“Mŵeje Ŵaganisya Chenene, Soni Mŵeje Mesope”

 1. Ana Yesu jwasalile yamtuli ŵakulijiganya ŵakwe pakwamba ya masiku gambesi? Ana kaneko jwakalamwisye ya chichi?

KULI kusigele masiku gamnono kuti Yesu awulajidwe, mcheche mwa ŵakulijiganya ŵakwe ŵamwusisye kuti, “Ana chimanyisyo . . . cha kumala kwa ndaŵi ajino chichiŵa chichi?” (Mat. 24:3) Ŵakulijiganyaŵa ŵasakaga kumanyilila ndaŵi jele Yelusalemu ni nyumba jakwe jakulambilila yichiŵa yili yisigele panandi konanjidwa. Nambo pakwanga, Yesu nganagamba kusala ya konanjidwa kwa Yelusalemu ni nyumba jakwe jakulambilila, nambo jwasasilesoni yakwamba “kumala kwa ndaŵi” jajili ndaŵi jatukutama apanoji. Myoyo pakwamba ya kumanyilila ndaŵi jeleji, Yesu jwatite, “Pakwamba ya lisikulyo kapena ndaŵi jakwe pangali jwakumanyilila, chinga malayika gakwinani kapena Mwanache, nambo Atati.” Kaneko jwalakwe ŵakalamwisye ŵakumkuya ŵakwe kuti ‘aŵeje mesope.’—Maliko 13:32-37.

 2. Ligongo chichi kuŵa mesope kwaliji kwakukososekwa mnope kwa ŵandu ŵaŵajembecheyaga konanjidwa kwa Yelusalemu ni nyumba jakwe jakulambilila?

² Kuti Aklistu ŵa Chiyuda ŵa m’yaka 100 yandanda chakulupuche, ŵasosekwaga kuŵa mesope. Mwamti Yesu ŵasalile ŵakumkuya ŵakwe yindu yayichakamuchisya kumanyilila kuti Yelusalemu soni nyumba jakulambilila yisigele panandi konanjidwa. Jwalakwe jwatite, “Pachimchawona asilikali ali asyungulile msinda wa Yelusalemu, chimmanyilile kuti msindawo usigele panandi konanjidwa.” Myoyo yaliji yakuti pachachigamba kuyiwona yeleyi yili mkutendekwa, chakumbuchile maloŵe ga Yesu ni ‘kutanda kutilila ku matumbi.’ (Luk. 21:20, 21) Ŵandu ŵaŵapikanile maloŵe ga Yesuga ŵakulupwiche pandaŵi jele Asilikali ŵa Chiloma ŵajonangaga msinda wa Yelusalemu.

 3. Ana chitukambilane chichi munganiji?

³ Masiku agano tukutama kumbesi kwa chilambo chakusakalachi. Myoyo, m’wejisoni tukusosekwa kuŵa ŵaganisya chenene soni kuŵa mesope. Munganiji, chitukambilane yampaka tutende kuti tupitilisye kuŵa mesope pa yakutendekwa ya m’chilambochi. Chitulolesoni yampaka tutende kuti tuŵeje ŵakusamala nambosoni yampaka tutende kuti tukamulichisyeje masengo mwalunda ndaŵi jajisigeleji.

 4. Ligongo chichi tukusasosekwa kutenda chidwi patukulola yakutendekwa ya m’chilambochi yili mkukwanilisya yakulochesya ya m’Baibulo?

⁴ Tukusatenda chidwi mnope patukuyiwona kuti yindu yayikutendekwa apano yikukwanilisya yakulochesya ya m’Baibulo. Kutenda yeleyi nganikuŵa kulemwa. Mwachisyasyo, Yesu jwasasile yakutendekwa yejinji yayichitukamuchisya kumanyilila kuti chilambo cha Satanachi chisigele panandi kumala. (Mat. 24:3-14) Ndumetume Petulo jwatulimbikasisye kuti tulolechesyeje kukwanilichikwa kwa yakulochesya kuti chikulupi chetu chipitilisye kuŵa chakulimba. (2 Pet. 1:19-21) Buku jakumalisya m’Baibulo jikusatanda ni maloŵe gakuti, “Chiwunukuko chele Mlungu ŵamsalile Yesu Klistu kuti ŵalosye achikapolo ŵakwe yindu yayaliji yili yisigele panandi kutendekwa.” (Chiw. 1:1) Myoyo, tukusatenda chidwi ni yakutendekwa ya m’chilambochi nambosoni kumanyilila yayikuti pakukwanilisya yakulochesya ya m’Baibulo. Mwamti mpaka tusachilileje kwasalila ŵane yakutendekwayi.

 5. Ana tukusosekwa kuŵambala kutenda chichi, nambi tutendeje chichi? (Alole yiwulili.)

⁵ Patukukambilana ni ŵane yakwamba yakulochesya ya m’Baibulo, tukusosekwa kuŵambalaga kusala ya mumtwe mwetu. Tukuŵecheta yeleyi, ligongo lyakuti ngatukusasaka kuŵecheta yindu yampaka yisokonasye mtendele mumpingo. Mwachisyasyo, mpaka twapikane ŵakulongolela chilambo ali mkusala yampaka atende kuti amasye ungapikangana kapena kutamilikasya mtendele soni kuti ŵandu atameje mwangali woga. Mmalo mwakwamba kujigalika ni mfundo jelejo ni kusalaga kuti yikukwanilisya yakulochesya ya pa 1 Atesalonika 5:3, tukusosekwa kumanyililaga mfundo syasambano syakusilondesya m’mabuku getu. Naga yindu yatukuŵecheta yikutyochela m’mabuku gajikusawandisya gulu ja Yehofa, tukusawukamuchisya mpingo kuti uŵepe wakamulana soni wakola “nganisyo syakulandana.”—1 Akoli. 1:10; 4:6.

 6. Ana mpaka tulijiganye chichi pa 2 Petulo 3:11-13?

⁶ Aŵalanje 2 Petulo 3:11-13. Ndumetume Petulo jwatukamuchisye kuŵa ŵakusamala patukuganichisya yakulochesya ya m’Baibulo. Jwalakwe jwatuŵendile kuti, “tujembecheyeje soni kuganichisya mnope kwika kwa lisiku lya Yehofa.” Ngatukusosekwa kutenda yeleyi pakwamba kusaka kumanyilila “lisikulyo soni ndaŵi jakwe” iyayi, nambo pakusaka kukamulichsisya masengo ndaŵi jajisigeleji pakulosya ‘ndamo syeswela soni kutenda yindu yakulosya kuti tuli ŵakulipeleka kwa Mlungu.” (Mat. 24:36; Luk. 12:40) Kaŵechete kane, mpaka tujile kuti tukusasaka kupitilisya kola ndamo syambone soni kulolechesya kuti kulimbichila kwetu kumtumichila Yehofa kukusalosya kuti tukusamnonyela mnope jwalakwe. Kuti yeleyi yikomboleche, tukusasosekwa kulolechesya mwatukusatendela yindu.

 7. Ana tukusalosya chamtuli kuti tukusasamala ni yatukusatenda? (Luka 21:34)

⁷ Yesu jwasalile ŵakulijiganya ŵakwe kuti ngakusosekwa kwamba kusamala ni yakutendekwa ya m’chilambo nambo akusosekwasoni kusamala ni yindu yakusatenda. Mfundo jeleji ŵajisasile mwakupikanika chenene pa Luka 21:34. (Aŵalanje.) Apikane maloŵe ga Yesu gakuti, “Msamale.” Mundu jwakusasamala ni yakusatenda akusalolechesya kuti chilichose chikajonanga unasi wakwe ni Yehofa. Nambosoni akusatenda yampaka akombole kuti ayiŵambale yindu yakusakala. Jwalakwe pakutenda yeleyi, Mlungu akusapitilisya kumnonyela.—Mis. 22:3; Yud. 20, 21.

 8. Ana ndumetume Paulo jwasalile Aklistu kutenda chichi?

⁸ Ndumetume Paulo jwasalile Aklistu kuti asamaleje ni yakusatenda. Mwachisyasyo, jwalakwe jwasalile Aklistu ŵa ku Efeso kuti, “Mlolechesyeje mwakusamala mwamkwendela. Mjendeje mpela ŵandu ŵalunda ngaŵaga mpela ŵangali lunda.” (Aef. 5:15, 16) Satana akupitilisya kulingalinga konanga unasi wetu ni Yehofa. Myoyo Baibulo jikutukalamusya kuti ‘ndaŵi jilijose tumanyilileje yakusaka Yehofa,’ ni chakulinga chakuti tulichenjele achimsyewe ku yindu yakutulinga nayo Satana.—Aef. 5:17.

 9. Ana mpaka tutende uli kuti tumanyilile yakusasaka Yehofa?

⁹ Baibulo jangasala yindu yosope yampaka yijonanje unasi wetu ni Yehofa. Ndaŵi syosope tukusasosekwa kusagula jika pangani syele nganasilondesya mwachindunji m’Malemba. Kuti tusagule mwalunda, tukusasosekwa kumanyilila kapena kuganichisya chenene “yakusasaka Yehofa.” Mpaka tutende yeleyi mwakulijiganya Maloŵe ga Mlungu soni kuganichisya mwakusokoka. Patukuganichisya mnope ya chakulinga cha Yehofa soni kukola “nganisyo sya Klistu,” ngatukukayichila kuti tuchijenda “mpela ŵandu ŵalunda,” atamose pandaŵi janganitukola malamusi gachindunji gakutusalila yampaka tutende pangani jinejakwe. (1 Akoli. 2:14-16) Yindu yine yakogoya yikusaŵa yangasawusya kuyimanyilila nambope pana yine yayikusaŵa yakusawusya kuyikopochela.

10. Ana ni yindu yine yapi yakogoya yatukusosekwa kuyiŵambala?

¹⁰ Yindu yine yakogoya yatukusosekwa kuyiŵambala yili kukopana, kumwa mnope, kulya mnope, kuŵecheta yindu yampaka yawulasye ŵane, kulolela yakusangalasya yachiwawa, kulolela yakuŵagula soni yine. (Sal. 101:3) Ndaŵi syosope mdani jwetu jwali Satana, akusapatilapo upile pa yindu yeleyi kuti asokonasye unasi wetu ni Yehofa. (1 Pet. 5:8) Naga ngatukuŵa mesope Satana mpaka apande mbeju syakusakala m’mitima soni munganisyo mwetu. Mbeju syakwe sili ungali chilungamo, kutunduka, uŵengani, kunyada soni kutumbila. (Agal. 5:19-21) Pandanda ndamosi mpaka siwonecheje mpela syangajogoya. Nambo naga ngatukutenda yampaka tukombole kuti tumalane nasyo mpaka sikuleje kwika pakuŵa mpela yakumela yapoyisoni soni mpaka sitandikasye yakusawusya.—Yak. 1:14, 15.

11. Ana chindu chapi chakogoya mnope chatukusosekwa kuchiŵambala soni ligongo chichi?

¹¹ Chindu chakogoya mnope chatukusosekwa kuchiŵambala chili kunguluka ni ŵandu ŵakwete ndamo syakusakala. Aganichisye ya chisyasyo achi: Tuwanichisye kuti akukamula masengo yalumo ni mundu jwanganaŵa jwa Mboni sya Yehofa. Ni wawojo akusaka kuti mjawojo aganisyeje yindu yambone yakwamba ŵa Mboni sya Yehofa. Myoyo akulingalinga kulosya kuti akusanonyela ŵane soni kwakamuchisya. Kombolekasoni kuti ndaŵi sine akusalila yakulya yalumo pandaŵi jakupumula. Mkanipapite ndaŵi atandite kulila yakulya yalumo ndaŵi syosope. Ni lisiku line mjawojo atandite kuŵecheta yindu yakusakala yele pandanda wawojo nganayinonyelaga. Kaneko wawojo akutanda kuŵecheta nawo ngani syele nganasangalalaga nasyo pandanda. Nambo lisiku line paŵelwiche kumasengo mjawojo akwaŵilanjila kunyumba jakwe kuti akamwele yalumo yakumwamwamwa ni wawojo akukunda. Pambesi pakwe akuyikopochela kuti akwamba kukunda yiliyose yakwasalila mjawojo. Nganiyijigala ndaŵi jelewu kuti atande kutenda yindu yakusatenda mjawojo. Yisyene kuti tukusatenda yindu yakumchimbichisya soni kumnonyela jwalijose, nambo tukusosekwa kukumbuchila kuti mpaka tujigalile yakutenda ya ŵandu ŵatukusakunguluka nawo kwa ndaŵi jelewu. (1 Akoli. 15:33) Naga tukusasamala ni yatukusatenda mpela yaŵatite Yesu pakutulimbikasya, tuchikombola kuŵambala kukunguluka ni ŵandu ŵangakusakuya malamusi ga Yehofa. (2 Akoli. 6:15) Nambosoni tuchiyiwona yindu yakogoya ni kuyiŵambala.

12. Ana ŵakulijiganya ŵa Yesu ŵasosekwaga kutendaga chichi paŵajembecheyaga mbesi ja chilambochi?

¹² Ŵakulijiganya ŵa Yesu nganasosekwaga kwamba kutama paŵajembecheyaga mbesi ja chilambochi. Myoyo Yesu jwapele masengo gakuti atendeje. Jwalakwe jwalamwile jemanjaji kuti alalichileje ngani syambone “mu Yelusalemu, mu Yudeya mosope, mu Samaliya, soni mpaka kumbesi kwa chilambo chapasi.” (Mase. 1:6-8) Kusala yisyene gelegatu galiji masengo gekulungwa kwabasi. Mwamti jemanjaji ŵalosisye kuti ŵakamulichisye masengo chenene ndaŵi jawo paŵakamwile masengoga mwakulipeleka mnope.

13. Ligongo chichi tukusosekwa kukamulichisya masengo chenene ndaŵi jetu? (Akolose 4:5)

¹³ Aŵalanje Akolose 4:5. Tukusosekwa kuganichisya mwakusamala mnope ni yatukusati pakamulichisya masengo ndaŵi jetu. Ligongo yindu yakusawusya ‘yikusagamba kutugwila’ wosopewe. (Jwak. 9:11) Myoyo ndaŵi jilijose mpaka tuwe.

14-15. Ana mpaka tutende uli kuti tukamulichisye masengo chenene ndaŵi jetu? (Ahebeli 6:11, 12) (Alole chiwulili.)

¹⁴ Mpaka tukamulichisye masengo chenene ndaŵi jetu naga tukutenda yindu yakusasaka Yehofa nambosoni kulimbisya unasi ŵetu ni jwalakwe. (Yoh. 14:21) Tukusosekwa kuŵa “ŵakulimbangana, soni ŵangatenganyika. Ndaŵi syosope tuŵeje ni yakutenda yejinji pa masengo ga Ambuje.” (1 Akoli. 15:58) Myoyo mbesi pajikwika, chinga ja umi wetu kapena jachilambo chakusakalachi, ngasitudandawula chilichose.—Mat. 24:13; Alo. 14:8.

¹⁵ Masiku agano, Yesu akupitilisyape kwalongolela ŵakulijiganya ŵakwe pakulalichila yakwamba Uchimwene wa Mlungu pachilambo chosope chapasi. Jwalakwe akwanilisye maloŵe gakwe. Kupitila mu gulu ja Yehofa, Yesu akutujiganya mwampaka tulalichilile soni akutupa yindu yatukusosechela kuti tukombole kukamula masengo gelega. (Mat. 28:18-20) Myoyo naga tukukamula mwakulipeleka mnope masengo gakulalichila soni gakwajiganya ŵane nikuti tukupikanila yaŵatulamwile Yesuyi. Nambosoni yikusatukamuchisya kuti tuŵeje mesope patukwembecheya kuti Yehofa ajonanje chilambochi. Naga tukukamulichisya masengo malangiso gagakusimanikwa pa Ahebeli 6:11, 12, nikuti tuchiŵa ŵakulimba pa chembecheyo chetu chatukwete “mpaka kumbesi.”—Aŵalanje.

16. Ana tuli ŵakusachilila kutenda chichi?

¹⁶ Yehofa akwete lisiku soni ndaŵi jachachijonanga chilambo cha Satanachi. Lisikuli palichikwana, Yehofa ngasalepela kwanilisya yakulochesya yakwe yaŵayilembile m’Maloŵe gakwe. Pandaŵi ajino mpaka tuganisyeje kuti mbesiji jikuchelewa kwika. Nambope, lisiku lya Yehofa ‘ngaŵa mkukokoŵa iyayi.’ (Hab. 2:3) Myoyo kwende wosopewe tuŵeje ŵakusachilila ‘kwegamila pa AMBUJE,’ kwineku tuli mkwembecheya ‘Mlungu mkulupusyo jwetu.’—Mik. 7:7.