Ŵakulolela Ŵakusachinga Gulu ja Ngondolo

PA UTUMIKI wakwe wa pachilambo chapasi, Yesu ŵalosisye kuti ŵaliji “mkuchinga jwambone.” (Yoh. 10:11) Paŵaweni ŵandu ŵajinji ali kumkuya, “ŵatendele chanasa, ligongo jemanjajo ŵaliji ŵakudandawula nipo ŵaliji ŵakusoŵa chikamuchisyo mpela ngondolo syangali mkuchinga.” (Mat. 9:36) Petulo ni ŵandumetume ŵane ŵayimanyi kuti kwa Yesu ngani jakwatendela ŵane chanasa jaliji jakusosekwa mnope ligongo lyakuti jwalakwejo ŵanonyelaga ŵanduwo. Yesu ŵaliji jwakulekangana ni ŵakuchinga ŵaunami ŵa Chiisalaeli, ŵaŵagambaga kusilechelela ngondolo sili mkusokonechela, soni kulaga ni sala jausimu. (Esek. 34:7, 8) Chisyasyo chambone chaŵalosisye Yesu pakwiganya soni kusamalila ngondolo, mpaka kuyikana pakwasa umi wakwe ligongo lya ngondolosyo, chakamuchisye ŵandumetume ŵakwe mwampaka ŵakamuchisye ŵakulupilila kuwujila kwa Yehofa, jwali ‘mkuchinga jwakwalolela jemanjajo.’—1 Pet. 2:25.

² Pandaŵi jine Yesu ali mkuŵecheta kwa Petulo, ŵagombelechesye kusosekwa kwa kusisamalila ngondolo. (Yoh. 21:15-17) Yeleyi yamlimbikasisye mnope Petulo mwamti ŵalimbikasisyesoni achakulungwa ŵa mumpingo wa Chiklistu wandanda kuti, ‘Mlanjeje likuga lyangondolo sya Mlungu liŵampele jemanja kuti mlisamalileje. Msiloleleje mpela kuti jwine akutenda kumchisya, nambo mwalisosa lya jemanja mpela mwakusachila Mlungu kuti jemanja mtendeje. Mkakamulaga masengo genugo pakukuya chakupata chakutesya soni, nambo ni mtima wakusaka kutumichila. Mkaŵaga mpela ŵakulamulila ŵakulikwesya pakwalongolela ŵandu ŵimkwenela kwalolela, nambo mlosyeje chisyasyo chambone kwa ngondolosyo.’ (1 Pet. 5:1-3) Achakulungwa ŵa mumpingo ŵa masiku agano akusakuyasoni maloŵe ga Petuloga. Pakuya Yesu, achakulungwa ŵa mumpingo akusaŵa chisyasyo chambone kwa ngondolo pakutumichila Yehofa mwakusachilila soni mwakulimbichila.—Ahe. 13:7.

³ Tukusayamichila ŵakulolela mumpingo ŵakusagulidwa ni msimu ŵeleŵa. Pana umbone watukusapata ligongo lya masengo gawo. Mwachisyasyo, ŵakulolela mumpingoŵa akusalimbikasya soni kusamalila jwalijose mumpingo. Wiki jilijose jemanjaji mwakulimbichila akusatendesya misongano ja mpingo, jajikusalimbikasya chikulupi cha ŵandu wosope. (Alo. 12:8) Kulimbichila kwawo pakusichenjela ngondolo ku yindu yampaka yisiwulasye, mpela ŵandu ŵakusakala, yikusakamuchisya kuti siŵe pa mtendele. (Yes. 32:2; Tito 1:9-11) Kulongolela kwawo mu utumiki wa mumgunda kukusatulimbikasya kuti tupitilisye kulalichila ngani syambone mwesi uliwose. (Ahe. 13:15-17) Yehofa akusalimbikasya mpingo, kupitila ‘m’mituka’ ja achalume.—Aef. 4:8, 11, 12.

⁴ Pakusaka kulolechesya kuti mpingo usamalidweje chenene, achalume ŵakusiŵasagula kuti aŵe ŵakulolela akusasosekwa kwanilisya yagakusala Maloŵe ga Mlungu. Naga jemanjaji akukwanilisya yeleyi, nikuti akusaŵa kuti aŵichidwe ni msimu weswela. (Mase. 20:28) Nambo, yakusosekwa kwanilisya ŵakulolela ŵa Chiklistu yili yapenani ligongo lyakuti udindo wakulolela uli wekulungwa mnope. Nambope yeleyi ngaŵa yapenani mnope mwamti ni kulepela kwanilisya achalume ŵa Chiklistu ŵakusamnonyela Yehofa yisyesyene, soni ŵakusasachilila kuti jwalakwe ŵakamulichisye masengo. Ŵandu wosope akusosekwa amanyilileje kuti jemanjaji akusakamulichisya masengo yajikusasala Baibulo pa umi wawo wa lisiku ni lisiku.

⁵ Ndumetume Paulo ŵasasile yakusosekwa kwanilisya ŵakulolela mu chikalata chakwe chandanda chakwawula kwa Timoteyo soni chakwawula kwa Tito. Pa 1 Timoteo 3:1-7, tukusaŵalanga kuti, “Naga mundu akusaka masengo gakulolela mpingo, akusaka masengo gambone. Jwakulolela mpingo aŵeje mundu jwangali ulemwa, aŵe jwa jwamkongwe jumpepe, aŵeje jwakuwusimana mtima, jwanganisyo syambone, jwauchimbichimbi, jwakwapochela chenene achalendo nambosoni jwakombola kwiganya. Akaŵa jwakukolelwa kapena jwakutenda ndewo nambo jwakuwusimana mtima, jwangatenda makani, nambosoni akaŵa jwakunonyela mbiya. Aŵe jwakumanyilila kwendesya chenene liŵasa lyakwe, ni kwalela chenene ŵanache ŵakwe kuti aŵe ŵakupikanila ni ŵauchimbichimbi. Naga mundu ngakumanyilila kwendesya chenene liŵasa lyakwe, ana mpaka apakombole uli kuwusamalila mpingo wa Mlungu? Akaŵa jwagambile kutanda kulupilila kwene, kogopela kuti atakulikwesya ni kupegwa chilango mpela muŵapegwele Satana. Akwenela kuŵa mundu jwakuchimbichisidwa ni ŵandu wosope ŵimkanaŵa ŵamumpingo kogopela kuti atakunyosyedwa ni kugwa m’chitega cha Satana.”

⁶ Paulo ŵamlembele Tito kuti, ‘Namlesile ku Kilete kuti mlondesye yosope yiyaliji mkaniyimale kulongosoka, nikuti mwaŵiche achakulungwa ŵa mpingo m’musi wuliwose mpela yinatite pakumlamula. Jwamkulungwa jwa mumpingo aŵe jwangakayikasya, soni aŵe jwa ŵakongwe ŵamo. Ŵanache aŵe ŵakulupilila mwa Klistu, ŵimkanakola mbili jakuti jemanjajo ali ŵa ndamo syakusakala kapena kuti ali ŵangapikanila. Jwakulolela mpingo aŵeje jwangakayikasya ligongo ali jwakutumichila jwa Mlungu. Jwalakwejo akaŵa jwakupikana yakwepe, akaŵa jwakumwa yakumwa yaukali, jwandewo, kapenasoni jwakunonyela mbiya. Aŵe jwakwapochela chenene achalendo, jwakunonyela yambone, jwakumanyilila kulilamulila msyene, jwakulungama, jwamswela mtima nambosoni jwakulilekasya msyene. Aŵeje jwakukamulichisya mnope maloŵe gagali gakulupichika gelesoni gagakukamulana ni majiganyo giŵajiganyisye. Mwalitala lyeleli tachipakombola kwalimbisya ŵane ni chijiganyo chisyesyene, nambosoni pakwalosya yakulemwa yawo yayikusisyana ni chijiganyocho.’—Tito 1:5-9.

⁷ Atamose kuti yakusosekwa kwanilisya ya m’Malembayi mpaka yiwoneche kuŵa yakusawusya, achalume ŵa Chiklistu ngakusosekwa kuwujila munyuma pakulingalinga kuti aŵe ŵakulolela. Pakulosya ndamo syambone sya Chiklistu syakuŵajilwa jwakulolela, akusiŵalimbikasya ŵane mumpingomo kutendasoni myoyo. Paulo ŵalembile kuti, “mituka” ja achalumeji “masengo gawo galiji gakuti akolochesye kapena kuti kwakosechelesya chilepe ŵandu ŵa Mlungu ku masengo gakutumichila, ni kulimbikasya mpingo wele wawuli chilu cha Klistu, niposoni pakumalisya tuchiyika ku umpepe wele ukusasimanikwa pakukulupilila soni pakummanyilila Mwanache jwa Mlungu. Nipo pelepo tuchikomangala kusyesyene ni kwika pa msingu wakwenela wa Klistu.”—Aef. 4:8, 12, 13.

⁸ Ŵakulolela ngakusosekwa kuŵa achachanda kapena achalume ŵagambile kutanda kulupilila kwene. Nambo, akusaŵa ŵakuti akumanyilila chenene umi wa Chiklistu, ŵakujimanyilila chenene Baibulo, ŵakupikanichisya chenene malemba, soni ŵakusalosya kuti akusawunonyela mnope mpingo. Akusaŵa ŵakuti mpaka aŵechete mwakulimba mtima soni kwakamuchisya ŵandu ŵatesile yakusakala, kwakuli kusichenjela ngondolo kwa jwalijose jwakusaka kusijimuchila. (Yes. 32:2) Ŵakulolelaŵa akusaŵa kuti ŵandu wosope mumpingomo akusiŵamanyilila kuti ali achalume ŵakomangale mwausimu, soni ŵakuti akusasiganichisya mnope ngondolo sya Mlungu.

⁹ Wosope ŵaŵajilwe kuŵa ŵakulolela akusalosya lunda payakutenda yawo ya paumi wa lisiku ni lisiku. Naga jwakulolela ali jwamlombele, akusasosekwa kuya mnope malamusi ga Chiklistu pa ngani ja ulombela. Mwambone, aŵe jwa jwamkongwe jumpepe soni jwakumanyilila kwendesya chenene liŵasa lyakwe. Naga jwakulolela akwete ŵanache ŵakulupilila ŵali ŵakupikanila ni ŵauchimbichimbi soni ŵimkanakola mbili jakuti jemanjajo ali ŵandamo syakusakala kapena kuti ali ŵangapikanila, ŵandu ŵane mumpingomo mpaka amkulupilile jwalakwejo ni kuja kukum’ŵenda chikamuchisyo pangani sya m’liŵasa soni utame wa Chiklistu. Jwakulolela akusaŵa jwangali ulemwa, jwangakayikasya soni jwakuchimbichisidwa ni ŵandu wosope atamose ŵimkanaŵa ŵa mumpingo. Ŵandu ŵane ngaŵa mkuŵecheta kuti akwete ndamo jakusakala pakusaka konanga mbili ja mpingo. Jwalakwe akaŵa jwakuti agambile kumjamuka kwene ligongo lyakutenda chakulemwa chekulungwa. Nambo akusosekwa kuŵa jwakuti ŵane mumpingo mpaka akuye chisyasyo chakwe chambone soni kumkulupilila ligongo lya chikamuchisyo chausimu chakusapeleka.—1 Akoli. 11:1; 16:15, 16.

¹⁰ Achakulungwa ŵa mumpingoŵa akusatumichila mpingo wa Chiklistu mpela muŵatendelaga achakulungwa ŵa Chiisalaeli ŵaŵakolanjidwaga kuŵa “ŵalunda, . . . ŵakupikanichisya, ni ŵakumanyilila chenene yindu.” (Det. 1:13) Achakulungwa ŵa mumpingo nganaŵa ŵamlama, nambo mumpingomo soni mu dela jakutamajo akusamanyika kuŵa ŵakogopa Mlungu soni ŵalunda, ŵalosisye kwa ndaŵi jelewu kuti ndamo syawo sili syakamulana ni malamusi ga Mlungu. Ungali magambo wawo ukusiwatendekasya kuti aŵecheteje mwagopoka pameso pa mpingo.—Alo. 3:23.

¹¹ Achalume ŵakuŵajilwa kusagulidwa kuŵa ŵakulolela akusasosekwa kuti aŵe ŵakuwusimana mtima kapena kuti ŵangapundaganya mu yitendo yawo soni pakutenda yindu ni ŵane. Akaŵa ŵakukalalisya yindu. Nambo, mwakusatendela yindu pa umi wawo alosyeje kuti ali ŵangapundanganya soni ŵakumanyilila kulilamulila achimsyene. Akusalosya kuti ali ŵangapundanganya pakulya, kumwa, soni pakutenda yakusangalasya. Ngakusamwelesya ukana kuti akakola magambo ga kukolelwa. Naga mundu nganisyo syakwe sisokonechele ni yakumwa yakolelwesya mpaka yimtendekasye kuti alepeleje kuligosa, yampaka yimlepelekasye kulolela chenene usimu wa mpingo.

¹² Jwakulolela mumpingo akusasosekwa kuŵa mundu jwakolosya yindu. Ndamo syakwe syambone sikusawonechela pa kawoneche ka mundujo, pa mlango pakwe, soni muyakutenda yakwe ya lisiku ni lisiku. Jwalakweju akusaŵambala kuŵa mundu jwa mbwaji, nambo akusalola yindu yayikusosechela ni kulinganya yakuti ayitende. Akusatenda yosope mwakamulana ni malamusi ga Mlungu.

¹³ Jwakulolela mumpingo akusosekwa kuŵa jwakuwusimana mtima. Jwalakwe akusosekwa kuti akamuleje masengo mwakamulana ni achakulungwa wosope ŵa mumpingo. Akusosekwa kuliwonaga mwakuŵajilwa, soni akaŵa jwakunonyela kwalamula ŵane. Jwakulolela, akusosekwa kupikanilaga ya achimjakwe, soni akaganisyaga kuti nganisyo syakwe sikusaŵa syapenani kupunda sya ŵakulolela achimjakwe. Komboleka kuti ŵakulolela achimjakwe akwete ndamo kapena mpaka atende chenene yindu yine kupunda jwalakwe. Naga jwamkulungwa jwa mumpingo akusakamulichisya masengo Malemba soni kulingalinga kuya chisyasyo cha Yesu Klistu, mpaka yiŵe yangasawusya kuti akundeje nganisyo sya ŵane. (Afi. 2:2-8) Jwamkulungwa jwa mumpingo akaŵa jwandewo [“jwakutumbila mwachitema,” NWT] kapena jwamakani, nambo ŵachimbichisyeje ŵane, mwakwawona kuti ali ŵakumpunda. Jwalakwe akaŵa jwakupikana yakwepe, soni jwakwakanganisya achimjakwe kuti akunde yakusaka kapena nganisyo syakwe. Nambo aŵe jwakuti akusakamulana ni ŵane pakutenda yindu.

¹⁴ Nambosoni jwamkulungwa jwa mumpingo akusosekwa kuŵa jwakumanyilila kulilamulila msyene. Yeleyi yikugopolela kuti aŵeje jwakulitimalika atamose pali pa yipwetesi, soni jwangawutuchila kupeleka nganisyo syakwe. Jwalakwe aŵe jwakuti akusagapikanichisya chenene malamusi ga Yehofa, soni mugakusakamulila masengo. Mundu jwanganisyo syambone akusapochela chamuko, soni kuya yindu yayikusosekwa. Akatendaga yindu mwachinyengo.

¹⁵ Paulo ŵamkumbwisye Tito kuti jwakulolela aŵeje jwakunonyela yambone. Jwalakwe aŵeje jwakulungama, soni jwamswela mtima [“jwakulupichika,” NWT]. Jwakulolelaju akusalosyaga ndamosi pakutenda yindu ni ŵane, soni kulimba mtima kwakwe pakuya yayili yambone. Akusaŵa jwangatenganyika pakulipeleka kwakwe kwa Yehofa, soni akusapitilisya kuya ndamo syakulungama sya Mlungu. Aŵejesoni jwakuti mpaka asunje chinsisi. Jwalakwe akusapochela chenene achalendo mwakulipeleka ni mtima wosope, soni kamulichisya masengo chipanje chakwe pakwakamuchisya ŵane.—Mase. 20:33-35.

¹⁶ Kuti aŵe jwakulolela jwakamula mtima, akusosekwa kuti aŵe jwakombola kwiganya. Mwakamulana ni yaŵamsalile Tito, Paulo ŵaŵechete kuti jwakulolela “aŵeje jwakukamulichisya mnope maloŵe gagali gakulupichika gelesoni gagakukamulana ni majiganyo giŵajiganyisye. Mwalitala lyeleli tachipakombola kwalimbisya ŵane ni chijiganyo chisyesyene, nambosoni pakwalosya yakulemwa yawo yayikusisyana ni chijiganyocho.” (Tito 1:9) Jwalakwe akusakamuchisya ŵandu kuganichisya mwakusokoka Malemba, kwalosya umboni wa nganijo, kusisya ŵakusisya, soni kwalosya ŵandu mwampaka akamulichisye masengo Malemba, mwamti akusajikutila, soni chikulupi chawo chikusalimba. Akusatendaga yeleyi pandaŵi jambone kapena jakusawusya. (2 Tim. 4:2) Jwalakwe akusaŵa jwakuwusimana mtima naga pakusosekwa kumjamuka jwatesile chakulemwa kapena kumkamuchisya jwakayichila kuti akakayichilaga, soni kumlimbikasya kuti atendeje yambone mwachikulupi. Naga jwakulolela akupakombola kwiganya chinga pagulu kapena mundu jwalijose pajika, yeleyi yikusalosya kuti jwalakwe akukwanilisya chindu chakusosekwachi.

¹⁷ Yili yakusosekwa kuti achakulungwa aŵeje ŵakulimbichila mu utumiki. Pakutenda yeleyi jemanjaji akusosekwa kulosya kuti akusalingalinga kuya chisyasyo cha Yesu, juŵagawonaga masengo gakulalichila ngani syambone kuŵa gakusosekwa mnope. Yesu ŵakolagasoni chidwi ni ŵakulijiganya ŵakwe, mwakwakamuchisya kuti akomboleje kulalichila mwakamula mtima. (Maliko 1:38; Luk. 8:1) Naga achakulungwa ŵa mumpingo akusalipeleka mnope pakulalichila, atamose kuti akwete yakutenda yejinji, yikusalimbikasya ŵane mumpingomo kuti nombe nawo aŵeje ŵakulimbichila pakulalichila. Nagasoni achakulungwa akusalalichila yimpepe ni ŵamwiŵasa mwawo, nambosoni ŵane mumpingo, yikusakamuchisya kuti ‘tulimbisyane jwine ni mjakwe.’—Alo. 1:11, 12.

¹⁸ Yakusosechelayi mpaka yiwoneche kuŵa yakusawusya kwa jwakusaka kuŵa jwakulolela. Nambope pangali jwakulolela jwampaka akwanilisye mwamlama yakusosechela yosope yayili m’Baibulo. Nambope yakusosechelayi ngayikusosekwa kupelembela mnope mwa jwamkulungwa jwa mumpingo, mwamti ni kuŵa chakulepela chakwe chekulungwa. Achakulungwa ŵane mpaka akole ndamo sine syakuti ŵane ŵangali, nambo achimjawowo mpaka atendeje chenene pa yindu yine. Umbone wa yeleyi ni wakuti gulu josope ja achakulungwajo jikusakola ndamo syasikusasosechela kuti mpingo wa Mlungu awulongoleleje chenene.

¹⁹ Achakulungwa wosope ŵa mumpingo pakuganichisya yakuŵika ŵane kuŵa ŵakulolela, akusosekwa kumbuchila maloŵe ga ndumetume Paulo gakuti, “Ngumsalila jemanja wosope kuti mkalitenda kuti mli ŵalunda kupunda mum’ŵelele. Mnopemnope m’ŵeje ŵakulitimalika mu kuganisya kwenu, mwakulingana ni winji wa chikulupi chapeleche Mlungu kwa jwalijose jwa jemanja.” (Alo. 12:3) Jwamkulungwa jwa mumpingo jwalijose akusosekwa kuŵa jwakulinandiya. Pangali jwakusosekwa kuŵa “jwambone mnope” pakuganichisya yakwaŵika ŵane kuti aŵe ŵakulolela. (Jwak. 7:16) Achakulungwa wosope ŵa mumpingo pakulola yakusosechela ya m’Malemba ya jwa kumganichisya kuti aŵe jwakulolela, akusosekwa kulola naga akukwanilisya yakusosechelayo pamlingo wakuŵajilwa. Naga achakulungwa ŵa mumpingo ngakukunda kulamulilidwa ni yindu mpela ungali umlama, lusagu soni chinyengo, nikuti chachimjitichisya m’bale kuŵa jwakulolela mwakulosya kuti akusachimbichisya ndamo syakulungama sya Yehofa, soni ligongo lya umbone wa mpingo. Pakumjitichisya jwalijose, jemanjaji chachipopela kaje, soni chachikunda kuti Msimu wa Mlungu walongolele. Kumjitichisya mundu kuti aŵe jwakulolela uli umo mwa maudindo gekulungwa ga achakulungwa, myoyo akusosekwa kutenda mwakamulana ni maloŵe ga Paulo gakuti, “Mkajanguya kumsajika mundu magasa.”—1 Tim. 5:21, 22.

²⁰ Achalume ŵakomangale mwausimu akusalosya kuti akusalongoleledwa ni msimu weswela, soni akusalosya yeleyi pa umi wawo. Paulo ŵasasile yindu msano ni mcheche yele msimu wa Mlungu ukusatendekasya yayili, “chinonyelo, lukondwa, mtendele, kuwusimana mtima, umbone mtima, kwatendela ŵane yambone, kulupichika, kulisinga, soni kuligosa.” (Agal. 5:22, 23) Ŵakulolelaŵa akusamlimbikasya jwalijose soni kuwukamuchisya mpingo kuti uŵe wakamulana pa kutumichila Mlungu. Ndamo syawo soni kulimbichila kwawo pakwakamuchisya ŵane yikusalosya kuti jemanjaji aŵichidwe ni msimu weswela.—Mase. 20:28.

²¹ Yili yakusosekwa kuti achakulungwa ŵa mumpingo akamuleje masengo mwakamulana kuti mumpingo muŵe mkamulano. Jemanjaji mpaka aŵe ŵakulekangana umundu, nambo akusalimbikasya mkamulano wawo mwakupikanganana mwauchimbichimbi atamose kuti jemanjaji ngaŵa mkupikangana pa ngani jilijose jakukambilana. Naga pangali jwakukasa malamusi ga m’Baibulo, jwalijose akusosekwa kunda, soni kukamuchisya yalisagwile achakulungwa wosope ŵa mumpingo. Mtima wa kunda ukusalosya kuti “lunda lwakutyochela kwinani” lwaluli “lwamtendele,” soni ‘lwakuweŵa’ lukusatulongolela. (Yak. 3:17, 18) Pangali jwamkulungwa jwakusosekwa kuganisya kuti ali jwakwapunda achimjakwe, soni pangali jwakusosekwa kwalamulila achimjakwe. Achakulungwa ŵa mumpingo pakukamulana mpela gulu kuti mpingo ujendeje chenene, akusaŵa ali mkukamulana yisyesyene ni Yehofa.—1 Akoli., chaputala 12; Akolo. 2:19.

²² Achalume ŵachiklistu ŵakomangale mwausimu akusosekwa kusachililaga kuŵa ŵakulolela. (1 Tim. 3:1) Nambope, mundu jwakusaka kuŵa jwamkulungwa jwa mumpingo akusosekwa kuŵa jwakulimbichila, soni jwakulipeleka ni mtima wosope. Akusosekwa aŵeje jwakoseka ndaŵi jilijose kwakamuchisya abale ni alongo payindu yakusosechela, mpela kwakamuchisya mwausimu. Mundu jwakusachilila kuŵa jwakulolela akusosekwa alinjilileje kwanilisya yakusosechela ya m’Malemba.

²³ Mundu jwaŵele mkutumichila kwa ndaŵi jelewu, mpaka akakombolaga kutumichila mpela jwakulolela, ligongo lya kulwala kapena kulepela kutendasoni yine, mwine ligongo lya uchekulu. Atamose yili myoyo, jwalakwe akusosekwa kumchimbichisya, soni kum’wonaga mpela jwamkulungwa jwa mumpingo naga jwalakwe akupitilisyape kutumichila mpela jwamkulungwa jwa mumpingo. Jwalakwe ngakusosekwa kuleka kutumichilaku ligongo lya yakulepelekasya yeleyi. Tukusosekwa kumchimbichisya mnope mpela mwatukusachimbichisya achakulungwa ŵane wosope ŵakutumichila mwakulimbichila pakuchinga gulu ja ngondolo.

²⁴ Nambo naga m’bale akuliwona kuti mpaka yiŵe chenene kuleka kaje kutumichila mpela jwamkulungwa jwa mumpingo, ligongo lyakuti yindu pa umi wakwe yikumtendekasya kuti akakombolaga kutumichila, jwalakwe komboleka kuleka. (1 Pet. 5:2) Nambope akusosekwa kumchimbichisyaga. Jwalakwe mpaka atendeje yejinji mumpingo, atamose kuti ngakukamulasoni masengo gakusatenda achakulungwa.

²⁵ Achakulungwa akwete maudindo gakulekanganalekangana mumpingo. Pana jwakulondesya masengo ga achakulungwa, mlembi, jwakulolela utumiki, jwakutendesya Lijiganyo lya Sanja ja Mlonda, soni jwakulolela msongano wa Utumiki ni Umi Wetu wa Chiklistu. Achakulungwa ŵajinji, akusatumichila mpela ŵakulolela magulu. Jemanjaji akusatumichila m’maudindoga kwa ndaŵi josope. Nambo naga m’bale jwa udindo atyosile, kapena ngakutumichila pa udindo wakwewo ligongo lya kulwala, kapena ngakukwanilisya yakusosechela ya m’Malemba, jwamkulungwa jwine mpaka asagulidwe kuti asamalileje udindowo. Mipingo jajikwete ŵakulolela ŵamnono, mpaka yiŵe yakusosekwa kuti jwamkulungwa jumo asamalileje udindo wakupunda umo, mpaka abale ŵane ali aŵajilwe kuŵa achakulungwa.

²⁶ Jwakulondesya masengo ga achakulungwa akusaŵa cheyamani pa misongano ja achakulungwa. Jwalakwe akusakamula masengo mwakulinandiya yalumo ni achakulungwa ŵane pakusamalila ngondolo sya Mlungu. (Alo. 12:10; 1 Pet. 5:2, 3) Jwalakwe akusasosekwa kuŵa jwakolosya chenene yindu soni jwakombola kulongolela mwakulimbichila.—Alo. 12:8.

²⁷ Mlembi akusasunga yikalata ya mpingo soni akusiŵamanyisya achakulungwa ya yikalata yakusosekwa mnope. Naga yili yakusosechela, jwamkulungwa jwine kapena jwakutumichila jwakamuchisya jwakuŵajilwa mpaka asagulidwe kuti amkamuchisyeje.

²⁸ Jwakulolela utumiki akusalolela yindu yakwayana ni utumiki wa mumgunda. Jwalakwe akusalinganya yakwendela kagulu ka utumiki kalikose, mwamti mwesi uliwose kumbesi kwa mwesi akusajendela kagulu ka utumiki kamo. M’mipingo jamwana jajikwete tumagulu twa utumiki twamnono, akusakomboleka kwendela kagulu kalikose kaŵili pa chaka. Pakwendela kakuga, jwalakwe akusatendesya msongano wakosechela utumiki wa mumgunda, kwawula yimpepe mu utumiki, soni kwakamuchisya ŵakulalichila ŵakwete maulendo gakuwilisya kapena majiganyo ga Baibulo.

²⁹ Kutumichila mumpingo mpela jwakulolela kagulu uli upile wapajika mnope. Jwakulolela kagulu akwete udindo (1) wakulolela umi wausimu wa jwalijose jwali mu kagulu ka utumiki kakulolelako; (2) wakumkamuchisya jwalijose mu kaguluko kuti ajigaleje nawo mbali mu utumiki wa mumgunda mwakutamilichika; soni (3) wakwakamuchisya ni kwajiganya ŵakutumichila ŵakamuchisya kuti aŵajilwe kola maudindo mumpingo. Achakulungwa wosope ŵa mumpingo akusasagula abale ŵakuŵajilwa ŵampaka akwanilisye mbali syosopesi.

³⁰ Mwakamulana ni masengo gagakusatendekwa mu kagulu, kuli chenene kuti jwakulolela kagulu aŵe jwamkulungwa jwa mumpingo. Jwakutumichila jwakamuchisya jwakuŵajilwa komboleka kulongolelaga kagulu mpaka pachachipatikana jwamkulungwa jwa mumpingo. Jwakutumichila jwakamuchisya jwakulongolela kagulu akusakolanjikwa kuti jwakutumichila kagulu, ligongo jwalakwe nganaŵa jwakulolela mumpingo. Nambo achakulungwa ŵa mumpingo ni ŵakusamlongolelaga pakukamula masengogo.

³¹ Masengo gekulungwa ga jwakulolela kagulu gali kukalongolela kaguluko mu utumiki wa mumgunda. Kulimbichila kwakwe mu utumiki kukusalimbikasya ŵandu ŵa m’kagulu kakwe. Pakuŵa ŵakulalichila akusasangalala ligongo lyakulimbikasyana, soni kamusyangana pakamula masengo pampepe, mpaka yiŵe yakamuchisya kola ndandanda jakwinjilila mu utumiki jajili jambone kwa ŵandu ŵa m’kaguluko. (Luk. 10:1-16) Jwakulolela kagulu akusosekwa kulolechesya kuti kaguluko kana malo gakwanila gakulalichila. Jwalakwe ni jwakusatendesya msongano wakosechela utumiki wa mumgunda, soni ni jwakusagaŵaga ŵakulalichila palisikulyo. Naga ngasimanikwapo, jwalakwe akusosekwa kulinganya yakuti jwamkulungwa jwa mumpingo jwine kapena jwakutumichila jwakamuchisya, kapenasoni jwakulalichila jwakuŵajilwa alongolele ŵakulalichila mu utumiki.

³² Jwakulolela kagulu akusosekwa kosechela mkanipaŵe kwendela kwa jwakulolela utumiki, soni kwamanyisya ŵa m’kagulu kakweko kuti ajembecheye mwachidwi kwa jwakulolela utumikijo. Naga wosope m’kaguluko akumanyilila yeleyi akusaŵa ŵakusachilila kusimanikwapo.

³³ Kagulu ka utumiki akusakapanganya kuti kaŵe kamwana pa magongo gakuŵajilwa. Yeleyi yikusamkamuchisya jwakulolela kaguluko kwamanyilila chenene ŵandu wosope ŵa m’kaguluko. Jwalakwe mpela mkuchinga jwachinonyelo, akusakola chidwi ni jwalijose. Jwalakwe akusamkamuchisya soni kumlimbikasya jwalijose kulalichila, soni kusimanikwa pamisongano jampingo. Akusatendasoni yiliyose yampaka akombole pakusaka kumkamuchisya jwalijose kuti aŵe jwakulimbangana mwausimu. Jwalakwe akusajendela ŵakulwala, soni ŵakulagasika nganisyo kuti akalimbikasye. Maloŵe gakwe gakulimbikasya mpaka gamtendekasye jwine kusachilila kola utumiki wine mumpingo, yampaka yakamuchisye wosope mumpingomo. Jwakulolela kagulu ka utumiki akusosekwa kwakamuchisya mnopemnope ŵandu ŵa m’kagulu kakwe. Nambope jwalakwe mpela jwakulolela soni mkuchinga jwachinonyelo akusakola chidwi ni ŵandu wosope mumpingo, soni akusaŵa jwakoseka kumkamuchisya jwalijose.—Mase. 20:17, 28.

³⁴ Masengo gane ga jwakulolela kagulu, gali kulokotela malipoti ga utumiki kwa ŵandu ŵa m’kagulu kakwe. Jwalakwe akusapeleka malipotiga kwa mlembi. Jwakulalichila jwalijose mpaka amkamuchisye jwakulolela kagulu naga akupeleka malipoti gakwe mwachitema. Pambesi pa mwesi uliwose, jwakulalichila jwalijose mpaka apeleche malipoti gakwe kwa jwakulolela kagulu, kapena kugaŵika mu libokosi lya malipoti ku Nyumba ja Uchimwene.

³⁵ Pana masengo gane gakusatendaga ŵa mu Komiti ja Utumiki ja Mpingo. Mu komitiji mukusaŵa jwakulondesya masengo ga achakulungwa, mlembi, soni jwakulolela utumiki. Mwachhisyasyo, komitiji jikusajitichisya kuti Nyumba ja Uchimwene aŵechetelemo ngani ja ulombela kapena ja malilo, soni jikusagaŵaga ŵakulalichila m’tumagulu twa utumiki. Komitiji jikusajichitisyasoni ŵakusaka kutenda upayiniya wakutamilichika, upainiya wakamuchisya kapena ŵakusaka kutenda mautumiki gane. Komitiji jikusakamula masengo mwakulongoleledwa ni achakulungwa wosope ŵa mumpingo.

³⁶ Masengo ga abale ŵa m’komitiji, soni ga jwakutendesya Lijiganyo lya Sanja ja Mlonda, jwakulolela Msongano wa Utumiki ni Umi wa Chiklistu, soni ŵane wosope ŵali mu likuga lya achakulungwa akusagasala mu yikalata yakutyochela ku ofesi ja nyambi.

³⁷ Ndaŵi sine pachaka, achakulungwa wosope mumpingo uliwose akusachingangana kuti akambilane yindu yampaka yikamuchisye kuti mpingo ujawuleje pasogolo mwausimu. Jemanjaji akusasosekwa kuchinganganasoni pali papite miyesi jitatu chiyichile jwakulolela dela. Nambope, achakulungwa mpaka achinganganeje pandaŵi jilijose naga pana kusosekwa kweleko.

³⁸ Yili yisyene kuti ŵakulolela ali ŵandu ŵangali umlama, nambo wosope tukusosekwa kwapikanila ligongo Yehofa ni juŵalingenye kuti jemanjaji atuloleleje. Jwalakwe chachajimba magambo pa yitendo yawo. Jemanjaji akusajimila Yehofa, soni ulamusi wakwe. Pa Ahebeli 13:17 pakusati, “Mwapikanileje ŵakumlamula [“ŵakulolela,” NWT] ŵenu ni kutenda yakumlamula. Jemanjajo ŵangapumulila kose kulolela umi wenu, pakuti akwenela kusala yamasengo gawo pameso pa Mlungu. Naga mkwapikanila, jemanjajo, tachikamula masengo mwakusangalala, ngaŵa mwakutumbila, ligongo naga ngatenda yeleyo nikuti jemanja ngasiyimkamuchisya kose.” Yehofa akusakamulichisya masengo msimu wakwe pakum’ŵika jwamkulungwa mumpingo. Myoyo, jwalakwe chachikamulichisya masengo msimu uwowo pakumtyosya mundujo pa udindowo naga ngakulosya ndamo syawukusakoposya msimu, soni naga umi wakwe ngawukukamulanasoni ni yakusosechela ya m’Malemba.

³⁹ Ana tukusayamichila ni mtima wosope masengo soni chisyasyo chambone chakusalosya achakulungwa ŵa mumpingo? Paŵawulembelaga chikalata mpingo wa ku Tesalonika, Paulo ŵalimbikasisye Aklistuwo kuti, “Tukumŵenda achalongo achimjetu, kuti mwachimbichisyeje ŵele ŵakukamula masengo pasikati penu, ŵele ŵakumlongolela ni kumsalila yakwenela kutenda mu ndamo sya Chiklistu. Mwachimbichisyeje mnope ni chinonyelo ligongo lya masengo gawo.” (1 Ates. 5:12, 13) Masengo gakusakamula jemanjaji gakusatendekasya kuti tutumichileje Mlungu mwangasawusya soni mwakusangalala. M’chikalata chakwe chandanda chiŵamlembelaga Timoteyo, Paulo ŵasasilesoni nganisyo syakusosekwa kola ŵandu mumpingo pakwamba ya achakulungwa. Jwalakwe ŵatite, “Achakulungwa ŵa mpingo ŵakuwulongolela chenene mpingo, aŵe ŵakwenela kupochela uchimbichimbi, mnopemnope ŵakusakamula masengo gakulalichila ni kwiganya maloŵe ga Mlungu.”—1 Tim. 5:17.

⁴⁰ Ndaŵi sine, achakulungwa ŵane mpaka ŵasagule kuti atumichileje m’Magulu Gakusonda Ŵakulwala. Ŵane akusatumichila mu Makomiti Gakuŵechetana ni Ŵachipatala. Jemanjaji akusajendela m’yipatala soni madokotala pakusaka kulimbikasya kuti Mboni sya Yehofa sipocheleje chikamuchisyo cha mtela changakamulichisya masengo miyasi. Achakulungwa ŵa mumpingo ŵane akusajawusya pasogolo masengo ga Uchimwene pakukamuchisya nawo masengo gakutaŵa soni kulinganya Nyumba sya Uchimwene ni Malo ga Msongano, kapena kutumichila mu Makomiti ga Msongano. Gulu josope jikusayamichila kulimbichila kwa jemanjaji, soni kulipeleka kwawo mwakusachilila kutenda masengoga. Myoyo, tukusosekwa ‘twachimbichisyeje ŵandu ŵamti m’yiyiŵa.’—Afi. 2:29.

⁴¹ Likuga Lyakulongolela likusalinganya yakuti achakulungwa ŵa mumpingo ŵakuŵajilwa asagulidwe kuti aŵe ŵakulolela madela. Ofesi ja nyambi ni jajikusasagula achakulungwaŵa kuti ajendeleje mipingo jajikusapanganya dela. Jemanjaji ndaŵi syejinji akusajendela mipingo kaŵili pachaka. Ndaŵi sine jemanjaji akusajendelasoni apayiniya ŵakutumichila m’madela gakwakutalichila. Akusakosechela maulendo gawo ni kuwumanyisya mpingo uliwose mkanipaŵe pakusaka kuti ulendo wawowo chiwuŵe wakamuchisya mnope.

⁴² Jwakulondesya masengo ga achakulungwa ni jwakusalongolela kulinganya yindu kuti ulendo wa jwakulolela delajo chiwulimbikasye wosope mwausimu. (Alo. 1:11, 12) Papochele chikalata chakwamanyisya ya kwika kwakwe, soni yindu yine yampaka ayisache jwakulolela delajo yalumo ni ŵamkwakwe (naga ali jwamlombele), jwakulondesya masengo ga achakulungwa kupitila mwa abale akusalinganya yakuti ŵapatile pagona, nambosoni yindu yine yakusosekwa. Akusalolechesya kuti ŵamanyisye yalinganyisyeyi wosope mumpingomo, soni jwakulolela dela.

⁴³ Jwakulolela dela akusamwusya jwakulondesya masengo ga achakulungwa yakwamba masiku ni ndaŵi ja misongano ja mpingo, soni ja utumiki wa mumgunda. Yeleyi yikusosekwa kuti alinganye mwakamulana ni yachasale jwakulolela dela soni malangiso gakutyochhela ku ofesi ja nyambi. Wosope akusosekwa kumanyilila mkanipaŵe ya ndaŵi soni malo ga misongano jampingo, msongano wa apayiniya, soni wa achakulungwa ŵa mumpingo ni ŵakutumichila ŵakamuchisya, nambosoni ndaŵi ni malo ga misongano jakosochela utumiki wa mumgunda.

⁴⁴ Lyaŵili musi, jwakulolela dela akusalola makadi gakulembapo Masengo ga Jwakulalichila jwa Mumpingo, chiŵalanjilo cha ŵakusongana, madela gakulalichila, soni yipepala yakuŵalanjila mbiya sya pampingo. Yeleyi yikusamkamuchisya jwalakwe kumanyilila yakusosekwa ya mumpingo, soni mwampaka ŵakamuchisye ŵakusasamalila yinduyi. Jwakulondesya masengo ga achakulungwa akusosekwa kulinganya yakuti jwakulolela dela apochele yinduyi mkanipaŵe.

⁴⁵ Pakwendela mpingo, jwakulolela dela naga yili yakomboleka akusapataga lipesa lyakuŵecheta ni Mklistu jwalijose, chinga pamisongano, mu utumiki, pandaŵi ja chakulya, kapena ndaŵi jine jilijose. Konjechesya pelepa jwalakwe akusachingangana ni achakulungwa ŵa mumpingo, soni ŵakutumichila ŵakamuchisya. Akusiŵakamuchisya jemanjaji mwa Malemba, soni kwalimbikasya kuti akamuleje masengo gawo gakuchinga gulu ja ngondolo jajili m’miyala mwawo. (Mis. 27:23; Mase. 20:26-32; 1 Tim. 4:11-16) Akusachinganganasoni ni apayiniya ni kwalimbikasya pamasengo gawo, soni akusamkamuchisya jwalijose pa yakusawusya yakusimana nayo mu utumiki.

⁴⁶ Naga pana ngani sine syakusosekwa chikamuchisyo, jwakulolela dela chachitenda yiliyose yampaka akombole kuti akamuchisye pa wiki jakwendela mpingowo. Naga nganiji nganijimala pa wikiji, jwalakwe mpaka ŵakamuchisye achakulungwawo soni ŵandu ŵajikwakwaya nganiji kuwungunya chikamuchisyo cha m’Malemba champaka chakamuchisye. Naga pakusosekwa kujimanyisya ofesi ja nyambi ya nganiji, jwalakwe yimpepe ni achakulungwa chachilemba chikalata chakusala chenene ya nganijo.

⁴⁷ Pakwendela mipingo, jwakulolela dela akusasimanikwa pamisongano josope ja mpingo. Masiku soni ndaŵi ja misonganoji komboleka kuchenga mwakamulana ni yasasile ku ofesi ja nyambi. Jwalakwe chachiŵecheta ngani syakwiganya, soni syakulimbikasya mpingo. Jwalakwe akusalingalinga kuwulimbikasya mpingo kuti unonyeleje Yehofa, Yesu Klistu, soni gulu.

⁴⁸ Chakulinga cha kwika kwa jwakulolela dela pa mpingo chili kwalimbikasya, soni kwakamuchisya wosope kuti alalichileje mwakulimbichila. Ŵandu ŵajinji mumpingomo mpaka achenje katende ka yindu yawo kuti apate lipesa lyakwanila lyakwinjila nawo mu utumiki wiki jelejo. Mwambone, ŵane mpaka alinganye yakutenda upayiniya wakamuchisya m’mwesi wachayiche jwakulolela delajo. Ŵane ŵampaka asache kulalichila ni jwakulolela delajo kapena ŵamkwakwe mpaka alembesye. Jwakulolela delajo kapena ŵamkwakwe mpaka ŵakamuchisye mnope naga akwawula nawo ku majiganyo gawo ga Baibulo kapena ku maulendo gakuwilisya. Kulimbichila kwakusalosya pakujigala nawo mbali mwakwanila ali ayiche jwakulolela dela kukusayamichilidwa mnope.—Mis. 27:17.

⁴⁹ Chaka chilichose, dela jilijose jikusakola misongano ja dela jiŵili. Jwakulolela dela ni jwakusalolela kajendesye kosope ka misonganoji soni ni jwakusaŵika jwakulolela msongano. Jemanjaji akusasosekwa kamula masengo ni jwakulolela dela pakulinganya ya msongano. Yeleyi yichimkamuchisya jwakulolela delajo kuŵika nganisyo syakwe syosope pa pologalamu ja msongano. Jwakulolela dela akusasagulasoni abale ŵane ŵakuŵajilwa kuti asamalileje madipatimenti gakulekanganalekangana. Panyuma pa msongano uliwose, jwakulolela dela akusalinganya ya kuŵalanjila mbiya sya dela. Pa msongano wa dela umo pakusayika jwakwimila nyambi jwakusaŵechetasoni ngani. Ligongo lya kutalichila kwa malo gakutendela msongano kapena unandi wa malogo, madela gane akusakomboleka kugagaŵa ni kola msongano wa dela mbali jilijose.

⁵⁰ Jwakulolela dela akusapeleka jika lipoti lyakwe lya mu utumiki wa mumgunda ku ofesi ja nyambi kumbesi kwa mwesi uliwose. Ofesi ja nyambi jikusawusya mbiya syakamulichisye masengo pakwendela, kusuma yakulya, kulipila malo gagona soni yindu yine yakusosekwa naga mpingo wajendelejewo nganiwukombola kumsamalila. Ŵakulolela madela akusakulupilila kuti naga akuŵika pasogolo Uchimwene wa Mlungu, tachipata yindu yakusosechela, mpela muŵaŵechetele Yesu. (Luk. 12:31) Ŵandu m’mipingo akusosekwa kuwuwona kuti uli upile kwapochela ni makono gaŵili achakulungwa ŵakusiŵatumichila mwakulimbichila.—3 Yoh. 5-8.

⁵¹ Ofesi ja nyambi jilijose ja Mboni sya Yehofa jikusakola achalume ŵakomangale mwausimu ŵatatu kapena kupunda, ŵakusatumichila mpela Komiti ja Nyambi. Jemanjaji akusalolela masengo gakulalichila ga m’chilambo chawo kapena m’yilambo yayili pasi pa nyambijo. Jumo jwa jemanjaji akusaŵa jwakulondesya masengo ga Komiti ja Nyambi.

⁵² Ŵa mu Komiti ja Nyambi akusasamalila ngani sya m’mipingo jajili pasi pa nyambi jawo. Komitiji jikusalolela masengo gakulalichila ngani syambone sya Uchimwene mu dela ja nyambijo. Jikusalolechesyasoni kuti mipingo ni madela gapali kuti yakusosekwa ya mu dela ja nyambijo ayisamalileje chenene. Komiti ja Nyambi jikusalolela masengo ga amishonale, apayiniya ŵapajika, ŵakutamilichika, soni ŵakamuchisya. Pa ndaŵi ja misongano ja dela soni ja chigawo, Komitiji jikusalinganya yindu yakusosekwa, soni kusagula ŵachakatendesye misonganoji kuti “yindu yosope yitendekwe mwakulongosoka.”—1 Akoli. 14:40.

⁵³ M’yilambo yine akusasagula Komiti Jachilambo jajikusaŵa pasi pa Komiti ja Nyambi ja m’chilambo chine. Yeleyi yikusakamuchisya kuti Komiti Jachilambo jiloleleje chenene masengo ga m’chilambo chawo. Jemanjaji akusasamalila yindu yakwayana ni liŵasa lya Beteli ni maofesi, akusalemba soni kupochela yikalata, kusamalila malipoti, nambosoni akusalolela masengo gakulalichila. Komiti Jachilambo jikusakamula masengo mwakamulana mnope ni Komiti ja Nyambi pakwawusya pasogolo yindu ya Uchimwene.

⁵⁴ Likuga lyakulongolela ni lyalikusaŵika ŵandu ŵakusatumichila m’Komiti ja Nyambi soni m’Komiti ja Chilambo.

⁵⁵ Ndaŵi ni ndaŵi, Likuga lyakulongolela likusatumisya abale ŵakuŵajilwa kuti ajendele maofesi ga nyambi pachilambo chosope. M’bale jwakusatumichila pa udindowu akusakolanjidwa kuti, jwakwimila likulu. Masengo gakwe gekulungwa gali kulimbikasya liŵasa lya Beteli soni kwakamuchisya ŵa m’Komiti ja Nyambi naga pana yakusawusya soni yiwusyo yakwayana ni masengo gakulalichila. Jwakwimila likuluju akusachinganganasoni ni ŵane mwa ŵakulolela madela soni ndaŵi sine amishonale. Jwalakwe akusakambilana yakusawusya yakusimana nayo soni yakusosechela. Akusiŵalimbikasyasoni pa masengo gawo gakusosekwa mnope gakulalichila ya Uchimwene soni kwiganya ŵandu.

⁵⁶ Jwakwimila likuluju akusakola chidwi ni masengo gakulalichila ya Uchimwene soni yakutendekwa ya mipingo ja m’chilambocho. Naga akwete ndaŵi jakwanila, jwalakwe akusajendelasoni maofesi gagopolela mabuku gagali m’madela gakutali. Jwalakwe pakwendela nyambi, akusatenda yakomboleka kuti atende nawo masengo gakulalichila ya Uchimwene.

⁵⁷ Kusala yisyene tukusasangalala ni masengo gakutusamalila mwachinonyelo gakusatenda achakulungwa ŵakomangaleŵa. Patukupitilisya kwapikanila wosope ŵasagulidwe kuti asiloleleje gondolo sya Mlungu soni kusichinga, tukusaŵa tuli mkukamulana ni Mtwe wa mpingo, Klistu Yesu. (1 Akoli. 16:15-18; Aef. 1:22, 23) Yakuyichisya yakwe yikusaŵa yakuti, Msimu wa Mlungu ukusakamula chenene masengo m’mipingo pachilambo chosope chapasi, soni Maloŵe ga Mlungu gakusakamuchisya kuti masengoga gajendeje chenene pachilambo chosope.—Sal. 119:105.