Ŵacinyamatamwe Ana Mpaka Mkosecele Catuli Kubatiswa?

1, 2. (a) Ligongo cici kubatiswa kuli cindu cekulungwa mnope? (b) Ana mundu akusosekwa kubatiswa pandaŵi japi, soni ligongo cici?

ANA mli jwacinyamata jwamkusaka kubatiswa? Naga yili m’yoyo, mkusosekwa kumanyilila kuti kubatiswa uli upile wekulungwa mnope. Nambo mpela mwajasalile ngani jipite jila, ngamkusosekwa kuwuwona ubatiso mpela cindu cang’andila. Ubatiso ukusalosya kuti mwatesile cilanga kwa Yehofa cakuti cimumtumicileje mpaka kalakala mwakuŵika lisosa lyakwe pasogolo pa yosope. M’yoyo, mkusosekwa kubatiswa pamkomangele, pamkusacilila jika kutenda yeleyo soni pammanyilile gopolela kwa kulipeleka kwa Mlungu.

² Nambi wuli naga mkuyiwona kuti nganimkosece kuti m’batiswe? Kapena, wuli naga acinangolo ŵenu akuyiwona kuti mkusosekwa kulinda kaje kuti myice pa msingu winewakwe soni mmanyilile cenene yindu yine? Naga yili m’yoyo, ngamkusosekwa kutenguka. Mkusosekwa kutenda yiliyose yakomboleka kuti mjawule pasogolo ni cakulinga cakuti m’ŵajilwe kubatiswa mkanipapite ndaŵi jelewu. Kuti mkombole kutenda yeleyi mkusosekwa kuliŵicila yakulinga pa yindu yitatu ayi: (1) yamkusakulupilila (2) yitendo yenu, soni (3) kuyamicila.

3, 4. Ana ŵacinyamata mpaka alijiganye cici kwa Timoteyo?

³ Ana mpaka mjanje wuli yiwusyo yakuyicisyayi: Ligongo cici ngusakulupilila kuti Mlungu apali? Ana cici cacikusasimicisya kuti Baibulo jili Maloŵe ga Mlungu? Ligongo cici ngusayiwona kuti kuya malamusi ga Mlungu kuli kwambone mnope kulekangana ni kujigalila ndamo syakusakala sya m’cilamboci? Yiwusyo yeleyi ngayikusosekwa kumtendekasya kuti mlikayicileje. M’malo mwakwe ciyimkamucisye kuya yaŵasasile ndumetume Paulo paŵatite, “Mmanyilile lisosa lya Mlungu, lyambone, lyakwiticika soni lyamlama.” (Alo. 12:2) Ligongo cici mkusosekwa kutenda yeleyi?

⁴ Kwende tulole kaje cisyasyo ca Timoteyo. Jwalakwe ŵagamanyililaga cenene Malemba ligongo lyakuti mamagwe soni angangagwe ŵamjiganyaga kutandila ‘paŵaliji likandi.’ Nambo atamose yaliji m’yoyo, Paulo ŵamlimbikasisye Timoteyo kuti, “Mjendelecele kuya yindu yamwalijigenye soni yamwayikulupilile panyuma pakwikutila nayo.” (2 Tim. 3:14, 15) Pelepa maloŵe gakuti ‘kwikutila’ gakugopolela “kusimicisya soni kulupilila yisyesyene yakwamba cinecakwe.” Timoteyo ŵakulupililaga kuti ŵapatile usyesyene. Jwalakwe ŵakulupililaga yeleyi ngaŵaga ligongo lyakuti mamagwe soni angangagwe ŵamsalile kuti atende yeleyo, nambo ligongo lyakuti ŵaganicisyaga yaŵalijiganyisyeyo soni ŵajikutile nayo.—Aŵalanje Aloma 12:1.

5, 6 Ligongo cici kuli kwakusosekwa kamulicisya masengo ‘macili genu ga kuganisya’?

⁵ Wuli pakwamba ya mmwejo? Komboleka kuti m’ŵele mli mkumanyilila usyesyene wa m’Baibulo kutandila kalakala. Naga yili m’yoyo, wuli ngalinganya yakuti m’wungunye mnope magongo gagakusamtendekasya kulupilila yeleyo? Yeleyi yicilimbisya cikulupi cenu soni yicimkamucisya kuti m’ŵambale kujigalila yitendo ya acimjenu, kaganisye ka ŵandu ŵakucilambo soni kuti mkakuya yakumbila yenu.

⁶ Naga mkusakamulicisya masengo ‘macili genu ga kuganisya’, cimcikombola kwajanga acimjenu pam’wusisye yiwusyo mpela ayi, “Ligongo cici mkusakulupilila kuti Mlungu apali? Ligongo cici Mlungu jwacinonyelo akusakunda kuti yakusakala yitendekweje? Ana yili yisyene kuti Mlungu apali kutandila kalakala?” Naga mkusakosecela, yiwusyo yeleyi ngaŵa mkumtendekasya kutanda kayicila, nambo yicimlimbikasya kulijiganya Baibulo mwamtawu.

7-9. Ana mbali ja pa Webusayiti jakuti “Kodi Baibulo Limaphunzitsa Chiyani?” mpaka jimkamucisye catuli kulimbisya cikulupi cenu?

⁷ Kutenda lijiganyo lyapajika mwakutamilicika mpaka kumkamucisye kwanga yam’wusisye ŵandu ŵane, kumasya kayicila, soni kulimbisya cikulupi cenu. (Mase. 17:11) Likuga litupele yida yejinji yakutukamucisya pangani syelesi. Mwambone, kabuku ka Cisungu kakuti: The Origin of Life—Five Questions Worth Asking soni buku jakuti Is There a Creator Who Cares About You? yakamucisye ŵacinyamata ŵajinji. Konjecesya pelepa, ŵacinyamata ŵane akusakamulicisya masengo yiwusyo yakamucisya kulijiganya yayikusimanikwa pa Webusayiti jetu jaciceŵa pa mbali jakuti “Kodi Baibulo Limaphunzitsa Chiyani?” Alole palembile kuti ZIMENE BAIBULO LIMAPHUNZITSA. Likuga lyalinganyisye mbali jeleji kuti jimkamucisye kulimbisya cikulupi cenu pa ngani sya m’Baibulo.

⁸ Pakuŵa mkusajimanyilila Baibulo mpaka yiŵe yangasawusya kwanga yine mwa yiwusyo yayikusimanikwa pambali jeleji. Nambo ana mkusajanga yakuwona? Pa yiwusyo yakamucisya kulijiganya, pakusaŵasoni malemba soni malo gakuti mlembeje nganisyo syenu. Mpaka yimkamucisye kosecela cenene kuti mkalaga pamkwasalila acimjenu ya cikulupi cenu. Mbali ja pa Webusayiti jakolanjikwa kuti “Kodi Baibulo Limaphunzitsa Chiyani?” jikamucisya ŵacinyamata ŵajinji kulimbisya cikulupi cawo. Naga mkwete yakumkamucisya kwinjila pa Intaneti, wuli ngakamulicisya masengo mbali jeleji pamkutenda lijiganyo lyapajika?

⁹ Kulimbisya cikulupi cenu kucimkamkucisya kuti m’batiswe. Mlongo jwine jwacinyamata jwatite, “Mkanimbatiswe, nalijiganyaga Baibulo ni nayiweni kuti aji jili dini jisyesyene. Yakuyicisya yakwe cikulupi cangu calimbaga lisiku ni lisiku.”

10. Ligongo cici Mklistu jwam’batiswe akusosekwa kutenda yindu mwakamulana ni cikulupi cakwe?

¹⁰ Baibulo jikusati, “Cikulupi pajika, naga cangali masengo gakwe, cili cewe.” (Yak. 2:17) Yitendo yenu yicilosya naga mkwete cikulupi cakulimba. Ana yitendo yakwe yatuli? Baibulo jikusasala kuti, “Akusosekwa kuŵa ŵandu ŵa ndamo jeswela soni atendeje yindu yakulosya kuti ali ŵakulipeleka kwa Mlungu.”—Aŵalanje 2 Petulo 3:11.

11. Ana maloŵe gakuti “ndamo jeswela” gakusagopolela cici?

¹¹ Kuti mkole “ndamo jeswela” ngamkusasosekwa kutenda yakusakala. Ana mkutenda wuli pangani jeleji? Mwambone, mganicisye yimtesile miyesi 6 jipiteji. Ana mlosisye catuli kuti ‘macili genu gakumanyilila’ gakumkamucisya kulekanganya pasikati pa cambone ni cakusakala? (Ahe. 5:14) Ana pana cakulingwa cinecakwe camwakombwele kucipilila? Ana yamkusatenda pamli ku sukulu yikusalosya yamkusakulupilila? Ana mkusaŵicila kunyuma yamkusakulupilila mmalo mwakogopa kuti acimjenu ŵa mkalasi camnyosye? (1 Pet. 4:3, 4) Yili yisyene kuti pangali mundu jwamlama. Atamose mundu jwaŵele ali mkumtumicila Yehofa kwa ndaŵi jelewu ndaŵi sine yikusamlema kuŵeceta ya cikulupi cakwe pekuga. Nambope, mundu juŵalipelece kwa Yehofa akusasangalala kumanyika ni lina lya Mlungu. Yeleyi yikusawonecela kupitila mu yitendo yakwe.

12. Ana yine mwa ‘yindu yakulosya kuti mli jwakulipeleka kwa Mlungu’ yili yapi, soni mkusosekwa kuyiwona mwatuli?

¹² Wuli pakwamba ya ‘yindu yakulosya kuti mli jwakulipeleka kwa Mlungu’? Yindu yeleyi yikupwatikapo kusimanikwa pamisongano soni kamula nawo masengo gakulalicila. Yikupwatikaposoni yindu yine yele ŵandu ŵane ngaŵa mkuyiwona, mpela kupopela pajika, soni lijiganyo lyapajika. Mundu juŵapelece umi wakwe kwa Yehofa ngakusayiwona yindu yeleyi mpela yakusitopesya. Mmalo mwakwe, akusaŵeceta mpela muŵaŵecetele Mwenye Daudi, juŵatite, “Ngusasangalala ni kutenda lisosa lyawo, wawo Mlungu jwangu. Soni cilamusi cawo cili mumtima mwangu.”—Sal. 40:8.

13, 14. Ana cici campaka cakamucisye ŵacinyamata kutenda “yindu yakulosya kuti ali ŵakulipeleka kwa Mlungu,” soni ana ŵacinyamata ŵane asasile yatuli pakwamba ya yeleyi?

¹³ M’buku jakuti Mayankho a Zimene Achinyamata Amafunsa—Buku Lachiwiri pa peji 308 ni 309, pana yiwusyo yampaka yimkamucisye kola yakulinga. Yine mwa yiwusyoyo yili yakuti, ‘Pamkupopela, ana mkusakolanga yindu yisyesyene yimkusaka?’ ‘Ana mapopelo genugo gakusalosya kuti mkusamnonyela Yehofa yisyesyene?’ ‘Ana mkusatenda yindu yatuli palijiganyo lyenu lyapajika?’ Ana mkusajawula mu undumetume atamose naga acinangolo ŵenu nganajawula?’ Pa mapejiga panasoni malo gakuti mlembeje yakulinga yampaka mkole yakwamba mapopelo, lijiganyo lyapajika soni undumetume.

¹⁴ Ŵacinyamata ŵajinji ŵakusaka kubatiswa ayiweni yindu yayikusimanikwa pelepa kuŵa yakamucisya mnope. Mwambone, jwacinyamata jwine lina lyakwe Tilda ŵatite, “Nakamulicisyaga masengo yiwusyo yeleyi panaliŵicilaga yakulinga. Nakwanilicisyaga cakulinga cimocimo mpaka naŵajilwe kubatiswa pali papitile caka cimo.” Yiwusyoyi yamkamucisyesoni jwacinyamata jwine lina lyakwe Patrick. Jwalakwe ŵatite, “Namanyililaga kala yakulinga yangu. Nambo kuyilemba kwangamucisye kuti ngole mtawu wakuyikwanilisya.”

15. Alondesye ligongo lyakwe mundu akusosekwa kusagula jika kulipeleka kwa Mlungu.

¹⁵ Cimo mwa yiwusyo yakusosekwa mnope yayili pa mapeji 308 ni 309, cili cakuti, “Ana cimcijendelecela kumtumicila Yehofa atamose acinangolo ŵenu soni acimjenu ali alesile kumtumicila?” Mkaliŵalila kuti Mklistu juŵalipelece soni jwam’batiswe, ngakusasosekwa kwegamila ŵane pakumtumicila Yehofa. Ndamo jenu jeswela soni yitendo yenu yakulosya kuti mwalipelece kwa Mlungu yikusalosya kuti mwawujigele usyesyene kuŵa wenuwenupe soni mpaka yilosye kuti mkutenda yakomboleka kuti m’batiswe.

16, 17. (a) Ana cici campaka cimtendekasye mundu kuŵa Mklistu? (b) Ana kuyamicila ciwombolo mpaka tukuwanicisye ni cici?

¹⁶ Mundu jwine juŵagamanyililaga cenene Malamusi ga Mose ŵam’wusisye Yesu kuti, “Ana lilamusi lyekulungwa mnope m’Cilamusi lili lyapi?” Yesu ŵamjanjile kuti, “Mumnonyeleje Yehofa Mlungu jwenu ni mtima wenu wosope, umi wenu wosope, ni nganisyo syenu syosope.” (Mat. 22:35-37) Yesu ŵalosisye kuti kumnonyela Yehofa lili ligongo lyekulungwa lyakumtendekasya mundu kubatiswa soni kuŵa Mklistu. Cindu cimo cakusosekwa mnope kuti mlimbisye cinonyelo celeci cili kuganicisya ya ciwombolo caŵatupele Yehofa. (Aŵalanje 2 Akolinto 5:14, 15; 1 Yohane 4:9, 19.) Kuganicisya ya kusosekwa kwa ciwomboloci kucimkamucisya kum’yamicila Yehofa.

¹⁷ Kuyamicila kwenu ciwomboloci mpaka tukuwanicisye m’yi. Tujile kuti mundu jwine amkulupwisye pamwatiŵilaga m’mesi. Ana mpaka mgambe kunyakuka ni kwawulaga kunyumba, kuliŵalila yamtendele mundujo? Ngaŵa mkutenda yeleyo. Mpaka mum’yamicile mnope mundujo ligongo lyakulupusya umi wenu. Mwakulandana ni yeleyi, tukusosekwasoni kum’yamicila Yehofa soni Yesu. Yikaŵe kuti jemanjaji nganatupa ciwombolo, tukatiŵile mu ulemwa soni m’ciwa. Nambo ligongo lyakuti jemanjaji akusatunonyela, apano tukwete cembeceyo cakutama ni umi kwangamala m’cilambo casambano ca paladaiso.

18, 19. (a) Ligongo cici ngamkusosekwa kogopa kulipeleka kwa Yehofa? (b) Ana kumtumicila Yehofa kukusakamucisya catuli?

¹⁸ Ana mkusayamicila yamtendele Yehofa? Naga yili m’yoyo, mpaka mtende cenene kupeleka umi wenu kwa Yehofa ni kubatiswa. Mkaliŵalila kuti kulipeleka kukusagopolela kutenda cilangano ni Yehofa kuti cimumtumicileje kwa umi wenu wosope atamose yisawusye catuli. Ana mkutenda woga kutenda cilangano celeci? Mkajogopa. Yehofa akusasaka kuti mtendeje yampaka mkombole mwakutyocela pasi pamtima. Soni jwalakwe cacapa mbote ŵandu ŵakusatenda lisosa lyakwe. (Ahe. 11:6) Kulipeleka soni kubatiswa kucimkamucisya kuti mkole umi wambone. M’bale jwine jwa yaka 24, juŵabatiswe ali jwacinandipile ŵatite, “Yikaŵe kuti nalindilile kuti ngule kaje mkaninalipelece ngamanyilile yindu yejinji, nambo kusagula kulipeleka kwa Yehofa ndili jwacinandipile kwangamucisye kuti ngajigalika ni yakucilambo.”

¹⁹ Yehofa ali jwakulekangana mnope ni Satana. Satana akusagamba kusaka yindu yakumkamucisya msyene. Jwalakwe nganaŵa ŵapele yindu yambone ŵandu ŵali kumbali jakwe ligongo lyakuti jwangali pambone, soni jwangali sogolo jilijose. Naga mkusagula kuŵa kumbali jwakwe, nomwe ŵakwe sogolo jenu jicisokonecela.—Ciu. 20:10.

20. Ana jwacinyamata mpaka atende cici kuti alipelece ni kubatiswa? (Alole libokosi lyakuti “Yampaka Yimkamucisye Kula Mwausimu.”)

²⁰ Kupeleka umi wenu kwa Yehofa kuli cindu cambone mnope. Ana mli jwakoseka kulipeleka? Naga yili m’yoyo, mkawujila munyuma. Nambo naga mkuyiwona kuti mkusosekwape kandaŵi, mkamulicisye masengo songa sya mungani ajino kuti mjendelecele kwawula pasogolo. Paulo ŵalembele Aklistu ŵa ku Filipi kuti, “Mulimose mwatujawulile pasogolo, kwende tujendelecele kwawula pasogolo mwakwenda mwakuŵajilwa m’litala lilyolyo.” (Afi. 3:16) Naga mkukuya maloŵe gelega, mpaka msacilile kupeleka umi wenu kwa Yehofa ni kubatiswa.