腓立比书

3 最后，我嘅弟兄，作为主嘅仆人，你哋要继续欢欣快乐。我唔觉得喺信入面向你哋讲同样嘅说话系麻烦嘅事，因为噉做可以保护你哋。

2 要小心嗰啲好似狗嘅人，小心嗰啲作恶嘅人，小心嗰啲鼓吹割礼嘅人*。 3 其实，我哋先至系受过真割礼*嘅人。我哋靠住上帝嘅神圣力量敬奉上帝，所夸耀嘅系基督耶稣，而唔系依赖外在嘅条件*。 4 其实，我比任何人都有理由依赖外在嘅条件。

如果有人认为自己可以依赖外在嘅条件，我就更加可以嘞。 5 我第八日接受割礼，属于以色列民族、便雅悯部族，系希伯来人生嘅希伯来人。我系法利赛派嘅，严格遵守法典； 6 我曾经充满热诚，一心迫害会众；我按照法典做啱嘅事，喺呢方面无可指责。 7 不过，以前对我嚟讲有价值嘅嘢*，而家由于基督，我认为系一啲价值都冇*。 8 其实，我认为之前放弃嘅所有嘢都毫无价值，因为认识我主基督耶稣实在有价值得多。为咗佢，我甘愿放弃*一切，将呢啲嘢视为垃圾*，噉就可以得到基督嘅喜爱*， 9 同佢联合。我能够同佢联合，唔系因为我遵守摩西法典而令自己正义，而系因为信从基督而得到正义，亦即系嚟自上帝、因为信心而有嘅正义。 10 我嘅目标系认识基督同埋佢复活嘅力量，受佢所受过嘅苦。我甚至愿意经历佢嗰种死亡， 11 希望得到较早嘅复活，摆脱死亡。

12 噉唔系话我已经得到奖赏，已经完美。我仍然竭尽全力，希望赢得奖赏。基督耶稣已经拣选我去得到呢个奖赏嘞。 13 各位弟兄，我冇认为自己已经赢得奖赏。但系有一件事我好肯定，就系要忘记背后，奋力向前， 14 向住目标努力奔跑。我噉做系为咗赢得奖赏，亦即系上帝通过基督耶稣呼召我去天上。 15 所以，我哋当中成熟嘅人，都要有呢种思想态度。如果你哋有任何人唔系噉谂，上帝就会令你哋知道点样先系正确嘅态度。 16 无论我哋进步到乜嘢程度，都应该沿住同一条路，井然有序噉继续前进。

17 各位弟兄，你哋要继续效法我，亦都要留意嗰啲效法我哋嘅人树立嘅榜样。 18 但系好多人嘅行为，就表明自己藐视基督喺苦刑柱上被处死呢件事。我以前成日提到佢哋，而家又流住眼泪提到佢哋。 19 佢哋嘅结局系灭亡，佢哋嘅神就系自己嘅欲望*，佢哋做可耻嘅事仲引以为傲，佢哋谂嘅都系地上嘅事。 20 不过我哋系天上嘅公民。我哋热切等候嚟自天上嘅救主，亦即系主耶稣基督。 21 基督拥有大能大力，能够令一切都顺服佢。佢会运用呢种能力，改变我哋卑微嘅身体，令我哋嘅身体同佢荣耀嘅身体一样。