Mpitilisye “Kukamusyangana”

 1. Mwakamulana ni 1 Atesalonika 5:11, ana ni masengo gapi gatukusakamula wosopewe?

ANA mpingo wawo pakwete pawutaŵile kapena kulinganyasoni Nyumba ja Uchimwene? Naga yili myoyo, ngatukukayichila kuti ŵangaliŵalilaga paŵasongene kandanda m’Nyumba ja Uchimwene jasambanojo. Ŵamyamichile mnope Yehofa. Soni ngatukukayichila kuti ŵasangalele mnope soni ŵajimbile mwakusangalala nyimbo jakuwugulila misonganojo. Nambotu, tukusamsangalasya mnope Yehofa patukukamula nawo mtundu wine wa masengo gakutaŵa. Masengo gelego, gali gakusosekwa mnope kupunda masengo gakutaŵa gasyesyene. Masengoga gakupwatikapo kwakamuchisya ŵandu ŵakusayika m’malo gakulambililaga. Ndumetume Paulo jwaganichisyaga ya kamuchisyana kweleku pajwalembaga maloŵe ga pa 1 Atesalonika 5:11, lyalili lilemba lyakulongolela ngani jetuji.—Aŵalanje.

 2. Ana munganiji chitukambilane chichi?

² Ndumetume Paulo ali chisyasyo chambone pangani jakwalimbikasya ŵakulupilila achimjakwe. Jwalakwe ŵatendelaga chanasa abale ni alongo. Munganiji chitulole yajwatesile jwalakwe pakwalimbikasya Aklistu achimjakwe (1) kuti akombole kupilila yakusawusya (2) kuti atameje mwamtendele soni (3) kuti alimbisyeje chikulupi chawo mwa Yehofa. Kwende tulole yampaka tutende pakumsyasya jwalakwe patukwalimbikasya abale ni alongo ŵetu masiku agano.—1 Akoli. 11:1.

 3. Ana Paulo jwagawonaga chamtuli masengo gaŵakamulaga nambosoni masengo gakulalichila?

³ Paulo jwanonyelaga mnope Aklistu achimjakwe. Jwalakwe jwasimene ni yakusawusya yejinji paumi wakwe. Yeleyi yamtendekasisye kuti akomboleje kwatendela chanasa Aklistu achimjakwe paŵasimanaga ni yakusawusya. Pandaŵi jine, Paulo syammalile mbiya, mwamti jwalakwe nganakola atamose likobili lyepowole. Myoyo, jwalakwe jwasosile masengo kuti alikamuchisyeje yalumo ni achimjakwe ŵaŵaliji najo. (Mase. 20:34) Jwalakwe jwamanyililaga masengo gakulinganya matenti. Myoyo pajwayiche ku Kolinto, jwalakwe jwakamulaga masengo ni achimjakwe ŵane Akula ni Pulisikila ŵaŵamanyililagasoni masengogo. Nambo “pa lisiku lililyose lya sabata,” jwalakwe jwalalichilaga Ayuda soni Agiliki. Kaneko Sila ni Timoteyo ali amsimene jwalakwe, “Paulo ŵalipeleche mnope pakulalichila maloŵe ga Mlungu.” (Mase. 18:2-5) Paulo nganaliŵalila chakulinga chakwe chekulungwa paumi wakwe chichaliji kumtumichila Yehofa. Jwalakwe jwalimbichilaga mnope kukamula masengo nambosoni jwalipelekaga mnope pamasengo gakulalichila. Yeleyi, yamkamuchisye kuti akombole kwalimbikasya Aklistu achimjakwe. Mwachisyasyo, jwalakwe ŵakamuchisye jemanjajo kuti akakundaga yakusawusya ya paumi wawo, soni kugasosela maŵasa gawo kwatendekasyeje kulepela kuganichisyaga yindu “yayili yakusosekwa mnope” yakwayana ni kumtumichila Yehofa.—Afil. 1:10.

 4. Ana Paulo ni Timoteyo ŵalimbikasisye chamtuli ŵakulupilila achimjawo kuti akombole kupilila paŵalagasidwaga?

⁴ Mpingo wa ku Tesalonika ali agambile kuwutamilikasya kwene, Aklistu ŵa mumpingomo ŵasimene ni yakusawusya yekulungwakulungwa. Gulu ja ŵandu ŵakusisya ŵalepele kumpata Paulo ni Sila. Yeleyi yatendekasisye ŵakusisyawo kuti ŵajigale “abale ŵane ni kwawula nawo kwa ŵakulamulila ŵa mumsindawo.” Paŵayiche kweleko ŵaŵechete mwakwesya maloŵe kuti, “Ŵandu wosopeŵa akutenda yakutindana ni malamusi ga Kaisala.” (Mase. 17:6, 7) Aganichisye woga ŵaŵakwete Aklistu ŵachasambanowo paŵayiweni kuti ŵandu ŵa mumsindamo ŵajimuchile. Yeleyi yikatendekasisye jemanjajo kuti awujile munyuma pakumtumichila Yehofa. Nambo Paulo nganakunda kuti yeleyi yitendekwe. Atamose kuti jwalakwe ni Sila ŵatisile mumsindamo, nambope ŵalolechesye kuti mpingo wasambanowo ukusamalilidwa chenene. Paulo ŵasalile Aklistu ŵa ku Tesalonika kuti, “Twamtumisye kwa jemanja mlongo mjetu Timoteyo kuti atamiche mitima jenu pasi ni kumlimbisya chikulupi. . . . . Twatesile yeleyi kuti akasimanikwa jwalijose jwakutenganyika ni yakusawusyayi.” (1 Ates. 3:2, 3) Timoteyo jwaliji pamalo gambone kwalimbikasya Aklistuwo ligongo lyakuti yakulandanayi yatendekwesoni mu tawuni ja kumangwakwe ku Lusitala. Jwalakwe jwayiweni yaŵatesile Paulo pakwalimbikasya Aklistu ŵa ku Lusitala. Ligongo lyakuti Timoteyo jwayiweni yaŵatesile Yehofa pakwakamuchisya Aklistu ŵa ku Lusitala, jwalakwe akakombwele kwalimbikasya Aklistuwo kuti nombenawo Yehofa chiŵakamuchisye.—Mase. 14:8, 19-22; Aheb. 12:2.

 5. Ana yajwatesile jwamkulungwa jwa mumpingo jwine yamkamuchisye chamtuli Bryant?

⁵ Ana Paulo ŵalimbikasisyesoni wakulupilila achimjakwe m’litala line lyapi? Paulendo wawo wakuwujila ku Lusitala, ku Ikoniyo, soni ku Antiokeya, Paulo ni Banaba “ŵaŵisile achakulungwa mumpingo uliwose.” (Mase. 14:21-23) Ngatukukayichila kuti achakulungwawo, ŵajilimbikasyaga mipingo mpela mwakusatendela achakulungwa ŵa mumpingo masiku agano. Alole yajwasasile m’bale jwine lina lyakwe Bryant. Jwalakwe jwatite, “Ndili ngwete yaka 15 baba ŵatyosile panyumba soni mama ŵatyosisye mumpingo. Nayiwonaga kuti pangali jwakungamuchisya soni yandengwisye.” Ana chichi chichamkamuchisye m’baleju pandaŵi jakusawusyajo? Jwalakwe jwatite, “Jwamkulungwa jwamumpingo jwine lina lyakwe Tony, jwaŵechetanaga ni une patuli ku misongano soni pandaŵi sine. Jwalakwe jwasalile ya ŵandu ŵane ŵaŵasimanaga ni yakusawusya nambo ni kupitilisyaga kuŵa ŵakusangalala. Jwambalanjile lilemba lya Salimo 27:10. Nambosoni ŵasalile yakwamba Hesekiya kuti jwalakwe jwakombwele kuŵape jwakulupichika atamose kuti babagwe nganaŵa chisyasyo chambone.” Ana yeleyi yamkamuchisye chamtuli Bryant? Jwalakwe jwatite, “Ligongo lyakuti Tony ŵalimbikasisye, yangamuchisye kola yakulinga yakutenda utumiki wandaŵi syosope.” Kusala yisyene, achakulungwa ŵa mumpingo akusosekwa kuŵa mesope kuti akombole kwakamuchisya ŵandu ŵali mpela Bryant, ŵakusasosekwa “maloŵe gambone” gakwalimbikasya.—Mis. 12:25.

 6. Ana Paulo jwakamulichisye masengo chamtuli mbili sya ŵandu pakwalimbikasya abale ni alongo ŵakwe?

⁶ Paulo jwakumbwisye Aklistu achimjakwe kuti nichikamuchisyo cha Yehofa “liwunde lyekulungwa lya mboni” lyakombwele kupilila yakusawusya. (Aheb. 12:1) Paulo jwamanyililaga kuti mbili sya ŵandu ŵakulupichika ŵaŵapilile yakusawusya yakulekanganalekangana mpaka syakamuchisye abale ni alongo kuŵa ŵakulimba. Jwamanyililesoni kuti mpaka syakamuchisye jemanjaji kuŵika nganisyo syawo pa “msinda wa Mlungu jwaumi.” (Aheb. 12:22) Yeleyisoni ni yayikutendekwa masiku agano. Kusala yisyene wosopewe yikusatulimbikasya kuŵalanga yaŵatesile Yehofa pakwakamuchisya ŵandu mpela Gidiyoni, Balaki, Daudi, Samuyele ni ŵane ŵajinji. (Aheb. 11:32-35) Nambi wuli pakwamba ya ŵandu ŵakulupichika ŵamasiku agano? Ku likulu lyetu tukusapochela yikalata ya abale ni alongo ŵele chikulupi chawo chalimbile mnope ligongo lyakuŵalanga ngani sya Aklistu ŵakumtumichila Yehofa mwakulupichika masiku agano.

 7. Ana akulijiganya chichi pa malangiso ga Paulo gagakusasimanikwa pa Aloma 14:19-21?

⁷ Tukusitwakamuchisyaga abale ni alongo ŵetu patukulingalinga kutama mwamtendele mumpingo. Ngatukusakunda kuti kulekangana nganisyo kusokonasyeje mtendele wetu. Nambosoni ngatukusasosekwa kwambaga kanilila nganisyo syetu naga yitendo ya ŵane ngayikukasa mfundo sya m’Baibulo. Mwachisyasyo, mumpingo wa ku Loma mwapali Aklistu ŵaŵaliji Ayuda soni ŵane ŵanganaŵa Ayuda. Chilamusi cha Mose pachalesile kukamula masengo, lilamusi lyakulekasya kulya yindu yine lyalesilesoni kamula masengo. (Maliko 7:19) Kutandila ndaŵi jelejo, Ayuda ŵane ŵayiwonaga kuti akwete ufulu wakulya chilichose. Nambo Aklistu ŵane ŵa Chiyuda ŵayiwonaga kuti kutenda yeleyo kuli kulemwa. Yeleyi yatendekasisye kuti mpingo uŵe wagaŵikangana. Nambo Paulo jwasasile kusosekwa kwakupitilisya kutama mwamtendele. Jwalakwe jwatite, “Kuli chenene ngalya nyama kapena kumwa finyo kapenasoni kutenda chilichose champaka chimkuŵasye mlongo mjenu.” (Aŵalanje Aloma 14:19-21.) Paulo ŵakamuchisye wakulupilila achimjakwe kumanyilila kuti kulekangana nganisyoko kwamkwayiye mundu jwalijose nambosoni mpingo wosope. Jwalakwe jwalijisoni jwakusachilila kuchenga ndamo syakwe ni chakulinga chakuti akakuŵasya ŵane. (1 Akoli. 9:19-22) M’wejisoni mpaka twalimbikasye ŵane soni kutamilikasya mtendele patukuŵambala kwasagulila ŵane yakutenda.

 8. Ana Paulo jwatesile chichi pakusaka kutamilikasya mtendele pajwayiweni kuti ŵandu alekangene nganisyo pangani jakusosekwa mnope?

⁸ Paulo jwapeleche chisyasyo chambone pangani ja kutamilikasya mtendele pasikati pa ŵandu ŵatindene nganisyo pangani jakusosekwa mnope. Mwachisyasyo, ŵandu ŵane ŵa mumpingo wa mu yaka 100 yandanda ŵasakaga kuti ŵandu ŵane ŵanganaŵa Ayuda awumbale. Ŵatendaga yeleyi ni chakulinga chakuti Ayuda ŵane akawonaga mwakulemwecheka. (Agal. 6:12) Paulo nganakamulana ni mfundo jeleji. Nambope mmalo mwakwakanganichisya ŵane kuti akuye nganisyo syakwe, mwakulinandiya ŵaŵendile kuti achakulungwakulungwa ŵa ku Yelusalemu ŵakamuchisye. (Mase. 15:1, 2) Yaŵatesile Pauloyi, yakamuchisye Aklistuwo kuti apitilisyepe kuŵa ŵakusangalala nambosoni kutama mwamtendele mumpingomo.—Mase. 15:30, 31.

 9. Ana mpaka tukuye chamtuli chisyasyo cha Paulo?

⁹ Naga tutindene nganisyo, tukusatamilikasya mtendele mwakuŵenda lunda kwa ŵandu ŵaŵasagwile Yehofa kuti alongoleleje yindu mumpingo. Ndaŵi syejinji mfundo syakamuchisya patutindene nganisyo sikusasimanikwa m’mabuku getu kapena mmalangiso gane gatukusapochela kutyochela ku gulu jetu. Naga tukusakamulichisya masengo yindu yeleyi tuchipitilisya kutamilikasya mtendele mumpingo.

10. Ana ni chindu chine chapi chiŵatesile Paulo pakulimbikasya mtendele mumpingo?

¹⁰ Paulo jwalimbikasyaga mtendele mwakuganichisya mnope yindu yaŵatendaga chenene Aklistu achimjakwe mmalo mwaganichisya mnope yakulepela yawo. Mwachisyasyo, pakumalisya chikalata chakwe chakwawula ku Loma, jwalakwe jwakolasile mena ga ŵandu ŵajinji, nambosoni jwasasile yindu yejinji yambone yaŵatendaga jemanjajo. Mpaka tumsyasye Paulo mwakulola yindu yambone yakusatendaga chenene abale ni alongo ŵetu. Patukutenda yeleyi tukusitwatendekasyaga abale ni alongo ŵetu kuti aŵeje ŵakamulana, yayikusakamuchisya kuti mpingo wosope unonyelaneje.

11. Ana mpaka tutende chichi kuti tutamilikasye mtendele patulekangene nganisyo?

¹¹ Ndaŵi sine atamose Aklistu ŵakumanyilila yejinji mpaka alekangane nganisyo kapena kukangana kwene. Yeleyi ni yayamtendechele Paulo ni Banaba ŵaŵakamulanaga mnope. Jemanjaji “ŵakanganile mnope” pangani jakuti amjigale Maliko paulendo wawo waŵili wa umishonale. (Mase. 15:37-39) Nambo kaneko ŵandu ŵatatuŵa ŵakamulenesoni. Yeleyi yikulosya kuti jemanjaji ŵakuwonaga kutamilikasya mtendele mumpingo kuŵa kwakusosekwa mnope. Mwamti pali papitile ndaŵi, Paulo jwasasile yindu yambone yakwamba Banaba soni Maliko. (1 Akoli. 9:6; Akolo. 4:10) M’wejisoni tukusasosekwa kutenda yampaka tukombole pakumasya kulekangana nganisyo kulikose mumpingo. Nambosoni tukusasosekwa kupitilisya kulola yambone mwa abale ni alongo ŵetu. Naga tukutenda yeleyi, tuchipitilisya kulimbikasya mtendele mumpingo.—Aef. 4:3.

12. Ana ni yakusawusya yine yapi yakusasimana nayo Aklistu achimjetu?

¹² Tukusalimbikasya abale ni alongo ŵetu patukwakamuchisya kuti amkulupilileje mnope Yehofa. Ŵandu ŵane akusalagasidwagwa ni ŵachinasi ŵawo ŵangakulupilila, achimjawo ŵakumasengo kapena ŵakusukulu. Pele ŵane akulimbana ni ulwele wekulungwa kapena kulagasika nganisyo. Nambosoni pana Aklistu ŵane ŵaŵabatisidwe yaka yejinji yipiteyo ŵaŵele ali mkwembecheya kwandaŵi jelewu kumala kwa chilambo chakusakalachi. Yakusawusya yatuyikolasileyi mpaka yilinje chikulupi cha Aklistu masiku agano. Nombe Aklistu ŵa mumpingo wa m’yaka 100 yandanda ŵasimenesoni ni yakusawusya mpela yeleyi. Ana Paulo jwatesile yamtuli pakwalimbikasya jemanjajo?

13. Ana Paulo jwakamuchisye chamtuli Aklistu ŵele ŵandu ŵane ŵasisyaga ligongo lya chikulupi chawo?

¹³ Paulo jwakamulichisyaga masengo Malemba pakwakamuchisya Aklistu achimjakwe kola chikulupi chakulimba. Mwachisyasyo, komboleka kuti Myuda jwine jwa Chiklistu nganamanyililaga yampaka ajile pakwajanga ŵachinasi ŵakwe ŵangakulupilila ŵaŵaŵechetaga kuti Chiyuda chaliji chakusosekwa mnope kupunda Chiklistu. Ngatukukayichila kuti chikalata cha Paulo chakwawula ku mpingo wa kwa Ahebeli chakamuchisye mnope Aklistuwo. (Aheb. 1:5, 6; 2:2, 3; 9:24, 25) Yayaliji m’chikalatamo, yikakamuchisye jemanjajo kumanyilila yampaka ajile pakwajanga ŵandu ŵakusisya. Masiku aganosoni, mpaka twakamuchisye Aklistu achimjetu. Mpaka tutende yeleyi mwakwasalila mfundo syasikusasimanikwa m’mabuku getu kuti akamulichisye masengo pakulondesya ya chikulupi chawo kwa ŵandu ŵakwasisya. Naga ŵandu ŵane akwaseka ŵachinyamata ŵetu ligongo lyakulupilila kuti apali juŵapanganyisye yindu yosope, mpaka twakamuchisye ŵachinyamataŵa kupata mfundo syakamuchisya mu tumabuku twakuti, Ana Yaumi Yatesile Kupanganyidwa nambosoni kakuti Yiwusyo Msano Yakusosekwa Kuliwusya Yakwamba Kuwatyochele Umi. Mfundo sya mtumabukutu mpaka syakamuchisye kulondesya ligongo lyakwe akusakulupilila kuti apali juŵapanganyisye yindu yosope.

14. Ana Paulo jwatendaga chichi atamose kuti jwalipelekaga mnope pamasengo gakulalichila soni kwiganya?

¹⁴ Paulo jwalimbikasisye Aklistu achimjakwe kuti anonyelaneje kupitila ‘mwakutenda yambone.’ (Aheb. 10:24) Jwalakwe nganagamba kwakamuchisya jemanjaji kupitila mu yakuŵecheta yakwepe. Nambo ŵakamuchisyesoni kupitila mu yitendo yakwe. Mwachisyasyo, Aklistu ŵa ku Yudeya paŵalagaga ni sala, Paulo jwalinganyisye yakwatumichisya yakulya. (Mase. 11:27-30) Atamose kuti Paulo jwalipelekaga mnope pa masengo gakulalichila, nambope jwalakwe jwasosagasosaga matala gakwakamuchisya ŵandu ŵanganakola yakusosekwa ya paumi wawo. (Agal. 2:10) Mwakutenda yeleyi, Paulo jwakamuchisye Aklistu achimjakwe kola chikulupi chakuti Yehofa chachakamuchisya. Nombe uweji masiku agano patukulipeleka kamulichisya masengo ndaŵi jetu, machili getu soni lunda pakukamuchisya kwakutendekwe ngosi, tukusaŵa kuti tukwakamuchisya Aklistu achimjetu kola chikulupi chakulimba. Yeleyi ni yayikusatendekwasoni patukupeleka ndaŵi syosope yakupeleka yakamuchisya pamasengo ga pachilambo chosope. Patukukamulichisya masengo matalaga soni gane, tukusitwakamuchisya Aklistu achimjetu kumanyilila kuti Yehofa ngasiŵaleka.

15-16. Ana mpaka twakamuchisye chamtuli ŵandu ŵele chikulupi chawo chitandite kunandipa?

¹⁵ Paulo jwapitilisye kwakamuchisya Aklistu achimjakwe ŵaŵakwete chikulupi chakunandipa. Jwalakwe jwatendelaga chanasa soni jwaŵechetanaga nawo mwakwaganichisya. (Aheb. 6:9; 10:39) Mwachisyasyo, mu chikalata chakwe chosope chakwawula kwa Ahebeli, jwalakwe jwakamulichisye masengo maloŵe gakulosya kuti jwamanyililaga kuti nombe najo jwasosekwaga kamulichisya masengo malangiso gaŵapelekagago. (Aheb. 2:1, 3) Mwakulandana ni Paulo, ngatukusosekwa kuleka kwakamuchisya ŵandu ŵele chikulupi chawo chinandipe. Mmalomwakwe tukusosekwa kwakamuchisya mwakwalosya kuti tukusitwaganichisyaga. Patukutenda yeleyi, tukusalosya kuti tukusitwanonyela jemanjaji. Maloŵe getu gambone mpaka galimbikasye mnope Aklistu achimjetu kupunda chindu chilichose champaka tuŵechete.

¹⁶ Paulo jwasimichisye Aklistu achimjakwe kuti Yehofa akusamanyilila masengo gambone gakusatenda jemanjajo. (Aheb. 10:32-34) M’wejisoni mpaka tutende yakulandana ni yeleyi patukwakamuchisya Aklistu achimjetu ŵele chikulupi chawo chinandipe. Mwambone, mpaka tumŵende Mklistu mjetu kuti atusalile chichamtendekasisye kuti alijiganye usyesyene. Kapena mpaka tumlimbikasye kuti aganichisye yaŵatite Yehofa pakumkamuchisya munyumamo. Mpaka tumsimichisye kuti Yehofa ngasaliŵalila yindu yaŵele ali mkutenda pakumtumichila jwalakwe nambosoni kuti Yehofa ngasaleka kumkamuchisya jwalakwe. (Aheb. 6:10; 13:5, 6) Kukambilana yindu yeleyi ni Aklistu achimjetu, mpaka kwakamuchisye kuti apitilisye kumtumichila Yehofa.

17. Ana mpaka twakamuchisye ŵane m’matala gapi?

¹⁷ Mpela mwayikusaŵela kuti mundu jwakusakamula masengo gakutaŵa akusasosekwa konjechesya luso lwakwe, m’wejisoni tukusosekwa kutenda yejinji pakulimbikasyana jwine ni mjakwe. Mpaka twakamuchisye Aklistu achimjetu kupilila yakusawusya yakusimana nayo mwakwasalila yisyasyo ya ŵandu ŵane ŵaŵapilile yakusawusya munyumamu. Mpaka tulimbikasye mtendele pasikati pa Aklistu achimjetu mwakutenda yindu yakuyichisyayi. Patukulola yambone mwa ŵane soni patukutenda yindu yakwikasya mtendele ŵandu palekangene nganisyo. Mpaka twakamuchisye Aklistu achimjetu kola chikulupi chakulimba pakamulichisya masengo mfundo sya m’Baibulo. Mpaka twakamuchisyesoni pa yindu yampaka tukombole nambosoni kwalimbikasya ŵandu ŵele chikulupi chawo chitandite kunandipa.

18. Ana wawojo asimichisye kutenda chichi?

¹⁸ Ŵandu ŵakusakamula masengo ga yakutaŵataŵa akusaŵa ŵakusangalala mnope. M’wejisoni mpaka tuŵe ŵakusangalala mnope patukwakamuchisya abale ni alongo ŵetu mumpingo kola chikulupi chakulimba. Mwakulekangana ni nyumba sisyesyene syele mkupita kwandaŵi sikusajonasikaga, masengo gatukusakamula pakwalimbikasya Aklistu achimjetu ngasigajonasika mpaka kalakala. Myoyo kwende ndaŵi syosope ‘tupitilisye kulimbikasyana soni kukamusyangana.’—1 Ates. 5:11.