17. Ipa wo ni ìsẹ̀lẹ̀ ńlá náà ní lórí oòrùn, òṣùpá àtàwọn ìràwọ̀?

¹⁷ Bí Jòhánù ṣe ń bá a lọ láti fi hàn wá, àwọn ìṣẹ̀lẹ̀ bíbani lẹ́rù tó kan ọ̀run pàápàá bá ìsẹ̀lẹ̀ ńlá náà rìn. Ó wí pé: “Oòrùn sì di dúdú bí aṣọ àpò [ìdọ̀họ] tí a fi irun ṣe, òṣùpá sì dà bí ẹ̀jẹ̀ látòkè délẹ̀, àwọn ìràwọ̀ ọ̀run sì jábọ́ sí ilẹ̀ ayé, bí ìgbà tí igi ọ̀pọ̀tọ́ tí ẹ̀fúùfù líle mì bá gbọn àwọn èso ọ̀pọ̀tọ́ rẹ̀ tí kò pọ́n dànù.” (Ìṣípayá 6:12b, 13) Àrà mérìíyìírí gbáà mà lèyí o! Ǹjẹ́ o lè ronú nípa bí òkùnkùn tí àsọtẹ́lẹ̀ yìí á yọrí sí ṣe máa da jìnnìjìnnì boni tó nígbà tó bá ní ìmúṣẹ bí wòlíì náà ṣe sọ ọ́ gan-an? Kò ní sí ìmọ́lẹ̀ oòrùn lílọ́wọ́ọ́wọ́, tí ń tuni lára lọ́sàn-án mọ́! Kò ní sí ìmọ́lẹ̀ òṣùpá gbígbádùn mọ́ni, aláwọ̀ fàdákà ní òru mọ́! Ẹgbàágbèje ìràwọ̀ ò ní ṣẹ́jú wẹ́lẹ́wẹ́lẹ́ ní sánmà mọ́ rárá. Dípò bẹ́ẹ̀, òkùnkùn dídúdú kirikiri, tó máa ń mú kí nǹkan súni ló máa wà.—Fi wé Mátíù 24:29.

17. Ipa wo ni ìsẹ̀lẹ̀ ńlá náà ní lórí oòrùn, òṣùpá àtàwọn ìràwọ̀?

¹⁷ Bí Jòhánù ṣe ń bá a lọ láti fi hàn wá, àwọn ìṣẹ̀lẹ̀ bíbani lẹ́rù tó kan ọ̀run pàápàá bá ìsẹ̀lẹ̀ ńlá náà rìn. Ó wí pé: “Oòrùn sì di dúdú bí aṣọ àpò [ìdọ̀họ] tí a fi irun ṣe, òṣùpá sì dà bí ẹ̀jẹ̀ látòkè délẹ̀, àwọn ìràwọ̀ ọ̀run sì jábọ́ sí ilẹ̀ ayé, bí ìgbà tí igi ọ̀pọ̀tọ́ tí ẹ̀fúùfù líle mì bá gbọn àwọn èso ọ̀pọ̀tọ́ rẹ̀ tí kò pọ́n dànù.” (Ìṣípayá 6:12b, 13) Àrà mérìíyìírí gbáà mà lèyí o! Ǹjẹ́ o lè ronú nípa bí òkùnkùn tí àsọtẹ́lẹ̀ yìí á yọrí sí ṣe máa da jìnnìjìnnì boni tó nígbà tó bá ní ìmúṣẹ bí wòlíì náà ṣe sọ ọ́ gan-an? Kò ní sí ìmọ́lẹ̀ oòrùn lílọ́wọ́ọ́wọ́, tí ń tuni lára lọ́sàn-án mọ́! Kò ní sí ìmọ́lẹ̀ òṣùpá gbígbádùn mọ́ni, aláwọ̀ fàdákà ní òru mọ́! Ẹgbàágbèje ìràwọ̀ ò ní ṣẹ́jú wẹ́lẹ́wẹ́lẹ́ ní sánmà mọ́ rárá. Dípò bẹ́ẹ̀, òkùnkùn dídúdú kirikiri, tó máa ń mú kí nǹkan súni ló máa wà.—Fi wé Mátíù 24:29.

20. Àbárèbábọ̀ bíbanilẹ́rù wo ló ń dúró de ètò àwọn nǹkan yìí nígbà tí ìsẹ̀lẹ̀ ńlá náà bá sẹ̀?

²⁰ Bákan náà, nígbà tí ìsẹ̀lẹ̀ délé-dóko náà bá sẹ̀, gbogbo ètò ayé yìí ni òkùnkùn biribiri á bò nítorí pé kò ní sí ìrètí kankan fún wọn. Ìrètí kankan ò ní sí látọ̀dọ̀ ètò Sátánì orí ilẹ̀ ayé, tó dà bí orísun ìmọ́lẹ̀ tí ń dán yanran. Àní lákòókò wa yìí, àwọn olóṣèlú ayé, pàápàá jù lọ, àwọn oníṣọ́ọ̀ṣì, làwọn èèyàn ti mọ̀ pé wọ́n ń hùwà ìbàjẹ́, wọ́n ń pa fóò nínú irọ́, wọ́n sì ń ṣèṣekúṣe. (Aísáyà 28:14-19) Wọn ò yẹ lẹ́ni téèyàn í gbẹ́kẹ̀ lé mọ́. Ìmọ́lẹ̀ wọn tí ń di bàìbàì yóò sì mòòkùn pátápátá nígbà tí Jèhófà bá mú ìdájọ́ ṣẹ ní kíkún. Àṣírí agbára tí wọ́n ní lórí bí nǹkan ṣe ń lọ sí nínú ayé máa tú, a óò rí i pé ọwọ́ wọn kún fún ẹ̀jẹ̀, apààyàn sì ni wọ́n. Títán máa dé bá àwọn ògbóǹtarìgì tó ń tàn bí ìràwọ̀ lára wọn, wọ́n á di fífẹ́ pa bí ìràwọ̀ tó já wálẹ̀ dòò, ìjì ẹ̀fúùfù ńláńlá á sì tú wọn ká bí èso ọ̀pọ̀tọ́ tí kò gbó. ‘Ìpọ́njú ńlá, irú èyí tí kò tíì ṣẹlẹ̀ láti ìbẹ̀rẹ̀pẹ̀pẹ̀ ayé títí di ìsinsìnyí, tí kì yóò sì tún ṣẹlẹ̀ mọ́,’ á mi gbogbo ilẹ̀ ayé wa tìtì. (Mátíù 24:21) Ẹ wo bí ohun tá à ń retí yìí ti bani lẹ́rù tó!