LIJIGANYO 51
Ana Mpaka Atende Yamtuli Kuti Yakusaŵecheta Yimsangalasyeje Yehofa?
Yehofa jwatupanganyisye mu litala lyakuti tukomboleje kuŵecheta. Nambo ana yatukusaŵecheta, yikumsakwayaga jwalakwe? Elo. (Aŵalanje Yakobo 1:26.) Sano ana mpaka tutende yamtuli kuti tumsangalasyeje Yehofa kupitila mukaŵechete ketu?
1. Ana mpaka tutende yamtuli kuti yakuŵecheta yetu yiŵeje yambone?
Baibulo jikusatusalila kuti ‘Tulimbisyaneje mtima ni kamuchisyana jwine ni mjakwe.’ (1 Atesalonika 5:11) Ana pana mundu jwakumganichisya jwampaka amlimbikasye? Akusosekwa kumsimichisya kuti ali jwakusosekwa mnope. Komboleka kumyamichila pa yindu yakusatenda chenene. Ana pana lilemba lyakuliganichisya lyampaka limlimbikasye mundu jwine? Pana malemba gejinji gampaka akamulichisye masengo. Nambo akusosekwa kumbuchilasoni kuti mundu mpaka amlimbikasye ni yakuti kaŵechete. Myoyo ndaŵi syosope alinjeje kuŵecheta mwakwaganichisya ŵane soni mwakuwusimana mtima.—Misyungu 15:1.
2. Ana tukusosekwa kuŵambala kuŵecheta yamtuli?
Baibulo jikusasala kuti: “Mkamwa mwenu mukasimukopoka maloŵe galigose gakusakala.” (Aŵalanje Aefeso 4:29.) Yeleyi yikugopolela kuti tukusosekwa kuŵambala kuŵecheta maloŵe gachipongwe kapena kuŵecheta yindu yakumjalusya mundu jwine. Tukusosekwasoni kuŵambala miseche kapena kuti kwasogoda ŵane. Tuŵambalejesoni kuŵecheta yindu yakwajonanjila ŵane mbili jawo.—Aŵalanje Misyungu 16:28.
3. Ana ni chichi champaka chitukamuchisye kuti tuŵecheteje yakwalimbikasya ŵane?
Ndaŵi syejinji yatukusaŵecheta yikusalosya yayili mu mtima mwetu kapena yatukusaganisya. (Luka 6:45) Myoyo tukusosekwa kulijiganya kuganisyaga yindu yambone. Yindu yakwe yili yakulungama, yayiswela, yakunonyelesya soni ya uchimbichimbi. (Afilipi 4:8) Kuti yeleyi yikomboleche tukusosekwa kusagulaga mwalunda yakusangalasya soni achimjetu. (Misyungu 13:20) Yikusaŵa yakamuchisyasoni kuti mkanituŵechete tuganichisyeje kaje. Tuganichisyejesoni muchiyakwayiye ŵane yatukusaka kuŵechetayo. Baibulo jikusati: “Mundu jwakusaŵecheta mwangasamalila, maloŵe [gakwe] gakusasoma mpela upanga, nambo maloŵe ga mundu jwalunda gakusaposya mitima ja ŵandu ŵane.”—Misyungu 12:18.
KULIJIGANYA YEJINJI
Chitulijiganye yampaka tutende kuti tuŵecheteje yakumsangalasya Yehofa soni yakwalimbikasya ŵane.
4. Asamaleje ni yakusaŵecheta
Wosopewe ndaŵi sine tukusaligamba pa yindu yatuŵechete. (Yakobo 3:2) Aŵalanje Agalatiya 5:22, 23, kaneko akambilane yiwusyo ayi:
Pakusaka kuti aŵeje ŵakusamala pakaŵechete, ana ni ndamo syapi sya palilembali syampaka amŵende Yehofa? Ana ndamosi mpaka syakamuchisye chamtuli?
Aŵalanje 1 Akolinto 15:33, kaneko akambilane chiwusyo achi:
Ana achimjetu soni yakusangalasya yatukusasagula mpaka yikwaye chamtuli kaŵechete ketu?
Ana ni chichi champaka chitutendekasye kuti tuŵecheteje yambone kapena yakusakala?
Aŵalanje Jwakulalichila 3:1, 7, kaneko akambilane chiwusyo achi:
Ana ni ndaŵi japi jatukusosekwa kuŵa jii kapena kwembecheya kuti tuŵechete pandaŵi jakuŵajilwa?
5. Aŵecheteje yindu yambone ya ŵane
Ana mpaka tuŵambale chamtuli kuŵecheta yakupweteka kapena mwangaganichisya ŵane? Alolele FIDIYO, kaneko akambilane yiwusyo ayi.
Mu fidiyoji, ligongo chichi m’baleju jwasosekwaga kuchenga mwakusaŵechetela yakwamba ŵane?
Ana jwatesile yamtuli kuti achenje?
Aŵalanje Jwakulalichila 7:16, kaneko akambilane chiwusyo achi:
Ana tukusosekwa kukumbuchila chichi patukusaka kuŵecheta yindu yampaka yisakasye mbili ja ŵane?
Aŵalanje Jwakulalichila 7:21, 22, kaneko akambilane chiwusyo achi:
Naga jwine ŵaŵechetaga wawojo, ana mavesiga mpaka gakamuchisye chamtuli kuti akatenda yindu mwakupundanganya?
6. Aŵecheteje mwakwaganichisya ŵamwiŵasa mwawo
Yehofa akusasaka kuti tuŵecheteje ni ŵamwiŵasa mwetu mwakwaganichisya soni mwachinonyelo. Alolele FIDIYO, kaneko akambilane chiwusyo achi.
Ana ni chichi champaka chakamuchisye kuti aŵecheteje mwakwaganichisya ŵamwiŵasa mwawo?
Aŵalanje Aefeso 4:31, 32, kaneko akambilane chiwusyo achi:
Ana ni kaŵechete kamtuli kampaka kalimbisye liŵasa?
Yehofa jwalosisye kuti jwanonyelaga Mwanache jwakwe jwali Yesu. Aŵalanje Mateyu 17:5, kaneko akambilane chiwusyo achi:
Ana mpaka amsyasye chamtuli Yehofa pakuŵechetana ni ŵamwiŵasa mwawo?
Apateje matala gakwalimbikasya ŵane
YAKUSAŴECHETA ŴANDU ŴANE: “Ngusaŵecheta chilichose changanichisye. Yangali kandu muchapikanile ŵane.”
Ana wawojo akukamulana nayo yeleyi? Ligongo chichi?
YALIJIGANYISYE
Maloŵe gakwete machili. Myoyo tukusosekwa kuganichisya yachituŵechete, ndaŵi jakuŵechetela soni mwatuŵechetele.
Yiwusyo Yakuwilisya
Ana mpaka aŵechete yakwalimbikasya ŵane m’matala gapi?
Ana akusosekwa kuŵambala kuŵecheta yamtuli?
Ana chichi champaka chitukamuchisye kuti ndaŵi syosope tuŵecheteje mwakwaganichisya ŵane?
YAKULINGA YINESONI
Ana ni chichi champaka chitukamuchisye kuti tuŵecheteje yakulimbikasya?
Alijiganye yampaka atende kuti aŵambaleje kuŵecheta maloŵe gakusakala.
“Ana Yisyene Kuti Kutukana Kuli Kwakusakala?” (Ngani ja pa intaneti)
Alole yampaka atende kuti aŵambale kuŵecheta miseche.
Alole yaŵatesile Yehofa pakumkamuchisya jwamlume jwine juŵalagaga kuti aleche kuŵecheta yachipongwe.
“Natandite Kuganichisya Mnope ya Umi Wangu” (Sanja ja Mlonda, Ogasiti 1, 2013)