• “Àkókò Ìtẹ́wọ́gbà”
    Àsọtẹ́lẹ̀ Aísáyà—Ìmọ́lẹ̀ fún Gbogbo Aráyé, Apá Kejì

    • 22. Báwo ni Jèhófà ṣe tẹnu mọ́ ọn pé òun ò ní gbàgbé àwọn èèyàn òun láé?

      22 Wàyí o, Aísáyà wá ń bá àwọn ìkéde Jèhófà nìṣó. Ó sọ tẹ́lẹ̀ pé yóò fẹ́ sú àwọn ọmọ Ísírẹ́lì tó wà nígbèkùn, wọn yóò sì fẹ́ sọ̀rètí nù. Aísáyà ní: “Síónì ń wí ṣáá pé: ‘Jèhófà ti fi mí sílẹ̀, Jèhófà tìkára rẹ̀ sì ti gbàgbé mi.’” (Aísáyà 49:14) Ṣé lóòótọ́ ni? Ṣé Jèhófà ti kọ àwọn èèyàn rẹ̀ sílẹ̀ tó sì ti gbàgbé wọn ni? Aísáyà gbẹnu sọ fún Jèhófà, ó ń bọ́rọ̀ lọ pé: “Aya ha lè gbàgbé ọmọ ẹnu ọmú rẹ̀ tí kì yóò fi ṣe ojú àánú sí ọmọ ikùn rẹ̀? Àní àwọn obìnrin wọ̀nyí lè gbàgbé, síbẹ̀, èmi kì yóò gbàgbé.” (Aísáyà 49:15) Èsì onífẹ̀ẹ́ gbáà lèyí jẹ́ látọ̀dọ̀ Jèhófà! Ìfẹ́ tí Ọlọ́run fẹ́ àwọn èèyàn rẹ̀ ju ìfẹ́ ìyá sí ọmọ lọ. Gbogbo ìgbà ló ń ro ti àwọn adúróṣinṣin rẹ̀. Bíi pé ó fín orúkọ wọn sí ara ọwọ́ rẹ̀ ló ṣe ń rántí wọn, ó ní: “Wò ó! Àtẹ́lẹwọ́ mi ni mo fín ọ sí. Àwọn ògiri rẹ wà ní iwájú mi nígbà gbogbo.”—Aísáyà 49:16.

      23. Báwo ni Pọ́ọ̀lù ṣe rọ àwọn Kristẹni láti ní ìdánilójú pé Jèhófà kò ní gbàgbé wọn?

      23 Nínú lẹ́tà tí àpọ́sítélì Pọ́ọ̀lù kọ sí àwọn ará Gálátíà, ó rọ àwọn Kristẹni pé: “Ẹ má ṣe jẹ́ kí a juwọ́ sílẹ̀ ní ṣíṣe ohun tí ó dára lọ́pọ̀lọpọ̀, nítorí ní àsìkò yíyẹ àwa yóò kárúgbìn bí a kò bá ṣàárẹ̀.” (Gálátíà 6:9) Ó sì kọ ọ̀rọ̀ ìṣírí yìí sí àwọn Hébérù pé: “Ọlọ́run kì í ṣe aláìṣòdodo tí yóò fi gbàgbé iṣẹ́ yín àti ìfẹ́ tí ẹ fi hàn fún orúkọ rẹ̀, ní ti pé ẹ ti ṣe ìránṣẹ́ fún àwọn ẹni mímọ́, ẹ sì ń bá a lọ ní ṣíṣe ìránṣẹ́.” (Hébérù 6:10) Kí á má ṣe rò ó láé pé Jèhófà ti gbàgbé àwọn èèyàn rẹ̀. Ìdí pàtàkì wà fún àwọn Kristẹni láti máa yọ̀ kí wọ́n sì dúró de Jèhófà bíi ti Síónì àtijọ́. Jèhófà kì í yẹhùn rárá lórí májẹ̀mú àti àwọn ìlérí rẹ̀.

  • “Àkókò Ìtẹ́wọ́gbà”
    Àsọtẹ́lẹ̀ Aísáyà—Ìmọ́lẹ̀ fún Gbogbo Aráyé, Apá Kejì

    • 25. Ìmúbọ̀sípò wo ló dé bá Ísírẹ́lì tẹ̀mí lákòókò òde òní?

      25 Ọ̀rọ̀ wọ̀nyí ní ìmúṣẹ ti òde òní. Ní àsìkò kan láàárín àwọn ọdún ìgbónágbóoru Ogun Àgbáyé Kìíní, Ísírẹ́lì tẹ̀mí wà láhoro àti ìgbèkùn. Ṣùgbọ́n ìmúbọ̀sípò dé bá a, ló bá bọ́ sínú párádísè tẹ̀mí. (Aísáyà 35:1-10) Ọ̀ràn rẹ̀ wá rí bíi ti ìlú tí ó dahoro tí Aísáyà ṣàpèjúwe rẹ̀, inú rẹ̀ dùn gan-an ni ká wí, bó ṣe wá rí i pé àwọn aláyọ̀ olùjọsìn Jèhófà tó já fáfá kún inú òun fọ́fọ́.