哥林多前书
15 各位弟兄，请谂吓我之前传俾你哋嘅好消息。你哋唔单止接受咗，仲坚定拥护呢个好消息。 2 你哋如果紧紧持守我传俾你哋嘅好消息，就会得救。如果唔系，就算你哋成为信徒都系冇用嘅。
3 我传俾你哋嘅道理，都系我学返嚟嘅。其中最重要嘅系，按照圣经所讲，基督为我哋嘅罪而死， 4 埋葬咗，亦都按照圣经所讲，第三日复活。 5 跟住基督向矶法*显现，然后向十二使徒显现。 6 之后，佢有一次向超过五百个弟兄显现。呢啲人大多数都仲喺度，有啲就已经长眠嘞。 7 后嚟佢都向雅各显现，然后又向所有使徒显现。 8 最后，佢仲向我呢个好似早产婴儿嘅人显现。
9 我喺使徒当中系最微不足道嘅，根本唔配称为使徒，因为我曾经迫害上帝嘅会众。 10 不过，靠住上帝嘅分外恩典，先至有今日嘅我。佢赐俾我嘅分外恩典并冇白费，因为我比佢哋所有人更加努力工作。其实，努力工作嘅唔系我，而系上帝所赐嘅分外恩典*。 11 无论系我，定系佢哋，传讲嘅都系同一个信息，而你哋相信嘅都系呢个信息。
12 既然我哋传讲基督已经死而复生，点解你哋当中竟然有人话，冇死人复活呢回事呢？ 13 如果真系冇死人复活呢回事，噉即系话基督都冇复活啦。 14 如果基督冇复活，我哋传道就冇意义嘞，你哋就算有信心亦都系冇意义嘅。 15 仲有，我哋噉做就系为上帝作咗假见证，因为我哋作证话上帝令基督复活。如果人死咗唔会复活，噉上帝其实都冇令基督复活。 16 如果人死咗唔会复活，基督就冇复活嘞。 17 如果基督冇复活，你哋嘅信心*就冇用嘞，你哋仍然喺罪里面， 18 嗰啲已经长眠嘅基督徒*就真系灭亡嘞。 19 如果我哋靠住基督而有嘅希望，只系得目前嘅生命*，就会比任何人都可怜。
20 不过基督已经死而复生，佢喺长眠嘅人当中系第一个被复活，成为最早嘅收成*嘅。 21 既然死亡因为一个人而嚟，死人复活自然都系因为一个人而嚟。 22 由于亚当，而家所有人都会死；由于基督，将来所有人都会得到生命。 23 不过，每个人都会按照适当嘅次序复活。基督系最早嘅收成，当基督返到我哋呢度嘅时候*，就轮到嗰啲属于佢嘅复活。 24 然后，到咗终结，佢将所有执政嘅、当权嘅、有势力嘅都消灭咗，就将王国交返俾佢嘅上帝，佢嘅爸爸。 25 基督一定会做君王，直到上帝将所有敌人都放喺佢嘅脚下。 26 之后，连死亡呢个最后嘅敌人都会被消灭。 27 圣经话，上帝“令一切都顺服喺佢脚下”。呢度话“一切都顺服”，好明显唔包括令一切都顺服基督嘅上帝。 28 当一切都顺服上帝嘅仔嗰阵，呢个仔自己都会顺服嗰位令一切都顺服阿仔嘅上帝。噉样，对众生嚟讲，上帝就系一切。
29 所以，而家为咗成为死人而受浸嘅人，将来会点呢？如果人死咗根本唔会复活，佢哋而家点解要为咗成为死人而受浸呢？ 30 我哋又点解要成日冒生命危险呢？ 31 各位弟兄，我每日都面对死亡。呢件事系千真万确嘅，正如我的确可以靠住我哋嘅主基督耶稣以你哋为荣一样。 32 当日我喺以弗所同野兽搏斗，如果同其他人冇分别*，噉做对我有咩好处呢？如果死人唔会复活，噉“我哋即管饮饮食食啦，横掂听日就要死嘞”。 33 唔好俾人误导嘞*，同坏朋友来往会破坏你嘅好习惯*。 34 你哋要清醒，做正义嘅事，唔好犯罪。你哋有啲人根本唔认识上帝。我噉讲，系要令你哋惭愧。
35 有人会问：“死人点样复活呢？会有点样嘅身体呢？” 36 不明事理嘅人啊，你撒嘅种子唔死就唔会生长。 37 仲有呀，你撒种，唔系撒下已经成长嘅植物*，而系撒下谷粒*，可能系小麦嘅种子，亦都可能系其他种子。 38 上帝随自己嘅心意令植物有唔同嘅形状，令种子有各种形状。 39 唔系所有身体都一样㗎。人有人嘅身体，动物有动物嘅身体，雀仔有雀仔嘅身体，鱼有鱼嘅身体。 40 另外，仲有天上嘅身体，同地上嘅身体。天上身体嘅荣耀同地上身体嘅荣耀系唔同㗎。 41 太阳有太阳嘅荣耀，月亮有月亮嘅荣耀，星辰都有星辰嘅荣耀。事实上，呢粒星同嗰粒星嘅荣耀都系唔同㗎。
42 死人复活都系一样。埋葬*嘅系会朽坏嘅身体，复活嘅系唔会朽坏嘅身体； 43 埋葬*嘅身体系冇尊荣嘅，而复活嘅系有荣耀嘅；埋葬*嘅系软弱嘅，复活嘅系有力量嘅； 44 埋葬*嘅系血肉之躯，复活嘅系灵体。既然有血肉之躯，就亦都有灵体。 45 正如圣经噉样写：“第一个人亚当就成为一个活人*。”末后嘅亚当成为赐人生命嘅灵体。 46 最初嘅身体唔系灵体，而系血肉之躯，后嚟嘅身体先至系灵体。 47 第一个人系出于地，用尘土造出嚟嘅。第二个人系嚟自天上嘅。 48 第一个用尘土造嘅人系点，其他用尘土造嘅人都系一样；嚟自天上嗰位系点，其他去到天上嘅都系一样。 49 而家我哋嘅形象同用尘土造嘅嗰个人一样，将来我哋嘅形象都会同嚟自天上嘅嗰位一样。
50 各位弟兄，我话俾你哋知，血肉之躯唔能够承受上帝嘅王国，会朽坏嘅身体亦都唔能够承受唔会朽坏嘅生命。 51 而家我将一个神圣秘密话俾你哋知：我哋唔系人人都会长眠，但系人人都会改变。 52 呢件事会发生喺一刹那，一眨眼之间，最后嘅号筒吹响嘅时候。号筒一响，死人就会复活，唔会朽坏，而我哋都会改变。 53 因为会朽坏嘅，会变成唔会朽坏嘅；会死嘅，都会变成唔会死嘅。 54 当会朽坏嘅变成唔会朽坏嘅，会死嘅变成唔会死嘅，圣经嘅说话就会应验：“死亡永远被吞灭。” 55 “死亡啊，你嘅胜利喺边呢？死亡啊，你嘅刺又喺边呢？” 56 令人死亡嘅刺就系罪，令罪有力量嘅就系摩西法典。 57 不过，感谢上帝，佢通过我哋嘅主耶稣基督，将胜利赐咗俾我哋嘞！