Mlungu Ŵanonyeleje

1, 2. Ana tukusosekwa kutenda cici kuti tutendeje yindu yampaka yimsangalasye Mlungu?

WOSOPEWE tukusasaka kola cilu cambone. M’yoyo, tukusalingalinga kulya yakulya yambone, kutenda mang’asi gakulimbisya cilu, soni kucisamalila cilu cetu. Atamose kuti pakusasosekwa macili kuti tukombole kutenda yeleyi, nambope yikusakola yakuyicisya yambone, m’yoyo ngatukusaleka. Nambosoni tukusosekwa kola cilu cambone mu litala line.

² Atamose kuti tukummanyilila Yehofa, nambo tukusosekwa kwendelecelape kulimbisya unasi wetu ni jwalakwe. Yuda paŵalimbikasyaga Aklistu kuti “Atendeje yindu yampaka yimsangalasye Mlungu,” ŵalondesye mwampaka atendele yeleyi. Ŵasalile kuti, “Akusyeje cikulupi cawo ceswela mnope.” (Yuda 20, 21) M’yoyo, ana mpaka tulimbisye cikulupi cetu mwamtuli?

3-5. (a) Ana Satana akusasakaga kuti wawojo agawoneje wuli malamusi ga Yehofa? (b) Ana akusagawonaga wuli malamusi soni yiwundo ya Yehofa?

³ Yili yakusosekwa kuti wawojo pajikape ajikutileje kuti matala ga Yehofa gali gambone. Satana akusasakaga wawojo kuti aganisyeje kuti malamusi ga Yehofa gali gakusawusya kugakuya, soni kuti mpaka aŵe ŵakusangalala naga akusagula jika yayili yambone soni yakusakala. Satana aŵele ali mkwatendekasya ŵandu kukulupilila yeleyi kutandila mu m’gunda wa Edeni. (Genesesi 3:1-6) Soni masiku agano ni pakulimbicila mnope ni nganisyosi.

⁴ Ana yakusala Satanayi yili yisyene? Ana malamusi ga Yehofa gali gakusawusya? Iyayi. Kuti tupikanicisye, awanicisye kuti akwenda ku malo gakusalala gakusunjila yinyama. Ni akuluwona lutenje lwelewu lwaluli mbali jine ja malogo. Mwine mpaka aliwusye kuti ligongo cici ŵataŵile lutenjelu? Nambo pandaŵi jijojo, akupikana lisimba lili mkutongola mkati mwalutenjemo. Ana sambano mpaka aganisye kuti lutenjelu ŵataŵile ligongo cici? Mwangakayicila, mpaka aŵe ŵakusangalala kuti lutenjelo cilwakamucisye kuti akaŵa cakulya ca lisimbalyo. Yiwundo ya Yehofa yili mpela lutenjelu, Satana ali mpela lisimbalyo. Maloŵe ga Mlungu gakusatukalamusya kuti, “Aŵeje ŵaganisya cenene, aŵeje mesope! Mmagongo jwawo, Satana, akwendajenda aku nakuku mpela lisimba lyakutongola, kupita mcisosasosa jwakuti amlye.”—1 Petulo 5:8.

⁵ Yehofa akusasaka kuti tukole umi wambone. Ngakusasaka kuti Satana atulambusyeje. Ni ligongo lyakwe atupele malamusi soni yiwundo kuti yitucenjeleje soni kutukamucisya kuŵa ŵakusangalala. (Aefeso 6:11) Yakobo jwalembile kuti, “Jwakulolecesya m’lilamusi lyamlama, lyalikusayikasya ufulu, soni jwakwendelecela kutenda myoyo . . . akusaŵa jwakusangalala mu yakutenda yakwe.”—Yakobo 1:25.

 6. Ana mpaka tuŵe ŵakwikutila camtuli kuti matala ga Yehofa gali gambone?

⁶ Patukukuya yakutusalila Yehofa, umi wetu wukusajenda cenene soni unasi wetu ni jwalakwe ukusalimba. Mwambone, yikusatujendela cenene patukupikanila yakuti tupopeleje kwa jwalakwe ndaŵi ni katema. (Mateyu 6:5-8; 1 Atesalonika 5:17) Tukusaŵa ŵakusangalala patukupikanila lilamusi lyakuti tusonganeje pampepe pakumlambila jwalakwe soni kulimbisyana jwine ni mjakwe. Nambosoni patukukamula mwakwanila masengo gakulalicila soni gakwiganya. (Mateyu 28:19, 20; Agalatia 6:2; Ahebeli 10:24, 25) Patukuganicisya mwayiŵelele yili mkutukamucisya kusya cikulupi cetu, ni patukusaŵa ŵakwikutila mnope kuti matala ga Yehofa gali gambone.

7, 8. Ana cici campaka citukamucisye kuti tukadandawulaga ni yakulingwa yayiciyika msogolo?

⁷ Mpaka tudandawuleje kuti msogolo tucisimana ni yindu yakulinga cikulupi cetu yayiciŵa yakusawusya mnope kwetuwe. Naga akusaganisya m’yoyo, akumbucileje maloŵe ga Yehofa gakuti, “Une Yehofa, ndili Mlungu jwenu, jwangumjiganya kuti jemanja yindu yimjendeleje cenene. Jwangumlongolela kuti mjendeje m’litala lyakuŵajilwa. Mpaka yiŵe cenene kupikanila malamusi gangu! Pamkutenda yeleyi mtendele wenu uciŵa mpela sulo, soni cilungamo cenu ciciŵa mpela matumbela ga m’nyasa.”—Yesaya 48:17, 18.

⁸ Naga tukumpikanila Yehofa, mtendele wetu uciŵa mpela lusulo lwangajumulila mesi soni cilungamo cetu ciciŵa mpela matumbela ga m’nyasa gagakusayika mungulugulu nyasa. Mwangasamala kandu yayikutendekwa paumi wetu, mpaka tuŵe ŵakulupicika. Baibulo jikutusimicisya kuti, “Amtulile Yehofa yakusawusya yawo, ni jwalakwe cacakamucisya. Ngasakunda kuti jwakulungama atenganyikwe.”—Salimo 55:22.

9, 10. Ana kuŵa jwamkomangale mwausimu kukusagopolela cici?

⁹ Pakulimbisya unasi wawo ni Yehofa, caciŵa “wakomangale mwausimu.” (Ahebeli 6:1) Ana kuŵa ŵakomangale mwausimu kukusagopolela cici?

¹⁰ Ukulu wa kucilu nganiwuŵa utendekasisye Aklistu kuŵa ŵakomangala mwausimu. Kuti tuŵe ŵakomangale mwausimu, tukusosekwa kuŵa mjakwe jwa Yehofa soni kulingalinga kuyiwona yindu mwakusayiwonela jwalakwe. (Yohane 4:23) Paulo jwalembile kuti, “Wosope ŵakusatenda yakusaka ya cilu akusaŵika nganisyo syawo pa yindu ya cilu, nambo wosope ŵakukuya ya msimu akusaŵika nganisyo syawo pa yindu ya msimu.” (Aloma 8:5) Mundu jwamkomangale mwausimu jwangaŵika nganisyo syakwe pa yindu yakusangalasya kapena yakucilu. M’malo mwakwe akusaŵika nganisyo syakwe pakumtumicila Yehofa soni pakutenda yisagula yalunda paumi wakwe. (Misyungu 27:11; aŵalanje Yakobo 1:2, 3) Soni ngakusasaka kujigalika ni yakusakala. Mundu jwamkongamale mwausimu akusamanyilila cacili cambone soni akusasacililaga kucitenda.

11, 12. (a) Ana Paulo jwasasile yamtuli pakwamba ya “macili gakumanyilila” ga Aklistu? (b) Ana kuŵa Mklistu jwamkomangale mwausimu kukulandana mwamtuli ni kuŵa mundu jwakombola kutenda mang’asi gakulimbisya cilu?

¹¹ Pakusasosekwa kulimbicila kuti mundu aŵe jwamkomangale mwausimu. Ndumetume Paulo jwalembile kuti, “Cakulya cakulimba cili ca ŵandu ŵakomangale mwausimu, ŵele pakamulicisya masengo macili gawo gakumanyilila, ajiganyisye maciligo pakulekanganya cambone ni cakusakala.” (Ahebeli 5:14) Maloŵe gakuti “ajiganyisye” mpaka gatutendekasye ganisya yakusatenda mundu pakulijiganya mang’asi gakulimbisya cilu.

¹² Naga tum’weni mundu jwakombola kutenda mang’asi gakulimbisya cilu, tukusamanyilila kuti ŵamalile ndaŵi soni kulijiganya kuti akomboleje cenene. Jwalakwe nganapagwa ali jwakombola kutenga mang’asi. Mwanace papagwile, jwangamanyililaga kamulicisya cenene masengo makono soni ngongolo syakwe. Nambo mkupita kwandaŵi, akusalijiganya kukamula yindu soni kwenda. Mundu mpaka akombole kutenda mang’asi gakulimbisya cilu ligongo lya kulijiganya. Mwakulandana ni yeleyi pakusajigala ndaŵi soni kulijiganya kuti tuŵe Aklistu ŵakomangale mwausimu.

13. Ana cici campaka citukamucisye kulijiganya kuganisya mwakusaganicisya Yehofa?

¹³ M’buku ajino, tulijiganyisye mwampaka tuganicisye mwakusaganicisya Yehofa soni kuyiwona yindu mwakusayiwonela jwalakwe. Tulijiganyisye kuyamicila soni kunonyela malamusi ga Yehofa. Patukutenda yakusagula tukusaliwusya kuti, ‘Ana ni malamusi kapena yiwundo yapi ya m’Baibulo yayikukamulana ni yangusagulayi? Ana mpaka nayikamulicisye masengo mwamtuli? Ana Yehofa akusasaka kuti ndendeje cici?’—Aŵalanje Misyungu 3:5, 6; Yakobo 1:5.

14. Ana tukusosekwa kutenda cici kuti tulimbisye cikulupi cetu?

¹⁴ Ngatukusosekwa kuleka kukusya cikulupi cetu pa Yehofa. Mpela mwayiŵelele kuti kulya yakulya yakamucisya kukusatukamucisya kulimbisya yilu yetu, m’yoyosoni kulijiganya pakwamba ya Yehofa kukusatukamucisya kulimbisya cikulupi cetu. Patwagambile kutanda kwene kulijiganya Baibulo, twalijiganyisye usyesyene wandanda wakwamba Yehofa soni matala gakwe. Nambo ndaŵi pajikupita, tukusosekwa kwendelecela kupikanicisya yindu yakusokoka. Yeleyi ni yaŵagopolelaga Paulo paŵasasile kuti, “Cakulya cakulimba cili ca ŵandu ŵakomangale mwausimu.” Naga tukukamulicisya masengo yindu yatukulijiganya tukusaŵa ŵalunda. Baibulo jikusatusalila kuti, “Lunda luli cindu cakusosekwa mnope.”—Misyungu 4:5-7; 1 Petulo 2:2.

15. Ana kumnonyela yisyesyene Yehofa soni abale ni alongo ŵetu kuli kwakusosekwa camtuli?

¹⁵ Mundu mpaka akole cilu cambone, nambo kuti yeleyi yikombolece akusosekwa kwendelecela kusamalila cilu cakwe. Mwakulandana ni yeleyi, mundu jwamkomangale mwausimu akusamanyilila kuti akusosekwa kulimbicila kuti unasi wakwe ni Yehofa ujendelecele kuŵa wakulimba. Paulo akutukumbusya kuti, “Ajendelecele kulilinga kuti alole naga ali ŵakulimba m’cikulupi. Ajendelecele kulilinga kuti alole kuti ali mundu jwamtuli.” (2 Akolinto 13:5) Nambope tukusosekwa yejinji ngaŵa cikulupi cakulimbape. Cinonyelo cetu pa Yehofa soni abale ni alongo ŵetu cikusosekwa kwendelecela kukula. Paulo jwatite, “Naga ngwete . . . lunda, soni naga ngwete cikulupi cakuti mpaka kusamisya matumbi, nambo ndili jwangali cinonyelo, ndili jwangali mate.”—1 Akolinto 13:1-3.

16. Ana Satana akusasakaga kuti tulipikaneje mwamtuli?

¹⁶ Satana akusasaka kuti tuganisyeje kuti nganituŵa tuŵele ŵandu ŵambone ni kumsangalasyaga Yehofa. Akusasakaga kuti tuŵeje ŵakudandawula ni kuganisyaga kuti pangali matala gampaka tumacisye yakusawusya yetu. Satana akusasaka kuti Aklistu acimjetu tukakulupililaga nambosoni kuti tuŵeje ŵangasangalala. (Aefeso 2:2) Satana akusamanyilila kuti nganisyo syakulemweceka mpaka situjonanje soni konanga unasi wetu ni Mlungu. Nambo Yehofa atupele yindu yakutukamucisya kulimbana ni nganisyo syakulemweceka syelesi. Atupele cembeceyo.

17. Ana cembeceyo cili cakusosekwa mnope mwamtuli?

¹⁷ Pa 1 Atesalonika 5:8, Baibulo jikusalandanya cembeceyo ni cisoti cacikusakamucisya mtwe wa msilikali ku ngondo. Akusacikolanga cisoti celeci kuti, “cembeceyo ca cikulupusyo.” Kola cembeceyo pa yilanga yatusimicisye Yehofa yikusatukamucisya kusikana nganisyo syakulemweceka.

18, 19. Ana cembeceyo camkamucisye camtuli Yesu kuŵa jwakulimba?

¹⁸ Cembeceyo caŵakwete Yesu camkamucisye kuŵa jwakulimba. Cilo cakumalisya ca umi wakwe pa cilambopa, jwasimene ni yakusawusya yejinji. Mjakwe jwapamtima ŵampelece jwalakwe. Mjakwe jwine ŵamkanile kuti ngakummanyilila. Acimjakwe ŵane ŵamlesile ni kumtila. Ŵandu ŵamtundu wakwe ŵamjimucile ni kuŵenda kuti awulajidwe mwakumkomelela pa citela cakulagacisya. Ana cici cicamkamucisye kupilila yipwetesiyi? Baibulo jikusasla kuti, “Ligongo lya cisangalalo caŵamŵicile pasogolo pakwe, ŵapilile pacitela cakulagacisya. Nganasamala kuti yakutesya sooni yikumtendecela, soni jutemi ku mkono wa mlyo wa citengu ca Mlungu.”—Ahebeli 12:2.

¹⁹ Yesu jwamanyililaga kuti kuŵa kwakwe jwakulupicika cikuyikasye ucimbicimbi kwa Atati ŵakwe soni kusimicisya kuti Satana ali jwaunami. Cembeceyo celeci camtendekasisye kuŵa jwakusangalala mnope. Jwamanyililesoni kuti pamkaŵa cawujile kwa Atati ŵakwe kwinani. Cembeceyo celeci camkamucisye kuti apilile. Mpela Yesu, tuŵiceje nganisyo syetu pa cembeceyo cetu. Yicitukamucisya kupilila mwangasamala kandu kuti mpaka yitutendecele yamtuli.

20. Ana cici campaka cakamucisye kola nganisyo syambone?

²⁰ Yehofa akusamanyilila cikulupi soni kupilila kwawo. (Yesaya 30:18; aŵalanje Malaki 3:10.) Akwasimicisya kuti “cacapa yakumbila ya mtima wawo.” (Salimo 37:4) M’yoyo aŵiceje nganisyo syawo pa cembeceyo cawo. Satana akusasaka kuti tukakola cembeceyo soni kuti tuganisyeje kuti yilanga ya Yehofa ngasiyikwanilicikwa. Nambo ngatukusosekwa kusikunda nganisyo syakulemweceka syelesi. Naga akuyiwona kuti cembeceyo cawo cikunandipa, amŵende Yehofa kuti ŵakamucisye. Akumbucile maloŵe gagakusimanikwa pa Afilipi 4:6, 7 gakuti, “Akadandawulaga ni cilicose, nambo pacilicose kupitila mu lipopelo soni kuyamicila yalumo ni kucondelela, yakuŵenda yawo yimanyice kwa Mlungu. Pakutenda m’yoyo, mtendele wa Mlungu wawukusapunda kuganisya mwakusokoka kulikose, ucicenjela mitima jawo soni nganisyo syawo mwa Klistu Yesu.”

21, 22. (a) Ana cakulinga ca Yehofa ca cilambo capasi cili cici? (b) Ana wawojo asimicisye kutenda cici?

²¹ Ndaŵi syosope aganicisyeje yakusangalasya ya msogolo. Pacangakaŵapa jwalijose cacilambilaga Yehofa. (Ciwunukuko 7:9, 14) Agambe ganisya mwawuciŵela umi m’cilambo casambano. Uciŵa wambone kupunda cilicose campaka tuganicisye. Satana, yiŵanda, soni yakusakala yosope kuciŵa kwangali. Ŵandu ngasalwalaga, soni ngasawaga. Mmalo mwakwe, lisiku lililyose tucijimukaga tuli ŵamacili soni ŵakusangalala ni umi. Wosope cacikamula masengo gakucitendekasya cilamboci kuŵa paladaiso. Wosope cacikola cakulya cambone soni malo gambone gakutama. Ŵandu ngasaŵa ŵangalwe kapena ŵa ciwawa nambo cacinonyelanaga yisyesyene. Pambesi ŵandu wosope pacilambopa cacisangalala ni “ufulu waucimbicimbi wa ŵanace ŵa Mlungu.”—Aloma 8:21.

²² Yehofa akusaka kuti tum’woneje kuŵa mjetu jwapamtima. Kwende tutendeje yosope yampaka tukombole kuti tumpikanileje Yehofa soni kumŵandicila jwalakwe lisiku lililyose. M’yoyo, kwende wosope tutendeje yindu yampaka yimtendekasye Mlungu kutunonyela mpaka kalakala!—Yuda 21.