罗马书

15 不过，我哋坚强嘅人，应该包容唔坚强嘅人嘅弱点，而唔系取悦自己*。 2 我哋人人做嘅事都应该令人开心，得到益处，受到鼓励。 3 因为连基督都冇取悦自己*，反而好似圣经所讲：“有人出言侮辱你，呢啲说话都落喺我身上。” 4 以前写低嘅说话，全部都系为咗教导我哋而写嘅。我哋怀有希望，系因为圣经为人带嚟安慰，帮我哋保持忍耐。 5 愿赐人忍耐同安慰嘅上帝，令你哋都有基督耶稣嘅思想态度。 6 噉你哋就能够团结一致、异口同声噉颂扬*我哋主耶稣基督嘅上帝，亦即系佢嘅爸爸。

7 为咗荣耀上帝，你哋要彼此接纳*，就好似基督接纳咗你哋噉。 8 我想你哋知道，基督成为受割礼嘅人嘅仆人，系要表明上帝真实可靠，证实上帝对佢哋祖先所作嘅承诺系可信嘅， 9 亦都系要令列国嘅人因为上帝怜悯佢哋而颂扬*佢。圣经话：“所以我要喺列国当中公开承认你，歌颂你嘅圣名。” 10 仲话：“列国嘅人啊，你哋要同上帝嘅子民一齐欢欣。” 11 又话：“万国啊，你哋要赞美耶和华*，万族都要赞美佢。” 12 以赛亚亦都讲过：“耶西嘅根将会出现，统治列国，列国嘅人会寄望于佢。” 13 愿赐人希望嘅上帝因为你哋信赖佢，就令你哋满怀喜乐同安宁。噉样，你哋就可以因为神圣力量发挥嘅强大作用而充满*希望。

14 我嘅弟兄，我深信你哋充满良善，有足够嘅知识，亦都能够彼此教导*。 15 不过，喺我写俾你哋嘅呢封信，有啲嘢我讲得特别率直，其实系想再次提醒你哋。噉系因为上帝赐分外恩典俾我， 16 要我做基督耶稣手下嘅公仆，为列国嘅人服务。我致力于神圣嘅工作，传扬上帝嘅好消息，系想令列国嘅人靠住神圣力量成圣*，可以成为上帝接纳嘅祭物。

17 我系基督耶稣嘅门徒，所以有理由因为上帝嘅事而欢喜。 18 我自己做过嘅事，我就唔讲嘞，净系讲基督点样通过我，令列国嘅人服从佢。佢通过我嘅言行， 19 同埋施行神迹奇事*嘅力量，仲有凭住上帝神圣力量发挥嘅强大作用*，令列国嘅人服从佢。结果，我由耶路撒冷起周游各地，直到以利里古行省，彻底传讲基督嘅好消息。 20 于是我立下目标，只要系有人听过基督嘅名嘅地方，我都唔去嗰度宣扬好消息，噉我就唔会喺其他人嘅根基上面建造， 21 就好似圣经所讲：“对佢闻所未闻嘅，将会睇见；未听过嘅，将会明白。”

22 由于呢个原因，我好多次想去你哋嗰度，都去唔成。 23 不过而家我已经完成咗喺呢一带嘅传道工作，而且咁多年嚟*，我一直好想去揾你哋。 24 所以，希望喺我去西班牙途中，可以探吓你哋。享受完同你哋相聚嘅时光之后，请你哋送我行一段路吖。 25 不过，我而家要去耶路撒冷执行职务先，援助嗰度嘅圣民。 26 马其顿同亚该亚嘅人乐意捐款，援助耶路撒冷圣民当中嘅穷人。 27 捐款嘅人本身都好乐意噉做，不过佢哋作出捐献亦都系因为感激圣民*。列国嘅人既然分享到呢啲圣民嘅福分*，就有义务用财物援助佢哋*。 28 我将捐款*顺利交俾佢哋之后，就会经过你哋嗰度去西班牙。 29 我知道，我去探你哋嘅时候，一定会将基督所赐嘅丰厚福分带俾你哋。

30 各位弟兄，我哋都相信主耶稣基督，神圣力量亦都令我哋彼此相爱，所以我恳请你哋同我一齐，为我向上帝热切祷告， 31 祈求我可以得到解救，唔会受犹地亚嗰啲不信嘅人阻碍，亦祈求我为耶路撒冷*执行嘅职务得到圣民嘅接纳。 32 噉样，如果系上帝嘅意思，我就能够开开心心去到你哋嗰度，大家互相鼓励。 33 愿赐人安宁*嘅上帝同你哋所有人同在。阿们。