3. Bawo ni liloye awọn àkàwé Jesu ṣe lè mú anfaani wá fun wa?

³ Jesu lẹhin naa fi ọrọ Isaiah 6:9, 10 silo, eyi ti o ṣapejuwe awọn eniyan kan ti wọn dití ti wọn sì fọ́jú nipa tẹmi. Bi o ti wu ki o ri, awa, kò nilati rí bẹẹ. Bi a bá lóye ti a sì huwa lori awọn àkàwé rẹ̀, a lè jẹ́ alayọ gan-an—nisinsinyi ati wọnu ọjọ-ọla alailopin. Jesu pese idaniloju amárayágágá yii fun wa pe: “Alayọ ni oju yin nitori wọn rí, ati etí yin nitori wọn gbọ́.” (Matteu 13:16, NW) Idaniloju yẹn kárí gbogbo awọn apejuwe Jesu, ṣugbọn ẹ jẹ ki a kó afiyesi jọ sori owe àkàwé ṣoki ti àwọ̀n-ìpẹja, ti a ṣakọsilẹ rẹ̀ ni Matteu 13:47-50.

Apejuwe Kan Ti Ó Ní Itumọ Jijinlẹ

 4. Ki ni Jesu fi àkàwé sọ, gẹgẹ bi a ti ṣe akọsilẹ rẹ̀ ní Matteu 13:47-50?

⁴ “Ijọba awọn ọ̀run dabii àwọ̀n-ìpẹja kan ti a dà sinu òkun ti o sì kó gbogbo oniruuru ẹja. Nigba ti ó kún wọn fà á wá si etíkun ati, ni jijokoo wọn ṣa awọn ti o dara sinu awọn ohun eelo, ṣugbọn awọn alaiyẹ ni wọn danu. Bi yoo ti ri niyẹn ni ipari eto igbekalẹ awọn nǹkan: awọn angẹli yoo jade lọ wọn o sì ya awọn eniyan buruku sọtọ kuro lara awọn olododo wọn ó sì ju wọn sinu ìléru oníná. Nibẹ ni sisunkun wọn ati pipahinkeke wọn yoo wà.”

 7. Ki ni Jesu ń ṣàkàwé nigba ti o sọrọ nipa ẹja?

⁷ Ni ibamu pẹlu iyẹn, ẹja naa ninu owe àkàwé yii duro fun awọn eniyan. Fun idi yii, nigba ti ẹsẹ 49 sọ nipa yiya awọn ẹni buburu sọtọ kuro lara awọn olododo, ó ń tọkasi, kì í ṣe awọn ohun alaaye olododo tabi buburu ti ń gbé inu agbami òkun, ṣugbọn si awọn olododo ati eniyan buburu. Lọna kan naa, ẹsẹ 50 kò gbọdọ mú wa ronu nipa awọn ẹran omi tí ń sunkun tabi pa ehín wọn keke. Bẹẹkọ. Owe àkàwé yii dá lori kiko awọn eniyan jọpọ ati ìyàsọ́tọ̀ wọn lẹhin naa, eyi ti ó se pataki gan-an, gẹgẹ bi abajade ti fihan.

 8. (a) Ki ni a lè kẹkọọ rẹ̀ niti abajade fun awọn ẹja ti kò yẹ? (b) Ni oju-iwoye ohun ti a sọ nipa awọn ẹja ti kò yẹ, ki ni a lè pari ero sí nipa Ijọba naa?

⁸ Ṣakiyesi pe awọn ẹja alaiyẹ, iyẹn ni, awọn ẹni buburu, ni a o gbé sọ sinu ìléru oníná, nibi ti wọn yoo ti sunkun ti wọn yoo sì pa ehín wọn keke. Nibomiran Jesu so iru ẹkún sísun ati ìpahínkeke bẹẹ mọ wíwà lẹhin ode Ijọba naa. (Matteu 8:12; 13:41, 42) Ni Matteu 5:22 ati 18:9, ó tilẹ mẹnukan “Gehenna oníná,” ti ń tọka si iparun titilae. Iyẹn kò ha fi bi o ti ṣe pataki tó lati lóye itumọ àkàwé yii ki a sì huwa lọna ti ó baa mu hàn bi? Gbogbo wa mọ pe kò sí bẹẹ ni ki yoo sí awọn ẹni buburu ninu Ijọba Ọlọrun. Fun idi yii, nigba ti Jesu sọ pe “ijọba awọn ọ̀run dabi àwọ̀n-ìpẹja,” oun ti lè ní in lọ́kàn pe ni isopọ pẹlu Ijọba Ọlọrun, ohun kan ti ó dabi àwọ̀n ti a dà silẹ lati kó oniruuru gbogbo ẹja wà.