Ẹ̀kọ́ Bíbélì tó o kọ́ lọ́dọ̀ àwa Ẹlẹ́rìí Jèhófà ti jẹ́ kó o mọ òtítọ́. Ó sì dájú pé àwọn ẹ̀kọ́ yẹn ti jẹ́ kó o di ọ̀rẹ́ Ọlọ́run, ó tún ti jẹ́ kó o nírètí pé ọ̀la ń bọ̀ wá dáa àti pé wàá gbádùn ọ̀pọ̀ ìbùkún nínú Párádísè lábẹ́ Ìjọba Ọlọ́run. Ìgbàgbọ́ tó o ní nínú Ọ̀rọ̀ Ọlọ́run ti lágbára sí i, o sì ti rí ọ̀pọ̀ ìbùkún látìgbà tó o ti ń dara pọ̀ mọ́ ìjọ Kristẹni. O ti wá lóye bí Jèhófà ṣe ń bójú tó àwọn èèyàn rẹ̀ lónìí.​—Sek. 8:23.

Bó o ṣe ń gbára dì fún ìrìbọmi, wàá rí ẹ̀kọ́ kọ́ látinú àtúnyẹ̀wò táwọn alàgbà máa ṣe pẹ̀lú rẹ nípa àwọn ohun táwọn Kristẹni gbà gbọ́. (Héb. 6:1-3) Àdúrà wa ni pé kí Jèhófà máa bù kún gbogbo ìsapá rẹ láti túbọ̀ mọ̀ ọ́n, kí ìyè àìnípẹ̀kun tó ṣèlérí sì jẹ́ tìrẹ.​—Jòh. 17:3.

1. Kí nìdí tó o fi fẹ́ ṣèrìbọmi?

2. Ta ni Jèhófà?

• “Jèhófà ni Ọlọ́run tòótọ́ lókè ọ̀run àti lórí ilẹ̀ ayé. Kò sí ẹlòmíì.”​—Diu. 4:39.

• “Ìwọ, ẹni tí orúkọ rẹ̀ ń jẹ́ Jèhófà, ìwọ nìkan ṣoṣo ni Ẹni Gíga Jù Lọ lórí gbogbo ayé.”​—Sm. 83:18.

3. Kí nìdí tó fi yẹ kó o máa lo orúkọ Ọlọ́run?

• “Ẹ máa gbàdúrà lọ́nà yìí: ‘Baba wa tí ń bẹ ní ọ̀run, kí orúkọ rẹ di mímọ́.’ ”​—Mát. 6:9.

• “Gbogbo ẹni tó bá ń ké pe orúkọ Jèhófà yóò rí ìgbàlà.”​—Róòmù 10:13.

4. Àwọn ọ̀rọ̀ wo ni Bíbélì lò láti ṣàpèjúwe Jèhófà?

• “Jèhófà, Ẹlẹ́dàá àwọn ìkángun ayé, jẹ́ Ọlọ́run títí ayé.”​—Àìsá. 40:28.

• “Baba wa tí ń bẹ ní ọ̀run.”​—Mát. 6:9.

• “Ọlọ́run jẹ́ ìfẹ́.”​—1 Jòh. 4:8.

5. Kí lo lè fún Jèhófà Ọlọ́run?

• “Fi gbogbo ọkàn rẹ àti gbogbo ara rẹ àti gbogbo èrò rẹ àti gbogbo okun rẹ nífẹ̀ẹ́ Jèhófà Ọlọ́run rẹ.”​—Máàkù 12:30.

• “Jèhófà Ọlọ́run rẹ ni o gbọ́dọ̀ jọ́sìn, òun nìkan ṣoṣo sì ni o gbọ́dọ̀ ṣe iṣẹ́ ìsìn mímọ́ fún.”​—Lúùkù 4:8.

6. Kí nìdí tó o fi fẹ́ jẹ́ adúróṣinṣin sí Jèhófà?

• “Ọmọ mi, jẹ́ ọlọ́gbọ́n, kí o sì mú ọkàn mi yọ̀, kí n lè fún ẹni tó ń pẹ̀gàn mi lésì.”​—Òwe 27:11.

7. Ta lo máa ń gbàdúrà sí, orúkọ ta lo sì máa fi ń gbàdúrà?

• “Lóòótọ́-lóòótọ́ ni mo [Jésù] sọ fún yín, tí ẹ bá béèrè ohunkóhun lọ́wọ́ Baba, ó máa fún yín ní orúkọ mi.”​—Jòh. 16:23.

8. Àwọn nǹkan wo lo lè gbàdúrà fún?

• “Torí náà, ẹ máa gbàdúrà lọ́nà yìí: ‘Baba wa tí ń bẹ ní ọ̀run, kí orúkọ rẹ di mímọ́. Kí Ìjọba rẹ dé. Kí ìfẹ́ rẹ ṣẹ ní ayé, bíi ti ọ̀run. Fún wa ní oúnjẹ òòjọ́ wa lónìí; kí o sì dárí àwọn gbèsè wa jì wá, bí àwa náà ṣe dárí ji àwọn tó jẹ wá ní gbèsè. Má sì mú wa wá sínú ìdẹwò, ṣùgbọ́n gbà wá lọ́wọ́ ẹni burúkú náà.’ ”​—Mát. 6:9-13.

• “Ohun tó dá wa lójú nípa rẹ̀ ni pé, tí a bá béèrè ohunkóhun tó bá ìfẹ́ rẹ̀ mu, ó ń gbọ́ wa.”​—1 Jòh. 5:14.

9. Kí ló lè mú kí Jèhófà má gbọ́ àdúrà ẹnì kan?

• “Wọ́n á ké pe Jèhófà pé kó ran àwọn lọ́wọ́, àmọ́ kò ní dá wọn lóhùn . . . torí ìwà burúkú wọn.”​—Míkà 3:4.

• “Ojú Jèhófà wà lára àwọn olódodo, etí rẹ̀ sì ṣí sí ìrawọ́ ẹ̀bẹ̀ wọn; àmọ́ Jèhófà kọjú ìjà sí àwọn tó ń ṣe ohun búburú.”​—1 Pét. 3:12.

10. Ta ni Jésù Kristi?

• “Símónì Pétérù dáhùn pé: ‘Ìwọ ni Kristi náà, Ọmọ Ọlọ́run alààyè.’ ”​—Mát. 16:16.

11. Kí nìdí tí Jésù fi wá sáyé?

• “Gẹ́gẹ́ bí Ọmọ èèyàn ò ṣe wá ká lè ṣe ìránṣẹ́ fún un, àmọ́ kó lè ṣe ìránṣẹ́, kó sì fi ẹ̀mí rẹ̀ ṣe ìràpadà ní pàṣípààrọ̀ fún ọ̀pọ̀lọpọ̀ èèyàn.”​—Mát. 20:28.

• “Mo [Jésù] tún gbọ́dọ̀ kéde ìhìn rere Ìjọba Ọlọ́run fún àwọn ìlú míì, torí pé nítorí èyí la ṣe rán mi.”​—Lúùkù 4:43.

12. Báwo lo ṣe lè fi hàn pé o mọrírì bí Jésù ṣe kú fún wa?

• “Ó sì kú fún gbogbo wọn kí àwọn tó wà láàyè má ṣe tún wà láàyè fún ara wọn mọ́, bí kò ṣe fún ẹni tó kú fún wọn, tí a sì gbé dìde.”​—2 Kọ́r. 5:15.

13. Àṣẹ wo ni Jésù ní?

• “Gbogbo àṣẹ ní ọ̀run àti ayé la ti fún mi.”​—Mát. 28:18.

• ‘Ọlọ́run gbé e sí ipò gíga, ó sì fún un ní orúkọ tó lékè gbogbo orúkọ mìíràn.’​—Fílí. 2:9.

14. Ṣé o gbà pé Ìgbìmọ̀ Olùdarí Àwa Ẹlẹ́rìí Jèhófà ni “ẹrú olóòótọ́ àti olóye” tí Jésù yàn?

• “Ta ni ẹrú olóòótọ́ àti olóye tí ọ̀gá rẹ̀ yàn pé kó máa bójú tó àwọn ará ilé rẹ̀, kó máa fún wọn ní oúnjẹ wọn ní àkókò tó yẹ?”​—Mát. 24:45.

15. Ṣé ẹnì kan ni ẹ̀mí mímọ́?

• “Áńgẹ́lì náà dá a lóhùn pé: ‘Ẹ̀mí mímọ́ máa bà lé ọ, agbára Ẹni Gíga Jù Lọ sì máa ṣíji bò ọ́. Ìdí nìyẹn tí a fi máa pe ẹni tí o bí ní mímọ́, Ọmọ Ọlọ́run.’ ”​—Lúùkù 1:35.

• “Torí náà, tí ẹ̀yin bá mọ bí ẹ ṣe ń fún àwọn ọmọ yín ní ẹ̀bùn tó dáa, bó tiẹ̀ jẹ́ pé ẹni burúkú ni yín, mélòómélòó wá ni Baba yín tó wà ní ọ̀run, ó máa fi ẹ̀mí mímọ́ fún àwọn tó ń béèrè lọ́wọ́ rẹ̀!”​—Lúùkù 11:13.

16. Àwọn ọ̀nà wo ni Jèhófà ti gbà lo ẹ̀mí mímọ́ rẹ̀?

• “Ọ̀rọ̀ ni Jèhófà fi dá àwọn ọ̀run, nípa èémí ẹnu rẹ̀ sì ni gbogbo ohun tó wà nínú wọn fi wà.”​—Sm. 33:6.

• “Ẹ ó gba agbára nígbà tí ẹ̀mí mímọ́ bá bà lé yín, ẹ ó sì jẹ́ ẹlẹ́rìí mi . . . títí dé ibi tó jìnnà jù lọ ní ayé.”​—Ìṣe 1:8.

• “Kò sí àsọtẹ́lẹ̀ kankan nínú Ìwé Mímọ́ tó wá látinú èrò ara ẹni èyíkéyìí. Torí a ò fìgbà kankan rí mú àsọtẹ́lẹ̀ wá nípasẹ̀ ìfẹ́ èèyàn, àmọ́ àwọn èèyàn sọ̀rọ̀ látọ̀dọ̀ Ọlọ́run bí ẹ̀mí mímọ́ ṣe darí wọn.”​—2 Pét. 1:20, 21.

17. Kí ni Ìjọba Ọlọ́run?

• “Ọlọ́run ọ̀run máa gbé ìjọba kan kalẹ̀, tí kò ní pa run láé. A ò ní gbé ìjọba yìí fún èèyàn èyíkéyìí míì. Ó máa fọ́ àwọn ìjọba yìí túútúú, ó máa fòpin sí gbogbo wọn, òun nìkan ló sì máa dúró títí láé.”​—Dán. 2:44.

18. Àǹfààní wo ni Ìjọba Ọlọ́run máa ṣe fún ẹ?

• “Ó máa nu gbogbo omijé kúrò ní ojú wọn, ikú ò ní sí mọ́, kò ní sí ọ̀fọ̀ tàbí ẹkún tàbí ìrora mọ́. Àwọn nǹkan àtijọ́ ti kọjá lọ.”​—Ìfi. 21:4.

19. Báwo lo ṣe mọ̀ pé Ìjọba Ọlọ́run ò ní pẹ́ dé?

• “Àwọn ọmọ ẹ̀yìn wá bá a ní òun nìkan, wọ́n sọ pé: ‘Sọ fún wa, ìgbà wo ni àwọn nǹkan yìí máa ṣẹlẹ̀, kí ló sì máa jẹ́ àmì pé o ti wà níhìn-ín àti ti ìparí ètò àwọn nǹkan?’ Jésù dá wọn lóhùn pé: ‘. . . Orílẹ̀-èdè máa dìde sí orílẹ̀-èdè àti ìjọba sí ìjọba, àìtó oúnjẹ àti ìmìtìtì ilẹ̀ sì máa wà láti ibì kan dé ibòmíì. A ó sì wàásù ìhìn rere Ìjọba yìí ní gbogbo ilẹ̀ ayé tí à ń gbé, kó lè jẹ́ ẹ̀rí fún gbogbo orílẹ̀-èdè, nígbà náà ni òpin yóò dé.’ ”​—Mát. 24:3, 4, 7, 14.

• “Àwọn ọjọ́ ìkẹyìn yóò jẹ́ àkókò tí nǹkan máa le gan-an, tó sì máa nira. Torí àwọn èèyàn máa nífẹ̀ẹ́ ara wọn nìkan, wọ́n á nífẹ̀ẹ́ owó, wọ́n á jẹ́ afọ́nnu, agbéraga, asọ̀rọ̀ òdì, aṣàìgbọràn sí òbí, aláìmoore, aláìṣòótọ́, ẹni tí kò ní ìfẹ́ àdámọ́ni, kìígbọ́-kìígbà, abanijẹ́, ẹni tí kò lè kó ara rẹ̀ níjàánu, ẹni tó burú gan-an, ẹni tí kò nífẹ̀ẹ́ ohun rere, ọ̀dàlẹ̀, alágídí, ajọra-ẹni-lójú, wọ́n á fẹ́ràn ìgbádùn dípò Ọlọ́run, wọ́n á jọ ẹni tó ń sin Ọlọ́run tọkàntọkàn, àmọ́ ìṣe wọn ò ní fi agbára rẹ̀ hàn.”​—2 Tím. 3:1-5.

20. Báwo lo ṣe lè fi hàn pé Ìjọba Ọlọ́run ṣe pàtàkì sí ẹ?

• “Ẹ máa wá Ìjọba náà àti òdodo Rẹ̀ lákọ̀ọ́kọ́.”​—Mát. 6:33.

• “Jésù wá sọ fún àwọn ọmọ ẹ̀yìn rẹ̀ pé: ‘Tí ẹnikẹ́ni bá fẹ́ máa tẹ̀ lé mi, kó sẹ́ ara rẹ̀, kó gbé òpó igi oró rẹ̀, kó sì máa tẹ̀ lé mi.’ ”​—Mát. 16:24.

21. Ta ni Sátánì àtàwọn ẹ̀mí-èṣù?

• “Ọ̀dọ̀ Èṣù bàbá yín lẹ ti wá . . . Apààyàn ni ẹni yẹn nígbà tó bẹ̀rẹ̀.”​—Jòh. 8:44.

• “A wá ju dírágónì ńlá náà sísàlẹ̀, ejò àtijọ́ náà, ẹni tí à ń pè ní Èṣù àti Sátánì, tó ń ṣi gbogbo ilẹ̀ ayé tí à ń gbé lọ́nà; a jù ú sí ayé, a sì ju àwọn áńgẹ́lì rẹ̀ sísàlẹ̀ pẹ̀lú rẹ̀.”​—Ìfi. 12:9.

22. Ẹ̀sùn wo ni Sátánì fi kan Jèhófà àtàwọn tó ń jọ́sìn Rẹ̀?

• “Ni obìnrin náà bá sọ fún ejò yẹn pé: ‘A lè jẹ lára àwọn èso igi inú ọgbà. Àmọ́ Ọlọ́run sọ fún wa nípa èso igi tó wà láàárín ọgbà pé: “Ẹ ò gbọ́dọ̀ jẹ ẹ́, kódà, ẹ ò gbọ́dọ̀ fọwọ́ kàn án; kí ẹ má bàa kú.” ’ Ejò yẹn wá sọ fún obìnrin náà pé: ‘Ó dájú pé ẹ ò ní kú. Torí Ọlọ́run mọ̀ pé ọjọ́ tí ẹ bá jẹ ẹ́ ni ojú yín máa là, ẹ máa dà bí Ọlọ́run, ẹ sì máa mọ rere àti búburú.’ ”​—Jẹ́n. 3:2-5.

• “Sátánì dá Jèhófà lóhùn pé: ‘Awọ dípò awọ. Gbogbo ohun tí èèyàn bá ní ló máa fi dípò ẹ̀mí rẹ̀.’ ”​—Jóòbù 2:4.

23. Báwo lo ṣe lè fi hàn pé irọ́ làwọn ọ̀rọ̀ Sátánì?

• ‘Fi gbogbo ọkàn sin [Ọlọ́run].’​—1 Kíró. 28:9.

• “Títí màá fi kú, mi ò ní fi ìwà títọ́ mi sílẹ̀!”​—Jóòbù 27:5.

24. Kí ló fa ikú?

• ‘Ẹ̀ṣẹ̀ tipasẹ̀ ẹnì kan wọ ayé, ikú sì wá nípasẹ̀ ẹ̀ṣẹ̀, bẹ́ẹ̀ ni ikú ṣe tàn dé ọ̀dọ̀ gbogbo èèyàn torí pé gbogbo wọn ti dẹ́ṣẹ̀.’​—Róòmù 5:12.

25. Kí ló ń ṣẹlẹ̀ sáwọn tó ti kú?

• “Àwọn alààyè mọ̀ pé àwọn máa kú, àmọ́ àwọn òkú kò mọ nǹkan kan rárá.”​—Oníw. 9:5.

26. Ìrètí wo ló wà fún àwọn tó ti kú?

• “Àjíǹde àwọn olódodo àti àwọn aláìṣòdodo yóò wà.”​—Ìṣe 24:15.

27. Àwọn mélòó ló máa lọ sọ́run láti jọba pẹ̀lú Jésù?

• “Wò ó! mo rí Ọ̀dọ́ Àgùntàn náà tó dúró lórí Òkè Síónì, àwọn ọ̀kẹ́ méje ó lé ẹgbàajì (144,000) wà pẹ̀lú rẹ̀, a kọ orúkọ rẹ̀ àti orúkọ Baba rẹ̀ sí iwájú orí wọn.”​—Ìfi. 14:1.

Àwọn ohun tó o kọ́ nínú Bíbélì ti jẹ́ kó o mọ ohun tí Jèhófà fẹ́ kó o máa ṣe àti bó o ṣe lè jẹ́ kí ìlànà òdodo Jèhófà máa darí ìgbésí ayé rẹ. Àwọn ohun tó o kọ́ ti lè mú kó o ṣe àwọn àtúnṣe kan nínú ìwà rẹ àti bó o ṣe ń ronú. Ní báyìí tó o sì ti pinnu láti jẹ́ kí ìlànà òdodo Jèhófà máa darí ìgbé ayé rẹ, o ti ń sin Ọlọ́run lọ́nà tó tọ́ gẹ́gẹ́ bí òjíṣẹ́ tó ń wàásù ìhìn rere.

Àwọn ìbéèrè tá a fẹ́ fi ṣàtúnyẹ̀wò yìí á jẹ́ káwọn ìlànà òdodo Jèhófà túbọ̀ wọ̀ ẹ́ lọ́kàn, á sì tún rán ẹ létí díẹ̀ lára àwọn nǹkan tó o lè máa ṣe kó o lè di ọ̀kan lára àwọn ìránṣẹ́ rẹ̀ tó tẹ́wọ́ gbà. Àlàyé yìí máa jẹ́ kó o túbọ̀ mọ bó ti ṣe pàtàkì tó pé kó o máa fi ẹ̀rí ọkàn tó dáa ṣe gbogbo nǹkan lọ́nà tó máa fi ìyìn fún Jèhófà.​—2 Kọ́r. 1:12; 1 Tím. 1:19; 1 Pét. 3:16, 21.

Níbi tó o kẹ́kọ̀ọ́ dé yìí, ó dájú pé ó wù ẹ́ pé kí Jèhófà máa darí rẹ, kó o sì wà nínú ètò rẹ̀. Àwọn ìbéèrè àtàwọn ẹsẹ Ìwé Mímọ́ tó wà níbẹ̀ á jẹ́ kó o mọ̀ bóyá lóòótọ́ lo mọ ohun tó túmọ̀ sí láti jẹ́ kí Jèhófà máa darí rẹ nínú ìjọ, nínú ìdílé àti nínú àwọn ọ̀rọ̀ tó kan àwọn ìjọba ayé yìí. Ó dájú pé wàá túbọ̀ mọyì ètò tí Jèhófà ṣe kó lè máa kọ́ àwọn èèyàn rẹ̀ lẹ́kọ̀ọ́, kó sì mú kí ìgbàgbọ́ wọn túbọ̀ lágbára. Lára àwọn ètò náà ni àwọn ìpàdé ìjọ, ó sì dájú pé wàá máa wá, wàá sì máa kópa níbẹ̀ déédéé tó bá ṣe lè ṣeé ṣe tó.

Yàtọ̀ síyẹn, nínú apá yìí, a máa jíròrò ìdí tó fi ṣe pàtàkì pé kó o máa wàásù Ìjọba Ọlọ́run déédéé, kó o sì ran àwọn míì lọ́wọ́ láti wá mọ Jèhófà àti ohun tó ń ṣe fún aráyé. (Mát. 24:14; 28:19, 20) Ju gbogbo ẹ̀ lọ, á jẹ́ kó o túbọ̀ rí i pé ìyàsímímọ́ fún Jèhófà Ọlọ́run àti ìrìbọmi kì í ṣe ọ̀rọ̀ ṣeréṣeré. Jẹ́ kó dá ẹ lójú pé inú Jèhófà dùn gan-an sí ẹ pé o mọyì inú rere àìlẹ́tọ̀ọ́sí tó fi hàn sí ẹ.

1. Ìlànà wo làwa Kristẹni gbọ́dọ̀ máa tẹ̀ lé lórí ọ̀rọ̀ ìgbéyàwó? Kí ni ìdí kan ṣoṣo tó bá Ìwé Mímọ́ mu tó lè mú kí tọkọtaya kọra wọn sílẹ̀?

• “Ṣé ẹ ò kà á pé ẹni tó dá wọn ní ìbẹ̀rẹ̀ dá wọn ní akọ àti abo, ó sì sọ pé, ‘Torí èyí, ọkùnrin á fi bàbá rẹ̀ àti ìyá rẹ̀ sílẹ̀, á sì fà mọ́ ìyàwó rẹ̀, àwọn méjèèjì á sì di ara kan’? Tó fi jẹ́ pé wọn kì í ṣe méjì mọ́, àmọ́ wọ́n jẹ́ ara kan. Torí náà, ohun tí Ọlọ́run ti so pọ̀, kí èèyàn kankan má ṣe yà á. . . . Ẹnikẹ́ni tó bá kọ ìyàwó rẹ̀ sílẹ̀, àfi tó bá jẹ́ torí ìṣekúṣe, tó sì fẹ́ ẹlòmíì ti ṣe àgbèrè.”​—Mát. 19:4-6, 9.

2. Kí nìdí táwọn tó ń gbé bíi tọkọtaya fi gbọ́dọ̀ ṣègbéyàwó lọ́nà tó bá òfin mu? Tó o bá ti ṣègbéyàwó, ṣé ó dá ẹ lójú pé ìgbéyàwó rẹ bófin mu, ṣé ìjọba sì fọwọ́ sí i?

• “Máa rán wọn létí pé kí wọ́n máa tẹrí ba fún ìjọba àti àwọn aláṣẹ, kí wọ́n máa ṣègbọràn sí wọn.”​—Títù 3:1.

• “Kí ìgbéyàwó ní ọlá láàárín gbogbo èèyàn, kí ibùsùn ìgbéyàwó má sì ní ẹ̀gbin, torí Ọlọ́run máa dá àwọn oníṣekúṣe àti àwọn alágbèrè lẹ́jọ́.”​—Héb. 13:4.

3. Kí ni ojúṣe rẹ nínú ìdílé?

• “Ọmọ mi, fetí sí ìbáwí bàbá rẹ, má sì pa ẹ̀kọ́ ìyá rẹ tì.”​—Òwe 1:8.

• “Ọkọ ni orí aya rẹ̀ bí Kristi ṣe jẹ́ orí ìjọ . . . Ẹ̀yin ọkọ, ẹ máa nífẹ̀ẹ́ àwọn aya yín, bí Kristi ṣe nífẹ̀ẹ́ ìjọ.”​—Éfé. 5:23, 25.

• “Ẹ̀yin bàbá, ẹ má ṣe máa mú àwọn ọmọ yín bínú, kàkà bẹ́ẹ̀, ẹ máa tọ́ wọn dàgbà nínú ìbáwí àti ìmọ̀ràn Jèhófà.”​—Éfé. 6:4.

• “Ẹ̀yin ọmọ, ẹ máa gbọ́ràn sí àwọn òbí yín lẹ́nu nínú ohun gbogbo, nítorí èyí dára gidigidi lójú Olúwa.”​—Kól. 3:20.

• “Kí ẹ̀yin aya máa tẹrí ba fún àwọn ọkọ yín.”​—1 Pét. 3:1.

4. Kí nìdí tá a fi gbọ́dọ̀ fọwọ́ pàtàkì mú ẹ̀mí?

• “[Ọlọ́run] ló ń fún gbogbo èèyàn ní ìyè àti èémí àti ohun gbogbo. . . . Ipasẹ̀ rẹ̀ ni a fi ní ìyè, tí à ń rìn, tí a sì wà.”​—Ìṣe 17:25, 28.

5. Kí nìdí tí kò fi yẹ ká pa ẹnikẹ́ni, títí kan ọmọ tó ṣì wà nínú oyún?

• “Tí àwọn èèyàn bá ń jà, tí wọ́n sì ṣe obìnrin tó lóyún léṣe, . . . tó bá la ẹ̀mí lọ, kí o fi ẹ̀mí dípò ẹ̀mí.”​—Ẹ́kís. 21:22, 23.

• “Ojú rẹ rí mi nígbà tí mo ṣì wà nínú ikùn; gbogbo àwọn ẹ̀yà rẹ̀ wà lákọsílẹ̀ nínú ìwé rẹ ní ti àwọn ọjọ́ tí o ṣẹ̀dá wọn, kí ìkankan lára wọn tó wà.”​—Sm. 139:16.

• “Jèhófà kórìíra . . . ọwọ́ tó ń ta ẹ̀jẹ̀ aláìṣẹ̀ sílẹ̀.”​—Òwe 6:16, 17.

6. Àṣẹ wo ni Ọlọ́run pa nípa ẹ̀jẹ̀?

• “Máa ta kété sí . . . ẹ̀jẹ̀ [àti] sí ohun tí wọ́n fún lọ́rùn pa.”​—Ìṣe 15:29.

7. Kí nìdí tá a fi gbọ́dọ̀ nífẹ̀ẹ́ àwọn arákùnrin àtàwọn arábìnrin wa?

• “Mò ń fún yín ní àṣẹ tuntun kan, pé kí ẹ nífẹ̀ẹ́ ara yín; bí mo ṣe nífẹ̀ẹ́ yín, kí ẹ̀yin náà nífẹ̀ẹ́ ara yín. Èyí ni gbogbo èèyàn máa fi mọ̀ pé ọmọ ẹ̀yìn mi ni yín, tí ìfẹ́ bá wà láàárín yín.”​—Jòh. 13:34, 35.

8. Kí ẹni tó ní àìsàn tó burú tó lè ranni má bàa ṣàkóbá fún àwọn míì, (a) Kí nìdí tí kò fi yẹ kó máa gbá àwọn èèyàn mọ́ra tàbí kó máa fẹnu kò wọ́n lẹ́nu? (b) Kí nìdí tí kò fi yẹ kó bínú táwọn kan ò bá fẹ́ kó wá sílé àwọn? (d) Tó bá ṣẹlẹ̀ pé ó ṣeé ṣe kẹ́nì kan ti kó àrùn tó lè ran ẹlòmíì, kí nìdí tó fi yẹ kí onítọ̀hún fúnra rẹ̀ lọ ṣe àyẹ̀wò ẹ̀jẹ̀ rẹ̀ kó tó bẹ̀rẹ̀ sí í fẹ́ ẹnì kan sọ́nà? (e) Kí nìdí tí ẹni tó ní àìsàn tó lè ran ẹlòmíì fi gbọ́dọ̀ sọ fún olùṣekòkáárí ìgbìmọ̀ àwọn alàgbà kó tó ṣèrìbọmi?

• “Ẹ má jẹ ẹnikẹ́ni ní gbèsè ohunkóhun, àmọ́ kí ẹ máa nífẹ̀ẹ́ ara yín. . . . ‘Kí o nífẹ̀ẹ́ ọmọnìkejì rẹ bí ara rẹ.’ Ìfẹ́ kì í ṣiṣẹ́ ibi sí ọmọnìkejì ẹni.”​—Róòmù 13:8-10.

• “Bí ẹ ṣe ń wá ire àwọn ẹlòmíì, kì í ṣe tiyín nìkan.”​—Fílí. 2:4.

9. Kí nìdí tí Jèhófà fi retí pé ká máa dárí ji àwọn ẹlòmíì?

• “Ẹ máa fara dà á fún ara yín, kí ẹ sì máa dárí ji ara yín fàlàlà, kódà tí ẹnikẹ́ni bá ní ìdí láti fẹ̀sùn kan ẹlòmíì. Bí Jèhófà ṣe dárí jì yín ní fàlàlà, ẹ̀yin náà gbọ́dọ̀ máa ṣe bẹ́ẹ̀.”​—Kól. 3:13.

10. Kí ló yẹ kó o ṣe tí arákùnrin tàbí arábìnrin kan bá bà ẹ́ lórúkọ jẹ́ tàbí tó lù ẹ́ ní jìbìtì?

• “Tí arákùnrin rẹ bá ṣẹ̀, lọ sọ ẹ̀bi rẹ̀ fún un láàárín ìwọ àti òun nìkan. Tó bá fetí sí ọ, o ti jèrè arákùnrin rẹ. Àmọ́ tí kò bá fetí sí ọ, mú ẹnì kan tàbí méjì dání, kó lè jẹ́ pé nípa ẹ̀rí ẹni méjì tàbí mẹ́ta, a ó fìdí gbogbo ọ̀rọ̀ múlẹ̀. Tí kò bá fetí sí wọn, sọ fún ìjọ. Tí kò bá fetí sí ìjọ pàápàá, bí èèyàn àwọn orílẹ̀-èdè àti agbowó orí ni kó rí sí ọ gẹ́lẹ́.”​—Mát. 18:15-17.

11. Irú ojú wo ni Jèhófà fi ń wo àwọn ẹ̀ṣẹ̀ yìí?

▪ Ìṣekúṣe

▪ Lílo ère nínú ìjọsìn

▪ Kí ọkùnrin máa bá ọkùnrin lò pọ̀ tàbí kí obìnrin máa bá obìnrin lò pọ̀

▪ Olè jíjà

▪ Tẹ́tẹ́ títa

▪ Ìmutíyó

• “Ẹ má ṣe jẹ́ kí wọ́n ṣì yín lọ́nà. Àwọn oníṣekúṣe, àwọn abọ̀rìṣà, àwọn alágbèrè, àwọn ọkùnrin tó ń jẹ́ kí ọkùnrin bá wọn lò pọ̀, àwọn abẹ́yà-kan-náà-lòpọ̀, àwọn olè, àwọn olójúkòkòrò, àwọn ọ̀mùtípara, àwọn pẹ̀gànpẹ̀gàn àti àwọn alọ́nilọ́wọ́gbà kò ní jogún Ìjọba Ọlọ́run.”​—1 Kọ́r. 6:9, 10.

12. Kí lo pinnu láti ṣe nípa ìṣekúṣe, èyí tó ní nínú ohunkóhun tó jẹ mọ́ ìbálòpọ̀ láàárín àwọn tí kì í ṣe tọkọtaya?

• “Ẹ máa sá fún ìṣekúṣe!”​—1 Kọ́r. 6:18.

13. Kí nìdí tó fi yẹ ká sá fún àwọn oògùn tó lè di bárakú tàbí èyí tó lè pani lọ́bọlọ̀, tí dókítà kò sọ pé ká lò?

• “Ẹ fi ara yín fún Ọlọ́run ní ẹbọ ààyè, tó jẹ́ mímọ́, tó sì ṣe ìtẹ́wọ́gbà, kí ẹ lè ṣe iṣẹ́ ìsìn mímọ́ pẹ̀lú agbára ìrònú yín. Ẹ má sì jẹ́ kí ètò àwọn nǹkan yìí máa darí yín, àmọ́ ẹ para dà nípa yíyí èrò inú yín pa dà, kí ẹ lè fúnra yín ṣàwárí ìfẹ́ Ọlọ́run tí ó dára, tí ó ṣe ìtẹ́wọ́gbà, tí ó sì pé.”​—Róòmù 12:1, 2.

14. Kí ni díẹ̀ lára àwọn nǹkan tó jẹ mọ́ ẹ̀mí èṣù tí Ọlọ́run kórìíra?

• “Ẹnì kankan láàárín yín . . . kò gbọ́dọ̀ woṣẹ́, kò gbọ́dọ̀ pidán, kò gbọ́dọ̀ wá àmì ohun tó fẹ́ ṣẹlẹ̀, kò gbọ́dọ̀ di oṣó, kò gbọ́dọ̀ fi èèdì di àwọn ẹlòmíì, kò gbọ́dọ̀ wádìí ọ̀rọ̀ lọ́wọ́ abẹ́mìílò tàbí woṣẹ́woṣẹ́, kò sì gbọ́dọ̀ wádìí ọ̀rọ̀ lọ́wọ́ òkú.”​—Diu. 18:10, 11.

15. Tí ẹnì kan bá dá ẹ̀ṣẹ̀ tó burú jáì, tó sì fẹ́ pa dà rí ojú rere Jèhófà, kí ló yẹ kí onítọ̀hún ṣe lẹ́sẹ̀kẹsẹ̀?

• “Mo jẹ́wọ́ ẹ̀ṣẹ̀ mi fún ọ; Mi ò bo àṣìṣe mi mọ́lẹ̀. Mo sọ pé: ‘Màá jẹ́wọ́ àwọn ẹ̀ṣẹ̀ mi fún Jèhófà.’ ”​—Sm. 32:5.

• “Ṣé ẹnikẹ́ni ń ṣàìsàn láàárín yín? Kó pe àwọn alàgbà ìjọ, kí wọ́n gbàdúrà lé e lórí, kí wọ́n fi òróró pa á ní orúkọ Jèhófà. Àdúrà ìgbàgbọ́ sì máa mú aláìsàn náà lára dá, Jèhófà máa gbé e dìde. Tó bá sì ti dẹ́ṣẹ̀, a máa dárí jì í.”​—Jém. 5:14, 15.

16. Tó o bá mọ̀ pé arákùnrin tàbí arábìnrin kan ti dá ẹ̀ṣẹ̀ tó burú, kí ló yẹ kó o ṣe?

• “Tí ẹnì kan bá gbọ́ tí wọ́n ń kéde ní gbangba pé kí ẹni tó bá mọ̀ nípa ọ̀rọ̀ kan wá jẹ́rìí sí i, tí ẹni náà sì jẹ́ ẹlẹ́rìí ọ̀rọ̀ náà tàbí tó ṣojú rẹ̀ tàbí tó mọ̀ nípa rẹ̀, àmọ́ tí kò sọ, ó ti ṣẹ̀, yóò sì jìyà ẹ̀ṣẹ̀ rẹ̀.”​—Léf. 5:1.

17. Tí wọ́n bá ṣèfilọ̀ pé ẹnì kan kì í ṣe Ẹlẹ́rìí Jèhófà mọ́, báwo ló ṣe yẹ ká máa ṣe sí ẹni náà?

• “Ẹ jáwọ́ nínú kíkẹ́gbẹ́ pẹ̀lú ẹnikẹ́ni tí a pè ní arákùnrin, àmọ́ tó jẹ́ oníṣekúṣe tàbí olójúkòkòrò tàbí abọ̀rìṣà tàbí pẹ̀gànpẹ̀gàn tàbí ọ̀mùtípara tàbí alọ́nilọ́wọ́gbà, kí ẹ má tiẹ̀ bá irú ẹni bẹ́ẹ̀ jẹun.”​—1 Kọ́r. 5:11.

• “Bí ẹnikẹ́ni bá wá sọ́dọ̀ yín, tí kò sì mú ẹ̀kọ́ yìí wá, ẹ má gbà á sílé, ẹ má sì kí i.”​—2 Jòh. 10.

18. Kí nìdí tó fi jẹ́ pé àwọn tó nífẹ̀ẹ́ Jèhófà ló yẹ kó o yàn lọ́rẹ̀ẹ́?

• “Ẹni tó ń bá ọlọ́gbọ́n rìn yóò gbọ́n, àmọ́ ẹni tó ń bá òmùgọ̀ da nǹkan pọ̀ yóò rí láburú.”​—Òwe 13:20.

• “Ẹ má ṣe jẹ́ kí ẹnikẹ́ni tàn yín jẹ. Ẹgbẹ́ búburú ń ba ìwà rere jẹ́.”​—1 Kọ́r. 15:33.

19. Kí nìdí tí àwa Ẹlẹ́rìí Jèhófà kì í dá sọ́rọ̀ òṣèlú?

• “Wọn kì í ṣe apá kan ayé, bí èmi [Jésù] ò ṣe jẹ́ apá kan ayé.”​—Jòh. 17:16.

20. Kí nìdí tó fi yẹ kó o máa ṣègbọràn sí ìjọba?

• “Kí gbogbo èèyàn máa tẹrí ba fún àwọn aláṣẹ onípò gíga, nítorí kò sí àṣẹ kankan àfi èyí tó wá látọ̀dọ̀ Ọlọ́run; àwọn aláṣẹ tó wà ni a gbé sí àwọn ipò wọn tó ní ààlà látọ̀dọ̀ Ọlọ́run.”​—Róòmù 13:1.

21. Tí èèyàn bá sọ pé kó o ṣe nǹkan, àmọ́ tí òfin Ọlọ́run sọ pé o ò gbọ́dọ̀ ṣe é, kí lo máa ṣe?

• “A gbọ́dọ̀ ṣègbọràn sí Ọlọ́run gẹ́gẹ́ bí alákòóso dípò èèyàn.”​—Ìṣe 5:29.

22. Tó o bá fẹ́ yan iṣẹ́ tó o máa ṣe, ẹsẹ Bíbélì wo ló lè ràn ẹ́ lọ́wọ́ kó o má bàa di apá kan ayé?

• “Àwọn orílẹ̀-èdè kò ní yọ idà sí ara wọn mọ́.”​—Míkà 4:3.

• “Ẹ jáde kúrò nínú rẹ̀ [Bábílónì Ńlá], ẹ̀yin èèyàn mi, tí ẹ kò bá fẹ́ pín nínú àwọn ẹ̀ṣẹ̀ rẹ̀, tí ẹ kò bá sì fẹ́ gbà lára àwọn ìyọnu rẹ̀.”​—Ìfi. 18:4.

23. Irú eré ìdárayá àti eré ìnàjú wo lo máa yàn, irú èwo lo sì máa yẹra fún?

• “Jèhófà . . . kórìíra ẹni tó bá nífẹ̀ẹ́ ìwà ipá.”​—Sm. 11:5.

• “Ẹ kórìíra ohun búburú; ẹ rọ̀ mọ́ ohun rere.”​—Róòmù 12:9.

• “Ohunkóhun tó jẹ́ òótọ́, ohunkóhun tó ṣe pàtàkì, ohunkóhun tó jẹ́ òdodo, ohunkóhun tó jẹ́ mímọ́, ohunkóhun tó yẹ ní fífẹ́, ohunkóhun tí à ń sọ̀rọ̀ rẹ̀ dáadáa, ohunkóhun tó bá dára, ohunkóhun tó bá yẹ fún ìyìn, ẹ máa ronú lórí àwọn nǹkan yìí.”​—Fílí. 4:8.

24. Kí nìdí tí àwọn Ẹlẹ́rìí Jèhófà kì í jọ́sìn pẹ̀lú àwọn ìsìn míì?

• “Ẹ ò lè máa jẹun lórí ‘tábìlì Jèhófà’ àti tábìlì àwọn ẹ̀mí èṣù.”​—1 Kọ́r. 10:21.

• “ ‘Ẹ . . . ya ara yín sọ́tọ̀,’ ni Jèhófà wí, ‘ẹ má fọwọ́ kan ohun àìmọ́ mọ́’; ‘màá sì gbà yín wọlé.’ ”​—2 Kọ́r. 6:17.

25. Àwọn ìlànà wo ló máa ràn ẹ́ lọ́wọ́ láti pinnu bóyá o máa lọ́wọ́ nínú ayẹyẹ kan tàbí o ò ní lọ́wọ́ sí i?

• “Wọ́n ń bá àwọn orílẹ̀-èdè náà ṣe wọlé wọ̀de, wọ́n sì ń hùwà bíi tiwọn. Wọ́n ń sin àwọn òrìṣà wọn, àwọn òrìṣà náà sì di ìdẹkùn fún wọn.”​—Sm. 106:35, 36.

• “Àwọn òkú kò mọ nǹkan kan rárá.”​—Oníw. 9:5.

• “Wọn kì í ṣe apá kan ayé, bí èmi ò ṣe jẹ́ apá kan ayé.”​—Jòh. 17:16.

• “Àkókò tó ti kọjá tí ẹ fi ṣe ìfẹ́ àwọn orílẹ̀-èdè ti tó yín, nígbà tí ẹ̀ ń hu ìwà àìnítìjú, tí ẹ̀ ń ṣe ìfẹ́kúfẹ̀ẹ́, tí ẹ̀ ń mu ọtí àmujù, ṣe àríyá aláriwo, ṣe ìdíje ọtí mímu àti àwọn ìbọ̀rìṣà tó jẹ́ ohun ìríra.”​—1 Pét. 4:3.

26. Báwo làwọn àpẹẹrẹ inú Bíbélì ṣe lè ràn ẹ́ lọ́wọ́ láti ṣèpinnu lórí ọ̀rọ̀ ayẹyẹ ọjọ́ ìbí?

• “Ọjọ́ kẹta wá jẹ́ ọjọ́ ìbí Fáráò, ó sì se àsè fún gbogbo ìránṣẹ́ rẹ̀, ó wá mú olórí agbọ́tí àti olórí alásè jáde níṣojú àwọn ìránṣẹ́ rẹ̀. Ó dá olórí agbọ́tí pa dà sí ipò tó wà tẹ́lẹ̀ . . . Àmọ́, ó gbé olórí alásè kọ́.”​—Jẹ́n. 40:20-22.

• “Nígbà tí wọ́n ń ṣe ayẹyẹ ọjọ́ ìbí Hẹ́rọ́dù, ọmọbìnrin Hẹrodíà jó níbi ayẹyẹ náà, ó sì múnú Hẹ́rọ́dù dùn gan-an débi pé ó ṣèlérí, ó sì búra pé òun máa fún un ní ohunkóhun tó bá béèrè. Ìyá ọmọbìnrin náà kọ́ ọ ní ohun tó máa sọ, ó sì sọ pé: ‘Fún mi ní orí Jòhánù Arinibọmi níbí yìí nínú àwo pẹrẹsẹ.’ Ó wá ránṣẹ́ pé kí wọ́n lọ bẹ́ orí Jòhánù nínú ẹ̀wọ̀n.”​—Mát. 14:6-8, 10.

27. Kí nìdí tó o fi fẹ́ máa tẹ̀ lé ìtọ́sọ́nà àwọn alàgbà?

• “Ẹ máa ṣègbọràn sí àwọn tó ń mú ipò iwájú láàárín yín, kí ẹ sì máa tẹrí ba, torí wọ́n ń ṣọ́ ẹ̀ṣọ́ lórí yín bí àwọn tó máa jíhìn, kí wọ́n lè ṣe é tayọ̀tayọ̀, kì í ṣe pẹ̀lú ẹ̀dùn ọkàn, torí èyí máa pa yín lára.”​—Héb. 13:17.

28. Kí nìdí tó fi ṣe pàtàkì pé kí ìwọ àti ìdílé rẹ ya àkókò kan sọ́tọ̀ láti máa ka Bíbélì déédéé, kẹ́ ẹ sì máa kẹ́kọ̀ọ́ rẹ̀?

• “Òfin Jèhófà máa ń mú inú rẹ̀ dùn, ó sì ń fi ohùn jẹ́ẹ́jẹ́ẹ́ ka òfin Rẹ̀ tọ̀sántòru. Ó máa dà bí igi tí a gbìn sétí odò, tó ń so èso ní àsìkò rẹ̀, tí ewé rẹ̀ kì í sì í rọ. Gbogbo ohun tó bá ń ṣe yóò máa yọrí sí rere.”​—Sm. 1:2, 3.

29. Kí nìdí tó o fi fẹ́ràn láti máa lọ sípàdé kó o sì máa kópa níbẹ̀?

• “Màá sọ orúkọ rẹ fún àwọn arákùnrin mi; màá sì yìn ọ́ láàárín ìjọ.”​—Sm. 22:22.

• “Ẹ sì jẹ́ ká gba ti ara wa rò ká lè máa fún ara wa níṣìírí láti ní ìfẹ́ àti láti ṣe àwọn iṣẹ́ rere, ká má ṣe máa kọ ìpàdé wa sílẹ̀, bí àṣà àwọn kan, àmọ́ ká máa gba ara wa níyànjú, ní pàtàkì jù lọ bí ẹ ṣe ń rí i pé ọjọ́ náà ń sún mọ́lé.”​—Héb. 10:24, 25.

30. Iṣẹ́ wo ni iṣẹ́ tó ṣe pàtàkì jù lọ tí Jésù gbé fún wa?

• “Torí náà, ẹ lọ, kí ẹ máa sọ àwọn èèyàn gbogbo orílẹ̀-èdè di ọmọ ẹ̀yìn, ẹ máa batisí wọn . . . , ẹ máa kọ́ wọn pé kí wọ́n máa pa gbogbo ohun tí mo pa láṣẹ fún yín mọ́.”​—Mát. 28:19, 20.

31. Tá a bá fẹ́ múnú Jèhófà dùn nígbà tá à ń ṣètọrẹ fún iṣẹ́ Ìjọba Ọlọ́run tàbí tá a fẹ́ ṣèrànwọ́ fáwọn ará wa, báwo ló ṣe yẹ ká ṣe é?

• “Fi àwọn ohun ìní rẹ tó níye lórí bọlá fún Jèhófà.”​—Òwe 3:9.

• “Kí kálukú ṣe gẹ́gẹ́ bí ó ti pinnu nínú ọkàn rẹ̀, kì í ṣe pẹ̀lú lílọ́ra tàbí lábẹ́ àfipáṣe, nítorí Ọlọ́run nífẹ̀ẹ́ ẹni tó ń fúnni pẹ̀lú ìdùnnú.”​—2 Kọ́r. 9:7.

32. Àwọn ìṣòro wo làwa Kristẹni retí pé a máa dojú kọ?

• “Aláyọ̀ ni àwọn tí wọ́n ṣe inúnibíni sí nítorí òdodo, torí Ìjọba ọ̀run jẹ́ tiwọn. Aláyọ̀ ni yín tí àwọn èèyàn bá pẹ̀gàn yín, tí wọ́n ṣe inúnibíni sí yín, tí wọ́n sì parọ́ oríṣiríṣi ohun burúkú mọ́ yín nítorí mi. Ẹ máa yọ̀, kí inú yín sì dùn gidigidi, torí èrè yín pọ̀ ní ọ̀run, torí bí wọ́n ṣe ṣe inúnibíni sí àwọn wòlíì tó wà ṣáájú yín nìyẹn.”​—Mát. 5:10-12.

33. Kí nìdí tó fi jẹ́ àǹfààní tó ṣàrà ọ̀tọ̀ pé kéèyàn ṣèrìbọmi, kó sì di ọ̀kan lára àwọn Ẹlẹ́rìí Jèhófà?

• “Ọ̀rọ̀ rẹ sì di ayọ̀ fún mi àti ìdùnnú ọkàn mi, nítorí wọ́n ti fi orúkọ rẹ pè mí, Jèhófà Ọlọ́run.”​—Jer. 15:16.

Ibi àpéjọ àwa Ẹlẹ́rìí Jèhófà ni ìrìbọmi ti máa ń wáyé. Nígbà tí olùbánisọ̀rọ̀ bá fẹ́ parí àsọyé ìrìbọmi, á ní kí àwọn tó fẹ́ ṣèrìbọmi dìde dúró, kí wọ́n sì dáhùn àwọn ìbéèrè méjì yìí sókè ketekete:

1. Ṣé o ti ronú pìwà dà àwọn ẹ̀ṣẹ̀ rẹ, ṣé o ti ya ara rẹ sí mímọ́ fún Jèhófà, ṣé o sì gbà pé Jésù Kristi ni Jèhófà lò láti gbà wá là?

2. Ṣé o mọ̀ pé ìrìbọmi rẹ fi hàn pé o jẹ́ ọ̀kan lára àwa Ẹlẹ́rìí Jèhófà tó wà nínú ètò Ọlọ́run?

Táwọn tó fẹ́ ṣèrìbọmi bá dáhùn ketekete pé bẹ́ẹ̀ ni sáwọn ìbéèrè yìí, ẹ̀rí nìyẹn pé wọ́n “kéde ní gbangba” pé àwọn ní ìgbàgbọ́ nínú ìràpadà Jésù àti pé wọ́n ti ya ara wọn sí mímọ́ pátápátá fún Jèhófà. (Róòmù 10:9, 10) Torí náà, á dáa kí àwọn tó fẹ́ ṣèrìbọmi gbàdúrà, kí wọ́n sì ronú jinlẹ̀ lórí àwọn ìbéèrè yìí ṣáájú ọjọ́ tí wọ́n máa ṣèrìbọmi kí wọ́n lè dáhùn àwọn ìbéèrè náà látọkàn wá.

Ṣé o ti gbàdúrà sí Jèhófà láti ya ara rẹ sí mímọ́ fún un, tó o sì ti ṣèlérí fún un pé òun nìkan lo máa sìn àti pé ìfẹ́ rẹ̀ lo máa kà sí pàtàkì jù ní ìgbésí ayé rẹ?

Ṣé ó dá ẹ lójú dáadáa pé wàá fẹ́ ṣèrìbọmi ní àpéjọ tó kàn yìí?

Irú aṣọ wo ló bójú mu fún ìrìbọmi? (1 Tím. 2:9, 10; Jòh. 15:19; Fílí. 1:10)

Ó yẹ kí “ìmọ̀wọ̀n ara ẹni àti àròjinlẹ̀” máa hàn nínú bá a ṣe ń múra, ká lè fi hàn pé à “ń sin Ọlọ́run tọkàntọkàn.” Torí náà, kò yẹ kẹ́ni tó fẹ́ ṣèrìbọmi wọ aṣọ ìwẹ̀ tó ń ṣí ara sílẹ̀ tàbí aṣọ tí wọ́n kọ ọ̀rọ̀ sí lára. Kí wọ́n wọ aṣọ tó bójú mu, tí kò dọ̀tí, táwọn èèyàn ò ní kọminú sí, tó sì máa ṣeé ṣèrìbọmi.

Báwo ló ṣe yẹ kí ẹnì kan ṣe lákòókò ìrìbọmi? (Lúùkù 3:21, 22)

Ìrìbọmi Jésù ni àwòkọ́ṣe táwa Kristẹni ń tẹ̀ lé lónìí. Ó mọ̀ pé ìgbésẹ̀ pàtàkì ni ìrìbọmi, ó sì hàn nínú ìwà àti ìṣe rẹ̀. Torí náà, odò ìrìbọmi kì í ṣe ibi tó o ti lè máa ṣẹ̀fẹ̀, tó o ti lè máa ṣeré tàbí lúwẹ̀ẹ́, kò sì yẹ kó o hu àwọn ìwà míì tó lè mú kó dà bíi pé nǹkan yẹpẹrẹ kan là ń ṣe. Bákan náà, kò yẹ kó o máa ṣe bí ẹni pé o gboyè jáde. Òótọ́ ni pé nǹkan ayọ̀ ni ìrìbọmi jẹ́, àmọ́ kò yẹ ká ṣàṣejù.

Tó o bá ń lọ sípàdé déédéé, tó o sì ń dara pọ̀ mọ́ àwọn ará ìjọ, báwo nìyẹn ṣe máa ràn ẹ́ lọ́wọ́ láti mú ẹ̀jẹ́ ìyàsímímọ́ rẹ ṣẹ?

Lẹ́yìn tó o bá ṣèrìbọmi, kí nìdí tó fi ṣe pàtàkì pé kó o ṣe ètò tó dáa fún ìdákẹ́kọ̀ọ́ Bíbélì kó o sì máa jáde òde ẹ̀rí déédéé?