunasi ŵambone ni Yehofa soni kulipeleka achimsyene kwa jwalakwe. Yesu ni ŵandu ŵachachilamulilaga najo yimpepe chachalolelaga ŵandu ŵangalungamaŵa naga akukamulichisya masengo yindu yakulijinganya. (Chiw. 20:4) Jwalijose juchachikana kukuya yakulijiganya ngasakundidwa kupitilisya kutama ni umi atamose mundujo ali akwete yaka 100. (Yes. 65:20) Yehofa ni Yesu akusamanyilila yayili mumtima mwa mundu mwamti jemanjaji ngasakunda kuti pasimanikwe mundu jwakutenda yakusakala m’chilambo chasambano.—Yes. 11:9; 60:18; 65:25; Yoh. 2:25.
KWIMUKA KUTI APOCHELE UMI KAPENA KUTI AWELUSIDWE
13-14. (a) Ana munyumamu twapikanaga kuti maloŵe ga pa Yohane 5:29 gakusagopolela chichi? (b) Nambo ana Yesu nganasala ya chichi pa maloŵe gelega?
13 Yesu jwasasilesoni yakwamba ŵandu ŵachachijimuka kuti atameje pachilambopa. Jwalakwe jwasasile kuti, “Jikwisa ndaŵi pele ŵandu wosope ŵali m’malembe chachipikana maloŵe gakwe ni chachijimuka. Ŵaŵatendaga yindu yambone chachipochela umi wangamala, nambo ŵaŵatendaga yindu yakusakala chachawelusya.” (Yoh. 5:28, 29) Ana pelepa Yesu jwagopolelaga chichi?
14 Munyumamu, maloŵe ga palilembali twagapikanaga kuti Yesu jwagopolelaga ya yindu yachachitenda ŵandu panyuma pa kwimuka ku ŵawe. Twaganisyaga kuti maloŵega gagopolelaga kuti ŵandu ŵane panyuma pa kwimuka ku ŵawe chachitendaga yindu yambone nambo ŵane chachitendaga yakusakala. Nambope Yesu nganasala kuti ŵandu ŵali m’malembe pachachigamba kwimuka ku ŵawe ndaŵi jijojo chachitendaga yindu yambone kapena yakusakala. Jwalakwe jwasalaga ya yindu yayatendekwe kala. Ni ligongo lyakwe jwakamulichisye masengo maloŵe gakuti, “Ŵaŵatendaga yindu yambone” soni “ŵaŵatendaga yindu yakusakala.” Pelepa yikulosya kuti Yesu ŵasalaga ya yindu yaŵatendaga jemanjaji mkanawe. Yeleyitu yili yakupikanika, ligongo m’chilambo chasambano pangali mundu jutachikundidwa kupitilisya kutenda yindu yakusakala. Ŵandu ŵangalungama ŵakwasala pelepaŵa ŵatendaga yindu yakusakala mkanaŵe kuwa. Sano ana maloŵe ga Yesu gakuti ŵandu ŵane chachijimuka kuti ‘apochele umi’ soni ŵane kuti ‘ŵawelusye’ gakugopolela chichi?
15. Ana ŵani ŵachachijimuka kuti ‘apochele umi’ soni ligongo chichi?
15 Ŵandu ŵakulungama ŵaŵatesile yindu yambone mkanaŵe kuwa chachijimuka ni ‘kupochela umi’ ligongo mena gawo galembedwe kala m’buku ja umi. Yeleyi yikugopolela kuti kwimuka kwa ŵandu “ŵaŵatendaga yindu yambone” kwakukusala pa Yohane 5:29 kukulandana ni kwa “ŵandu ŵakulungama” ŵakwasala pa Masengo 24:15. Mwamti yeleyi yili yakamulana ni maloŵe gagakusimanikwa pa Aloma 6:7. Maloŵega gakusati “Mundu jwawile agopweche ku ulemwa wakwe.” Myoyo ŵandu ŵeleŵa pawile, Yehofa akusiŵakululuchila yakulemwa yawo. Mwamti jwalakwe akusapitilisya kukumbuchila kukulupichika kwaŵalosisye jemanjaji pandaŵi jiŵaliji umi. (Aheb. 6:10) Nambope ŵandu ŵakulungamaŵa chachisosekwa kupitilisya kuŵa ŵakulupichika kuti mena gawo gaŵepe m’buku ja umi.
16. Ana kwimuka kuti ‘awelusidwe’ kukugopolela chichi?
16 Nambi wuli pakwamba ya ŵandu ŵaŵatendaga yindu yakusakala pandaŵi jiŵaliji umi? Atamose kuti paŵagambile kuwa ulemwa wawo wakululuchidwe, nambope jemanjaji nganamtumichileje Yehofa. Nambosoni mena gawo nganigalembedwa m’buku ja umi. Myoyo kwimuka kwa ŵandu “ŵaŵatendaga yindu yakusakala” kukulandana ni kwimuka kwa “ŵangalungama” ŵakwasala pa Masengo 24:15. Kwimuka kwa jemanjaji kuchiŵa kwakuti ‘awelusidwe.’c Yeleyi yikugopolela kuti Yesu ni juchachalolelaga soni kwawelusya jemanjaji kuti ali ŵakulungama kapena iyayi. (Luk. 22:30) Yesu chachalolela jemanjaji kwa ndaŵi jelewu kuti amanyilile naga mena gawo gakusosekwa kulembedwa m’buku ja umi kapena iyayi. Naga ŵandu ŵeleŵa chachileka ndamo syawo syakusakala ni kulipeleka kwa Yehofa, nikuti mena gawo gachilembedwa m’buku ja umi.
17-18. Ana ŵandu wosope ŵachachijimuka ku ŵawe kuti atame pachilambopa chachisosekwa kutenda chichi? Ana “yitendo” yakuyisala pa Chiwunukuko 20:12, 13 yili yapi?
17 Ŵandu ŵakulungama kapena ŵangalungama ŵachachijimuka ku ŵawe, wosope chachisosekwa kupikanila malamusi gagachisimanikwaga m’mipukutu jasambano. M’mipukutuji jichiwugulidwa mu Ulamusi wa Yaka 1,000. Ndumetume Yohane jwasasile yaŵayiweni mesomkulola kuti, “Nawenisoni ŵawe, ŵakuchimbichika soni ŵangachimbichika ali ajimi pasogolo pa mpando waumwenyewo. Pelepo mipukutu ŵajiwugwile. Nambo mpukutu wine waŵawuwugwile waliji mpukutu wa umi. Soni ŵawe ŵaliji mkwawelusya pakujigalila yiŵalembile m’mipukutujo, mwakamulana ni yitendo yawo.”—Chiw. 20:12, 13.
18 Ana ŵachachijimuka ku ŵawe chachawelusya pakujigalila “yitendo” yapi? Ana yichiŵa “yitendo” yaŵatesile mkanawe? Iyayi. Akumbuchile kuti jemanjaji paŵagambile kuwa, Mlungu jwakululuchile yakulemwa yawo. Myoyo “yitendo yawo” yakuyisala pelepa nganiyiŵa yaŵatesile mkanawe. Nambo akwamba ya yindu yachachitendaga m’chilambo chasambano panyuma pa kwiganyidwa. Atamose achalume ŵakulupichika mpela Nowa, Samuyele, Daudi, soni Daniyele chachisosekwa kulijiganya yakwamba Yesu soni kukulupilila mbopesi jakwe. Kusala yisyene, naga achalume ŵeleŵa chachisosekwa kulijiganya yakwamba Yesu, nikuti ŵandu ŵangalungama chachisosekwa kulijiganya yindu yejinji.
19. Ana ŵandu ŵachachikana upile wakwiganyidwa chichatendechela chichi?
19 Ana ŵandu ŵachachikana upile wakwiganyidwa chichatendechela chichi? Lilemba lya Chiwunukuko 20:15 likusatusalila kuti, “Jwalijose jwele lina lyakwe nganilisimanikwa mu buku ja umi ŵamponyisye m’nyasa jakolela moto.” Kusala yisyene ŵandu ŵeleŵa chachijonanjidwa mwamti ngasasimanikwasoni mpaka kalakala. Myoyo, tukusosekwa kulolechesya kuti lina lyetu lilembedwe mu buku ja umi soni kuti liŵe mwelemo mpaka kalakala.
M’bale akukamula nawo masengo gekulungwa gakwiganya mu Ulamusi wa Yaka 1,000 (Alole ndime 20)
20. Ana masengo gakusangalasya gapi gagachitendekwa mu Ulamusi wa Yaka 1,000? (Alole chiwulili chapachikuto.)
20 Kusala yisyene mu Ulamusi wa Yaka 1,000 jichiŵa ndaŵi jakusangalasya mnope. Pandaŵiji kuchiŵa masengo gekulungwa gakwiganya ganganigatendekweje ni kala kose pachilambopa. Nambosoni ndaŵi jeleji jichiŵa ndaŵi jele ŵandu ŵakulungama soni ŵangalungama chachalolelaga kuti alosye naga akuchenga ndamo syawo. (Yes. 26:9; Mase. 17:31) Ana majiganyoga gachitendekwaga mwamtuli? Ngani jetu jwakuyichisya jichitukamuchisya kuganichisya soni kuyamichila yindu yambone mnopeyi.
NYIMBO NA. 147 Chilanga cha Umi Wangamala
a Nganiji chijisale kuchenga kwa kapikane ketu ka maloŵe ga Yesu gagakusasimanikwa pa Yohane 5:28, 29. Maloŵega gakusasala ya ŵandu ŵachachijimuka kuti ‘apochele umi’ soni ŵachachijimuka kuti ‘ŵawelusye.’ Chitupikanichisye ya mitundu jiŵili ja kwimuka jakujisala pelepaji soni chitulole ŵandu ŵali m’magulu gelega.
b Bukuji jatandite kulembedwa mena kutandila “paŵachitamilikasisye chilambo.” Pelepa akwamba kutandila pandaŵi jiŵatandite kupagwa ŵanache ŵa Adamu ŵelesoni akwete upile wakuwomboledwa ni mbopesi ja Yesu Klistu. (Mat. 25:34; Chiw. 17:8) Myoyo mundu jwakulupichika Abele ni juŵaliji jwandanda kulembedwa lina lyakwe m’buku ja umiji.
c Munyumamu, twasalaga kuti maloŵe gakuti ‘kuwelusidwa’ gaŵagakamulichisye masengo pelepa, kuli ‘kuwelusidwa’ kwakupedwa chilango kapena kwimbidwa magambo. Yisyene kuti maloŵe gakuti ‘kuwelusidwa’ mpaka gagopolele yeleyi. Nambo yikuwoneka kuti Yesu pakusala maloŵe gakuti ‘kuwelusidwa’ jwagambaga ya kumlolela mundu kwakandaŵi ni kulola naga achenjile ndamo syakwe kapena kumpa upile mundu wakuti alosye mwaŵelele. Kapenasoni “kumlinga mundu” mpela mwajikusaŵechetela Dikishonale jine ja Chigiliki.