“Citujawule Namwe Yimpepe”

1, 2. (a) Ana Yehofa ŵasasile kuti cici cacicitendekwa m’moŵa getu gano? (b) Ana mungani ajino citutagulilane yiwusyo yapi? (Alole ciwulili cacili penanici.)

PAKWAMBA ya moŵa getu gano, Yehofa ŵalocesye kuti, “M’moŵa gelego, acalume 10 ŵakutyocela m’yiŵeceto yosope ya ŵandu ŵa mitundu jine cacikamula cakuwala ca Myuda ni kusala kuti, ‘Citujawule namwe yimpepe, pakuŵa tupikene kuti Mlungu ali namwe.’” (Zek. 8:23) Mpela acalume 10 ŵakuwanicisyaŵa, wosope ŵakwete cembeceyo cakutama pacilambo capasi ‘akamwile cakuwala ca Myuda.’ Jemanjaji akusasangalala kumlambila Mlungu pamo ni “Yisalayeli jwa Mlungu” jwesagulwe ni msimu weswela acimanyililaga kuti Yehofa akwajaliwa ŵasagulweŵa.—Aga. 6:16.

² Mwakulandana ni maloŵe ga jwakulocesya Sekaliya, Yesu nombe najo ŵasasile ya mkamulano wawupali pasikati pa ŵandu ŵa Mlungu. Jwalakwe ŵasasile kuti ŵakumkuya ŵakwe ali m’makuga gaŵili. Likuga lyandanda lili lya “kakuga ka ngondolo.” Likuga line lili lya “ngondolo sine.” Nambo jwalakwe ŵatite makuga gosopega gaciŵa “likuga limo” soni gacikola “mkucinga jumo.” (Luk. 12:32; Yoh. 10:16) Nambope, ligongo lyakuti pana makuga gaŵili ŵandu mpaka aliwusye kuti, (1) Ana ŵangondolo sine akusosekwa kumanyilila mena ga ŵasagulwe wosope? (2) Ana ŵasagulwe akusosekwa kuliwona mwatuli? (3) Ana akusosekwa kutenda cici naga mundu jwine mumpingo mwawo atandite kulya ni kumwa yiwanicisyo ya pa Cikumbucilo? (4) Ana akusosekwa kulaga nganisyo ni kutupa kwa ciŵalanjilo ca ŵandu ŵakulya soni kumwa yiwanicisyo ya pa Cikumbucilo? Kwende tutagulilane yiwusyo yeleyi.

 3. Ligongo cici yili yangakomboleka kumanyilila ŵasagulwe wosope ŵacacipocela mbote jawo?

³ Ana ŵangondolo sine akusosekwa kumanyilila mena ga ŵasagulwe wosope ŵapali moŵa agano? Iyayi. Ligongo cici tukuti m’yoyo? Ligongo lyakuti pangali mundu jwampaka ŵamanyilile ŵasagulwe ŵacacipocela mbote jawo. Atamose kuti Mlungu ŵasagwile Aklistuŵa kuti cajawule kwinani, nambope cacipocela mbote jawo akaŵe naga akuŵape ŵakulupicika. Satana akusamanyilila yeleyi, soni akusakamulicisya masengo “ŵakulocesya ŵaunami . . . kuti naga kulikwakomboleka, ŵasokonasye atamose ŵasagulwewo.” (Mat. 24:24) Aklistu ŵasagulwe ngaŵa mkuŵa ŵakusimicisya kuti cacijawula kwinani, mpaka pandaŵi jele Yehofa cacalamula kuti ali ŵakulupicika. Yehofa akusiŵasimicisya ŵasagulwe ŵakulupicika ya mbote jawo pakwadinda cidindo cakumalisya mkanawe. Ŵane cacadinda cidindoci kusogoloku mkaniyitande “yisawusyo yakogoya.” (Ciu. 2:10; 7:3, 14) M’yoyo, yili yangali masengo kumanyilila mena ga ŵakutumicila ŵa Mlungu wosope ŵa 144,000.^[1]

 4. Naga yili yangakomboleka kumanyilila mena ga ŵasagulwe wosope ŵali pacilambo capasi, ana mpaka ‘tujawule nawo’ yimpepe catuli?

⁴ Naga yili yangakomboleka kumanyilila mena ga ŵasagulwe wosope, ni ana ŵangondolo sine mpaka ‘ajawule nawo’ yimpepe catuli? Kwende tulolesoni yaŵasasile jwakulocesya Sekaliya yakwamba acalume 10 ŵakuwanicisya ŵala. Acalume 10 ŵelewo “cacikamula cakuwala ca Myuda ni kusala kuti, ‘Citujawule namwe yimpepe, pakuŵa tupikene kuti Mlungu ali namwe.’” Atamose kuti lilembali likusala ya Myuda jumo, nambo ligopolela ya ŵandu ŵajinji. Myuda jwausimu jweleju akugopolela ŵandu ŵajinji ngaŵa mundu jumo. M’yoyo, yili yangasosekwa kumanyilila Myuda jwausimu jwalijose ni kutanda kwawula najo yimpepe. M’malo mwakwe tukusosekwa kwamanyilila ŵasagulweŵa mpela likuga ni kwakamucisya mwampaka tukombolele. Yesu ni jwali Mlongola jwetu, soni Malemba gakusatusalila kuti tumkuyeje jwalakwe jika.—Mat. 23:10.

 5. Ana Aklistu ŵasagulwe akusosekwa ganicisya mwakusokoka maloŵe gapi, soni ligongo cici?

⁵ Aklistu ŵakusalya ni kumwa yiwanicisyo ya pa Cikumbucilo akusosekwa ganicisya mwakusokoka maloŵe ga pa 1 Akolinto 11:27-29. (Aŵalanje.) Pa lilembali, Paulo ŵasasile kuti naga Mklistu akusalya soni kumwa yiwanicisyo nambo ali mkutenda yindu yakusakala nikuti akulya soni kumwa yiwanicisyoyo mwangaŵajilwa. (Ahe. 6:4-6; 10:26-29) Maloŵega gakusakumbusya Aklistu ŵasagulwe kuti akusosekwa kwendelecela kuŵa ŵakulupicika kuti capocele mbote jawo ‘jakuŵilanjidwa ni Mlungu ni kwawula kwinani, kupitila mwa Klistu Yesu.’—Afi. 3:13-16.

 6. Ana Aklistu ŵasagulwe akusosekwa kuliwona mwatuli?

⁶ Paulo ŵasalile Aklistu ŵasagulwe kuti “ajendeje mwakuŵajilwa mwakamulana ni kuŵilanjidwa kwawo.” Ana Aklistuwo mpaka atende catuli yeleyi? Paulo ŵajendelecele kuti “ajendeje mwakulinondiya, mwakufasa, mwakulitimalika, soni mwakundililana m’cinonyelo. Alinjilile ni mtima wosope kuŵa ŵakamulana pakuŵa ŵamtendele wawuli mpela cakutaŵila cakutukamulanya.” (Aef. 4:1-3) Msimu wa Yehofa ukusalimbikasya ŵakutumicila ŵakwe kuŵa ŵakulinondiya ngaŵaga ŵakulikwesya. (Akolo. 3:12) Mwakulinondiya, Aklistu ŵasagulwe akusamanyilila kuti Yehofa ngakusiŵapa macili ga msimu weswela gejinji kupunda ŵane. Jemanjaji ngakusaliwona kuŵa ŵakumanyilila mnope yindu kapena ŵapenani kupunda ŵane. Ngakusiŵasalilasoni ŵane kuti atande kulya yiwanicisyo, mmalo mwakwe akusamanyilila kuti Yehofa ni jwakusiŵasagula ŵandu.

7, 8. Ana ŵasagulwe ŵangasaka cici kwa Aklistu ŵane, soni ligongo cici?

⁷ Kuŵa ŵasagulwe uli upile wapajika. Nambope ŵasagulwe ŵangasaka kuti Aklistu ŵane ŵacimbicisyeje mnope. (Aef. 1: 18, 19; aŵalanje Afilipi 2:2, 3.) Akusamanyilila kuti Yehofa ni juŵasagwile kupitila mwa msimu wakwe, soni kuti jwalakwe nganapeleka cimanyisyo kwa jwalijose kuti asagulidwe. M’yoyo Aklistu ŵasagulwe ŵangasimonga Aklistu ŵane pakwakayicila naga ali ŵasagulwe yisyene. Jemanjaji akusamanyilila yagakusasala Malemba yakuti mundu akagambaga kumkulupilila jwalijose jwakusala kuti asagulidwe ni Mlungu. (Ciu. 2:2) Ngakusalimanyikasya kwa ŵandu kuti ali ŵasagulwe ni cakulinga cakuti ŵanewo ŵacimbicisyeje. Jemanjaji ŵangalikwesya ligongo lya mbote jawo jacacipocela kusogolo.—1 Akoli. 1:28, 29; aŵalanje 1 Akolinto 4:6-8.

⁸ Konjecesya pelepa, Aklistu ŵasagulwe ŵangaliwona kuŵa ŵambone mnope kupunda ŵane. Jemanjaji ŵangasosasosa ŵasagulwe acimjawo kuti akunguluceje pampepe kapena kuti alijiganyeje pampepe Baibulo. (Aga. 1:15-17) Yeleyi yili yakutindana ni msimu weswela soni mpaka yisokonasye mkamulano mumpingo.—Aŵalanje Aloma 16:17, 18.

 9. Ligongo cici tukusosekwa kuŵa ŵakusamala ni mwatukusitwawonela Aklistu ŵasagulwe? (Alole libokosi lyakuti “Cinonyelo ‘Cangatenda Yangaŵajilwa.’”)

⁹ Ana tukusosekwa kum’wona mwatuli mundu jwakusalya soni kumwa yiwanicisyo ya pa Cikumbucilo? Yesu ŵasalile ŵakulijiganya ŵakwe kuti, “Wosope mli abale.” Ni jwajendelecele kuti, “Jwalijose jwakulikwesya cacimtulusya, nambo jwalijose jwakulinondiya cacimkwesya.” (Mat. 23:8-12) M’yoyo, ngaŵa cenene kum’wona m’bale kuŵa jwapenani mnope, atamose jwali jwamsagulwe. Pakwamba ya acakulungwa ŵa mumpingo, Baibulo jikusatusalila kuti tukusosekwa kuya cikulupi cawo, nambo jangatusalila kuti tum’woneje mundu jwine mpela mlongola jwetu. (Ahe. 13:7) Yili yisyene kuti Malemba gakusatulimbikasya kuti ŵandu ŵane tukusosekwa “kwacimbicisya mnope.” Nambope, ngatukusosekwa kwacimbicisya ŵanduwo ligongo lyakuti ali ŵasagulwe, nambo ligongo lyakuti ‘akulongolela cenene,’ soni “akusaŵa ŵamtawu pakuŵeceta ni kwiganya.” (1 Tim. 5:17) M’yoyo, ŵasagulwe mpaka atenguce soni mpaka atande kulikwesya naga tukwacimbicisya mwakupelenganya malile. (Alo. 12:3) Pangali jwalijose jwetuwe jwampaka asace kwakuŵasya acalongo acimjakwe ŵa Klistu ŵeleŵa.—Luk. 17:2.

10. Ana mpaka tulosye catuli kuti tukusitwacimbisya Aklistu ŵasagulwe?

¹⁰ Ana mpaka tulosye catuli kuti tukwacimbicisya mwakuŵajilwa Aklistu ŵasagulwe? Ngatukusosekwa kwawusya yiwusyo yakwayana ni kusagulwa kwawo. Yeleyi yicitukamucisya kuŵambala kwinjilila nawo ngani syangatukwaya. (1 Ates. 4:11; 2 Ates. 3:11) Tukaganisyaga kuti naga mundu ali jwamsagulwe nikuti ŵanace ŵakwe, ŵamkwakwe kapena ŵacinasi ŵakwe alisoni ŵasagulwe. Ulongo kapena ulombela yangakwayana ni kusagulwa kwa mundu. (1 Ates. 2:12) Tukusosekwasoni kuŵambala kwawusya ŵamkwakwe ŵa mundu jwamsagulwe mwacacipikanila mumtima kutama jika ali ŵangali ŵamkwakwe m’Paladaiso. M’malo mwakwawusya ŵane yiwusyo yakupweteka, tukusosekwa kulupilila kuti Yehofa cacitambasukula mkono wakwe ni “kwanilisya cakumbila ca cindu cilicose ca umi.”—Sal. 145:16.

11. Ana kuŵambala kwalapilila ŵandu mpaka kutukamucisye catuli?

¹¹ Ŵandu ŵakusiŵacimbisya Aklistu ŵasagulwe mwakuŵajilwa akusaŵambala yakogoya. Malemba gakusatusalila kuti “abale ŵaunami” mpaka ajinjile mumpingo. (Aga. 2:4, 5; 1 Yoh. 2:19) Abale ŵaunami ŵeleŵa mpaka atulambusye kuti ali ŵasagulwe. Konjecesya pelepa, Aklistu ŵane ŵasagulwe mpaka alece kuŵa ŵakulupicika. (Mat. 25:10-12; 2 Pet. 2:20, 21) Tukusosekwa kuŵambala kwalapilila Aklistu ŵasagulwe kapena Aklistu ŵaŵele ali mkumtumicila Yehofa kwandaŵi jelewu. Kutenda yeleyo kucitukamucisya kuti tujendelecele kuŵa ŵakulupicika kwa Yehofa soni kuti tukaleka kumtumicila naga jemanjaji atandite yakusakala kapena alesile usyesyene.—Yuda 16.

12, 13. Ligongo cici ngatukusosekwa kulaga nganisyo ni kutupa kwa ciŵalanjilo ca ŵandu ŵakulya ni kumwa yiwanicisyo ya pa Cikumbucilo?

¹² M’yaka yipiteyo, ciŵalanjilo ca ŵandu ŵaŵalyaga soni kumwa yiwanicisyo ya pa Cikumbucilo catulukaga. Nambo tuyiweni kuti m’yaka yapacangakaŵapa ciŵalanjiloci cikutupa. Ana tukusosekwa kulaga nganisyo ligongo lya kutupa kwa ciŵalanjiloci? Iyayi. Kwende tulole yindu yine yatukusosekwa kuyiganicisya panganiji.

¹³ “Yehofa akusamanyilila ŵandu ŵakwe.” (2 Tim. 2:19) Abale ŵakusaŵalanga ŵandu ŵalile soni kumwa yiwanicisyo pa Cikumbucilo nganaŵa amanyilile ŵasagulwe ŵasyesyene ŵacacijawula kwinani. Ciŵalanjilo ca ŵakusalya soni kumwa yiwanicisyo cikusapwatikaposoni ŵandu ŵakusalya kapena kumwa mwangaŵajilwa aciganisyaga kuti asagwilwe. Ŵane ŵaŵalyaga soni kumwa yiwanicisyo munyumamu apano ŵalesile. Kombolekasoni kuti ŵane paŵalyaga mtwe wawo nganiwukamulaga cenene yayatendekasisye kulupilila kuti cacilamulila ni Klistu kwinani. M’yoyo, ciŵalanjilo ca ŵakusalya soni kumwa yiwanicisyo moŵa agano ngacikulosya ciŵalanjilo cisyesyene ca ŵasagulwe ŵali ciŵela pacilambo capasi.

14. Ana Baibulo jikusasala yatuli pakwamba ya ciŵalanjilo ca ŵasagulwe ŵacaciŵa ciŵela pacilambo payicitanda yisawusyo yakogoya?

¹⁴ Ŵasagulwe cacisimanikwa m’yilambo yejinji Yesu pacaciyika kukwasonganganya ni kwawula nawo kwinani. Pakwamba ya ndaŵi jelejo, Baibulo jikusati, “[Yesu] cacitumisya malayika gakwe ni kusona kwekulungwa kwa lipenga, soni cacisonganganya ŵakusagulwa ŵakwe kutyocela ku mbepo mcece, kutyocela kumtepa kwa kwinani mpaka kumtepa kwine.” (Mat. 24:31) Malemba gakusalosya kuti m’moŵa gambesi ŵasagulwe ŵane caciŵape ciŵela pacilambo. (Ciu. 12:17) Nambo Baibulo jangasala kutupa kwa ciŵalanjilo ca ŵasagulwe ŵacaciŵa ciŵela pacilambopa pandaŵi ja yisawusyo yakogoya.

15, 16. Ana tukusosekwa kumanyilila cici pakwamba ya ŵandu ŵa 144,000 ŵakusasagulwa ni Yehofa?

¹⁵ Yehofa akusamanyilila ndaŵi jakusagulila ŵandu. (Alo. 8:28-30) Yehofa ŵatandite kusagula ŵandu panyuma pakuwa soni kwimuka kwa Yesu, soni yikuwoneka kuti Aklistu wosope ŵa m’yaka 100 yandanda ŵaliji ŵasagulwe. Kutandila m’yaka 100 yandanda mpaka kundanda kwa moŵa gambesi, ŵajinji mwa ŵandu ŵaŵalikolangaga kuti ali ŵakumkuya Mklistu ŵaliji Aklistu ŵaunami. Yesu ŵawanicisye jemanjajo ni “yikoko.” Nambope, Yehofa ŵajendelecele kusagula ŵandu ŵane ŵaŵaliji ŵakulupicika m’yaka yeleyo. Ŵandu ŵelewo ni ŵaŵaliji mpela “tiligu” juŵamsasile Yesu. (Mat. 13:24-30) Mkati mwa moŵa gambesi, Yehofa aŵele ali mkusagula ŵandu ŵa 144,000.^[2] Yehofa ali asacile kuti casagule ŵa 144,000 ŵane mbesi jili jisigele panandi kwene, pangali jwampaka akayicile naga jwalakwe akutenda yakuŵajilwa. (Yes. 45:9; Dan. 4:35; aŵalanje Aloma 9:11, 16.)^[3] Tukusosekwa kuŵa ŵakusamala kuti tukatenda yindu mpela ŵamasengo ŵangajikutila ŵaŵadandawile bwana jwawo ali ŵapele malipilo gakulandana ni ŵamasengo ŵaŵatandite masengo mwakucelewa.—Aŵalanje Matayo 20:8-15.

¹⁶ Ngaŵa kuti wosope ŵakwete cembeceyo cakwawula kwinani ali mlikuga lya “kapolo jwakulupicika ni jwalunda.” (Mat. 24:45-47) Mpela muyaŵelele m’yaka 100 yandanda, Yehofa soni Yesu akulisya ŵandu ŵajinji pakamulicisya masengo ŵandu ŵamnono. Aklistu ŵasagulwe ŵakuŵalanjikape ŵa m’yaya 100 yandanda ni ŵaŵalembile Malemba Gacigiliki. Mwakulandana ni yeleyi, moŵa aganosoni Aklistu ŵasagulwe ŵakuŵalanjika ni ŵakusapeleka ‘cakulya causimu pandaŵi jakuŵajilwa.’

17. Ana tulijiganyisye cici mungani ajino?

¹⁷ Ana tulijiganyisye cici munganiji? Yehofa ŵapele ŵandu ŵakwe mbote siŵili. Aklistu ŵasagulwe cacijawula kwinani. Aklistu ŵane ŵali mpela acalume 10 ŵakuwanicisya cacitama pacilambo capasi. Nambo jwalakwe akusasaka kuti ŵandu ŵacacijawula kwinani soni ŵacacitama pacilambo capasi aŵeje ŵakulupicika soni ŵakulinondiya. Akusosekwasoni kuŵa ŵakamulana, soni ŵakulimbikasya mtendele mumpingo. Mbesi pajikuŵandicila, kwende wosopewe tuŵe ŵakusimicisya mtima kuŵa m’likuga limo lyalikulongolelegwa ni Klistu.