哥林多前书

8 关于献过俾偶像嘅食物，我哋系有呢方面嘅知识。不过，知识令人自高自大，只有爱心先能够鼓励人。 2 边个以为自己好了解一啲佢应该知道嘅嘢，其实佢仲未好了解。 3 不过只要一个人爱上帝，上帝就认识佢嘞。

4 至于食唔食献过俾偶像嘅食物，我哋知道偶像唔系真正嘅神，而真神只有一位。 5 虽然天上地上都有所谓嘅“神”，而啲人都认为有好多“神”或者“主”， 6 但系我哋只有一位真神，就系天父。万物都嚟自佢，我哋亦都为咗佢而存在。另外只有一位主，就系耶稣基督，万物都系通过佢而有嘅，我哋都系通过佢而有嘅。

7 不过，唔系人人都明白呢一点。有啲人以前拜偶像，而家仍然认为食呢种食物同拜偶像有关。佢哋嘅良心比较弱*，觉得不安*。 8 其实食物唔能够令我哋同上帝更加亲近。我哋唔食唔会有咩损失，食咗都冇咩益处。 9 不过你哋要时刻留意，唔好因为自己有呢个选择嘅权利就令良心弱啲嘅人跌倒*。 10 虽然你知道拜偶像系冇意义嘅，但系如果俾一个良心弱啲嘅人见到你喺偶像嘅殿宇入面食呢啲食物，噉佢可能会胆大妄为，就去食献俾偶像嘅食物。 11 即使你知道食呢啲食物冇问题，不过噉样做都会破坏呢个良心比较弱嘅人嘅信心。唔好忘记，基督都为呢个弟兄而死。 12 你哋噉样得罪弟兄，伤害佢哋比较弱嘅良心，就系得罪基督。 13 所以，如果食肉会令我嘅弟兄跌倒*，我就永远唔再食肉，以免令我嘅弟兄跌倒。