启示录

14 我见到绵羊羔企喺锡安山，有14万4000人同佢一齐。呢啲人嘅额头上都写住绵羊羔嘅名同佢爸爸嘅名。 2 我听到天上发出声音，好似急流嘅声音，亦都好似雷霆嘅声音。我听到嘅呢个声音，好似一啲歌手喺度一边弹竖琴一边唱歌嘅声音。 3 佢哋喺宝座前面，喺四个活物同长老面前唱歌，呢首睇嚟系一首新歌。除咗喺地上买返嚟嘅14万4000人，冇人识得唱呢首歌。 4 呢啲人一直保持童贞，冇同女人发生过关系而玷污自己。无论绵羊羔去边度，佢哋都一直跟住佢。佢哋系喺人类当中买返嚟嘅，系献俾上帝同绵羊羔嘅最早收成*。 5 佢哋从来唔讲大话，亦都毫无瑕疵。

6 我见到另一个天使喺空中*飞翔，要向喺地上居住嘅人，向每个国族、部族、语言同民族嘅人宣扬永恒嘅好消息。 7 佢大声话：“你哋要敬畏上帝，颂扬佢，因为佢审判嘅时刻到嘞。你哋要崇拜创造天、地、海同水泉嘅主。”

8 第二个天使跟住话：“陷落嘞！大巴比伦陷落嘞！佢曾经令所有国族都饮咗佢淫乱*嘅催情酒。”

9 第三个天使跟住佢哋大声话：“边个崇拜野兽同兽像，喺额头或者手上接受记号， 10 边个就要饮上帝嘅愤怒之酒，呢啲冇稀释嘅酒被倒入上帝嘅盛怒之杯。噉样嘅人要喺绵羊羔同圣洁嘅天使眼前，喺硫磺烈火当中受到折磨。 11 折磨佢哋嘅烈火所冒出嘅烟，会永永远远向上升。崇拜野兽同兽像嘅人，同埋所有接受野兽个名作为记号嘅人，会日夜受到折磨*，得唔到安宁。 12 所以，遵守上帝嘅诫命、对耶稣深信不疑*嘅圣民一定要忍耐。”

13 我听到天上发出声音话：“你要噉样写：从今以后，嗰啲已经死去而且同主联合嘅人有福*嘞！神圣力量话，冇错，等佢哋休息*，唔使咁辛苦嘞，佢哋做过嘅事唔会被遗忘*。”

14 我见到一嚿白色嘅云，坐喺云上面嘅好似人子，佢头上戴住金色冠冕，拎住锋利嘅镰刀。

15 有另一个天使由圣殿嘅至圣所出嚟，向坐喺云上面嗰位大声话：“伸出你嘅镰刀收割啦，因为收割嘅时刻到嘞，地上嘅农作物已经完全成熟。” 16 于是坐喺云上面嗰位向住大地挥动镰刀，地上嘅农作物就收割好嘞。

17 又有一个天使由天上圣殿嘅至圣所出嚟，佢都拎住一把锋利嘅镰刀。

18 仲有另一个天使由祭坛嗰度出嚟，佢有权掌管火。佢向嗰位拎住锋利镰刀嘅天使大声话：“伸出你锋利嘅镰刀，收割地上嘅葡萄啦，因为葡萄树果实累累，已经熟嘞。” 19 嗰位天使就向住大地挥动镰刀，收割地上葡萄树嘅果实，然后将葡萄树同果实都揼入上帝愤怒嘅大酒榨里面。 20 马喺城外面踩酒榨，血就由酒榨流出嚟，升到去马嘅辔头咁高，流到1600斯塔迪安*咁远。