LIJIGANYO 28

Alosyeje Kuyamichila Yaŵatendele Yehofa Soni Yesu

Printed Edition

Ana akusapikana uli naga mjawo ŵapele mtuka wambone mnope? Kusala yisyene akusasangalala mnope soni akusalosya kuti ayamichile mtuka wapochelewo. Yehofa soni Yesu atupele mtuka wambone mnope kupunda mituka jatuŵele tuli mkupochela. Mtuka wakwe uli mbopesi jakutuwombola. Nambo ana mpaka tulosye chamtuli kuti tukuwuyamichila mtukawu?

1. Ana mpaka tulosye chamtuli kuyamichila yindu yaŵatutendele Mlungu soni Klistu?

Baibulo jikusasala kuti, “jwalijose jwakulupilila mwa [Yesu]” chachitama mpaka kalakala. (Yohane 3:16) Ana kumkulupilila Yesu kukusagopolelaga chichi? Kumkulupilila Yesu kukusapwatikapo yindu yejinji, ngaŵaga kwamba kumkulupililape. Tukusalosya kuti tukwete chikulupi pakujigalila ni mwatukusasagulila yindu soni yitendo yetu. (Yakobo 2:17) Naga yatukusatenda soni kusagula yikukamulana ni chikulupi chetu, tuchiŵa paunasi wambone ni Yesu soni Atati ŵakwe ŵali Yehofa.—Aŵalanje Yohane 14:21.

2. Ana ni chakutendekwa chapi champaka tulosye kuyamichila yaŵatutendele Yehofa soni Yesu?

Lisiku line ligulo, Yesu ŵasalile ŵakumkuya ŵakwe litala linesoni lyampaka alosye kuyamichila mbopesi jakwe. Jwalakwe ŵasalile kuti asonganeje pampepe kuti atendeje mwambo wakusosekwa mnope. M’Baibulo, chakutendekwachi chikusamanyika kuti, “Chakulya [“Chakulya Chaligulo,” NWT] cha Ambuje.” Chikusamanyikasoni kuti Chikumbuchilo cha Chiwa cha Klistu. (1 Akolinto 11:20) Yesu paŵatandisyaga chakutendekwachi, ŵasakaga kuti ŵakumkuya ŵakwe soni Aklistu ŵasyesyene akumbuchileje chiwa chakwe. Pakwamba ya chakutendekwachi, Yesu jwalamwile kuti, “Mtendeje yeleyi kuti mungumbuchileje.” (Luka 22:19) Pakusimanikwa pa chikumbuchilo, akusalosya kuti akusayamichila yindu yaŵatutendele Yehofa soni Yesu.

KULIJIGANYA YEJINJI

Alijiganye matala ganesoni gampaka alosye kuti akusayamichila chinonyelo chiŵatulosisye Yehofa soni Yesu. Alijiganyesoni kusosekwa kwa Chikumbuchilo cha Chiwa cha Yesu.

3. Ana mpaka tulosye chamtuli kuti tukusayamichila?

Awanichisye kuti jwine jwakwe ŵakulupwisye wawojo paŵatiŵilaga m’mesi. Ana mpaka aliŵalile yaŵatendele munduju? Ana ngasapata matala gakuyamichila yatesile munduju?

Tukwete upile wakupata umi wangamala ligongo lya umbone mtima wa Yehofa. Aŵalanje 1 Yohane 4:8-10, kaneko akambilane yiwusyo ayi:

Ana ligongo chichi mbopesi ja Yesu jili mtuka wakusosekwa mnope?
Ana akupikana uli mumtima pamanyilile yiŵatendele Yehofa soni Yesu?

Ana mpaka tulosye chamtuli kuyamichila yiŵatutendele Yehofa soni Yesu? Aŵalanje 2 Akolinto 5:15 soni 1 Yohane 4:11; 5:3. Paŵalasile lilemba lililyose akambilane chiwusyo achi:

Mwakamulana ni lilembali, ana mpaka tulosye chamtuli kuyamichila?

4. Tumsyasyeje Yesu

Litala line lyampaka tulosye kuti tukusamyamichila Yesu lili kumsyasya jwalakwe. Aŵalanje 1 Petulo 2:21, kaneko akambilane chiwusyo achi:

Ana mpaka tutende yamtuli pakuya sajo sya Yesu?

Yesu akuŵalanga Maloŵe ga Mlungu. — Yesu jwaganonyelaga Maloŵe ga Mlungu, jwalalichilaga ngani syambone soni jwakamuchisyaga ŵane

Yesu akuŵecheta kwa jwamkongwe jwa Chisamaliya pachisima. — Yesu jwaganonyelaga Maloŵe ga Mlungu, jwalalichilaga ngani syambone soni jwakamuchisyaga ŵane

5. Asimanikweje pa Chikumbuchilo cha Chiwa cha Klistu

Kuti amanyilile yayatendekwe Yesu paŵatandisyaga mwambo wa Chakulya Chaligulo cha Ambuje, aŵalanje Luka 22:14, 19, 20. Kaneko akambilane yiwusyo ayi:

Ana pa Chakulya Chaligulo cha Ambuje patendekwe yamtuli?
Ana mkate soni finyo yikusajimilaga chichi?—Alole mavesi 19 soni 20.

Chakulinga cha Yesu chaliji chakuti ŵakulijiganya ŵakwe akumbuchileje chiwa chakwe kamo pachaka. Ni ligongo lyakwe pakuya yaŵalamwile Yesu, ŵa Mboni sya Yehofa akusasongana pampepe chaka chilichose pakumbuchila chiwa chakwe. Kuti amanyilile yejinji yakwamba msongano wakusosekwawu, alolele FIDIYO. Kaneko akambilane chiwusyo achi.

FIDIYO: Akumbuchileje Chiwa cha Yesu (1:41)

Kambali ka fidiyo ‘Akumbuchileje Chiwa cha Yesu.’ Mboni sya Yehofa sisongene pakumbuchila Chakulya Chaligulo cha Ambuje.

Ana pa Chikumbuchilo pakusatendekwa yamtuli?

Mbale ja mkate wangali chakusasaŵilisya soni kapu ja finyo.

Mkate ukusajimilaga chilu cha mlama chiŵapeleche Yesu mmalo mwetu. Finyo jikusajimilaga miyasi jakwe

Ŵandu akupegana finyo pa Chakulya Chaligulo cha Ambuje.

YAKUSAŴECHETA ŴANDU ŴANE: “Nampochele Yesu kuŵa Ambuje ni Mkulupusyo jwangu, myoyo pangali chinesoni champaka ndende.”

Ana mpaka akamulichisye chamtuli lilemba lya Yohane 3:16 soni Yakobo 2:17 pakulosya kuti kwamba kumpochelape Yesu ngaŵa kwakwanila?

YALIJIGANYISYE

Tukusayamichila yaŵatutendele Yesu patukumkulupilila jwalakwe soni patukusimanikwa pa Chikumbuchilo cha chiwa chakwe.

Yiwusyo Yakuwilisya

Ana kumkulupilila Yesu kukusagopolelaga chichi?
Ana wawojo mpaka alosye chamtuli kuti akusayamichila yiŵatendele Yehofa soni Yesu?
Ana kusimanikwa pa mwambo wakumbuchila chiwa cha Yesu kuli kwakusosekwa ligongo chichi?

Tumalisisye kulijiganya pa:

Akole Chakulinga Achi

Asimanikwe pa mwambo wakuyichisya wakumbuchila chiwa cha Yesu. Amwusye jwakwajinganya Baibulo ya lisiku lyawuchitendekwa mwambowu soni alembe chimanyisyo pa kalendala jawo kuti akumbuchileje.

Yakulinga yine:

Your other goal

YAKULINGA YINESONI

Ana chiwa cha Yesu chikusatulimbikasya kutenda chichi?

Ŵam’chimbichisye Yehofa ni Chilu Chakwe (9:28)

Alijiganye yejinji yakwamba chikulupi soni yampaka atende kuti amkulupilileje Yehofa.

“Alosyeje Cikulupi pa Yaŵalagucisye Yehofa” (Sanja ja Mlonda, Okotoba 2016)

Mungani jakuti “Nguyiwona Kuti Ndili Jwamswela Soni Ngwete Umi Wakusangalala,” aŵalanje yajatite kumkamuchisya jwamkongwe jwine mbopesi ja Yesu.

“Baibulo Jikusachenga Umi” (Sanja ja Mlonda, Ogasiti 1, 2011)

Amanyilile ligongo lyakwe ŵandu ŵamnono ni ŵakusalyaga mkate soni kumwa finyo.

“Ligongo Chichi ŵa Mboni sya Yehofa Akusakumbuchila Chakulya Chaligulo cha Ambuje Mwakulekangana ni ma Dini Gane?” (Ngani ja pa intaneti)