约翰一书

5 所有相信耶稣系基督嘅人，都已经从上帝而生；所有爱赐人生命嘅上帝嘅人，都会爱从上帝而生嘅人。 2 我哋爱上帝，遵守佢嘅诫命。凭住呢一点，我哋就知道自己爱上帝嘅仔女。 3 我哋遵守上帝嘅诫命，就系爱佢，况且佢嘅诫命唔系沉重嘅负担， 4 因为从上帝而生嘅人，都战胜世界。我哋战胜咗世界，系因为我哋有信心*。

5 边个可以战胜世界呢？唔系就系相信耶稣系上帝个仔嘅人咩？ 6 耶稣基督通过水同血而嚟，唔系只有水，而系有水又有血。神圣力量亦都作见证，因为神圣力量系真理。 7 作见证嘅有三样， 8 就系神圣力量、水同埋血。呢三样作嘅见证系一致㗎。

9 我哋接受人嘅见证，但系上帝嘅见证更加优越。上帝已经为佢个仔作咗见证，呢个就系佢作嘅见证。 10 信从上帝个仔嘅人，相信上帝向佢作嘅见证。唔信从上帝嘅人，当上帝讲大话，因为佢唔相信上帝为自己个仔作嘅见证。 11 呢个见证就系：上帝赐永远嘅生命俾我哋，我哋通过佢个仔得到呢种生命。 12 接受上帝个仔嘅，就有呢种生命；唔接受上帝个仔嘅，就冇呢种生命。

13 我写呢啲说话俾你哋，系想你哋知道，你哋呢啲相信上帝个仔*嘅人都有永远嘅生命。 14 我哋对上帝有信心，我哋相信：无论我哋按照佢嘅旨意求乜嘢，佢都会听*。 15 既然我哋相信，无论求乜嘢，佢都会听，噉我哋就可以肯定，自己会得到向佢求嘅嘢，因为我哋已经求咗。

16 边个见到弟兄犯咗唔会导致死亡嘅罪，为佢祈求，上帝就会赐生命俾佢。上帝会赐生命俾唔系犯咗死罪嘅人。不过亦都有导致死亡嘅罪，我唔会叫人为犯咗呢种罪嘅人祈求。 17 所有唔正义嘅行为都系罪，但系都有唔会导致死亡嘅罪。

18 我哋知道，所有从上帝而生嘅人，都唔会经常犯罪。嗰位从上帝而生嘅*会守护佢，噉撒但*就对佢无能为力*嘞。 19 我哋知道，我哋系源自上帝嘅，但系全世界都受撒但*控制。 20 不过我哋知道，上帝个仔已经嚟过地上，仲赐咗洞悉事理嘅能力*俾我哋，等我哋可以认识真实嘅主。通过上帝个仔耶稣基督，我哋就同真实嘅主联合。真实嘅主就系真神，亦都系永远嘅生命。 21 我嘅仔女啊，你哋要小心，唔可以拜偶像。