Alipelecheje pa Utumiki Wawo

ANA akusapikana uli papochele chikalata chakulimbikasya kutyochela kwa mjawo? Timoteyo jwapochele chikalata kutyochela kwa ndumetume Paulo soni chikalatachi ni chele apano chikusamanyikwa kuti buku ja 2 Timoteo. Mwangakayichila Timoteyo paŵapochele chikalatachi ŵapatile malo gambone kuti aŵalanje yaŵalembile mjakwe jwapamtimaju. Komboleka kuti Timoteyo jwaliwusyaga kuti, ‘Ana Paulo ali uli? Ana pana yakusaka kusalila pakwamba ya utumiki wangu? Ana chikalatachi mpaka chingamuchisye pangutenda utumiki wangu soni pangwakamuchisya ŵane?’ Yachitukambilane, chiyitukamuchisye kumanyilila kuti Timoteyo jwapatile kwanga kwa yiwusyoyi mu chikalata chiŵapochelechi. Kwende sambano tukambilane mfundo syekulungwa syatukusisimana mu chikalatachi.

Timoteyo paŵagambile kutanda kuŵalanga chikalatachi, ŵayiweni kuti Paulo akusamnonyela mnope. Paulo jwamkolasile Timoteyo kuti “mwanangu jwakunonyelwa.” (2 Tim. 1:2) Komboleka kuti Timoteyo jwapochele chikalatachi ali ni yaka 30, cha mu 65 C.E. Pandaŵiji jwalakwe jwaliji jwamkulungwa jwamumpingo jwakumanyilila chenene yindu. Jwalakwe jwaŵele ali mkwenda ni Paulo kwa yaka yakupunda 10 soni komboleka kuti ŵalijiganyisye yindu yejinji.

Timoteyo yamlimbikasisye mnope paŵapikene kuti Paulo akupitilisya kuŵa jwakulupichika atamose kuti akusimana ni yakuwusya yejinji. Pandaŵiji Paulo jwaliji ku ukayidi ku Loma soni jwajembecheyaga kuwulajidwa. (2 Tim. 1:15, 16; 4:6-8) Timoteyo jwayiweni kuti Paulo ali jwakulimba mtima ligongo jwaŵechete kuti, ‘Ngupilila yosopeyi.’ (2 Tim. 2:8-13) Mpela mwayaŵelele ni Timoteyo, nombe m’we mpaka tukole chikulupi chakulimba patukulola yaŵatiga Paulo pakupilila.

Paulo ŵamlimbikasisye Timoteyo kuti awuwoneje utumiki wakwe kuŵa mtuka wakutyochela kwa Mlungu. Paulo jwasakaga kuti Timoteyo ‘awukolosye’ mtuka waŵapochele kuti, ‘ukoleleje mpela moto.’ (2 Tim. 1:6) Paulo jwakamulichisye masengo liloŵe lya Chigiliki lyakuti khaʹri·sma pakusala ya “mtuka.” Liloŵeli likusagopolela chindu chele mundu agambile kupochela mwalulele. Myoyo, Timoteyo jwapochele mtukawu pandaŵi jele achakulungwa ŵamjitichisye kuti atande kutumichila mumpingo.—1 Tim. 4:14.

Ana Timoteyo jwasosekwaga kutenda uli ni mtuka waŵapochelewu? Jwalakwe paŵapikene maloŵe gakuti ‘mwukolosye kuti ukoleleje mpela moto,’ komboleka kuti jwaganisisye ya moto wakusakamulichisya masengo ŵandu pakuteleka wele ndaŵi sine ukusaŵa wamakala. Makalaga gakusasosekwa kugapepelela kuti gakoposyeje moto. Dikishonale jine jasasile kuti liloŵe lya Chigiliki (a·na·zo·py·reʹo) lyaŵakamulichisye masengo Paulo likusagopolela “konjechesya machili soni kupepelela moto.” Yeleyi yagopolelaga kuŵa “ŵakusangalala soni ŵakulimbichila mnope pakukamula masengo.” Myoyo Paulo jwamlimbikasyaga Timoteyo kuti ‘alipelecheje pa utumiki wakwe.’ M’wejisoni mpaka tujitichisye kuti tukusosekwa kulipeleka pa utumiki watukutenda.

Timoteyo paŵaŵalangaga chikalata chaŵalembile Paulochi, ŵapatilemo yindu yine yayikamkamuchisye pa utumiki wakwe. Paulo jwalembile kuti, ‘Myisunje chenene yindu yambone yele yiŵampele, ligongo lya machili ga Msimu Weswela wawuli mwa uwe.’ (2 Tim. 1:14) Ana yindu yambone yaŵapochele Timoteyo yaliji chichi? Paulo jwasasile kuti yindu yeleyi yaliji “maloŵe gasyesyene” gagali usyesyene wakusimanikwa Malemba. (2 Tim. 1:13) Ligongo lyakuti Timoteyo jwaliji jwakutumichila jwa Mlungu, jwalakwe jwasosekwaga kwajiganya usyesyene ŵandu ŵa mumpingo soni ŵandu ŵa mudela jiŵatamaga. (2 Tim. 4:1-5) Timoteyo jwalijisoni jwamkulungwa jwamumpingo. Myoyo jwasosekwaga kusisamalila ngondolo sya Mlungu. (1 Pet. 5:2) Kuti Timoteyo akombole kusamalila yindu yambone yaŵapocheleyi, jwasosekwaga kuti amdalileje mnope msimu weswela wa Yehofa soni Maloŵe gakwe.—2 Tim. 3:14-17.

Masiku aganosoni, m’weji tukwete usyesyene watukusosekwa kuti twajiganye ŵandu ŵane. (Mat. 28:19, 20) Ndaŵi syosope tukusosekwa tukumbuchileje kuti usyesyene watukwajiganya ŵanduwu uli wakusosekwa mnope, myoyo tukusosekwa kupopelaga soni kulijiganya Maloŵe ga Mlungu ndaŵi syosope. (Alo. 12:11, 12; 1 Tim. 4:13, 15, 16) Kombolekasoni kola udindo wine wakutumichila mpela jwamkulungwa jwamumpingo kapena kutenda utumiki wandaŵi syosope. Utumiki mpela welewu ukusasosekwa utujiganyeje kuŵa ŵakulinandiya soni kumdalila Mlungu. Myoyo mpaka tusunje chenene kapena kuteteya yindu yeleyi mwakuyiwona kuti yili yakusosekwa mnope. Tukusosekwasoni kumdalila mnope Yehofa kuti atukamuchisyeje kuteteya utumiki watwapochele.

Utumiki waŵapochele Timoteyo, nganiwugamba kuŵa wajikape. Mmalo mwakwe ŵasosekwagasoni kwajiganya ŵane. Ni ligongo lyakwe Paulo ŵamlimbikasisye Timoteyo kuti, “Mjigale maloŵe gele gimwagapikene kutyochela kwa une . . , pameso pa mboni syejinji sila, mwasalile ŵandu ŵakulupilila ŵele ŵitachikombola kwajiganya ŵane.” (2 Tim. 2:2) Pelepatu Paulo ŵamkumbwisye Timoteyo kuti ŵakusosekwa kwajiganya ŵane yindu yosope yaŵalijiganyisye. Yeleyi yikugopolela kuti, jwakulolela masengo julijose mumpingo akusosekwa kutendaga yeleyi. Jwakulolela jwambone ngakusakola kamtima ka jelasi kampaka kamtendekasye ngasalila ŵane yindu yakuyimanyilila chenene pa kakamule ka masengo kapena utumiki wine wakwe. Mmalo mwakwe, jwalakwe akusiŵajiganya ŵane kuti masengogo gajende chenene. Sonitu ngakusajogopa kuti mwine jwakumjiganyajo mpaka amanyilile yejinji mnope ni kumpunda. Myoyo, jwakulolela ngakusagamba kwiganya yindu yapachanyape. Mmalo mwakwe chakulinga chakwe chisyesyene chikusaŵa kumkamuchisya jwakumjiganyajo kuti aganisyeje chenene soni kumanyilila yejinji. Yeleyi yichimkamuchisya kuti akule mwausimu. Pelepo nikuti “ŵandu ŵakulupilila” ŵajiganyidwewo, sambano mpaka akamule chenene masengo gakuwukamuchisya mpingo.

Mwangakayichila Timoteyo jwachiweni chikalata chaŵampele Paulo chila kuti chaliji chakusosekwa mnope. Yili yangasawusya kumwona munganisyo Timoteyo ali mkuŵalanga mwakuwilisyawilisya malangiso gagaliji m’chikalatachi, kwineku ali mkuganichisya yampaka atende kuti agakamulichisye masengo pautumiki wakwe.

M’wejisoni tukusosekwa kukamulichisya masengo malangisoga. Ana mpaka tugakamulichisye masengo chamtuli? Tukusosekwa kulimbichila kupepelela mpela moto mtuka watwapochele. Tuwuteteyeje utumiki watukutenda, soni twajiganyeje ŵane yindu yosope yatukuyimanyilila chenene. Mwakamulana ni yaŵaŵechete Paulo, naga tukutenda yeleyi nikuti ‘tuchikamula masengo getu gosope mpela jwakutumichila jwa Mlungu.’—2 Tim. 4:5.