希伯来书

6 所以，既然我哋学过关于基督嘅基本*教义，就应该迈向成熟嘅阶段，唔应该只系重复学习基本嘅嘢*，例如为死嘅行为*悔改、信从上帝、 2 浸礼、按手礼、死人复活、永远嘅判决一类嘅道理。 3 只要有上帝帮助*，我哋就可以迈向成熟嘅阶段。

4 有啲人曾经接受真理嘅亮光，得到*嚟自天上嘅恩赐*，领受过神圣力量， 5 得到*上帝美善嘅话语，感受过将来制度*嘅福分*。 6 呢啲人既然离弃正道，就冇可能帮到佢哋重新悔改，因为佢哋就好似*将上帝个仔再次钉喺木柱上面噉，公然羞辱佢。 7 呢个就好似一块土地，如果经常吸收雨水，生出嚟嘅植物对耕种嘅人有用，就系得到上帝赐福嘞。 8 不过，如果呢块土地生出嚟嘅系荆棘野草，就会被舍弃，亦都好快会被咀咒，而最终就会被烧毁。

9 亲爱嘅弟兄，虽然我哋噉样讲，不过我哋深信你哋嘅情况好好多，深信你哋为得救而努力紧。 10 上帝系正义嘅*，佢唔会忘记你哋做嘅嘢，仲有你哋为佢嘅名显出嘅爱心，即系你哋以前为圣民服务*，而家仍然继续为佢哋服务。 11 我哋好想你哋人人都继续咁勤力，噉样你哋就会有十足嘅把握，确信自己嘅希望会实现，直到最后。 12 我哋唔想你哋懒惰，而系想你哋效法嗰啲因为有信心同耐心而得到承诺嘅人。

13 当上帝向亚伯拉罕作出承诺嗰阵，由于冇任何一位大过自己，上帝就指住自己发誓， 14 话：“我一定会赐福俾你，一定会令你嘅后代增多。” 15 亚伯拉罕表现耐心，后嚟终于得到呢个承诺。 16 人一定系指住大过自己嘅发誓㗎。誓言系有法律效力嘅保证，可以终止各种争论。 17 同样，上帝为咗向得到承诺嘅人更加清楚噉表明，佢嘅旨意唔会更改，就发誓为证*。 18 呢两样嘢*都唔会更改，因为上帝系冇可能讲大话嘅，所以我哋呢啲走入去庇护所嘅人可以大受鼓励，紧紧持守摆喺我哋前面嘅希望。 19 我哋嘅呢个希望，就好似生命嘅船锚噉，又确定又可靠，而且带领我哋穿越帷幔*入去里面。 20 为咗帮助我哋，耶稣入咗去先*。佢已经好似麦基洗德噉样做大祭司，而且会永远做大祭司。