哥林多前书

12 各位弟兄，我希望你哋清楚了解乜嘢系因神圣力量而有嘅恩赐*。 2 你哋知道，以前你哋唔系信徒*嘅时候，俾人误导，走入迷途，崇拜嗰啲唔能够讲说话嘅偶像，任人摆布。 3 所以我希望你哋明白，凭住上帝嘅神圣力量讲说话嘅人唔会话：“耶稣系应该被咀咒㗎！”同样，如果一个人唔系受神圣力量引导，佢就唔可以话：“耶稣系主！”

4 大家嘅恩赐*唔同，不过得到嘅神圣力量系相同嘅。 5 大家嘅职务唔同，不过主系相同嘅。 6 大家做嘅事*唔同，不过上帝系相同嘅，佢通过每个人做呢一切事。 7 上帝赐下嘅神圣力量喺每个人身上发挥作用，系为咗令人得益。 8 有人凭住神圣力量，能够讲出有智慧嘅说话*；有人凭住同样嘅神圣力量，能够讲出有知识嘅说话； 9 有人凭住同样嘅神圣力量，就有信心*；有人凭住同样嘅神圣力量，就得到医病嘅能力。 10 另外，有人能够施行奇迹，有人受上帝启示发言*，有人能够辨明信息系唔系嚟自上帝，有人能够讲唔同嘅外语*，有人能够传译外语。 11 呢一切都系同一股神圣力量发挥嘅作用，系按照上帝嘅意思*分俾每个人嘅。

12 就好似身体只有一个，但系有好多部分；全身虽然有好多部分，但系都属于同一个身体。基督嘅身体*都系噉。 13 无论我哋系犹太人定系希腊人*，系奴隶定系自由人，人人都凭住同一股神圣力量受浸，组成一个身体，我哋都接受*咗同一股神圣力量。

14 身体唔系得一个部分，而系由好多部分组成。 15 就算只脚话，“我唔系手，所以唔属于身体”，只脚仍然系身体嘅一部分。 16 就算耳仔话，“我唔系眼睛，所以唔属于身体”，耳仔仍然系身体嘅一部分。 17 如果全身只系一只眼，点会听到嘢呢？如果全身只系一只耳仔，点会闻到嘢呢？ 18 不过上帝按照自己嘅意思，将各部分安放喺身体。

19 如果每个部分都一模一样，点会有身体呢？ 20 虽然身体有好多部分，但系仍然只系一个身体。 21 眼睛唔可以同只手讲：“我唔需要你。”头都唔可以同只脚讲：“我唔需要你。” 22 其实，身体上睇嚟比较弱嘅部分，反而系必需嘅。 23 我哋觉得身体边部分唔系咁得体，就将嗰部分装饰得比较得体，令唔美观嘅部分变得比较美观。 24 我哋身体靓啲嘅部分反而唔需要装饰。不过上帝噉样将身体各部分放埋一齐，令原本唔够得体嘅部分比较得体， 25 噉身体就唔会分裂，各部分都互相关心。 26 身体一个部分受苦，其他部分就一齐受苦；一个部分得到荣耀，其他部分就一齐欢乐。

27 你哋就系基督嘅身体，每个人都系身体嘅一部分。 28 上帝喺会众里面安排咗唔同嘅人，首先系使徒，第二系先知，第三系导师，然后系施行奇迹嘅人、有医病能力嘅人、提供协助嘅人、有领导才能嘅人、能够讲唔同外语嘅人。 29 系咪人人都系使徒呢？人人都系先知？人人都系导师？人人都能够施行奇迹？ 30 系咪人人都有医病嘅能力？人人都能够讲外语？人人都能够传译外语呢？ 31 你哋要努力得到*更大嘅恩赐*，不过而家我要话俾你哋知，乜嘢系最美好嘅道路。