希伯来书

12 既然有呢一大班见证人，好似云彩噉围绕住我哋，我哋就应该抛开各种重担，摆脱容易缠住我哋嘅罪，保持忍耐，跑前面嘅赛程， 2 密切注视我哋信心嘅引领者同埋成全者耶稣*。佢因为知道将来会得到喜乐，就喺苦刑柱*上忍耐，唔在乎*所受到嘅羞辱，而家坐喺上帝宝座嘅右边。 3 虽然罪人对佢恶言恶语（其实啲罪人伤害嘅系自己），但系佢仍然保持忍耐。你哋要仔细留意*佢嘅榜样，以免筋疲力竭而最终放弃。

4 你哋同嗰种罪搏斗，仲未抵抗到流血嘅地步。 5 你哋完全忘记咗，上帝曾经好似劝自己嘅仔噉劝你哋，佢话：“仔啊，你唔好轻视耶和华*嘅管教，就算俾佢纠正都唔好放弃； 6 因为耶和华*管教佢所爱嘅人，鞭打*每一个佢所认可嘅仔。”

7 你哋要忍耐，噉就系接受管教*嘞。上帝对待你哋，就好似对待佢嘅仔一样。边有做仔嘅，系爸爸唔会管教嘅呢？ 8 如果你哋唔接受上帝嘅管教，你哋就系私生子，唔系仔嘞。 9 人间嘅爸爸*管教我哋，我哋都会尊敬佢哋，何况系用神圣力量引导我哋生活嘅爸爸呢？要得到生命，我哋唔系应该更加乐意顺服佢咩？ 10 人间嘅爸爸管教我哋一段时间，用嘅系佢哋自己认为适当嘅方式；而上帝管教我哋，系为咗我哋嘅益处，想我哋好似佢一样圣洁。 11 我哋俾人管教嘅时候，当然唔会开心，只会觉得痛苦*。不过之后，喺管教当中受到磨炼嘅人，会结出安宁嘅果实*，就系正义。

12 所以，要令软弱*嘅手变得强壮，令冇力嘅膝头变得有力， 13 不断修直你哋脚下嘅道路，令跛咗嘅脚唔会甩骹，反而得到医治。 14 要努力*同所有人和睦共处，努力过圣洁嘅生活*。如果人唔圣洁，就唔能够见到主。 15 你哋要小心，以免有人得唔到上帝嘅分外恩典；亦都要留意，以免有人好似毒根噉生长，危害你哋，玷污好多人。 16 你哋要小心，以免有人淫乱*，有人唔重视圣物，好似以扫一样。佢为咗换取少少食物，竟然放弃咗自己嘅长子权。 17 你哋都知道，后嚟佢想得到福分，不过就被拒绝。虽然佢流住眼泪求爸爸回心转意，但系都冇用嘞。

18 你哋唔系嚟到嗰座摸得到嘅山。嗰度曾经有烈火、乌云、漆黑、风暴。 19 天上仲传嚟号筒嘅响声同讲说话嘅声音，当时人民听到，就恳求唔好再同佢哋讲说话。 20 人民觉得好惊，因为听到呢个命令：“踏足呢座山嘅，就算系野兽，都要俾石头打死。” 21 当时嘅景象实在太可怕，所以摩西话：“我好惊，惊到一直喺度震。” 22 其实，你哋系嚟到锡安山，真神*嘅城，天上嘅耶路撒冷。你哋系嚟到千千万万天使嘅 23 全体大会当中，嚟到名字记喺天上嘅长子嘅会众里面，嚟到审判众生嘅上帝面前。嗰度有正义嘅人，佢哋喺神圣力量引导下生活，已经达到完美。 24 你哋系嚟到新约嘅中间人耶稣面前，嗰度有佢所洒嘅血，佢嘅血所表达嘅*嘅比亚伯嘅更加好。

25 你哋要小心。嗰位讲紧嘢嘅，你哋唔可以唔听*。以前有人喺地上发出上帝嘅警告，当时嘅人唔肯听，都逃唔过惩罚，更何况我哋呢？而家，如果我哋唔听嗰位喺天上讲说话嘅，就更加逃避唔到惩罚嘞！ 26 当时佢嘅声音震动大地，但系佢而家就承诺话：“再一次，我唔单止要震动地，亦都要震动天。” 27 佢话“再一次”，就表示被震动嘅都会除去，亦即系话，唔系上帝所造嘅都会被消灭，而唔能够被震动嘅就可以存留。 28 既然我哋会得到一个唔能够被震动嘅王国，就应该继续接受分外恩典。噉样，我哋就能够怀住虔诚而敬畏嘅心敬奉上帝，得到佢嘅接纳， 29 我哋嘅上帝系毁灭之火。