罗马书

2 无论你系边个，都冇理由妄自批评*其他人。你批评人哋，但系自己都有同样嘅行为，你噉样做，就系定自己有罪。 2 我哋知道，上帝会根据事实审判有呢啲行为嘅人，定佢哋有罪。

3 你批评人做呢啲嘢，但系自己又噉样做，你以为自己可以逃避到上帝嘅判决咩？ 4 定系你唔知道上帝咁仁慈，系想引导你悔改，所以你轻视佢极大嘅仁慈、宽容同耐心呢？ 5 你顽固不化，唔愿意悔改，就令上帝对你嘅愤怒继续累积落去。喺上帝施行正义审判嘅日子，佢会降下愤怒。 6 佢会按照各人嘅行为奖赏或者惩罚佢哋*： 7 如果人坚持不懈噉*行善*，追求荣耀、尊贵同埋唔会朽坏嘅生命，就会得到永远嘅生命； 8 如果人好辩争胜，唔服从真理，反而做唔正义嘅事，就会承受上帝嘅愤恨同怒气。 9 每个作恶嘅人，都会遭受患难同痛苦，首先系犹太人，然后系希腊人*； 10 每个行善嘅人，都会有荣耀、尊贵、安宁*，首先系犹太人，然后系希腊人。 11 因为上帝系唔偏心嘅。

12 冇上帝嘅法律约束嘅人犯咗罪，就算冇法律，都系会死；而受上帝嘅法律约束嘅人犯咗罪，就要根据法律受审。 13 对上帝嚟讲，只系聆听法律嘅唔算系正义嘅人，遵守法律嘅先称得上系正义嘅人*。 14 外族人*冇上帝嘅法律，但系如果凭天性做符合法律嘅事，就算冇上帝嘅法律，自己就系约束自己嘅法律嘞。 15 佢哋嘅情况充分表明，法律嘅本质写喺佢哋心里面，佢哋嘅良心同佢哋一齐作证。于是，佢哋嘅思想指控自己有罪或者裁定自己无罪。 16 正如我宣扬嘅好消息提到，上帝会通过基督耶稣审判人类暗中做嘅事，到咗嗰个日子，呢啲事就会发生。

17 你话自己系犹太人，信赖法典，炫耀自己同上帝嘅特殊关系。 18 你受过摩西法典嘅教导，知道上帝想你做乜嘢，明白乜嘢系重要嘅*。 19 你深信自己能够带领盲眼嘅人，照亮身处黑暗嘅人。 20 你仲以为自己因为掌握咗法典嘅基本知识同真理，就可以纠正不明事理嘅人，教导好似小朋友一样愚昧无知嘅人。 21 不过，你既然教导其他人，点解唔教吓自己呢？你同人讲“唔可以偷窃”，自己竟然去偷嘢？ 22 你话“唔可以通奸”，自己竟然通奸？你憎恨偶像，自己竟然盗取庙宇嘅嘢？ 23 你因为法典而自豪，自己竟然违反法典，羞辱上帝？ 24 圣经话：“上帝嘅圣名因为你哋做嘅嘢，喺列国中被亵渎。”

25 其实，你要遵守法典，割礼*先至有价值；如果你违反法典，受咗割礼都等于冇受割礼。 26 所以，如果冇受割礼嘅人遵守法典上嘅正义规定，冇受割礼唔系就等于受咗割礼咩？ 27 你认识法典上嘅条文，亦都受咗割礼，但系就冇遵守法典。所以，嗰啲冇受割礼嘅人如果遵守法典，就可以定你有罪嘞。 28 表面上系犹太人，唔算系犹太人；身体上外在嘅割礼，亦都唔算系割礼。 29 内心系犹太人，先算系犹太人。佢嘅割礼系喺心入面嘅，靠嘅系神圣力量，而唔系法典条文。呢个人得到嘅称赞，唔系嚟自人，而系嚟自上帝。