约翰一书

2 我嘅仔女，我写呢啲说话俾你哋，系唔想你哋一时犯罪。不过，如果有人真系一时犯罪，喺天父嗰度有一位会帮助我哋*，就系正义嘅耶稣基督。 2 佢为我哋嘅罪成为求恩嘅祭牲*，其实唔单止系为咗我哋嘅罪，亦都系为咗世上所有人嘅罪。 3 如果我哋时刻遵守佢*嘅诫命，噉就证明我哋已经认识佢。 4 边个话“我已经认识佢”，但系唔遵守佢嘅诫命，就系讲大话，真理亦都唔喺呢个人心入面。 5 边个遵守佢嘅话语，呢个人心入面就真系对上帝有完美无缺嘅爱嘞。如果我哋都噉做，就表明自己系同佢联合嘅。 6 边个话自己时刻同佢联合，噉基督点样处世为人*，呢个人都应该点样处世为人。

7 亲爱嘅弟兄姊妹，我而家写俾你哋嘅，唔系新诫命，而系旧诫命，系你哋一开始就有㗎嘞。呢条旧诫命就系你哋听过嘅说话。 8 不过，我而家写俾你哋嘅，其实都系新诫命，系基督同你哋都遵守*嘅。而家黑暗消逝紧，真光已经照耀嘞。

9 边个话自己喺亮光之中，但系憎恨自己嘅弟兄*，就仲喺黑暗之中。 10 爱弟兄嘅，就留喺亮光之中，冇嘢会令佢失足跌倒*。 11 憎恨弟兄嘅，就喺黑暗之中，亦都喺黑暗中行走，唔知道自己要去边度，因为黑暗令佢对眼睇唔到嘢。

12 我嘅仔女啊，由于基督嘅名，你哋嘅罪已经得到宽恕，所以我写信俾你哋。 13 各位父老，我写信俾你哋，因为你哋认识最初就存在嘅嗰位。各位年轻人，我写信俾你哋，因为你哋战胜咗撒但*。我嘅仔女啊，我写信俾你哋，因为你哋认识咗天父。 14 各位父老，我写信俾你哋，因为你哋认识最初就存在嘅嗰位。各位年轻人，我写信俾你哋，因为你哋系坚强嘅，上帝嘅话语几时都喺你哋心入面，你哋亦都战胜咗撒但*。

15 唔好爱呢个世界同世界嘅事。边个爱世界，对天父嘅爱就唔喺佢心入面； 16 因为世界嘅一切，例如肉体嘅欲望、眼睛嘅欲望、炫耀财物嘅行为，都唔系源自天父㗎，而系源自世界㗎。 17 呢个世界同世界嘅欲望已经消逝紧，但系遵从上帝旨意嘅人就永远长存。

18 我嘅仔女啊，而家系最后嘅时刻嘞。你哋都听过会有基督嘅敌人出现，其实而家已经有好多基督嘅敌人。呢个证明而家就系最后嘅时刻。 19 佢哋从我哋呢度出去，不过就唔系属于我哋嘅*。佢哋如果系属于我哋嘅，就会留喺我哋当中。不过佢哋离开咗，即系话，唔系所有人都属于我哋。 20 你哋受到嗰位圣者任命*，人人都有知识。 21 我写信俾你哋，唔系因为你哋唔认识真理，而系因为你哋认识，亦都因为冇大话系源于真理㗎。

22 噉讲大话嘅系边个呢？唔系就系否认耶稣系基督嘅嗰个咩？否认天父同上帝个仔嘅，就系基督嘅敌人。 23 边个否认上帝个仔，佢就得唔到天父嘅认可*。边个承认上帝个仔，佢就有天父嘅认可。 24 你哋要将一开始就听到嘅，时刻留喺心入面。你哋一开始就听到嘅，如果时刻留喺心入面，你哋就时刻同上帝个仔联合，亦都同天父联合。 25 上帝*承诺赐俾我哋嘅，就系永远嘅生命。

26 我写呢啲说话俾你哋，系因为有啲人企图误导你哋。 27 上帝用佢嘅神圣力量任命咗*你哋，呢股力量时刻留喺你哋里面，你哋唔需要任何人教导。佢嘅呢股力量系真嘅，唔系假嘅*，教导紧你哋所有嘢。你哋要按照呢股力量嘅教导，时刻同佢联合。 28 我嘅仔女啊，你哋要时刻同佢联合。噉佢返嚟呢度嘅时候*，喺佢显现嗰阵，我哋就可以充满信心*噉发言，唔会因为羞愧而喺佢面前退缩。 29 你哋既然知道佢系正义嘅，就知道所有行事正义嘅，都已经从上帝而生嘞。