加拉太书

2 过咗14年，我再上耶路撒冷，一齐去嘅有巴拿巴。我仲带埋提多去。 2 我系得到启示先至去嘅。我只系向嗰啲深受尊重嘅人说明自己喺列国传讲好消息嘅情况。因为我想确保以前又好，当时又好，我为上帝做嘅嘢都唔系白费心机嘅。 3 虽然同我一齐去嘅提多系希腊人，但系都冇人迫佢接受割礼*。 4 后嚟呢件事成为咗争议，系因为有啲假弟兄潜入会众，混入嚟揾方法损害*我哋因为基督耶稣而享有嘅自由，想完全奴役我哋。 5 我哋一刻都冇向呢啲人妥协让步，等你哋可以继续持守好消息嘅真理。

6 至于嗰啲大家认为好重要嘅人，即系嗰啲深受尊重嘅人，佢哋冇俾咩新嘅指示我。（佢哋以前系点，对我唔重要，因为上帝唔会根据外在条件判断人）。 7 佢哋睇出我受托向冇受割礼嘅人传讲好消息，就好似彼得受托向受过割礼嘅人传讲好消息一样。 8 （因为主唔单止令彼得有能力做使徒，为受过割礼嘅人服务，亦都令我有能力做使徒，为列国嘅人服务。） 9 佢哋知道上帝赐分外恩典俾我之后，被视为会众支柱嘅雅各、矶法*、约翰，就同我仲有巴拿巴握手，表示同意我哋去列国嘅人嗰度传道，而佢哋就去受过割礼嘅人嗰度传道。 10 佢哋净系要求我哋要记得贫穷嘅弟兄姊妹，呢件事我都一直尽力而为。

11 后嚟，矶法*嚟到安提阿。我当面责备*佢，因为佢明显犯咗错*。 12 喺雅各嗰度嚟嘅人到埗之前，矶法经常同外族人*一齐食饭。但系嗰啲人一到，佢就唔再噉样做嘞，反而同外族人分开，因为佢怕咗嗰啲接受割礼嘅人。 13 其他犹太人都跟住佢做咁虚伪嘅事*，结果连巴拿巴都受佢哋影响，一齐噉做。 14 我一见佢哋嘅行为唔符合好消息嘅真理，就当住佢哋所有人嘅面，同矶法讲：“你系犹太人，你自己嘅生活方式都已经唔似犹太人，而系好似外族人噉，而家点解仲要迫外族人遵守犹太人嘅规矩呢？”

15 我哋系血统上嘅犹太人，唔系列国嘅“罪人”。 16 不过我哋知道，人唯独信从耶稣基督，先至可以称为义人*，人称义唔系因为遵守法典，所以我哋信从咗基督耶稣。噉样，我哋称为义人就系由于信从基督，而唔系由于遵守法典，因为冇人能够靠住遵守法典喺上帝面前称为义人。 17 我哋努力靠住基督称为义人*，如果到头嚟都系被视为罪人，噉基督咪即系怂恿人犯罪？肯定冇可能！ 18 如果我建立返自己推翻咗嘅嘢，就证明自己系犯法嘅人嘞。 19 由于法典，我已经死咗，脱离咗法典，等我可以为上帝而活。 20 我已经同基督一齐钉喺木柱上面嘞。而家活着嘅唔再系我，而系喺我里面活着嘅基督。而家我以肉身活着，系按照对上帝嘅仔嘅信心而活。佢爱我，为我牺牲咗自己。 21 我唔会拒绝上帝嘅分外恩典*。如果人要遵守法典先至成为正义嘅人，噉基督嘅死就一啲意义都冇嘞。