“Ayisunjeje Chenene Yindu Yaŵapochele”

1-2. Ana lilemba lya 1 Timoteo 6:20 likusalosya kuti Timoteyo jwapochele yindu yapi?

NDAŴI sine tukusanonyela kusunjisya yindu yetu yakusosekwa mnope. Mwachisyasyo, tukusasunjisyaga mbiya syetu ku banki. Patutesile yeleyi tukusakulupilila kuti mbiya syetusyo chatusunjile chenene soni pangali jwampaka ajiŵe. Yatukusatendayi yikusalosya kuti ngatukusakayichila kumpa mundu chindu chakusosekwa mnope kuti atusunjile.

² Aŵalanje 1 Timoteo 6:20. Ndumetume Paulo ŵamkumbwisye Timoteyo kuti akumbuchileje kuti jwapochele yindu yakusosekwa mnope. Yindu yaŵapocheleyi yaliji kumanyilila mwakulondola yakusasaka Mlungu. Timoteyo jwapochelesoni upile wine wakukamula masengo “gakulalichila Maloŵe ga Mlungu” soni ‘wakukamula masengo mpela jwakutumichila jwa Mlungu.’ (2 Tim. 4:2, 5) Paulo ŵamlimbikasisye Timoteyo kuti ayisunjeje chenene yindu yapochele. Mpela mwayaŵelele ni Timoteyo nombe m’weji masiku agano tupochele yindu yakusosekwa mnope. Ana yindu yeleyi yili yapi? Ligongo chichi tukusosekwa kuyisamalila yindu yakusosekwa mnope yaŵatupele Yehofa?

3-4. Ligongo chichi usyesyene wa m’Baibulo wuli wakusosekwa mnope?

³ Mwachinonyelo, Yehofa jwakundile kuti tumanyilile usyesyene wakulondola wakusimanikwa m’Maloŵe gakwe, m’Baibulo. Usyesyenewu uli wambone mnope ligongo ukusatujiganya mwampaka tuŵele paunasi wambone ni Yehofa, soni yampaka tutende kuti tukole umi wambone. Patutandite kukamulichisya masengo yindu yatukusalijiganya m’Baibulo, tukusagopoledwa ku yijiganyo yaunami soni ku ndamo syakusakala.—1 Akoli. 6:9-11.

⁴ Ligongo line lyalikusatendekasya usyesyene kuŵa wapenani mnope lili lyakuti Yehofa akuwusapeleka kwa ŵandu ŵali ŵakulinandiya soni ŵakwete nganisyo syambone. (Mase. 13:48) Ŵandu ŵeleŵa akusajitichisya dongosolo jakujikamulisya masengo Mlungu pakupeleka usyesyenewu masiku agano. (Mat. 11:25; 24:45) Yili yakusawusya kuwupikanichisya usyesyenewu pali pangali chikamuchisyo cha ŵane. Tukusosekwa kumanyililasoni kuti pangali chindu chakusosekwa mnope kupunda usyesyenewu.—Mis. 3:13, 15.

 5. Ana Yehofa atupelesoni upile wine wapi?

⁵ Yehofa atupelesoni upile wakwajiganya ŵandu ŵane yakwamba jwalakwe soni chakulinga chakwe. (Mat. 24:14) Utenga watukusalalichila wuli wakusosekwa mnope ligongo ukusiwakamuchisya ŵandu kuti aŵe mu gulu ja Yehofa soni ukusiwapa upile wakola umi wangamala. (1 Tim. 4:16) Chinga tukusatenda yejinji kapena yamnono pakukamula masengo gakulalichila, tukusosekwa kumanyilila kuti yatukusatendayo yikukamuchisya mnope pamasengo gagakutendekwa pachilambo chosopega. (1 Tim. 2:3, 4) Uli upile wekulungwa kukamula masengo yimpepe ni Yehofa.—1 Akoli. 3:9.

 6. Ana chichi chachatendechele ŵandu ŵane ŵaŵalesile kuwuwona usyesyene kuŵa wakusosekwa?

⁶ Achimjakwe ŵane ŵa Timoteyo ŵalepele kuyamichila upile waŵakwete ŵakukamula masengo yimpepe ni Mlungu. Mwachisyasyo, Dema jwajasile upile wakukamula masengo ni Paulo ligongo jwanonyele mnope yindu ya m’chilambo. (2 Tim. 4:10) Figelo soni Helemogene ŵalesile utumiki wawo pakogopa kuti mpaka alagasidwe mpela mwaŵalajile Paulo. (2 Tim. 1:15) Himeneo, Alekisanda soni Fileto ŵaŵele ŵakusapuka mwamti ŵalesile usyesyene. (1 Tim. 1:19, 20; 2 Tim. 2:16-18) Ŵandu wosopeŵa ŵaliji Aklistu ŵakulimba mwausimu nambo kaneko ŵalesile kuwuwona usyesyene kuŵa wakusosekwa mnope.

 7. Ana ni yindu yapi yakusakamulichisya masengo Satana pakusaka kututendekasya kuleka usyesyene?

⁷ Ana Satana akusatenda chichi pakusaka kutujasikasya yindu ya mtengo wapenani yaŵatupele Yehofa? Kwende tulole yindu yine yakusayikamulichisya masengo Satana. Jwalakwe akusakamulichisya masengo yakusangalasya soni yindu yine mpela intaneti, mabuku soni magasini pakusaka kututendekasya kuti atujasikasye usyesyene. Jwalakwe akusatujogoya kupitila mwa achimjetu soni pane kupitila mwa ŵandu ŵakusatulagasya ni chakulinga chakuti tuleche kulalichila. Jwalakwe akusatutendekasya kuti tupikanileje “nganisyo syakusisyana syakusaŵecheta ŵandu kuti sili lunda lyakumanyilila yindu.” Nganisyosi sikusatyochela kwa ŵandu ŵakusisya ni chakulinga chakuti tuleche usyesyene.—1 Tim. 6:20, 21.

 8. Ana tukulijiganya chichi kutyochela pa chisyasyo cha Daniel?

⁸ Naga ngatukusamala mpaka tutande kuleka usyesyene mwapanandipanandi. Aganichisye chisyasyo cha Daniel,b juŵanonyelaga maseŵela ga pa intaneti kapena kuti magemu. Jwalakwe jwasasile kuti, “Natandite kuganonyela magemu ga pa intaneti ndili ni yaka 10. Pandanda natendaga magemu gele nganigaŵa gakogoya mnope. Nambo kaneko natandite kutenda gachiwawa soni gakulosya yamisimu.” Pali papite ndaŵi, Daniel jwatandite kutenda magemuga kwa maawala chiŵandika 15 palisiku. Daniel jwaŵechetesoni kuti, “Mumtimamu namanyililaga kuti mtundu wa magemu gangutenda soni ndaŵi jangumalila pakutenda magemuga, yikundendekasya konanga unasi wangu ni Yehofa. Nambope nayiwonaga kuti yakusasala Yehofa nganiyiŵa yili yikamwile masengo paunejo.” Naga ngatukusamala mpaka tujase upile wetu wakola usyesyene, wawuli wapenani mnope.

 9. Ana Paulo jwawanichisye Timoteyo ni ŵani palilemba lya 1 Timoteo 1:18, 19?

⁹ Aŵalanje 1 Timoteo 1:18, 19. Paulo jwawanichisye Timoteyo ni msilikali, mwamti ŵamlimbikasisye kuti apakombole kuputa chenene ngondo. Pelepatu Paulo nganasalaga ya ngondo jakulimbana ni asilikali ŵasyesyene. Ana Aklistu akulandana chamtuli ni asilikali ŵakuputa ngondo? Ana tukusosekwa kola ndamo syapi kuti tuŵe asilikali ŵa Klistu? Kwende tulole yindu msano yatukulijiganya kutyochela pa chisyasyo cha Paulochi. Yindu yeleyi mpaka yitukamuchisye kuti tukajasa usyesyene watukwete.

10. Ligongo chichi tukusosekwa kuŵa ŵakulipeleka kwa Mlungu?

¹⁰ Aŵeje ŵakulipeleka kwa Mlungu. Msilikali jwambone akusaŵa jwakulupichika. Jwalakwe akusaputa ngondo mwakulimbichila mnope kuti amchenjele mundu jwakusamnonyela kapena chindu chachili chakusosekwa mnope kwa jwalakwe. (1 Tim. 4:7) Naga tukusamnonyela mnope Mlungu soni naga tuli ŵakulipeleka mnope kwa jwalakwe yichitukamuchisya kuti tukajasa usyesyene.—1 Tim. 4:8-10; 6:6.

11. Ligongo chichi tukusosekwa kuŵa ŵakulilekasya?

¹¹ Aŵeje ŵakulilekasya. Msilikali akusasosekwa kulilekasya pa yindu yine kuti aŵeje jwakoseka kamula masengo gakwe. Timoteyo jwapitilisye kuŵa jwakulimbangana mwausimu ligongo lyakuti jwakuyaga malangiso gaŵampaga Paulo. Paulo ŵamlimbikasisye Timoteyo kuti aŵambaleje yakumbila ya chilu, akoleje ndamo syambone soni kuti akungulucheje ni ŵakulupilila achimjakwe. (2 Tim. 2:22) Kuti yeleyi yikomboleche, jwasosekwaga kuŵa jwakulilekasya. M’wejisoni tukusasosekwa kuŵa ŵakulilekasya kuti tukombole kuŵambala yakumbila yakulemwecheka. (Alo. 7:21-25) Tukusasosekwasoni kuŵa ŵakulilekasya kuti tukombole kuwula umundu wakala ni kuwala wasambano. (Aef. 4:22, 24) Panyuma pakamula masengo kwa lisiku lyosope, tukusaŵa tuli tupesile, nambope tukusasosekwa kuliwuta kuti tujawule ku Nyumba ja Uchimwene kukusongana.—Aheb. 10:24, 25.

12. Ana tukusosekwa kutenda yindu yapi kuti tugamanyilile chenene Maloŵe ga Mlungu?

¹² Msilikali akusasosekwa kulijiganya mwampaka akamulichisye masengo yida yakwe. Kuti amanyilile chenene mwampaka ayikamulichisye masengo yidayi, akusasosekwa kulijiganya mwakuwilisyawilisya. M’wejisoni, tukusosekwa kumanyilila chenene mwampaka tukamulichisye masengo Maloŵe ga Mlungu. (2 Tim. 2:15) Misongano jetu ja mpingo ni jampaka jitukamuchisye kutenda yeleyi. Nambo kuti tukombole kwakamuchisya ŵane kulupilila usyesyene wa m’Maloŵe ga Mlungu, tukusosekwa m’wejo kola chisyoŵe chakulijiganya Maloŵe ga Mlunguga pajika. Tugakamulichisyeje masengo kuti tulimbisye chikululupi chetu. Nambo kuti yeleyi yikomboleche, tukusasosekwa kutenda yejinji kupunda kwambaga kuŵalangape basi. Tukusasosekwa kuyiganichisya mnope yatuŵalasileyo, soni kuwungunya m’mabuku getu ni chakulinga chakuti tupikanichisye chenene yatuŵalasileyo ni kulola yampaka tutende kuti tuyikamulichisyeje masengo. (1 Tim. 4:13-15) Patutesile yeleyi, tuchiŵa ŵakoseka kamulichisya masengo Maloŵe ga Mlungu pakwajiganya ŵane. Nambosoni patukwajiganya ŵane ngatukusosekwa kwambaga kwaŵalanjila Malemba. Tukusosekwa twakamuchisyeje ŵakupikanila ŵetu kuti apikanichisye chenene Malemba ni chakulinga chakuti agakamulichisyeje masengo. Naga tukujikuya chenene ndandanda jetu jakuŵalanjila Baibulo, jichitukamuchisya kuti tugamanyilile chenene Maloŵe ga Mlungu ni kuŵa ŵakoseka kwajiganya ŵane.—2 Tim. 3:16, 17.

13. Ana lilemba lya Ahebeli 5:14, likulosya chamtuli kuti tukusosekwa kuŵa ŵaganisya chenene?

¹³ Aŵeje ŵaganisya chenene. Msilikali akusasosekwa kumanyilila yindu yampaka yimwulasye ni kuyiŵambalaga. M’wejisoni tukusosekwa kumanyilila yindu yampaka yitusokonasye ni kulola yampaka tutende kuti tuyiŵambale. (Mis. 22:3; aŵalanje Ahebeli 5:14.) Masiku agano, mapologalamu ga pa TV soni mafidiyo, gakusalosyaga yindu yakulimbikasya ndamo syakusakala. Yehofa akusaŵengana ni ndamosi, soni ndamosi mpaka situwulasye m’wejo. Myoyo, tukusaŵambala yakusangalasya yampaka yisokonasye unasi wetu ni Yehofa.—Aef. 5:5, 6.

14. Ana chichi chachamkamuchisye Daniel kumalana ni ndamo jakwe jakusakala?

¹⁴ Daniel jwatumkolasile jula, jwamanyilile kuti kutenda magemu gachiwawa soni gakulimbikasya yamisimu kuli kwakogoya mnope. Jwalakwe jwawungunyisye pa Watchtower Library yindu yampaka yimkamuchisye kuti amalane ni ndamo jakweji. Ana yaŵatesileyi yamkamuchisye? Elo. Jwalakwe jwalesile kutenda magemu gakusakalaga. Jwalakwe jwatyosisye magemuga mu kompyuta jakwe soni jwalesile kukunguluka ni achimjakwe ŵaŵatendaga nawo magemuga. Daniel jwaŵechete kuti, “Nalesile kutenda magemuga mwamti natandite kukamulichisya masengo ndaŵi jangu pakukunguluka ni achimjangu ŵamumpingo.” Apano, Daniel ali mpayiniya soni jwamkulungwa jwamumpingo.

15. Ligongo chichi ngani syaunami sili syakogoya?

¹⁵ Mpela mwayaŵelele ni Timoteyo, nombewe tukusosekwa kusamala soni kumanyilila kogoya kwa ngani syaunami syakusawandisya ŵandu ŵakusapuka. (1 Tim. 4:1, 7; 2 Tim. 2:16) Mwachisyasyo, ŵandu ŵakusapukaŵa akusawandisya ngani syaunami syakwamba abale ŵetu soni akusasaka kututendekasya kuti tukayichileje gulu ja Yehofa. Ngani syaunami syelesi mpaka sijonanje chikulupi chetu. Tukusosekwa kuŵambala kulupilila ngani mpela syelesi ligongo ŵandu ŵakusawandisya nganisi ali ŵalunda lwejonasiche, soni ŵangamanyilila yakuwona yisyesyene. Ŵakusapukaŵa akusagamba kusaka “yakusisyanasisyana ni kukangana.” (1 Tim. 6:4, 5) Jemanjaji akusasaka kuti tukulupilileje ngani syawo syaunami soni kuti twakayichileje Aklistu achimjetu.

16. Ana ni yindu yapi yampaka yitusokonasye?

¹⁶ Asamaleje ni yindu yampaka yasokonasye. Mpela “msilikali jwambone jwa Klistu Yesu,” Timoteyo jwasosekwaga kuŵika nganisyo syakwe pakumtumichila Mlungu mmalo mwakusokonechela ni yindu ya kuchilambo. (2 Tim. 2:3, 4) Mpela Timoteyo tukusosekwa kusamala kuti yindu ya kuchilambo yikatusokonasya. Yipanje yana machili gakututendekasya kuleka kumnonyela Yehofa. Mpaka yitutendekasyesoni kuleka kuganonyela Maloŵe ga Mlungu soni kuleka kwasalila ŵane ya Maloŵego. (Mat. 13:22) Tukusosekwa kola umi wangasaka yindu yejinji soni tukamulichisyeje masengo ndaŵi ni machili getu pakusosasosa “yindu yayili yakusosekwa mnope mu Uchimwene wa Mlungu.”—Mat. 6:22-25, 33.

17-18. Ana tukusosekwa kutenda chichi kuti tuŵe paunasi wambone ni Yehofa?

¹⁷ Aŵeje ŵakoseka kutendapo kandu. Msilikali akusasosekwa kumanyilila chilepe yampaka atende kuti akombole kulichenjela pasimene ni yakogoya. Kuti tukombole kuyichenjela yindu yaŵatupele Yehofa tukusosekwa kutendapo kandu mwachitema patusimene ni yindu yakogoya. Ana chichi champaka chitukamuchisye kuti tutende yeleyi? Tukusasosekwa kumanyilila chile yampaka tutende mkanitusimane ni yinduyo.

¹⁸ Mwachisyasyo, mundu pakwesile basi, akusasosekwa kumanyilila kaje palili liwindo lyakopochela pajitendekwe ngosi. Akusasosekwa kutenda yeleyi ni chakulinga chakuti akombole kutila mwachitema naga chinechakwe chili chitendekwe mwangajembecheya. Mwakulandana ni yeleyi m’wejisoni tukusosekwa kumanyilila yampaka tutende patusimene ni yindu yanganitujembecheyaga. Patukukamulichisya masengo intaneti kapena kulolela TV ndaŵi sine mpaka payiche yiwulili yakuŵagula, yachiwawa kapena ngani sya ŵandu ŵakusapuka. Naga tukusaŵa ŵakoseka nikuti mpaka tukombole kuŵambala kulolela yindu yakusakalayi kuti tuŵe paunasi wambone ni Yehofa soni kuti tukole chikumbumtima chambone.—Sal. 101:3; 1 Tim. 4:12.

19. Ana tuchisangalala ni yindu yapi naga tukusayisamalila yindu yaŵatupele Yehofa?

¹⁹ Tukusosekwa kuyisamalila chenene yindu yakusosekwa yaŵatupele Yehofa. Yindu yeleyi wuli usyesyene wakusimanikwa m’Maloŵe gakwe soni upile wakwajiganya ŵane usyesyenewo. Naga tukutenda yeleyi tuchikola chikumbumtima chambone, soni tuchikola umi usyesyene. Tuchiŵasoni ŵakusangalala mnope patukwakamuchisya ŵane kuti ammanyilile Yehofa. Ni chikamuchisyo cha Yehofa tuchikombola kuyisamalila yindu yakusosekwa mnope yatwapochele.—1 Tim. 6:12, 19.