Buidi Luzolo Lulenda Tusadisila Kununga Boma?

 1. Mambu mbi malenda ku tutula boma?

TALA mambu mamonika mu luzingu lu zikhomba zitu. Yaya Nestor ayi nkazi’andi María, baba tomba kue sadila kuma kuidi tsatu yi minsamuni.b Vayi muingi kununga kuvanga mawu, vaba tombulu bawu kulengisa luzingu luawu. Bawu baba kuazuka beni boti bankuiza baka mayangi makiedika, ba kubalula mua mambu mu luzingu luawu. Bo Biniam kayiza ba Mbangi yi Yave ku tsi bakandimina kisalu kitu, nandi wuvisa ti bo kadi kisadi ki Nzambi, buna kalenda viokila mu zinzomono. Mawu maba kunkuazula. Vayi waba luta kuazuka mu matedi basi dikanda diandi mu thangu bala zaba ti nandi weka Mbangi yi Yave. Valérie bayiza kumbakula kimbevu kingolo ki câncer ayi waba tomba dotoli yilenda kumpasula mu khambu bundula minsiku mi Kibibila mitedi menga. Bukiedika, nandi wuba boma bu kufua.

 2. Kibila mbi vantombulu kuvanga mangolo muingi kununga boma?

² Ngie widi mu kuviokila mu mambu amomo? Bowombo mu befu tumana maviokila. Boti tuisinnunga ko kuyala boma, tulenda bua mu ntambu wu kubaka makani mambi malenda bivisa kikundi kitu na Yave. Ayi mawu Satana kantomba. Nandi mvandi wunsadilanga boma tuidi, muingi tulevula minsiku mi Yave kubunda mvandi lutumu lu kusamuna zitsangu zimboti. (Nzai. 12:17) Satana lutidi lulendu kena batu, nandi kasi ko kiadi ayi widi mvondi. Vayi ngie wulenda ku yikieba mu mintambu mi Satana. Buidi?

 3. Mbi binkuiza tusadisa kununga boma?

³ Befu kuba lufiatu ti Yave wu tuzolanga ayi widi ku khonzo’itu, tulenda nunga mintambu mioso mi Satana. (Minku. 118:6) Dedi nsoniki wu Minkunga 118 wuviokila mu mambu mawombo maphasi, nandi wuba zimbeni ziwombo ayi bankaka mu bawu baba kimfumu (matangu 9, 10). Khumbu zinkaka nandi waba kuazukanga beni (lutangu 13). Mvandi wutambula tsembolo yingolo kuidi Yave (lutangu 18). Vayi kheti bobo, nandi wuyimbila: “Minu yisinkuiza mona ko boma.” Mbi binsadisa kuba lufiatu alolo? Kheti Yave wunsemba, nandi wuzaba ti Tat’andi yi diyilu wuba kunzolanga beni. Nsoniki wu minkunga wuba lufiatu ti moso kuandi mambu kalenda viokila, Nzambi’andi yi luzolo wala tatamana kuba va khonzo’andi muingi kunsadisa.—Minku. 118:29.

 4. Befu kufiatila mu lozolo lu Nzambi, boma mbi tulenda nunga?

⁴ Tufueti ba lufiatu ti Yave wunzolanga kadika mutu mu befu. Lufiatu alolo, luala tusadisa kununga mambu matatu malenda ku tuvanga kuba boma: (1) kuba boma boti tuisinkuiza nunga ko kudukisa zitsatu zi dikanda ditu (2) kuba boma bu batu ayi (3) kuba boma bu lufua. Zikhomba tube tubila mu lutangu lutheti, banunga boma baba kibila baba lufiatu mu lozolo lu Nzambi.

 5. Mambu mbi malenda kuazula mfumu dikanda? (Tala foto yidi va thonono levista.)

⁵ Mfumu dikanda widi Mbangi yi Yave, wumvuanga nkinza kudukisa zitsatu zi kinsuni zi dikanda diandi. (1 Timo. 5:8) Boti ngie widi mfumu dikanda, ḿba mu thangu COVID-19, wube kuazukanga beni boti bankuiza kubotula mu kisalu. Voti wunkuiza nunga kudukiza zitsatu zi dikanda diaku mu kuba vana bidia ayi kufuta nzo. Mvandi wube kuazukanga beni boti ba kukubotula mu kisalu, wunkuiza nunga kubaka kisalu kinkaka. Dedi yaya Nestor ayi María, ḿba ngie wunkuazuka boti wunkuiza nunga kudukisa zitsatu ziaku, ngie kue sadila kuidi tsatu yi minsamuni. Ayi Satana wunnunganga ku tutula boma mu mambu amomo.

 6. Mambu mbi Satana kantomba muingi befu tukikinina?

⁶ Satana wuntomba ku tuvanga tukikinina ti Yave kavuanga ko nkinza kadika mutu mu befu ayi ka tusadisanga ko kudukisa zitsatu zi dikanda ditu. Mu kibila akiokio, tulenda yindula ti tufueti vanga mamoso tunnunga muingi kutomba kisalu kimboti, kheti kiawu kimbundula minsua mi Kibibila voti ki tutula nkaku mu mbuongimin’itu kuidi Yave.

 7. Khindusulu mbi Yesu ka tuvana?

⁷ Yesu lutidi zaba Tat’andi kena woso kua mutu. Nandi wu tukindisa bo katuba ti Nzambi “zebi zitsatu zitu ava tundinda.” (Matai 6:8) Mvandi Yesu zebi ti Yave widi wukubama muingi kudukisa zitsatu zitu. Mu kuba Baklisto tuidi mu khati dikanda di Nzambi. Diawu tulenda bela lufiatu ti bo kadi Mfumu dikanda, Yave wumvuanga nkinza nsua kavana widi mu 1 Timoteo 5:8.

 8. (a) Mbi binkuiza tusadisa kununga boma, boti tunkuazuka mu kukhammbu nunga kudukisa zitsatu zi dikanda ditu? (Matai 6:31-33) (b) Buidi tulenda landikinina kifuani ki bakuela abobo badi mu foto badi mu kukabila khomba bidia?

⁸ Befu kuba lufiatu ti Yave wu tuzolanga ayi wunzolanga dikanda ditu, tuinsikuiza ba ko divuda ti nandi wunkuiza dukisa zitsatu zitu. (Tanga Matai 6:31-33.) Mu kuba nkua luzolo ayi nkua kukaba, Yave wuntomba kudukisa zitsatu zitu zioso! Bo kavanga ntoto nandi wuvanga biabioso biaba tombulu, muingi bivangu bioso bitatamana kuzinga. Mu luzolo, Yave wuvanga biuma biwombo va ntoto bi tutuadisanga mayangi. (Ngene. 2:9) Kheti khumbu zinkaka tulenda baka to mua biuma tuntomba, vayi tufueti tebuka moyo ti kheti bidi biluelu, Yave be tuvana biawu. (Matai 6:11) Tufueti tebukanga moyo ti moso kua mangolo tumvanga muingi kubaka ki kudia voti va kulala, malendi dedakana ko na biuma Tat’itu yi luzolo ka tuvananga bubu ayi kala tuvana mu bilumbu binkuiza. Mawu yaya Nestor ayi nkazi’andi María bavisa.—Yesa. 65:21, 22.

 9. Mbi ngie wulenda longuka mu kifuani ki Nestor ayi María?

⁹ Nestor ayi María baba luzingu lu kimvuama ku Colômbia. Vayi bawu batuba: “Tubaka makani ma kubalula mua mambu mu luzingu luitu, muingi tubuela kukivana mu kisalu ki kusamuna. Vayi tuba boma boti tunkuiza nunga kubaka mayangi mu kuzingila mu zimbongo ziluelu.” Mbi biba sadisa kununga boma? Bawu bayindula ziphila Yave kaba monisina luzolo ayi kaba sadisila. Bo baba lufiatu ti Yave wunkuiza dukisa zitsatu ziawu, bawu babika bisalu baba bakilanga zimbongo ziwombo ayi basumbisa nzo’awu muingi kue sadila kuidi tsatu yi minsamuni. Buidi bawu babela mu makani amomo babaka? Nestor wutuba: “Tumona mambu madi mu Matai 6:33, kusalama mu luzingu luitu. Tukhambuanga ko ni kiuma ayi bubu tulutidi mayangi kena mimvu mima vioka.”

10. Kibila mbi tulendi kuitukila ko kumona bawombo kuba boma bu batu?

¹⁰ Bo tuidi bankua masumu, tuidi kifu ki kuvangilanga bankaka mambu mambi. (Mpovi 8:9) Dedi, batu badi kimfumu bansadilanga bubi kimfumu kiawu, bankua matingu bamvanganga mambu ma buphunya, bana ba kikola bamfingasananga, bamvangasananga phasi bawu na bawu ayi batu bankaka bakiebanga ko buboti basi dikanda diawu. Diawu tulendi kuituka ko kumona bawombo kuba boma bu batu! Vayi buidi Satana kansadilanga beni luaku alolo?

11-12. Buidi Satana kansadilanga boma tuidi bu batu?

¹¹ Satana wunsadilanga boma tuidi bu batu, muingi tulevula minsiku mi Yave ayi ku tutula nkaku muingi tubika kusamuna. Mu thuadusulu yi Satana, zimfumu zi luyalu bankandiminanga kisalu kitu ayi bankuamisanga bisadi bi Nzambi. (Luka 21:12; Nzai. 2:10) Mvandi batu bankaka Satana kansadilanga, bantiamunanga luvunu matedi Zimbangi zi Yave. Ayi bawombo bankikininanga mu luvunu alolo, ba tuvuezanga ayi ba tubulanga. (Matai 10:36) Vayi, bukiedika ti tufueti kuituka mu mambu Satana kamvanganga? Ndamba. Kibila nandi wutona kuvanga mawu tona mu sekulu yitheti.—Mava. 5:27, 28, 40.

¹² Boma bu zimfumu zi luyalu buisi ko to buawu Satana kansadilanga. Kuidi bankaka, boma bu basi dikanda bulutidi kena kututu khuba. Kibila bawu banzolanga beni basi dikanda diawu ayi bantomba muingi bawu mvawu bazaba ayi bazola Yave. Ayi banlualanga beni ntima bo bammona basi dikanda diawu kukhambu kinzika Nzambi yikiedika ayi bo bamvueza bisadi bi Yave. Vayi khumbu zinkaka, bawombo mu basi dikanda baba tulanga nkaku zikhomba zitu bayiza kikinina kiedika. Buabu boti basi dikanda ba tuvueza voti ba tukuekula kibila tueka Zimbangi zi Yave, mbi tunkuiza vanga?

13. Buidi kuba lufiatu mu luzolo lu Nzambi, kulenda tusadisila kununga zithotolo zi basi dikanda? (Minkunga 27:10)

¹³ Tulenda baka khindusulu mu mambu madi mu Minkunga 27:10 (Tanga.) Bo tuntebuka moyo ti Yave wu tuzolanga beni, tunkuiza baka khindusulu muingi kukindama mu zikhuamusu. Tuidi lufiatu ti Yave wala sakumuna lukuikumunu luitu. Ayi Yave wunluta dukisanga zitsatu zitu zi kinsuni ayi zi kiphevi kuvioka na woso kuandi mutu! Mawu Biniam, tube tubila mu lutangu lutheti kavisa.

14. Mbi wulenda longuka mu kifuani ki Biniam?

¹⁴ Biniam wuyiza ba Mbangi yi Yave, kheti mu kuzaba ti wunkuiza viokila mu zikhuamusu. Mona buidi kuzaba ti Yave wu kunzolanga kusadisila Biniam kununga boma bu batu. Nandi wutuba: “Phila yaba yindudila ti yinkuiza viokila mu zikhuamusu masi ko mawu yiviokila. Vayi yiluta ba boma bu zithotolo zi basi dikanda diama kena zikhuamusu zi zimfumu zi luyalu. Kibila yaba mona boma ti minu kuba Mbangi yi Yave, yinkuiza nhongisa ntima wu tat’ama ayi dikanda diami bankuiza yindula ti yisi nsadilanga ko buboti luzingu luama.” Kheti bobo, Biniam wuzaba ti Yave wumvuanga nkinza baboso ba kunzolanga. Biniam wubue tuba: “Yiyindula mu phila Yave kasadisila bankaka kununga ziphasi mu matedi zimbongo, luvasanu ayi buphunya. Mvandi yizaba ti minu kutatamana wukuikama mu Yave, nandi wunkuiza kutsakumuna. Bo bandata khumbu ziwombo mu buloku ayi bambula, yimona bivisa bi luzolo lu Yave bo katsadisa mu thangu yaba tomba lusadusu muingi kutatamana wukuikama.” Bukiedika, Yave wuyiza ba Tata yikiedika kuidi Biniam ayi dikabu di Nzambi diyiza ba dikanda diandi.

15. Kibila mbi tumbelanga boma bu lufua?

¹⁵ Kibibila kintuba ti lufua luidi mbeni. (1 Koli. 15:25, 26) Tulenda kuazuka beni mu kuyindula ti tuala fua ayi bulutidi boti mutu tunzolanga widi mu kimbevu kingolo. Kibila mbi tumuenanga boma bu lufua? Kibila Yave wu tuvanga na phuila yi kuzinga mvu ka mvu. (Mpovi 3:11) Vayi kuba boma bufuana bu lufua, kulenda ku tusadisa kukieba moyo’itu mu mambu malenda tula luzingu luitu va kingela. Dedi, kulenda ku tusadisa kubaka makani mamboti matedi kuvanga bisavu bi kunyikuna nhitu, kuba keba keba mu biuma tundia, kutomba lusalusu lu zidotoli, kunua bilongu bo tumbela ayi kubika tula luzingu luitu va kingela.

16. Buidi Satana kansadilanga boma bu lufua tuidi?

¹⁶ Satana zebi ti tumvuanga beni nkinza luzingu luitu. Nandi wuntubanga ti tuala vanga mamoso tulenda nunga—ayi kumanisa kikundi kitu kifikama na Yave—muingi kuvukisa luzingu luitu bubu. (Yobi 2:4, 5) Kheti tuzebi ti Satana, “widi luaku lu kutuadisa lufua,” vayi mambu amomo madi ma luvunu! Diawu kansadilanga boma tuidi bu lufua, muingi tubika sadila Yave. (Ebe. 2:14, 15) Dedi batu Satana kansadilanga, bankananga kuvonda bisadi bi Yave, boti bawu bamengi kubika kusadila Nzambi. Mvandi boti tuidi mu kubela, Satana wunsadilanga luaku alolo muingi ku tutula boma ayi kusadila mimfelimi voti basi dikanda muingi ba tukuika kubundula minsiku mi Nzambi mitedi kuvutula menga. Voti, valenda ba mutu wulenda ku tukuika kutambula mbukulu yikhambulu nguizani na minsua mi Kibibila.

17. Dedi bummonisina Loma 8:37-39, kibila mbi tulendi bela ko boma bu lufua?

¹⁷ Kheti tuisintomba ko kufua, vayi tuzebi ti Yave wala tatamana ku tuzola kheti tufuidi. (Tanga Loma 8:37-39.) Kibila bo bakundi ba Yave bamfua, nandi wuba lundanga va kilunzi kiandi, buka ti bawu bakhidi bamoyo. (Luka 20:37, 38) Nandi widi phuila yi kuba vulubusa muingi babue zinga. (Yobi 14:15) Diawu Yave kafutila thalu yinangama yi lufua lu Muan’andi Yesu “muingi . . . tubaka luzingu lu mvu ka mvu.” (Yoa. 3:16) Ayi tuzebi ti Yave wu tuzolanga ayi wu tuvuanga beni nkinza. Diawu tubika tatuka Yave mu thangu tuidi mu kubela voti bankana ku tuvonda kibila nandi widi wukubama muingi ku tukindisa, ku tuvana nduenga ayi mangolo. Mawu Valérie ayi nnuni’andi bavanga.—Minku. 41:3.

18. Mbi ngie belonguka mu kifuani ki Valérie?

¹⁸ Bo kaba 35 di mimvu, Valérie bambakula kimbevu kingolo ki câncer. Mona buidi luzolo lunsadisila kununga boma bu lufua. Nandi wutuba: “Bo bambakula kimbevu akiokio, luzingu luama lubaluka. Kibila vaba tombulu kuphasula muingi kuvukisa luzingu luama. Diawu yitombila zidotoli ziwombo, vayi ni wumueka mu bawu wukikinina kuphasula mu khambu sadila menga. Minu yiba beni boma ayi yisa vitika ko mbukulu ayoyo. Mu luzingu luama loso Yave wumbonisa ti wu kunzolanga. Buabu yiba thangu’ami muingi yimmonisa luzolo luami. Kadika khumbu yaba tambulanga zitsangu zimbi, minu yibaka makani ma kubika Yave mu mayangi ayi kufuisa Satana zitsoni. Vayi buboti beni kuzaba ti bayiza kuphasula mu khambu sadila menga. Kheti buvinha buama buntatamana bulebakana, Yave wuntatamananga kudukisa zitsatu ziama. Dedi, mu lukutukunu lu tsuka sabala ava kue kongusu, tulonguka dilongi diaba tuba: ‘Enfrente com coragem os problemas atuais.’c Dilongi adiodio dikhindisa ayi dikindisa nnuni’ama ayi tutanga diawu khumbu ziwombo. Malongi ma phila ayoyi ayi kuvanga mambu ma kiphevi, ma tusadisa kubaka ndembama, kuba mayindu mafuana ayi kubaka makani mamboti.”

19. Mambu mbi mambelama kumonika?

¹⁹ Mu lusalusu lu Yave, zikhomba ziwombo mu nza yimvimba bannunganga mambu mawombo maphasi mu mayangi ayi bamfuisanga Satana zitsoni. (1 Pete. 5:8, 9) Ngie mvaku wulenda nunga. Nkadu to wunkhambu, Yave wala vana nsua kuidi Yesu ayi baklisto bala yala yandi “muingi kubunga mavanga ma Satana.” (1 Yoa. 3:8) Bosi dikabu di Nzambi ba kunsadilanga “balasa bue ba ko boma bu kiuma kimvela.” (Yesa. 54:14; Mika 4:4) Vayi bo tumvingila thangu ayoyo yituka, tufueti vanga mangolo muingi tununga boso kuandi boma tuidi.

20. Mbi bilenda ku tusadisa kununga boma?

²⁰ Tufueti tatamana kukindisa lufiatu luitu ti Yave wunzolanga ayi wunkiebanga bisadi biandi. Ayi tulenda vangila mawu mu kulonguka ayi kunyindulanga phila Yave kakiebila bisadi biandi mu thangu yikhulu. Mvandi kuyindulanga phila Yave kama tusadisila kununga mambu maphasi kumbusa. Bukiedika, mu lusalusu lu Yave, befu tulenda nunga boso kuandi boma tuidi!—Minku. 34:4.