• “Mo Ti Fi Ọ̀rọ̀ Mi sí Ẹnu Rẹ”
    Ọ̀rọ̀ Tí Ọlọ́run Bá Wa Sọ Nípasẹ̀ Jeremáyà
    • Àwòrán tó wà ní ojú ìwé 6

      6, 7. Báwo la ṣe mọ̀ pé Ọlọ́run nífẹ̀ẹ́ sí Jeremáyà, báwo sì ni ipò nǹkan ṣe rí nígbà tí wọ́n bí i?

      6 Ìgbà gbogbo ni aya kan tó lóyún àti ọkọ rẹ̀ sábà máa ń ronú nípa bí ọjọ́ ọ̀la ọmọ tí wọ́n máa bí ṣe máa rí. Irú èèyàn wo ló máa jẹ́, kí ló máa fi ìgbésí ayé rẹ̀ ṣe, ìyẹn ohun tó máa nífẹ̀ẹ́ sí, iṣẹ́ tó máa ṣe nígbèésí ayé àti ohun tó máa gbé ṣe láyé? Àwọn òbí tìrẹ náà á ti ro irú nǹkan báwọ̀nyí rí. Irú ohun táwọn òbí Jeremáyà náà á sì ti ṣe nìyẹn. Àmọ́, ọ̀ràn tiẹ̀ ṣàrà ọ̀tọ̀. Kí nìdí tó fi rí bẹ́ẹ̀? Ìdí ni pé Ẹlẹ́dàá ayé òun ọ̀run dìídì nífẹ̀ẹ́ sí ìgbésí ayé Jeremáyà àtàwọn ìgbòkègbodò rẹ̀.—Ka Jeremáyà 1:5.

      7 Àní kí wọ́n tó bí Jeremáyà, Ọlọ́run tó mọ ọjọ́ iwájú ti rí i pé ó jẹ́ ẹni tó máa lè ṣe wòlíì. Ó dìídì nífẹ̀ẹ́ sí ọmọkùnrin yìí tí wọ́n máa bí sínú ìdílé àlùfáà kan tó ń gbé ní àríwá ìlú Jerúsálẹ́mù. Ìyẹn sì jẹ́ ní àárín ọ̀rúndún keje ṣáájú Sànmánì Kristẹni, nígbà tí nǹkan ò fara rọ ní Júdà nítorí ìṣàkóso Mánásè Ọba burúkú. (Wo ojú ìwé 19.) Ohun tó burú lójú Jèhófà ni Mánásè ń ṣe ní èyí tó pọ̀ jù nínú ọdún márùndínlọ́gọ́ta tó fi ṣàkóso. Ìwà kan náà ni Ámọ́nì ọmọ rẹ̀ tó jọba lẹ́yìn rẹ̀ hù. (2 Ọba 21:1-9, 19-26) Àmọ́, àyípadà ńlá dé nígbà tí ọba míì jẹ ní Júdà, ìyẹn Jòsáyà. Jòsáyà Ọba yìí wá Jèhófà ní tiẹ̀. Nígbà tó fi máa di ọdún kejìdínlógún ìjọba Jòsáyà, ó ti mú kí ìbọ̀rìṣà kásẹ̀ nílẹ̀ ní Júdà. Ó dájú pé èyí á dùn mọ́ àwọn òbí Jeremáyà nínú gan-an. Ìgbà ìṣàkóso Jòsáyà yìí ni Ọlọ́run sọ ọmọ wọn di wòlíì.—2 Kíró. 34:3-8.

  • “Mo Ti Fi Ọ̀rọ̀ Mi sí Ẹnu Rẹ”
    Ọ̀rọ̀ Tí Ọlọ́run Bá Wa Sọ Nípasẹ̀ Jeremáyà

    • ỌLỌ́RUN YAN AGBỌ̀RỌ̀SỌ KAN

       8. Iṣẹ́ wo ni Ọlọ́run yàn fún Jeremáyà, báwo ló sì ṣe rí lára Jeremáyà?

      8 A ò mọ ọjọ́ orí Jeremáyà nígbà tí Ọlọ́run sọ fún un pé: “Wòlíì fún àwọn orílẹ̀-èdè ni mo fi ọ́ ṣe.” Bóyá yóò ti fẹ́rẹ̀ẹ́ tó ọmọ ọdún mẹ́ẹ̀ẹ́dọ́gbọ̀n, ìyẹn ọdún táwọn àlùfáà kọ́kọ́ máa ń bẹ̀rẹ̀ iṣẹ́ ìsìn. (Núm. 8:24) Àmọ́, ohun tí Jeremáyà fi fèsì ni pé: “Págà, Jèhófà Olúwa Ọba Aláṣẹ! Kíyè sí i, èmi kò tilẹ̀ mọ ọ̀rọ̀ sọ, nítorí pé ọmọdé lásán ni mí.” (Jer. 1:6) Jeremáyà lọ́ tìkọ̀, torí ó ṣeé ṣe kó máa ronú pé òun kéré sí ẹni tó ń ṣe irú iṣẹ́ ńlá yẹn àti pé òun ò tún lágbaja àtimáa báwùjọ èèyàn sọ̀rọ̀ bí àwọn wòlíì ṣe máa ń ṣe.