哥林多后书

8 各位弟兄，我哋好想你哋知道，上帝所赐嘅分外恩典喺马其顿各地会众成就咗啲乜嘢。 2 虽然佢哋处于困境，大受考验，但系佢哋满心喜乐，喺极度贫困之下，仍然显得特别*慷慨、真正富足。 3 我可以作证，佢哋所做嘅系按照佢哋嘅能力，甚至系超过咗佢哋嘅能力。 4 佢哋采取主动，一次又一次恳求我哋俾佢哋捐助圣民，喺救济嘅职务上尽一份力。 5 佢哋所做嘅超出我哋嘅期望。佢哋按照上帝嘅旨意，先全心全意为主服务*，然后又为我哋服务。 6 所以我哋勉励提多，既然佢喺你哋当中开始筹办救济工作，就应该完成收集你哋嘅捐献呢件善事。 7 你哋事事富足，充满信心、口才、知识，亦都满腔热诚，深受我哋所爱。愿你哋都继续慷慨捐献*。

8 我噉样讲，唔系想命令你哋，而系想你哋知道其他人几咁热诚，亦都想睇吓你哋系咪有真挚嘅爱心。 9 你哋知道我哋主耶稣基督嘅分外恩典，佢本来富足，但系就甘愿为咗你哋而变得贫穷，令你哋能够因为佢嘅贫穷而变得富足。

10 我认为办妥救济嘅事对你哋比较好。始终喺一年前你哋已经开始收集捐献，表明自己有呢个心愿。 11 你哋做呢件事，要有始有终。你哋按照自己嘅能力去做，就能够达成自己乐意行善嘅心愿嘞。 12 如果一个人有乐意嘅心，佢嘅奉献就令上帝特别高兴，因为上帝希望人献出自己拥有嘅，而唔系自己冇嘅。 13 我唔系想人哋轻松，你哋辛苦， 14 而系想大家均等，噉样你哋而家多出嚟嘅，就能够弥补佢哋嘅不足，将来佢哋多出嚟嘅，亦都能够弥补你哋嘅不足，噉大家就能够互补不足*嘞。 15 正如圣经噉写：“多嘅未至于太多，少嘅亦未至于太少。”

16 我哋感谢上帝，因为提多好似我哋一样，热切关心你哋。 17 佢去你哋嗰度，一方面系因为我哋鼓励佢去，另一方面系因为佢本来就好想噉样做，自愿去见你哋。 18 我哋仲会派一个弟兄同佢一齐去。呢个弟兄喺传讲好消息嘅工作上受到称赞，名声传遍所有会众。 19 唔单止噉，佢仲受到各群会众嘅委派，同我哋一齐去各地办理呢件救济嘅善事，将荣耀归于主，亦都证明我哋乐意协助其他人。 20 我哋用呢个方式处理你哋慷慨嘅捐款，就冇人可以挑剔我哋嘞。 21 我哋“唔单止喺耶和华*眼前办事诚实，喺人眼前亦都办事诚实”。

22 另外，我哋仲会派多一个弟兄同佢哋一齐去。呢个弟兄经过我哋多次试验，证明佢喺好多事上都办事勤恳。佢对你哋非常有信心，所以而家就更加勤恳嘞。 23 如果有人对提多有疑问，唔使担心，佢系我嘅同伴，亦都系同我一齐工作嘅拍档，要令你哋得益。至于其他弟兄，佢哋系各群会众派出嘅使徒，系基督嘅荣耀。 24 所以，你哋要向佢哋证明你哋嘅爱心，向各群会众证明我哋夸奖*你哋系啱㗎。