Hósíà

1 Ọ̀rọ̀ Jèhófà sí Hósíà* ọmọ Béérì, nígbà ayé Ùsáyà,+ Jótámù,+ Áhásì+ àti Hẹsikáyà,+ àwọn ọba Júdà+ àti nígbà ayé Jèróbóámù+ ọmọ Jóáṣì,+ ọba Ísírẹ́lì. 2 Nígbà tí Jèhófà bẹ̀rẹ̀ sí í gbẹnu Hósíà sọ̀rọ̀, Jèhófà sọ fún Hósíà pé: “Lọ, fẹ́ obìnrin oníṣekúṣe* kan, kí o sì ní àwọn ọmọ àlè,* nítorí pé nípasẹ̀ ìṣekúṣe,* ilẹ̀ yìí ti kúrò lẹ́yìn Jèhófà pátápátá.”+

3 Torí náà, ó lọ, ó fẹ́ Gómérì ọmọ Díbíláímù, obìnrin náà lóyún, ó sì bí ọmọkùnrin kan fún un.

4 Lẹ́yìn náà, Jèhófà sọ fún un pé: “Pe orúkọ rẹ̀ ní Jésírẹ́lì,* torí pé ní ìgbà díẹ̀ sí i, màá pe ilé Jéhù+ wá jíhìn fún ìtàjẹ̀sílẹ̀ tó wáyé ní Jésírẹ́lì, màá sì fòpin sí ìṣàkóso ilé Ísírẹ́lì.+ 5 Ní ọjọ́ yẹn, màá ṣẹ́ ọrun Ísírẹ́lì ní Àfonífojì* Jésírẹ́lì.”

6 Ó tún lóyún, ó sì bí ọmọbìnrin kan. Ọlọ́run wá sọ fún Hósíà pé: “Pe orúkọ rẹ̀ ní Lo-ruhámà,* torí mi ò ní ṣàánú+ ilé Ísírẹ́lì mọ́, ṣe ni màá lé wọn dà nù.+ 7 Ṣùgbọ́n màá ṣàánú ilé Júdà,+ èmi Jèhófà Ọlọ́run wọn á sì gbà wọ́n là;+ mi ò ní fi ọfà* tàbí idà tàbí ogun tàbí àwọn ẹṣin tàbí àwọn agẹṣin gbà wọ́n là.”+

8 Lẹ́yìn tó gba ọmú lẹ́nu Lo-ruhámà, ó lóyún, ó sì bí ọmọkùnrin kan. 9 Ọlọ́run sì sọ pé: “Pe orúkọ rẹ̀ ní Lo-ámì,* nítorí ẹ kì í ṣe èèyàn mi, mi ò sì ní jẹ́ tiyín.

10 “Iye àwọn èèyàn* Ísírẹ́lì máa dà bí iyanrìn òkun tí a kò lè díwọ̀n tàbí tí a kò lè kà.+ Níbi tí a ti sọ fún wọn pé, ‘Ẹ kì í ṣe èèyàn mi,’+ a ó pè wọ́n ní, ‘Àwọn ọmọ Ọlọ́run alààyè.’+ 11 A ó sì mú kí àwọn èèyàn Júdà àti ti Ísírẹ́lì ṣọ̀kan,+ wọ́n á yan olórí fún ara wọn, wọ́n á sì jáde kúrò ní ilẹ̀ náà, nítorí ọjọ́ ńlá ni ọjọ́ náà máa jẹ́ ní Jésírẹ́lì.+