提摩太前书

1 我系保罗，奉我哋嘅救主上帝同我哋嘅希望基督耶稣嘅命令，做基督耶稣嘅使徒*。 2 我写信俾提摩太*，我喺信仰上嘅亲生仔。

愿上帝我哋嘅爸爸，仲有主基督耶稣，赐分外恩典、怜悯、安宁*俾你。

3 我起程去马其顿之前，曾经请你留喺以弗所。而家我请你继续留喺嗰度，吩咐某啲人唔好传授其他教义， 4 亦都唔好关注无稽之谈同埋世系记录。呢啲嘢一啲益处都冇，只系会引发种种猜想，而且唔系嚟自上帝，唔能够加强人嘅信心。 5 我俾呢个指示*你，目的系要激发所有人嘅爱心。呢种爱出于洁净嘅内心、无愧嘅良心同埋唔虚伪嘅信心。 6 有啲人偏离呢一切，反而钟意毫无意义嘅言论。 7 佢哋想做上帝法律嘅导师*，但系就唔明白自己讲紧乜嘢，极力主张嘅系乜嘢。

8 我哋知道，摩西法典系好嘅，但系人要正确噉*运用。 9 我哋亦都知道，制定法律唔系为咗正义嘅人，而系为咗不法又反叛嘅人、藐视上帝又犯罪嘅人、唔忠贞*又亵渎圣物嘅人，仲有嗰啲谋杀父母嘅、谋杀其他人嘅、 10 淫乱*嘅、有同性恋行为嘅*、绑架嘅、讲大话嘅，同埋作伪证*嘅人，仲有其他违背健全*教导嘅人。 11 健全嘅教导嚟自快乐嘅上帝，根据嘅系佢所赐嘅荣耀好消息。我受到委任*去宣扬呢个好消息。

12 我好感激赐力量俾我嘅基督耶稣，我哋嘅主，因为佢认为我忠心，派我执行职务。 13 以前我亵渎上帝，迫害人，侮辱人，但系后嚟就得到怜悯。我以前因为无知，冇真正嘅信心，先至会做出呢啲事。 14 不过我哋嘅主赐特别丰厚嘅分外恩典俾我，帮助我有信心，享有基督耶稣嘅爱。 15 基督耶稣嚟到世人当中系要拯救罪人。呢句说话真实可信，值得完全接受。我系罪人中嘅罪人， 16 但系就连我呢个罪大恶极嘅人都得到怜悯。噉样，基督耶稣就可以通过我，充分显示佢嘅耐心，令我成为先例，等将来嗰啲信赖佢而盼望得到永生嘅人可以借鉴。

17 愿尊贵同荣耀永永远远归于永恒嘅君王，亦即系嗰位唔能够朽坏、人睇唔见、独一无二嘅上帝。阿们。

18 我嘅仔提摩太啊，我向你提出嘅呢个指示*，同关于你嘅预言一致。凭住呢啲预言，你可以继续打嗰场美好嘅仗， 19 持守信心同埋无愧嘅良心。有啲人埋没良心，结果信心尽毁，就好似船遇到海难沉没噉样。 20 许米乃同亚历山大就系噉样嘅人。我已经将佢哋交咗俾撒但*，等佢哋受到管教，唔再亵渎上帝。