哥林多前书

9 唔通我冇自由做我想做嘅事咩？我唔系使徒咩？唔通我冇见过我哋嘅主耶稣咩？你哋唔系我为主工作嘅成果咩？ 2 就算其他人唔当我系使徒，对你哋嚟讲我点都系！因为你哋就好似印记一样，证明我系主嘅使徒。

3 对于嗰啲批评*我嘅人，以下系我嘅申辩： 4 我哋唔系有权接受其他人提供嘅饮食咩？ 5 唔通我哋冇权带埋信主嘅妻子喺身边，好似其余嘅使徒、主耶稣啲细佬同埋矶法*噉咩？ 6 唔通净系得我同巴拿巴要工作谋生*咩？ 7 边有当兵嘅人要自备粮饷㗎？喺葡萄园栽种嘅人，有边个会唔食园里面嘅果实呢？边个牧羊人，会唔饮自己啲羊嘅奶呢？

8 我讲嘅唔系只系人嘅睇法，法典都系噉讲。 9 摩西法典噉样写：“牛踩谷嘅时候，唔可以套住佢嘅嘴。”唔通上帝净系关心啲牛咩？ 10 佢噉讲，唔系都为咗我哋咩？呢句说话系为我哋而写嘅，因为无论犁地嘅人定系脱谷嘅人，都应该期望分到一啲收成。

11 既然我哋好似撒种噉，将上帝嘅嘢俾你哋，噉我哋接受*你哋俾嘅一啲资助，都唔算过分吖。 12 既然其他人有权要求你哋噉做，何况我哋呢？虽然我哋有权*噉做，但系我哋冇要求你哋俾啲乜嘢我哋，反而事事忍耐，以免妨碍人接受基督嘅好消息。 13 你哋唔知道执行神圣职务嘅人都会食圣殿里面嘅食物，而经常喺祭坛服务嘅人都会得到祭坛上面一部分嘅祭物咩？ 14 同样，主吩咐过，宣扬好消息嘅人可以靠好消息为生。

15 不过，我冇要求你哋俾啲乜嘢我。我噉写，并唔系要你哋噉样做。我宁愿死都唔会俾任何人夺去我夸耀嘅理由！ 16 我宣扬好消息，冇乜嘢值得夸耀，因为我有义务噉做。如果我唔宣扬好消息就有祸嘞！ 17 我甘心乐意去做，就有奖赏；即使唔系甘心乐意，管家嘅职责仍然交托咗俾我。 18 噉样，我得到乜嘢奖赏呢？我嘅奖赏就系，宣扬好消息嘅时候，俾人免费听到好消息。噉我就唔系滥用传讲好消息嘅人嘅权利*嘞。

19 我虽然系自由嘅，冇受任何人辖制，但系为咗尽力帮助*更多人，我愿意做所有人嘅奴隶。 20 对犹太人，我就做犹太人，因为想帮助犹太人。对受法典*约束嘅人，我虽然冇受到法典约束，仍然好似受法典约束嘅人，因为想帮助受法典约束嘅人。 21 对冇法典*嘅人，我就做冇法典嘅人，因为想帮助冇法典嘅人。不过，我遵守上帝嘅法律，亦都受基督嘅法律约束。 22 对软弱嘅人，我就做软弱嘅人，因为想帮助软弱嘅人。对乜嘢人，我就做乜嘢人，无论用咩方法，都要救一啲人。 23 我愿意为好消息做任何事，目的系向其他人传讲好消息。

24 你哋都知道参加赛跑嘅人，虽然大家都跑，但系只有一个人可以得奖。你哋都要抱住必胜嘅决心去跑。 25 所有参加体育竞赛嘅人，凡事都要自制。佢哋噉做，无非系想赢得会腐坏嘅冠冕，而我哋系想赢得唔会腐坏嘅冠冕。 26 所以，我跑唔系冇目标；我出拳都唔系好似打空气。 27 我不断痛打*自己嘅身体，令身体成为听话嘅奴隶，以免我传咗好消息俾其他人，自己反而得唔到认可*。