AYÉ DOJÚ RÚ

2 | Ṣe Ohun Tí Ò Ní Jẹ́ Kí Àtijẹ Àtimu Nira Fún Ẹ

ÌDÍ TÍ Ọ̀RỌ̀ YÌÍ FI ṢE PÀTÀKÌ

Lónìí, ọ̀pọ̀ èèyàn ló ń ṣe kìràkìtà torí àtijẹ àtimu lójoojúmọ́, ṣe nìyẹn sì túbọ̀ ń nira torí bí nǹkan ṣe ń dojú rú láyé yìí. Kí nìdí tọ́rọ̀ fi rí bẹ́ẹ̀?

Tí àjálù bá ṣẹlẹ̀ níbì kan tàbí tí nǹkan ò rí bó ṣe yẹ kó rí, àwọn nǹkan á gbówó lórí, irú bí owó ilé àti owó oúnjẹ.
Tí nǹkan bá dojú rú nílùú, iṣẹ́ lè bọ́ lọ́wọ́ àwọn èèyàn tàbí kí owó tó ń wọlé fún wọn dín kù.
Tí àjálù bá ṣẹlẹ̀, ó lè ba ohun ìní àwọn èèyàn jẹ́, kíyẹn sì sọ wọ́n di òtòṣì.

Ohun Tó Yẹ Kó O Mọ̀

Tó o bá mọ béèyàn ṣe ń ṣọ́wó ná, ìyẹn ò ní jẹ́ kí nǹkan nira jù fún ẹ nígbà ìṣòro.
Fi sọ́kàn pé nǹkan lè yí pa dà nígbàkigbà. Owó tàbí ohun ìní rẹ lè má níyì mọ́ tó bá dọ̀la.
Tẹ́nì kan bá lówó, ìyẹn ò túmọ̀ sí pé ó máa láyọ̀ tàbí pé ìdílé ẹ̀ máa wà níṣọ̀kan.

Ohun Tó O Lè Ṣe Ní Báyìí

Bíbélì sọ pé: “Tí a bá ti ní oúnjẹ àti aṣọ, àwọn nǹkan yìí máa tẹ́ wa lọ́rùn.”—1 Tímótì 6:8.

Tó o bá ní ìtẹ́lọ́rùn, o ò ní máa wá àwọn nǹkan tó kàn wù ẹ́. Kàkà bẹ́ẹ̀, inú ẹ á máa dùn ọkàn ẹ á sì balẹ̀ tó o bá ti rí àwọn ohun pàtàkì tó o nílò. Èyí máa ràn ẹ́ lọ́wọ́ gan-an tí nǹkan bá yí pa dà fún ẹ.

Kó o lè ní ìtẹ́lọ́rùn, o máa ní láti ṣe àwọn àtúnṣe pàtàkì kan. Bí àpẹẹrẹ, á dáa kó o máa ṣọ́wó ná, kó o má sì ṣe ju agbára ẹ lọ. Torí tó o bá ń ná ju iye tó ń wọlé fún ẹ, ìyẹn lè mú kí nǹkan nira.

KÍ LỌ̀NÀ ÀBÁYỌ?—Ohun Tó O Lè Ṣe

Tó o bá ń ṣe àwọn nǹkan yìí, àtijẹ àtimu ò ní nira fún ẹ tí àjálù bá ṣẹlẹ̀ tàbí tí nǹkan ò rí bó ṣe yẹ kó rí nílùú

DÍN ÌNÁWÓ RẸ KÙ

Dín ìnáwó rẹ kù

Àwọn ohun tó o nílò nìkan ni kó o máa rà. Bi ara ẹ pé: ‘Ṣé dandan ni kí n ra mọ́tò? Ṣé mo lè dáko kí n lè dín àwọn nǹkan tí mò ń fowó rà kù?’
Kó o tó ra ohunkóhun, bi ara ẹ pé: ‘Ṣé mo nílò nǹkan yìí? Ṣé máa lè bójú tó o lẹ́yìn tí mo bá rà á tán?’
Tí ohun kan bá wà tí ìjọba tàbí àwọn ará ìlú ṣètò láti fi ran àwọn èèyàn lọ́wọ́, o lè ní kí wọ́n ràn ẹ́ lọ́wọ́.

“Èmi àti ìdílé mi ronú lórí àwọn nǹkan tá à ń náwó lé. Ìyẹn mú ká dín iye tá à ń ná lórí eré ìnàjú kù. Lẹ́yìn náà, a bẹ̀rẹ̀ sí í jẹ àwọn oúnjẹ tí ò ní ná wa lówó púpọ̀.”—Gift.

ṢÈTÒ BÓ O ṢE MÁA NÁWÓ

Ṣètò bó o ṣe máa náwó

Bíbélì sọ pé: “Àwọn ohun tí òṣìṣẹ́ kára gbèrò láti ṣe máa ń yọrí sí rere, àmọ́ ó dájú pé gbogbo àwọn tó bá ń kánjú yóò di aláìní.” (Òwe 21:5) Tó o bá ṣètò bó o ṣe máa náwó, ìyẹn ò ní jẹ́ kó o máa ná ju iye tó ń wọlé fún ẹ.

Kọ iye tó o rò pé ó máa wọlé fún ẹ lóṣù sílẹ̀.
Ronú lórí iye tó ò ń ná lóṣooṣù lórí oúnjẹ, iná mànàmáná àtàwọn nǹkan míì, kó o wá kọ ọ́ sílẹ̀.
Lẹ́yìn náà, fi iye tó ò ń ná wéra pẹ̀lú iye tó ń wọlé fún ẹ. Tó o bá wá rí i pé iye tó o fẹ́ ná ti pọ̀ ju iye tó ń wọlé fún ẹ, á dáa kó o dín àwọn nǹkan tó ò ń náwó lé lórí kù.

“Oṣooṣù la máa ń kọ iye tó ń wọlé fún wa àti iye tá a fẹ́ ná sílẹ̀. A sì máa ń fi owó kan pamọ́ tá a lè ná nígbà tí nǹkan pàjáwìrì bá ṣẹlẹ̀. Ohun tá a ṣe yìí máa ń jẹ́ kí ọkàn wa balẹ̀ torí pé a ti mọ bá a ṣe fẹ́ ná owó tó ń wọlé fún wa.”—Carlos.

MÁ ṢE JẸ GBÈSÈ / MÁA FOWÓ PA MỌ́

Má ṣe jẹ gbèsè / máa fowó pa mọ́

Ṣètò bó o ṣe máa ná owó kó o máa bàa yá owó tó pọ̀ jù tàbí kó o má tiẹ̀ yáwó rárá. Dípò ìyẹn, ńṣe ni kó o máa fowó pa mọ́ kó o lè ra àwọn nǹkan tó o nílò.
Máa fi iye kan pa mọ́ lóṣooṣù torí ohun àìròtẹ́lẹ̀ lè ṣẹlẹ̀ nígbàkigbà.

MÁA ṢIṢẸ́ KÁRA / MÁ JẸ́ KÍṢẸ́ BỌ́ MỌ́ Ẹ LỌ́WỌ́

Bíbélì sọ pé: “Gbogbo iṣẹ́ àṣekára ló ní èrè.”—Òwe 14:23.

Máa ṣiṣẹ́ kára / má jẹ́ kíṣẹ́ bọ́ mọ́ ẹ lọ́wọ́

Máa ní èrò tó dáa nípa iṣẹ́ ẹ. Tó ò bá tiẹ̀ fi bẹ́ẹ̀ nífẹ̀ẹ́ iṣẹ́ tó ò ń ṣe báyìí, rántí pé ibẹ̀ lo ṣáà ti ń rówó tó o fi ń gbọ́ bùkátà ara ẹ.
Gbìyànjú láti jẹ́ ẹni tó ṣeé gbára lé kó o sì máa ṣiṣẹ́ kára. Ìyẹn ò ní jẹ́ kíṣẹ́ bọ́ mọ́ ẹ lọ́wọ́. Tí nǹkan bá sì yí pa dà fún ẹ, wàá tètè ríṣẹ́.

“Oríṣiríṣi iṣẹ́ ni mo máa ń ṣe, bíṣẹ́ náà ò bá tiẹ̀ wù mí tàbí tí owó ẹ̀ ò pọ̀ tó bí mo ṣe fẹ́. Ọwọ́ pàtàkì ni mo fi múṣẹ́, ojúlówó iṣẹ́ ni mo sì máa ń ṣe. Tí mo bá ń bá ẹnì kan ṣiṣẹ́, ńṣe ni mo máa ń ṣe é bí iṣẹ́ tara mi.”—Dmitriy.

Ohun tó o lè ṣe tó o bá ń wáṣẹ́ . . .

Má jókòó tẹtẹrẹ. Wáṣẹ́ lọ sọ́dọ̀ àwọn ilé iṣẹ́ tó o gbà pé wọ́n máa ní iṣẹ́ tó o lè ṣe, tí wọn ò bá tiẹ̀ sọ pé àwọn ń wá ẹni tó máa ṣe irú iṣẹ́ náà. Sọ fáwọn mọ̀lẹ́bí ẹ àtàwọn ọ̀rẹ́ ẹ pé ò ń wáṣẹ́.
Jẹ́ kí iṣẹ́ tó o bá rí tẹ́ ẹ lọ́rùn. Fi sọ́kàn pé o lè má ríṣẹ́ tó ní gbogbo nǹkan tó o fẹ́.