罗马书

9 我跟从基督，所以我讲嘅系真话，唔系大话。我嘅良心喺神圣力量引导下，为以下嘅事作证： 2 我内心好悲伤，一直觉得好痛苦。 3 为咗我啲弟兄，即系我本族嘅同胞，如果可以嘅话，我宁愿代替佢哋受咀咒，同基督隔绝。 4 佢哋系以色列人，俾上帝收养做仔女，得到荣耀、誓约、法典、敬奉上帝嘅安排，同埋上帝嘅承诺。 5 按照血统嚟讲，几位族长系佢哋嘅祖先，基督都系呢啲人嘅后代。愿主宰一切嘅上帝永远受赞美。阿们*。

6 噉唔系话上帝嘅承诺*落空，因为唔系所有以色列人，都属于真正嘅“以色列”。 7 佢哋系亚伯拉罕嘅后代，但系噉唔代表佢哋都系佢嘅“仔女”。圣经话：“从以撒而出嘅先至会称为‘你嘅后代’。” 8 噉即系话，亚伯拉罕血统上嘅仔女，唔一定真系上帝嘅仔女。由于上帝嘅承诺而有嘅仔女，先至算系“后代”。 9 上帝曾经承诺：“到咗呢个时候，我就会返嚟，撒拉会生一个仔。” 10 呢个唔系唯一嘅例子。当利百加怀孕，为我哋嘅祖先以撒佗住双胞胎嗰阵，情形都一样。 11 上帝按照佢嘅旨意拣选人，唔系根据人嘅行为，而系根据呢位呼召人嘅上帝嘅意愿。所以，两个小朋友仲未出世，仲未做过好事或者坏事， 12 上帝已经同利百加讲：“哥哥会做细佬嘅奴隶。” 13 圣经话：“我爱雅各，不过憎恨以扫。”

14 噉我哋想讲嘅系乜嘢呢？上帝系咪唔公正？梗系唔系啦！ 15 上帝同摩西讲：“我想怜悯边个，就怜悯边个；想向边个开恩，就向边个开恩。” 16 由此可见，人被拣选，唔在于佢嘅愿望，亦都唔在于佢嘅努力*，而系在于怜悯人嘅上帝。 17 圣经记载上帝同法老讲*：“我容许你生存，就系要喺你身上显示我嘅力量，令我嘅名传遍天下。” 18 由此可见，佢想怜悯边个，就怜悯边个，边个顽固，佢就由得边个顽固。

19 既然系噉，你可能会话：“点解佢仲要怪责人呢？边个能够违抗佢嘅旨意呢？” 20 不过，你系边个呢？你只系凡人，竟然敢反驳上帝？唔通被塑造嘅器皿可以同塑造佢嘅陶匠讲，“点解你将我造成噉呀”？ 21 唔通陶匠冇权用同一嚿陶泥做两个器皿，一个用喺体面*嘅事，一个用喺唔体面*嘅事咩？ 22 同样道理，虽然上帝嘅旨意系要向恶人表明佢嘅愤怒，彰显佢嘅力量，不过佢好有耐心，容忍嗰啲将会承受佢愤怒、应该俾佢毁灭嘅器皿，噉有乜嘢问题呢？ 23 上帝噉样做，向嗰啲佢怜悯嘅器皿彰显佢丰富嘅荣耀，又有乜嘢问题呢？上帝一早就预备要令呢啲器皿得到荣耀。 24 我哋就系呢啲器皿。上帝唔单止喺犹太人当中，亦都喺列国嘅人当中呼召我哋， 25 正如佢喺何西阿嘅书讲过：“本来唔系我子民嘅，我要将佢哋称为‘我嘅子民’；本来唔系我所爱嘅，我要将佢称为‘我所爱嘅’。 26 以前我喺边度同佢哋讲‘你哋唔系我嘅子民’，将来都会喺嗰度将佢哋称为‘真神*嘅仔’。”

27 另外，关于以色列，以赛亚宣告话：“以色列人嘅数目虽然好似海边嘅沙咁多，但系只有少数人*会得救， 28 因为耶和华*会同地上嘅人算帐，行动彻底而且迅速。” 29 以赛亚都讲过：“如果唔系天军嘅统帅耶和华*俾我哋嘅后代存留，我哋一早就好似所多玛、蛾摩拉噉嘞。”

30 噉我哋想讲嘅系乜嘢呢？列国嘅人虽然冇追求正义，但系由于表现信心，就被视为正义嘅人*。 31 不过，以色列人虽然力求遵守正义嘅法律，但系就冇完全达到法律嘅要求。 32 点解呢？因为佢哋觉得可以靠住行为，而唔系靠住信心达到呢个目标。佢哋因为“绊脚石”而失足跌倒， 33 正如圣经话：“睇吓！我要放一块绊脚石，一块令人失足*嘅石头喺锡安。不过，信赖佢嘅人唔会失望。”