12 耶稣用比喻同佢哋讲：“有个人喺佢笪地种植葡萄，喺葡萄园四面安咗围栏，挖咗个池用嚟榨酒，又起咗座瞭望塔。佢将葡萄园租咗俾一啲农户之后，就出咗国嘞。 2 到咗收割葡萄嘅季节，佢派一个奴隶去农户嗰度，收取属于佢嘅嗰部分果实。 3 但系，佢哋竟然捉住嗰个奴隶，殴打佢，等佢空手而回。 4 主人又派另一个奴隶去佢哋嗰度。点知佢哋打伤呢个奴隶嘅头，又羞辱佢。 5 主人再派另一个人去，佢哋就杀咗呢个人。佢再派多啲人去，不过有啲俾人打，有啲俾人杀死。 6 最后葡萄园嘅主人派佢深爱嘅仔去见啲农户，话：‘佢哋会尊重我个仔嘅。’ 7 不过，班农户商量话：‘呢个就系继承人。嚟，我哋杀咗佢，噉佢将要继承嘅产业就属于我哋㗎喇。’ 8 佢哋就捉住主人个仔，杀咗佢，拖佢出去葡萄园外面。 9 葡萄园嘅主人会点样做呢？佢会嚟杀咗呢啲农户，将葡萄园交俾其他人。 10 你哋从来冇读过圣经嘅呢段说话咩？圣经话：‘建造嘅人抛弃嘅石头，成为咗最重要嘅房角石。 11 呢块房角石系嚟自耶和华㗎，对我哋嚟讲真系好奇妙。’”
12 佢哋睇出呢个比喻系针对佢哋讲㗎，就想拘捕耶稣。不过佢哋又好惊啲民众，就唯有离开嘞。
13 之后，佢哋派咗一啲法利赛派嘅人同埋希律党徒去耶稣嗰度，想喺佢嘅说话当中揾把柄。 14 嗰啲人嚟到，就同佢讲：“老师，我哋知道你净系讲真话，唔会去讨好人，因为你唔在乎人哋嘅身份地位；你只系会按照真理教导人认识上帝嘅旨意。噉你话俾我哋知，纳人头税俾凯撒，啱唔啱呢？ 15 我哋应唔应该纳呢？”耶稣睇穿佢哋嘅虚伪，就同佢哋讲：“点解你哋试探我呢？拎个第纳流斯钱币嚟睇吓。” 16 佢哋攞咗过嚟。耶稣问佢哋：“呢个系边个嘅头像，边个嘅名号呀？”佢哋话：“系凯撒嘅。” 17 耶稣话：“属于凯撒嘅要俾返凯撒，属于上帝嘅要俾返上帝。”佢哋听到耶稣噉讲觉得好惊讶。
18 撒都该派一向都话冇复活呢回事，佢哋嚟揾耶稣，问佢： 19 “老师，摩西写低话，如果有个人佢嘅兄弟死咗，留低老婆，但系又冇仔女，噉死者嘅兄弟就应该娶咗个遗孀，帮死咗嘅兄弟传宗接代。 20 有个家庭曾经有七兄弟，第一个娶咗老婆，冇生到仔女就死咗嘞。 21 第二个兄弟娶咗佢嘅遗孀，同样冇生到仔女就死咗嘞；第三个都系噉。 22 七兄弟都冇仔女。最后嗰个女人都死埋。 23 噉复活嗰阵，佢系边个嘅老婆呀？七个都娶过佢噃。” 24 耶稣同佢哋讲：“你哋错嘞，因为你哋唔了解圣经，亦都唔了解上帝嘅力量。 25 死人复活之后，唔会嫁娶，好似天上嘅天使一样。 26 关于死人复活嘅事，你哋冇读过摩西嘅经卷里面，荆棘丛嘅记载咩？上帝同摩西讲，‘我系亚伯拉罕嘅上帝，以撒嘅上帝，雅各嘅上帝’， 27 所以佢唔系死人嘅上帝，而系活人嘅上帝。你哋大错特错嘞。”
28 有一个抄经士之前已经嚟咗，听到佢哋嘅争论，见耶稣答得咁好，就问佢：“诫命当中边一条系最重要嘅呢？” 29 耶稣答佢：“最重要嘅系，‘以色列啊，你要听！耶和华我哋嘅上帝系独一嘅耶和华， 30 你要全心，全意，全力，用全部生命爱耶和华你嘅上帝’。 31 第二条诫命系‘要爱人如己’。冇其他诫命比呢两条更重要。” 32 嗰个抄经士同佢讲：“老师，你讲得啱，你讲嘅符合真理，‘上帝系独一㗎，除咗佢，就冇其他神㗎嘞’。 33 一个人全心，全意，全力爱佢，又爱人如己，噉样比任何全烧祭同埋其他祭牲更有价值。” 34 耶稣见佢答得好有智慧，就同佢讲：“你离上帝嘅王国唔远嘞。”之后就冇人再够胆问耶稣啲乜嘢嘞。
35 耶稣继续喺圣殿教导人，佢话：“点解抄经士话基督系大卫嘅子孙呢？ 36 大卫喺神圣力量嘅指引下话：‘耶和华同我主讲：“你坐喺我嘅右边，直到我将你嘅敌人放喺你嘅脚下。”’ 37 既然大卫称呼基督做‘主’，噉点解基督又会系大卫嘅子孙呢？”
嗰一大班人都好钟意听耶稣讲嘅嘢。 38 耶稣继续教导佢哋话：“要小心，唔好好似啲抄经士噉，佢哋钟意着住件长袍行嚟行去，亦都钟意人哋喺市集广场度，恭敬噉同佢哋打招呼， 39 又钟意会堂入面最好嘅座位同埋晚宴当中贵宾嘅座位。 40 佢哋侵吞寡妇嘅屋，又为咗引人注目作长篇大论嘅祷告。呢啲人会比其他人受到更严厉嘅判决。”
41 耶稣喺一个望到宝库钱箱嘅位置坐低，观察啲民众将钱放入钱箱。好多有钱人放咗好多钱币入去。 42 有个穷寡妇嚟到，将两文小钱放入钱箱。 43 耶稣就叫啲门徒嚟，同佢哋讲：“我好肯定噉话俾你哋知，呢个穷寡妇放入钱箱嘅，比其他所有人放嘅仲多。 44 人人都系喺净低嘅钱当中攞一啲出嚟放入去，而呢个寡妇虽然好穷，但系佢将所有钱，赖以为生嘅一切放晒入去。”