彼得前书

5 所以，我请求*你哋当中各位长老（我都系长老，曾经亲眼见证基督受苦，未来都会得享*即将显露出嚟嘅荣耀）： 2 要牧养上帝交俾你哋照顾嘅羊群，负起监督嘅责任*，唔系迫于无奈，而系喺上帝面前乐意服务，唔系因为贪爱利益*，而系因为热诚， 3 亦都唔系对身为上帝产业嘅人作威作福，而系做羊群嘅榜样。 4 当总牧人显现嘅时候，你哋就会获得永远唔会衰残嘅荣耀冠冕。

5 同样，你哋年轻嘅要顺服年长嘅*。其实你哋所有人都要以谦卑嘅态度*彼此相待，因为上帝同高傲嘅人为敌，但系就会赐分外恩典俾谦卑嘅人。

6 所以，你哋要喺大能嘅上帝面前*谦卑。噉样，到咗适当嘅时候，佢就会令你哋得到尊荣*。 7 要将所有忧虑*卸俾上帝，因为佢关心你哋。 8 要清醒守望！因为你哋嘅仇敌魔鬼好似一只咆哮紧嘅狮子，行嚟行去，谂尽方法吞噬人*。 9 要企稳，怀住坚定嘅信心抵抗佢，因为你哋知道，世上嘅整个弟兄团体都经历紧同样嘅苦难。 10 喺你哋受过短暂嘅苦难之后，嗰位赐下一切分外恩典，亦都通过基督呼召你哋去得享永恒荣耀嘅上帝，会亲自完成你哋嘅训练。佢会令你哋坚定，令你哋刚强，令你哋企稳。 11 愿大能永远归于佢。阿们。

12 我嘅弟兄西拉忠信可靠，我请佢帮助我写咗呢封简短嘅信鼓励你哋，亦都向你哋保证，上帝赐俾你哋嘅分外恩典系真实嘅。你哋唔好放弃呢个恩典*。 13 喺巴比伦同你哋一样被上帝拣选嘅姊妹*问候你哋。我嘅仔马可亦都问候你哋。 14 你哋要怀住爱心互相问候*。

愿你哋所有同基督联合嘅人享有安宁*。